རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་ ༨ པ་ཟླ་འདིའི་ཕྱི་ཚེས་ ༢༢ ནས་ཉིན་གྲངས་གཉིས་རིང་འཚོག་རྒྱུ་ཡིན་པ་ལྟར་སྲིད་སྐྱོང་མཆོག་ཨ་རིའི་ནང་ཕེབས་ཏེ་ཞོར་དུ་མི་ནི་སོ་ཌ་དང་ཝར་མོན་ཌི་སོགས་སུ་གཟིགས་སྐོར་གནང་བཞིན་འདུག
ཟླ་འདིའི་ཕྱི་ཚེས་ ༡༦ ནས་ཕྱི་ཟླ་ ༧ ཚེས་ ༣ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་ནང་གཞུང་འབྲེལ་གཟིགས་སྐོར་གནང་བཞིན་པ་ལྟར། ཁ་སང་ཕྱི་ཚེས་ ༡༩ ཉིན་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་མངའ་སྡེ་མི་ནི་སོ་ཌའི་གནམ་ཐང་དུ་ཕེབས་འབྱོར་གནང་སྟེ། མི་ནི་སོ་ཌའི་གྲོང་ཁྱེར་ (St. Paul) དུ་ས་གནས་བོད་མིའི་སྤྱི་མཐུན་ཚོགས་པའི་ཚོགས་ཁང་རྙིང་པར་བོད་རིགས་གཞོན་སྐྱེས་ ༥༠ ཙམ་ལ་ཟུར་དུ་མཇལ་འཕྲད་ཀྱིས། ཨ་རིར་བོད་རིགས་ཐོག་མར་བསླེབས་སྟངས་སྐོར་དང་། ༧གོང་ས་མཆོག་བོད་དང་བོད་མི་རིགས་ཀྱི་ཆེད་དུ་བཀའ་དྲིན་ཆེན་པོ་ཡིན་པ། ད་ཆ་ང་ཚོ་མི་མང་ནས་བོད་བསྟན་སྲིད་མི་རིགས་ཀྱི་དོན་དུ་དཀའ་ལས་བརྒྱག་དགོས་པ་དང་། ལྷག་པར་དུ་གཞོན་སྐྱེས་རྣམས་ནས་དྭང་བླངས་བོད་དོན་ཞུ་གཏུག་ལས་འགུལ་ནང་མཉམ་ཞུགས་གནང་དགོས་གལ་དང་། ཕྱི་དྲིལ་ལས་ཁུངས་དང་སྐུ་ཚབ་དོན་ཁང་གི་ལས་དོན་སྐོར། བོད་རྒྱ་གཉིས་ཀྱི་དཀའ་རྙོག་སེལ་ཐབས་དང་འབྲེལ་བའི་གཏན་འཇགས་ཐབས་ཇུས་འཆར་འགོད་ཚོགས་ཆུང་གསར་འཛུགས་གནང་བ་དང་ལས་དོན་འགྲོ་མུས་ཡིན་སྐོར་སོགས་ངོ་སྤྲོད་གསུང་བཤད་གནང་ཡོད་འདུག
ཟླ་འདིའི་ཕྱི་ཚེས་ ༡༧ ཉིན་སྲིད་སྤྱོང་སྤེན་པ་ཚེ་རིང་མཆོག་ཨ་རིའི་གྲོང་ཁྱེར་སན་ཧྥ་རན་སི་ཁོ་(San Francisco)རུ་ཕེབས་འབྱོར་གནང་སྟེ། གནམ་ཐང་དུ་བྱང་ཁ་ལེ་ཧྥོར་ནེ་ཡའི་ (California) བོད་རིགས་ཚོགས་པའི་ཚོགས་གཙོ་དང་རྒྱུན་ལས་རྣམས་ནས་ཕེབས་བསུ་སྣེ་ལེན་ཞུས་ཡོད་པ་དང་། ཚེས་ ༡༨ ཉིན་ (JFK) ཚོགས་ཁང་ནང་ས་གནས་བོད་མི་རྣམས་ལ་གསུང་བཤད་གནང་ཡོད་པ་དང་། སྐབས་དེར་སྲིད་སྐྱོང་མཆོག་ནས་༧གོང་ས་མཆོག་ནི་ང་ཚོ་དང་འཛམ་གླིང་སྤྱི་ལ་བཀའ་དྲིན་ཤིན་ཏུ་ཆེན་པོ་ཡིན་པས་ཚང་མས་ཡིད་འཇགས་དགོས་གལ་དང་། བོད་ཀྱི་སྐད་ཡིག་གལ་ཆེན་ཡིན་སྐོར། དམངས་གཙོའི་ཀ་བ་གསུམ་གྱི་འགན་དབང་ཆ་བགོས་ཀྱིས་ལྗིད་སྙོམས་སྟངས་འཛིན་མིང་དོན་མཚུངས་པ་ཞིག་ཡོང་རྒྱུ་ནི་གལ་ཆེན་ཡིན་སྐོར་སོགས་གསུངས་ཡོད་འདུག
ད་དུང་སྲིད་སྐྱོང་མཆོག་གིས། རང་རིགས་ཆོལ་གསུམ་མི་མང་ནང་ཁུལ་འཆམ་མཐུན་བྱ་རྒྱུ་ནི་གལ་ཆེན་ཡིན་སྐོར་དང་། བོད་རྒྱ་གཉིས་ཀྱི་དཀའ་རྙོག་སེལ་ཐབས་དང་འབྲེལ་བའི་གཏན་འཇགས་ཐབས་ཇུས་འཆར་འགོད་ཚོགས་ཆུང་གསར་འཛུགས་གནང་བ་དང་ལས་དོན་འགྲོ་མུས་སྐོར། སྐབས་བཅུ་དྲུག་པའི་བཀའ་ཤག་གི་ལས་གཞི་དྭང་བླངས་བོད་དོན་ཞུ་གཏུག་ལས་འགུལ་དང་། རིང་མིན་མི་འབོར་གྲངས་བཤེར་བྱ་རྒྱུ། མང་ཚོགས་ནས་བོད་ཀྱི་ལོ་རྒྱུས་ཤེས་དགོས་རྒྱུ་གལ་ཆེན་ཡིན་ལུགས་སྐོར་སོགས་གསུངས་ཡོད་འདུག
ཡང་ཉིན་དེའི་ཉིན་རྒྱབ་ཏུ་སྲིད་སྐྱོང་མཆོག་གིས་སན་ཧྥ་རན་སི་ཁོ་(San Francisco) ལ་རྟེན་གཞི་བྱས་ཡོད་པའི་ཨེ་ཝཾ་ཆོས་ལྡན་ཆོས་ཚོགས་དང་། སེར་བྱེས་དགེ་རྩ་ཚོགས་པ། རྒྱལ་གཤེན་ཞང་བོད་སློབ་གཉེར་ཁང་། བཀའ་བརྒྱུད་འགྲོ་དོན་ཀུན་ཁྱབ་ཆོས་ཚོགས། གནས་ཆུང་ཆོས་ཚོགས། རྒྱུད་སྟོད་དགེ་རྩ་ཚོགས་པ། རྙིང་མ་ཆོས་ཚོགས། ཇོ་ནང་བཅས་ཀྱི་མགོ་འཛིན་དང་སྐུ་ཚབ་ལྷན་དུ་ཚོགས་མོལ་གནང་ཞིང་། བཙན་བྱོལ་ནང་ཡོད་པའི་དགོན་སྡེ་ཁང་གི་གནས་སྟངས་སྐོར་སྙིང་བསྡུས་ཤིག་འགྲེལ་བརྗོད་གནང་བ་དང་། རང་རེའི་སྤྱི་ཚོགས་རང་ཁ་རང་གསོ་ཡོང་རྒྱུ་གལ་ཆེན་ཡིན་སྐོར། ཆོས་ཚོགས་ཁང་ནས་རྒྱ་གར་དུ་རྒས་གསོ་ཁང་ལྟ་བུར་མཐུན་རྐྱེན་སྦྱོར་སྤྲོད་གནང་རྒྱུའི་རེ་སྐུལ་གནང་། དེ་བཞིན་བོད་མིའི་སྒྲིག་འཛུགས་ནས་ཀྱང་མཐུན་འགྱུར་རམ་འདེགས་གང་ཐུབ་ཞུ་རྒྱུ་ཡིན་སྐོར་གསུངས་ཡོད་འདུག
ཟླ་འདིའི་ཕྱི་ཚེས་ ༢༢ དང་ ༢༣ ཉིན་གཉིས་རིང་ཨ་རིའི་རྒྱལ་ས་ཝ་ཤིང་ཊོན་དུ་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པ་འཚོག་རྒྱུ་ཡིན་པ་ལྟར། སྲིད་སྐྱོང་མཆོག་ཚོགས་ཆེན་ཐོག་ཕེབས་རྒྱུ་ཡིན་ལ། ཞོར་དུ་གྲོང་ཁྱེར་སན་ཧྥ་རན་སི་ཁོ་དང་མི་ནི་སོ་ཊ། ཝར་མོན་ཌི་(Vermont)། བྷོ་སི་ཊོན་(Boston)བཅས་སུ་ཕེབས་ཀྱི་ཡོད་པ་དང་། ས་གནས་དེ་དག་གི་བོད་རིགས་རྣམས་ལ་ཐུག་འཕྲད་དང་ས་གནས་ཆོས་ཚོགས་ཁག་གི་སྐུ་ཚབ་རྣམ་པར་མཇལ་མོལ་སོགས་གནང་ཡོད་འདུག
གསར་འགོད་པ་བསྟན་འཛིན་ཕུར་བུས་བོད་མིའི་སྒྲིག་འཛུགས་ཀྱི་དྲ་རྒྱ་ལས་བཏུས།
