འབྲུག་ཡུལ་དུ་ཕྱི་ནང་གི་བཙུན་མ་ ༡༤༤ ལ་བོད་བརྒྱུད་ནང་བསྟན་གྱི་དགེ་སློང་མའི་སྡོམ་པ་འབོག་ཆོག་གནང་།

ཁ་སང་ཕྱི་ཚེས་ ༢༡ ཉིན་འབྲུག་གི་སྤ་གྲོར་ཆགས་པའི་ར་མོ་ཐང་ཀ་དགོན་པར་ཡུལ་དེའི་དབུ་བླ་རྗེ་མཁན་པོ་མཆོག་གིས་འབྲུག་པ་དང་ཕྱི་རྒྱལ་ཡུལ་གྲུ་ཁག་ནས་ཡིན་པའི་བཙུན་མ་ ༡༤༤ ལ་དངོས་སུ་བོད་བརྒྱུད་ནང་བསྟན་གྱི་དགེ་སློང་མའི་སྡོམ་པ་གནང་ཡོད་པའི་གནས་ཚུལ་སྤེལ་རྗེས་དགེ་སློང་མའི་སྡོམ་ཁྲིམས་སྐོར་ལ་བསམ་ཚུལ་མི་མཐུན་པ་མང་པོ་ཡོང་བཞིན་འདུག

དགེ་སློང་མའི་སྡོམ་པ་འབོག་ཆོག་གི་མཛད་སྒོ། འབྲུག་གཞུང་གྲྭ་ཚང་གི་པར།

དེ་ཡང་འབྲུག་གི་དགོན་སྡེ་ཁག་གི་ཆེས་མཐོའི་ལས་ཁུངས་གཞུང་གྲྭ་ཚང་ཞེས་པའི་ངོ་དེབ་སྟེང་དགེ་སློང་མའི་སྡོམ་པ་འབོག་ཆོག་གི་མཛད་སྒོའི་པར་རིས་དང་གནས་ཚུལ་འཁོད་ཡོད་ཅིང་། མཛད་སྒོར་འབྲུག་རྒྱལ་ཁབ་ཀྱི་རྒྱལ་ཡུམ་ཨ་ཞེ་ཚེ་རིང་དབྱངས་སྒྲོན་དབང་ཕྱུག་ལགས་དང་། ཚོགས་ཀྱི་སློབ་དཔོན་བཅས་ཀྱང་ལྷན་འཛོམས་གནང་ཡོད་སྐོར་འཁོད་འདུག སྤྱིར་ཉེ་ཆར་འབྲུག་ཨ་ཎེ་གཞི་ཚོགས་ཞེས་པའི་ཚོགས་པ་དེས་ཡོངས་ཁྱབ་གསལ་བསྒྲགས་ཤིག་སྤེལ་བའི་ནང་། སྐྱབས་རྗེ་རྗེ་རིན་པོ་ཆེ་མཆོག་གིས་བསྟན་པའི་མེ་རོ་སླར་གསོ་བའི་ཆེད་དུ་ཐུགས་དགོངས་བླ་ན་མ་མཆིས་པ་ཞིག་བཞེས་ཏེ་ཟླ་འདིའི་ཕྱི་ཚེས་ ༢༡ ཉིན་དགེ་སློང་མའི་སྡོམ་པ་གནང་གཏན་ཁེལ་སོང་བས། དགེ་སློང་མའི་སྡོམ་པ་ཞུ་འདོད་ཡོད་པ་རྣམས་ཀྱིས་ཚོགས་པ་དེར་འབྲེལ་གཏུག་བྱ་དགོས་སྐོར་འཁོད་ཡོད་འདུག

ཆོས་དོན་གསར་འགྱུར་ (Religion News Service) ཟེར་བའི་དྲ་རྒྱའི་ཐོག་དེའི་སྐོར་གནས་ཚུལ་འཁོད་པའི་ནང་། ད་ལན་དགེ་སློང་མའི་སྡོམ་པ་ཞུ་མཁན་ཁོངས་སུ་ཡོད་པའི་འཇར་མན་གྱི་བུད་མེད་བྱམས་པ་ཚེ་སྒྲོན་ཞེས་པ་ཞིག་གིས། དེ་རིང་དགེ་སློང་མའི་སྡོམ་པ་འབོག་ཆོག་གི་མཛད་སྒོ་དེ་ནི་ནང་བསྟན་ཆོས་ལུགས་ནང་ཞུགས་པའི་བུད་མེད་ཚོར་མཚོན་ན། ལོ་རྒྱུས་རང་བཞིན་གྱི་གལ་གནད་ཆེ་བའི་གནད་དོན་ཞིག་ཡིན་པ་མ་ཟད། བོད་བརྒྱུད་ནང་བསྟན་དེ་དུས་རབས་ཉེར་གཅིག་ནང་འཁྲིད་ཐུབ་ཡོད། ཅེས་དང་། དགེ་སློང་མའི་སྡོམ་པ་ཐོབ་པའི་བཙུན་མ་རྣམས་ལ་མཚོན་ན་དེ་ནི་ནང་བསྟན་ལ་སྲི་ཞུ་སྒྲུབ་རྒྱུའི་གོ་སྐབས་ཆེན་པོ་ཞིག་བྱུང་ཡོད་སྐོར་བརྗོད་འདུག་ལ། ཡང་ (Damcho Diana Finnegan) ཟེར་བའི་ཨ་རིའི་ནང་པའི་བཙུན་མ་ཞིག་གིས། དགེ་སློང་མའི་སྡོམ་པ་འབོག་ཆོག་གི་མཛད་སྒོ་དེ་ནི་བོད་བརྒྱུད་ནང་བསྟན་ཁྲོད་ཀྱི་ཕོ་མོ་འདྲ་མཉམ་མིན་པའི་གནད་དོན་མེད་པར་བཟོ་བའི་གོམ་པ་རླབས་ཆེན་ཞིག་ཡིན་སྐོར་བརྗོད་འདུག སྤྱིར་འདས་པའི་ལོ་ངོ་མང་པོའི་རིང་བོད་བརྒྱུད་ནང་བསྟན་གྱི་གཞི་ཐམས་ཅད་ཡོད་པར་སྨྲ་བའི་ལུགས་ཀྱི་དགེ་སློང་མའི་སྡོམ་པ་སླར་གསོ་ཐད་ལ་སྤྱི་ཚོགས་ཁྲོད་བསམ་ཚུལ་མི་མཐུན་པ་མང་པོ་བྱུང་ཡོད་ཅིང་། ལྷག་པར་དུ་འབྲུག་ཨ་ཎེ་གཞི་ཚོགས་ཞེས་པ་དེས་སྤེལ་བའི་གསལ་བསྒྲགས་དེའི་རྗེས་སུ་འདུལ་བར་ཆ་རྒྱུས་ཡོད་པ་རྣམས་ཀྱིས་དེར་དགག་བྱའི་ཚུལ་དུ་རྩོམ་ཡིག་སྤེལ་བཞིན་ཡོད་འདུག

ཕྱི་ལོ་ ༢༠༡༢ ལོར་ས་རཱ་མཐོ་སློབ་ཏུ་ཚོགས་པའི་ཆོས་བརྒྱུད་ཁག་གི་མཁས་པའི་ཞིབ་འཇུགས་ཚོགས་ཆུང་དབུ་འཛུགས་ཀྱི་མཛད་སྒོ། བོད་མིའི་སྒྲིག་འཛུགས་ཀྱི་པར།

འདས་པའི་ལོ་ངོ་བཅུ་ཕྲག་དུ་མའི་རིང་༧གོང་ས་རྒྱལ་བ་རིན་པོ་ཆེ་མཆོག་གིས་སིངྒ་ལ་དང་རྒྱ་ནག ཝི་ཐི་ནམ། ཀོ་རི་ཡ་སོགས་ཀྱི་ནང་བསྟན་བརྒྱུད་པ་ཁག་ལ་དགེ་སློང་མའི་སྡོམ་རྒྱུན་ཡོད་པ་ལྟར། བོད་ཀྱི་གཞི་ཐམས་ཅད་ཡོད་པར་སྨྲ་བའི་རྒྱུད་ནང་དུའང་དགེ་སློང་མའི་སྡོམ་པ་བསྐྱར་གསོ་ཐུབ་ཐབས་ཡོད་མེད་ཐད་ལ་ཉམས་ཞིབ་སོགས་ཕྱག་བཞེས་མང་པོ་བསྐྱངས་ཡོད་ཅིང་། དགེ་སློང་མའི་སྡོམ་རྒྱུན་དེ་ཉིད་འདུལ་བའི་ཁྲིམས་ལྟར་བསྐྱར་གསོ་གནང་དགོས་པའི་བཀའ་སློབ་རིམ་པར་ཕེབས་ཡོད་པ་བཞིན། ཕྱི་ལོ་ ༢༠༡༢ ལོར་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་ཆོས་ཚོགས་སྐབས་ ༡༡ པའི་ཐོག་བཞག་པའི་གྲོས་ཆོད་དོན་ཚན་༧ པའི་དགོངས་དོན་ལྟར། བོད་བརྒྱུད་ནང་བསྟན་ལྟར་དགེ་སློང་མའི་སྡོམ་རྒྱུན་སླར་གསོ་གནང་ཐབས་ཡོད་མེད་ཐད་ཞིབ་འཇུག་གནང་ཆེད་ཆོས་བརྒྱུད་ཁག་གི་སྐུ་ཚབ་བརྒྱད་དང་བཙུན་མའི་སྐུ་ཚབ་གཉིས་བཅས་ཀྱིས་དུས་ཡུན་ཟླ་བཞིའི་རིང་ཉམས་ཞིབ་གནང་རྒྱུ་ཡིན་པའི་གནས་ཚུལ་ཐོན་ཡོད་ཀྱང་། ཞིབ་འཇུག་ཚོགས་ཆུང་ནས་གྲུབ་དོན་ཅི་བྱུང་བོད་མིའི་སྒྲིག་འཛུགས་ཆོས་རིག་ལས་ཁུངས་ལའང་བཀའ་འདྲི་ཞུས་ཀྱང་གསལ་པོ་ཤེས་རྟོགས་ཐུབ་མ་སོང་།

དེ་ཡང་ཕྱི་ལོ་ ༢༠༠༧ ལོའི་ཟླ་ ༧ ཚེས་ ༡༨ ནས་ ༢༠ བར་འཇར་མ་ནིའི་ཧམ་བྷག་གཙུག་ལག་སློབ་གྲྭ་ཆེན་མོར་བསྐོང་འཚོག་བྱས་པའི་དགེ་སློང་མ་དང་འདུལ་བ། སྡོམ་རྒྱུན་བཅས་དང་འབྲེལ་བའི་ནང་པའི་བུད་མེད་ཚོའི་འགན་འཁྲི་དང་བྱེད་སྒོའི་སྐོར་གྱི་རྒྱལ་སྤྱིའི་ཚོགས་ཆེན་ཐོག ༧གོང་ས་མཆོག་གིས། དེ་རིང་ཁ་སང་ནང་པའི་རྒྱལ་ཁབ་ཕལ་ཆེ་བའི་ནང་དགེ་སློང་གི་སྡོམ་པ་ཡོད་ནའང་། དགེ་སློང་མའི་སྡོམ་རྒྱུན་རྒྱལ་ཁབ་ཁ་ཤས་ནང་མ་གཏོགས་མེད། རྒྱུ་མཚན་དེ་ལ་བརྟེན་ནས་བོད་བརྒྱུད་ནང་བསྟན་ནང་དགེ་སློང་དང་། དགེ་སློང་མ། དགེ་བསྙེན་ཕ་དང་མ་བཅས་ཐུབ་པའི་འཁོར་རྣམ་དག་བཞི་ཆ་ཚང་གི་མེད། གལ་ཏེ་བོད་བརྒྱུད་ནང་བསྟན་ནང་དགེ་སློང་མའི་སྡོམ་པ་གསར་གཏོད་བྱ་ཐུབ་པ་ཡིན་ན་ཐུབ་པའི་འཁོར་རྣམ་དག་བཞི་ཆ་ཚང་བ་ཡོང་བར་ཧ་ཅང་ཡག་པོ་ཡོང་རྒྱུ་རེད། ཅེས་དང་། དེང་དུས་འཛམ་གླིང་ནང་བུད་མེད་ཀྱིས་འཛིན་སྐྱོང་དང་། ཚན་རིག། གསོ་རིག། ཁྲིམས་ལུགས། སྒྱུ་རྩལ། སྒྱུ་རྩལ་རིག་གནས། སློབ་གསོ། ཚོས་ལུགས་སོགས་ལས་རིགས་ཚང་མའི་ནང་ཆ་ཤས་ཤུགས་ཆེན་པོ་ལེན་གྱི་ཡོད་པ་མ་ཟད། ད་དུང་བུད་མེད་ཚོས་ཆོས་ཕྱོགས་ཀྱི་འཚོ་བའི་ནང་ཡོངས་སུ་ཞུགས་པ་དང་། ཆོས་ཀྱི་སློབ་གཉེར་དང་སྦྱོར་བརྡར་ཐོབ་པ་བྱས་ནས་གཞན་གྱིས་མིག་དཔེ་བལྟ་ས་ལྟ་བུ་བྱས་ཏེ་འགྲོ་བ་མིའི་སྤྱི་ཚོགས་ཀྱི་གོང་འཕེལ་ལ་ཕྱོགས་ཡོངས་ནས་ཞབས་འདེགས་ཞུ་བའི་འདོད་པ་ཤུགས་ཆེན་པོ་ཡོད་པ་རེད། དེ་དང་མཐུན་པར་བཙུན་མ་ཚོ་དང་། འཛམ་གླིང་ཕྱོགས་མཐའ་གང་སའི་བོད་བརྒྱུད་ནང་བསྟན་གྱིི་རྗེས་འཇུག་པ་ཚོས་བཙུན་མར་སྡོམ་པ་ཆ་ཚང་ལེན་རྒྱུ་ཡོད་པ་ཞིག་ཡོང་བར་སེམས་འཁུར་ཧ་ཅང་ཆེན་པོ་བྱེད་ཀྱི་ཡོད། ཅེས་གསུངས་འདུག

The First International Congress on Buddhist Women’s Role in the Sangha in Hamburg, Germany, July 18–20, 2007

ཡང་མགོན་པོ་མཆོག་གིས། དེ་ཡང་ཐུབ་པའི་བཀའ་ཆོས་ཀྱི་མཐར་ཐུག་བསྒྲུབ་བྱ་གང་ཡིན་པ་བུད་མེད་ཚོས་སྒྲུབ་ཐུབ་ཀྱི་ཡོད་པར་བརྟེན། དེང་དུས་ཀྱི་མངོན་འདོད་དང་མཐུན་པའི་སྒོ་ནས་བུད་མེད་ཚོས་བསྒྲུབ་བ་དེ་སྒྲུབ་པར་བྱེད་པའི་ལམ་དང་གོ་སྐབས་ཆ་ཚང་ཐོབ་པ་ཞིག་དགོས་ཀྱི་ཡོད། བསྒྲུབ་བྱ་དེ་ལེགས་སོན་ཡོང་བར་བྱེད་པའི་ཐབས་དང་གོ་སྐབས་ཡག་ཤོས་ནི་དགེ་སློང་མའི་སྡོམ་པ་ཆ་ཚང་ཐོབ་པ་བྱས་ནས་དགེ་སློང་མའི་སྡེ་ཡི་འཚོ་བའི་ནང་ཡོངས་སུ་བཞུགས་པ་དང་ཉམས་ལེན་གྱི་སྲོལ་སྐྱོང་རྒྱུ་དེ་རེད། ཅེས་དང་། བོད་བརྒྱུད་ནང་བསྟན་གྱི་འདུལ་བའི་མཁས་པ་དང་དགེ་འདུན་གྱི་སྡེ། དེ་བཞིན་རྒྱལ་སྤྱིའི་ཐོག་གི་ནང་པའི་ལུགས་གཞན་པ་བཅས་དང་གོ་བསྡུར་དང་། བོད་རིགས་ནང་པའི་སྡེ་ཁག་གི་རྒྱབ་སྐྱོར་ཡོད་པའི་ཐོག་ཕྱི་ལོ་ ༡༩༦༠ རེ་གྲངས་ནས་ངོས་ཀྱིས་བོད་བརྒྱུད་ནང་བསྟན་ནང་དགེ་སློང་མའི་སྡེ་རྩ་འཛུགས་ཡོང་བར་རྒྱབ་སྐྱོར་མཐའ་གཅིག་ཏུ་ཞུ་གི་ཡོད། ཅེས་གསུངས་འདུག་ལ། བོད་བརྒྱུད་ནང་བསྟན་ནང་དགེ་སློང་མའི་སྡོམ་ཁྲིམས་གསར་འཛུགས་བྱེད་ཕྱོགས་ཐད། འདུལ་བའི་ནང་གཏན་འབེབ་བྱས་པའི་སྒྲོམ་གཞིའི་ནང་དུ་ང་ཚོ་གནས་དགོས་ཀྱི་ཡོད། དེ་མིན་ན། ང་ཚོས་དགེ་སློང་མའི་སྡོམ་ཁྲིམས་བོད་བརྒྱུད་ནང་བསྟན་ནང་སྔ་ས་ནས་སྲོལ་གཏོད་བྱས་ཟིན་ངེས་རེད། ཅེས་གསུངས་འདུག

ད་ལྟའི་ཆར་འཛམ་གླིང་འདིར་གནས་བསྟན་སྨྲ་བ་དང་། ཆོས་སྲུང་སྡེ་པ། གཞི་ཐམས་ཅད་ཡོད་པར་སྨྲ་བའི་སྡེ་པ་བཅས་ལས་ཆོས་སྲུང་སྡེ་པ་ཁོ་ནར་དགེ་སློང་མའི་རྒྱུད་པ་ཉམས་པ་མེད་པར་གནས་ཡོད་ཀྱང་། བོད་བརྒྱུད་ནང་བསྟན་གྱི་གཞི་ཐམས་ཅད་ཡོད་པར་སྨྲ་བའི་སྡེ་པའི་ནང་དགེ་སློང་མའི་སྡོམ་པ་བྱུང་ཡོད་མེད་སོགས་ཁ་གསལ་མེད་ནའང་། ནང་ཆོས་སློབ་གཉེར་(study buddhism)ཞེས་པའི་ནང་བསྟན་སྐོར་གྱི་དྲ་རྒྱའི་ནང་། བོད་ནང་དུས་སྐབས་གསུམ་གྱི་རིང་གཞི་ཐམས་ཅད་ཡོད་པར་སྨྲ་བའི་ལུགས་ཀྱི་དགེ་སློང་གི་སྡོམ་རྒྱུན་ལུ་གུ་རྒྱུད་དུ་སླར་གསོ་མཛད་ཡོད་ནའང་། གཞི་སྨྲའི་ལུགས་ཀྱི་དགེ་སློང་མའི་སྡེ་པ་རྩ་འཛུགས་བརྟན་པོ་ནམ་ཡང་ཚུགས་ཐུབ་མེད་ཅེས་འཁོད་ཡོད་པ་རེད། ད་དུང་ཕྱི་ལོ་ ༧༧༥ ལོར་རྒྱ་གར་གྱི་མཁན་ཆེན་ཞི་བ་འཚོ་གཙོས་པའི་དགེ་འདུན་ཞལ་གྲངས་ ༣༠ བོད་དུ་ཕེབས་ནས་བསམ་ཡས་དགོན་པ་ཕྱག་བཏབ་པ་མ་ཟད་བོད་ནང་གཞི་སྨྲའི་ལུགས་ཀྱི་དགེ་སློང་གི་སྡོམ་རྒྱུན་ཐེངས་དང་པོ་དེ་གསར་འཛུགས་མཛད་ཡོད། སྐབས་དེར་རྒྱ་གར་ནས་གཞི་སྨྲའི་ལུགས་ཀྱི་དགེ་སློང་མ་བཅུ་གཉིས་ཕེབས་མེད་དང་། ཕྱོགས་གཞན་ནས་བོད་ཀྱི་བུད་མེད་རྣམས་རྒྱ་གར་དུ་དགེ་སློང་མའི་སྡོམ་པ་ལེན་པ་བསྐྱོད་མེད་པའི་རྒྱུ་མཚན་སོགས་ཀྱིས། བོད་ནང་སྐབས་དེ་དུས་གཞི་སྨྲའི་ལུགས་ཀྱི་དགེ་སློང་མའི་སྡོམ་རྒྱུན་རྩ་འཛུགས་བྱེད་ཐུབ་མེད། ཅེས་འཁོད་འདུག

ཡང་དྲ་རྒྱ་དེའི་ནང་བོད་ཀྱི་དགེ་སློང་མའི་སྡོམ་རྒྱུན་སྐོར་ནས་ཏུང་ཧོང་ཡིག་ཆ་ལྟར་ན། ཆོས་རྒྱལ་ཁྲི་སྲོང་ལྡེ་བཙན་གྱི་དུས་སུ། བཙུན་མོ་གཉིས་པ་འབྲོ་བཟའ་བྱང་སྒྲོན་དང་བུད་མེད་གཞན་སུམ་ཅུ་ལྷག་ལ་བསམ་ཡས་དགོན་པར་དགེ་སློང་མའི་སྡོམ་པ་འབོགས་ཡོད་པ་དང་། སྡོམ་པ་འབོག་མཁན་དེ་རྒྱ་ནག་ནས་གདན་དྲངས་པའི་དགེ་སློང་ཕ་རྣམས་ཡིན་ཞིང་། དུས་སྐབས་དེར་རྒྱ་ནག་གི་ཐང་རྒྱལ་རབས་ཀྱི་གོང་མ་ཀྲོང་ཛོང་གིས་ཕྱི་ལོ་ ༧༠༩ ལོར་རྒྱ་ནག་ནང་ཆོས་སྲུང་སྡེ་པའི་སྡོམ་རྒྱུན་མ་གཏོགས་ལག་བསྟར་མི་ཆོག་པའི་བཀའ་རྒྱ་བསྒྲགས་པར་བརྟེན། བོད་ནང་གི་དགེ་སློང་མའི་སྡོམ་པ་འབོག་འཇོག་དེ་ཆོས་སྲུང་སྡེ་པའི་རྒྱུད་པ་ཡིན་སྐོར་དང་། ཡང་ཕྱི་ལོ་ ༨༡༥ ནས་ ༨༣༦ བར་ཆོས་རྒྱལ་ཁྲི་རལ་པ་ཅན་གྱིས་བོད་གཞི་སྨྲའི་གཞུང་ལུགས་མ་གཏོགས་ཐེག་དམན་གྱི་གཞུང་བསྒྱུར་མི་ཆོག་པའི་བཀའ་བསྒྲགས་པ་དང་། དུས་རབས་ ༩ པའི་མཇུག་དང་ ༡༠ པའི་འགོར་རྒྱལ་པོ་འུ་དུམ་བཙན་གྱིས་བསྟན་པ་སྣུབ་པའི་སྐབས། བླ་ཆེན་དགོངས་པ་རབ་གསལ་ནས་སྨད་འདུལ་དང་། ལྷ་བླ་མ་ཡེ་ཤེས་འོད་ནས་སྟོད་འདུལ་ཞེས་འདུལ་སླར་གསོ་དང་། ཡང་ཕྱི་ལོ་ ༡༢༠༤ ལོར་རྒྱ་གར་གྱི་དཔལ་ནཱལནྜའི་མཁན་པོ་མཐའ་མ་སློབ་དཔོན་ཤཱ་ཀྱའི་དཔལ་བཟང་བོད་ལ་ཕེབས་ཏེ་གཞི་སྨྲའི་ལུགས་ཀྱི་དགེ་སློང་གི་སྡོམ་པ་མནོས་ཡོད་སྐོར་འཁོད་འདུག