རྒྱ་གར་དུ་སྤྲེའུའི་འབྲུམ་ནད་འགོས་མཁན་ཇེ་མང་དུ་འགྲོ་ཡི་ཡོད་འདུག

ད་ལྟའི་ཆར་འཛམ་གླིང་རྒྱལ་ཁབ་མང་པོའི་ནང་སྤྲེའུའི་འབྲུམ་ནད་འགོས་ཁྱབ་ཏུ་འགྲོ་ཡི་ཡོད་པ་དང་རྒྱ་གར་ནང་དུའང་འབྲུམ་ནད་དེ་ཕོག་མཁན་ཇེ་མང་དུ་འགྲོ་ཡི་ཡོད་ཀྱང་རྒྱལ་སྤྱིའི་ནང་འདས་གྲོངས་སུ་གྱུར་བ་ཧ་ཅང་ཉུང་ཉུང་རེད་འདུག

Health workers screen passengers arriving from abroad for Monkeypox symptoms at Anna International Airport terminal in Chennai. (Photo: AFP)

ཉེ་ལམ་ནས་སྤྲེའུའི་འབྲུམ་ནད་(Monkeypox)ཅེས་པ་དེ་འཛམ་གླིང་རྒྱལ་ཁབ་མང་པོའི་ནང་མགྱོགས་མྱུར་ངང་ཁྱབ་མུས་ཡིན་པ་ལྟར། ད་ལྟ་བར་དུ་འཛམ་གླིང་རྒྱལ་ཁབ་ ༧༥ ལྷག་ནང་མི་གྲངས་ ༡༦༠༠༠ ལྷག་ལ་འབྲུམ་ནད་དེ་འགོས་ཡོད་པ་དང་། རྒྱ་གར་གྱི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། དེ་རིང་བསྐྱར་དུ་རང་ལོ་ ༣༠ ལྷག་ཡིན་པའི་རྒྱ་གར་གྱི་སྐྱེས་པ་ཞིག་ལ་སྤྲེའུའི་འབྲུམ་ནད་འགོས་པའི་གནས་ཚུལ་ཐོན་ཡོད་སྟབས། ད་ལྟ་རྒྱལ་ས་ལྡི་ལིའི་(LNJP)སྨན་ཁང་དུ་ཟུར་བཀག་ལ་བསྡད་དེ་སྨན་བཅོས་བྱེད་བཞིན་ཡོད་འདུག་ལ། ཁོང་ནི་རྒྱ་གར་ནང་སྤྲེའུའི་འབྲུམ་ནད་འགོས་མཁན་གྱི་ནད་པ་ལྔ་པ་དེ་ཡིན་འདུག

ཟླ་འདིའི་ཕྱི་ཚེས་ ༡༤ ཉིན་རྒྱ་གར་གྱི་ཀེ་ར་ལ་( Kerala )མངའ་སྡེ་ནས་སྤྲེའུའི་འབྲུམ་ནད་འགོས་པའི་ནད་པ་དང་པོ་དེ་ཐོན་ཡོད་པ་དང་། རང་ལོ་ ༣༥ ཙམ་ཡིན་པའི་སྐྱེས་པ་དེ་ནི་ཉེ་སྔོན་ཨེ་ཤ་ཡའི་དཀྱིལ་ཤར་རྒྱལ་ཁབ་ཅིག་ནས་ཡོང་བ་ཡིན་འདུག ད་ལྟའི་བར་དུ་རྒྱ་གར་ལྷོ་ཕྱོགས་ཀེ་ར་ལ་ ( Kerala ) མངའ་སྡེ་ནས་སྤྲེའུའི་འབྲུམ་ནད་འགོས་མཁན་ ༣ དང་། ལྡི་ལི་ཁུལ་ནས་མི་ ༢ བྱུང་ཡོད་པ་མ་ཟད། ལྡི་ལི་ནས་ཡིན་པའི་རང་ལོ་ ༣༤ ཅན་གྱི་ནད་པ་དེ་ཉེ་སྔོན་ཧི་མ་ཅལ་མངའ་སྡེའི་མ་ན་ལི་སོགས་སུའང་འགྲུལ་བཞུད་བྱས་ཡོད་འདུག

རྒྱ་གར་ནང་དུའང་འབྲུམ་ནད་དེ་འགོས་མཁན་ཇེ་མང་དུ་འགྲོ་མུས་ཡིན་པར་བརྟེན། འཕྲོད་བསྟེན་ཆེད་མཁས་པ་ཚོས་རྒྱ་གར་རྒྱལ་ཡོངས་སུ་འབྲུམ་ནད་དེ་ཁྱབ་གདལ་དུ་མི་འགྲོ་བའི་ཆེད་སྔོན་འགོག་དང་དོགས་ཟོན་ནན་པོ་དགོས་པའི་འབོད་སྐུལ་བྱེད་མུས་ཡིན་ཡང་། རྒྱ་གར་འཕྲོད་བསྟེན་ལས་ཁུངས་ཀྱི་འབྲེལ་ཡོད་འགས་སྤྲེའུའི་འབྲུམ་ནད་འགོས་མཁན་ཇེ་མང་དུ་འགྲོ་མུས་ཡིན་ཡང་། གཞུང་འབྲེལ་གྱི་ཐོག་ནས་འགོག་ཁབ་རིགས་བཟོ་འཆར་མེད་སྐོར་འགྲེལ་བརྗོད་བྱས་ཡོད་འདུག

WHO Director-General Dr Tedros Adhanom Ghebreyesus gives an opening statement during the first meeting of the International Health Regulations (2005) Emergency Committee regarding the multi-country monkeypox outbreak. The meeting was held on 23 June 2022 at WHO Headquarters in Geneva, Switzerland

ཟླ་འདིའི་ཕྱི་ཚེས་ ༢༣ ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་འཕྲོད་བསྟེན་སྒྲིག་འཛུགས་ནས་སྤྲེའུའི་འབྲུམ་ནད་ཐད་ཛ་དྲག་ཚོགས་འདུ་བསྡུས་ཡོད་པ་དང་། ཕྱི་ཚེས་ ༢༤ ཉིན་འཛམ་གླིང་ཁྱོན་ཡོངས་སུ་ཁྱབ་སླ་བའི་སྤྲེའུའི་འབྲུམ་ནད་ཁྱབ་གདལ་འགྲོ་མུས་ཡིན་སྟབས། རྒྱལ་སྤྱིའི་གཞུང་སྒེར་ཚང་མས་འཚོ་གནས་སོགས་སུ་དོ་ཕོག་མི་འགྲོ་སླད་སྔོན་འགོག་དང་འགོག་སྡོམ་སོགས་བྱ་དགོས་པའི་སྔོན་བརྡ་བཏང་འདུག་པ་མ་ཟད། འཕྲོད་བསྟེན་སྒྲིག་འཛུགས་ཀྱི་འགན་འཛིན་ཊེ་ཌོ་སུ་(Tedros Adhanom Ghebreyesus) ལགས་ཀྱིས། སྤྲེའུའི་འབྲུམ་ནད་དེ་འགོས་ཁྱབ་ཇེ་ཆེར་འགྲོ་དུས་མང་ཚོགས་ཀྱི་འཕྲོད་བསྟེན་ལའང་ཉེན་ཚབས་ཆེན་པོ་ཡོད་པར་བརྟེན། ནད་རིགས་དེ་འགོག་སྡོམ་བྱ་རྒྱུར་རྒྱལ་སྤྱིའི་སྤྱི་སྒེར་ཚང་མས་མཉམ་རུབ་བྱ་དགོས་སྐོར་དང་། འབྲུམ་ནད་དེ་ལུས་འབྲེལ་ལས་འགོས་པ་མང་པོ་འབྱུང་གི་ཡོད་སྐོར་བརྗོད་འདུག

ད་ལྟ་འཛམ་གླིང་གི་ཡུལ་གྲུ་མང་པོའི་ནང་གསར་དུ་འགོས་ཁྱབ་བྱུང་བཞིན་པའི་སྤྲེའུ་འབྲུམ་ནད་དེ་ནི། ཕྱི་ལོ་ ༡༩༥༨ ལོར་ཡུ་རོབ་རྒྱལ་ཁབ་ཌན་མག་ནང་ཐོག་མར་ངོས་འཛིན་བྱུང་བ་དང་། ཕྱི་ལོ་ ༡༩༧༠ ལོར་དབུས་ཨ་ཧྥེ་རི་ཁའི་རྒྱལ་ཁབ་ཁོན་གྷོ་ནང་ཐོག་མར་མི་ལ་འགོས་ཁྱབ་བྱུང་བ་ནས་ད་བར་རྒྱལ་ཁབ་ ༧༥ ནང་འགོས་ཁྱབ་ཏུ་འགྲོ་བཞིན་ཡོད་ཀྱང་། ད་བར་ནད་པ་ ༡༦༠༠༠ བྱུང་བ་ནས་མི་ ༥ འདས་གྲོངས་སུ་ཕྱིན་འདུག འབྲུམ་ནད་དེ་མི་དང་མིའི་བར་གྱི་ཐུག་རེག་དང་། འབུ་སོགས་སེམས་ཅན་གྱིས་སོ་བརྒྱབ་པ། ཟུངས་ཁྲག་འགོས་པ་སོགས་ནས་འབྲུམ་ནད་དེ་ཁྱབ་ཀྱི་ཡོད་འདུག་ལ། འབྲུམ་ནད་དེ་འགོས་པའི་ནད་རྟགས་ནི་གཟུགས་པོའི་རུས་ཚིགས་སོགས་ལ་ཟུག་གཟེར་རྒྱག་པ་དང་། གཟུགས་པོར་འབྲུམ་འབུར་ཐོན་པ་དང་ཟ་འཕྲུག་ལངས་བ། ཚ་བ་རྒྱས་པ། མགོ་ན་བ་དང་ཐང་ཆད་པ། པགས་མདོག་འགྱུར་བ་སོགས་ཡོང་གི་ཡོད་འདུག

གསར་འགོད་པ། དཔལ་ལྡན།