འདས་པའི་བདུན་ཕྲག་ལྔའི་ནང་བོད་རིགས་ཨོ་རྩེད་བ་ཆོས་དབྱིངས་སྐྱིད་ལགས་སུ་རྒྱལ་སྤྱིའི་མཆོངས་རྒྱུག་འཕེན་གསུམ་གྱི་སྐྱེད་མའི་འདུར་རྒྱུག་འགྲན་སྡུར་ཁྲོད་ཨང་དང་པོ་གསུམ་ཐོབ་ཡོད་འདུག
ཟླ་འདིའི་ཕྱི་ཚེས་ ༢༩ ཉིན་འཛམ་གླིང་མཆོང་རྒྱུག་འཕེན་གསུམ་མཉམ་འབྲེལ་ལྷན་ཚོགས་ཀྱི་གཞུང་འབྲེལ་དྲ་བའི་ཐོག་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༢༨ ཉིན་སི་པན་གྱི་གྲོང་ཁྱེར་ (La Coruna) དུ་འཛམ་གླིང་མཆོང་རྒྱུག་འཕེན་གསུམ་གྱི་འགྲན་སྡུར་བསྡུས་ཡོད་པ་དང་། འགྲན་སྡུར་དེའི་ནང་འཛམ་གླིང་རྒྱལ་ཁབ་མང་པོ་སི་པན་གྱི་གྲོང་ཁྱེར་ (La Coruna) ས་ཁུལ་དུ་འཛམ་གླིང་མཆོང་རྒྱུག་འཕེན་གསུམ་གྱི་འགྲན་སྡུར་ནང་ཧོང་ཀོང་དང་ཉི་ཧོང་ལ་སོགས་པའི་རྒྱལ་ཁབ་ ༣༠ ཡི་རྩེད་འགྲན་པ་ ༡༦༡ མཉམ་ཞུགས་བྱས་ཡོད་འདུག་ལ། བོད་ཀྱི་ཨོ་རྩེད་བ་ཆོས་དབྱིངས་སྐྱིད་ལགས་ཀྱིས་སྤྱི་ལེ་ ༢༠ ཡི་སྐྱེད་མའི་འདུར་རྒྱུག་ཁྲོད་དུས་ཡུན་ཆུ་ཚོད་གཅིག་དང་སྐར་མ་ ༢༧ དང་སྐར་ཆ་ ༥༠ ཡི་གྲུབ་འབྲས་བླངས་ཏེ་ཨང་དང་པོ་ཐོབ་ཡོད་འདུག
ཟླ་འདིའི་ཕྱི་ཚེས་ ༡༦ ཉིན་ཡུ་རོབ་རྒྱལ་ཁབ་སི་པན་གྱི་རྒྱལ་ས་མན་ཌི་རེ་ཌིར་འཚོགས་པའི་རྒྱལ་སྤྱིའི་རྩེད་འགྲན་ཐོག་ཏུའང་ཆོས་དབྱིངས་སྐྱིད་ལགས་ཀྱིས་ཨང་དང་པོ་བླངས་ཏེ་གསེར་གྱི་རྟགས་མ་བླངས་ཡོད་འདུག ཡང་འདི་ལོའི་ཕྱི་ཟླ་ ༤ ཚེས་ ༢༣ ཉིན་ཡུ་རོབ་རྒྱལ་ཁབ་ (Slovakia) ནང་འཚོགས་པའི་རྒྱལ་སྤྱིའི་གསེར་གྱི་རྟགས་མའི་སྐྱེད་མའི་སྤྱི་ལེ་ ༣༥ ཡི་འདུར་རྒྱུག་ཁྲོད། ཆོས་དབྱིངས་སྐྱིད་ལགས་ཀྱིས་ཡང་ཨང་དང་པོ་བླངས་ཡོད་འདུག་ལ། འདས་པའི་གཟའ་འཁོར་ལྔའི་ནང་ཆོས་དབྱིངས་སྐྱིད་ལགས་ཀྱིས་རྒྱལ་སྤྱིའི་འགྲན་སྡུར་ཁྲོད་ཨང་དང་པོ་ཐེངས་གསུམ་བླངས་ཡོད་འདུག
ཕྱི་ལོ་ ༢༠༡༢ ལོའི་ལོན་ཏོན་ཨོ་རྩེད་འགྲན་ཚོགས་ཀྱི་སྐྱེད་མའི་སྤྱི་ལེ་ ༢༠ ཡི་འདུར་རྒྱུག་འགྲན་སྡུར་ཁྲོད་ཆོས་དབྱིངས་སྐྱིད་ལགས་སུ་ཨང་གསུམ་པ་ཐོབ་ཡོད་པ་རེད། འོན་ཀྱང་། ཕྱི་ལོ་ ༢༠༡༦ ལོར་སྐབས་དེར་ཨང་གཉིས་པ་ཐོབ་མཁན་ཨུ་རུ་སུའི་འགྲན་ཞུགས་པ་ཨོ་གྷ་ཁ་ནི་སི་ཀི་ནཱ་(Olga Kaniskina)ཡིས་སྟོབས་སྐྱེད་སྨན་རྫས་བེད་སྤྱོད་བྱས་པའི་ཉེས་མིང་འོག མོའི་ཨང་གཉིས་པའི་གཟེངས་རྟགས་ཕྱིར་བསྡུས་ཏེ་ཆོས་དབྱིངས་སྐྱིད་ལགས་སུ་སྤྲད། ཡང་ཕྱི་ལོ་ ༢༠༢༢ ཏེ་མི་ལོ་ ༡༠ ཡི་རྗེས་སུ་ཕྱི་ལོ་ ༢༠༡༢ ལོའི་རྩེད་འགྲན་དེར་ཨང་དང་པོ་ལེན་མཁན་ཨུ་རུ་སུའི་འདུར་རྒྱུག་པ་ལཱ་ཤི་མཱ་ནོ་ཝ་ (Yelena Lashmanova) ཡིས་ཀྱང་སྟོབས་སྐྱེད་སྨན་རྫས་བེད་སྤྱོད་བྱས་ཡོད་སྐོར་ར་འཕྲོད་དེ། མི་ལོ་ ༡༠ ཡི་རྗེས་སུ་སྐབས་དེའི་ཨང་དང་པོ་གཟེངས་རྟགས་དེ་ཆོས་དབྱིངས་སྐྱིད་ལགས་སུ་སྤྲད་པ་ཡོངས་བསྒྲགས་བྱས་ཡོད་པ་དང་། སྐབས་དེར་ཆོས་དབྱིངས་སྐྱིད་ལགས་ཀྱིས་དེ་རིང་ང་ལ་དགའ་སྐྱོ་ཟུང་འབྲེལ་གྱི་ཚོར་བ་ཞིག་ཡོང་གི ཨང་དང་པོ་ཐོབ་པར་དགའ་ཡི་འདུག་ཀྱང་། མི་ལོ་ ༡༠ ཡི་ཡར་སྔོན་དུ་ངས་འཛམ་གླིང་མི་མང་གི་མདུན་ནས་གཟེངས་རྟགས་དེ་ལེན་མ་ཐུབ་པར་སྐྱོ་སྣང་སྐྱེ་ཡི་འདུག་ཅེས་བརྗོད་ཡོད་པ་རེད།
བོད་རིགས་ཨོ་རྩེད་བ་ཆོས་དབྱིངས་སྐྱིད་ལགས་ནི། ཕྱི་ལོ་ ༡༩༩༠ ལོར་བོད་མཚོ་སྔོན་ཞིང་ཆེན་མཚོ་བྱང་ཁུལ་མདའ་བཞི་རྫོང་ཝ་མགྱོགས་ཡུལ་ཚོ་ནས་ཡིན་ཞིང་། ཆུང་དུས་ནས་ཡུལ་ཚོའི་སློབ་གྲྭར་ཞུགས་ཡོད་པ་དང་། ཕྱི་ལོ་ ༢༠༡༢ ལོར་ལོན་ཏོན་ཨོ་རྩེད་ཐོག་མཉམ་ཞུགས་བྱས་ཏེ་མཐར་ཨང་དང་པོའི་གསེར་གྱི་རྟགས་མ་ཐོབ་ཡོད་པ་རེད། མོའི་གཟེངས་སུ་ཐོན་པའི་གྲུབ་འབྲས་ཀྱིས་བོད་ཁུལ་གྱི་ན་གཞོན་མང་པོར་ལུས་རྩལ་ཐད་རྨི་ལམ་གསར་པ་ཞིག་བསྐྲུན་ཡོད་པས། ཕྱི་ལོ་ ༢༠༡༣ ནས་བོད་ཁུལ་གྱི་ན་གཞོན་མང་པོ་ཞིག་རྒྱ་ནག་དང་རྒྱལ་སྤྱིའི་རྩེད་འགྲན་སྣ་མང་ནང་ཞུགས་ཏེ་རིམ་པ་མི་འདྲ་བའི་བྱ་དགའ་ཁག་ཐོབ་ཡོད་པ་རེད། དེ་ཡང་བོད་རིགས་ཨོ་རྩལ་རྒྱང་རྒྱུག་པ་སྟོབས་རྒྱལ་ལགས་ལ་ཕྱི་ལོ་ ༢༠༠༨ ལོའི་ཡ་གླིང་ལུས་རྩལ་འགྲན་ཚོགས་ཐོག་སྨི་ཆིག་ཁྲིའི་སྐྱེས་པའི་རྒྱང་རྒྱུག་ཁྲོད་ཨང་དང་པོ་ཐོབ། དེ་བཞིན་ ༢༠༡༡ ལོའི་ཊོར་ཀེ་རྒྱལ་སྤྱིའི་འགྲན་ཚོགས་ཐོག་འཇུ་རེས་ཤེད་རྩལ་འགྲན་སྡུར་ཁྲོད་ཨང་དང་པོ་བླངས་བའི་ཤི་ལོག་སྒྲོལ་མ་ལགས། ཕྱི་ལོ་ ༢༠༡༣ ལོའི་སྐབས་ ༢༡ པའི་ཡ་གླིང་གི་འགྲན་ཚོགས་མཐོར་འཛེག་འགྲན་སྡུར་ཁྲོད་བོད་རིགས་བུ་མོ་རིན་ཆེན་ལྷ་མོ་ལགས་ལ་ཨང་དང་པོ་ཐོབ་ཡོད་པ་རེད། ཁོང་མོ་ནི་བོད་ཀྱི་ལོ་རྒྱུས་ཁྲོད་འཛམ་གླིང་ཨོ་རྩེད་འགྲན་ཚོགས་ཐོག་གཟེངས་རྟགས་ལེན་མཁན་བོད་རིགས་ཐོག་མ་དེ་ཆགས་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
