ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གིས་བོད་ཀྱི་བུད་མེད་རིག་པའི་གཡུ་མཚོ་དུས་དེབ་བསྐྱར་གསོ་གནང་རྒྱུ་ཡིན་འདུག

ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་ནས་བོད་ཀྱི་རིག་གཞུང་ཐོག་ཞིབ་འཇུག་གི་ཕྱག་ལས་རྒྱུན་སྐྱོང་གནང་བ་དང་འབྲེལ་བོད་ཀྱི་བུད་མེད་རྐྱང་བའི་དུས་དེབ་གཡུ་མཚོ་བསྐྱར་གསོ་གནང་རྒྱུ་ཡིན་འདུག

ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་མཁན་པོ་འཇུ་བསྟན་སྐྱོང་ལགས་སུ་རྩིས་སྤྲོད་ཟིན་ཡོད་པ་ལྟར། ཁ་སང་ཕྱི་ཚེས་ ༡༥ ཉིན་ཞིབ་འཇུག་ཁང་གི་མ་འོངས་པའི་ལས་འཆར་དང་འབྲེལ་བའི་གསར་འགོད་གསལ་བསྒྲགས་ཤིག་སྤེལ་ཡོད་ཅིང་། ཨ་མྱེས་རྨ་ཆེན་རིག་གཞུང་ཞིབ་འཇུག་ཁང་གི་འགན་འཛིན་མཁན་པོ་འཇུ་བསྟན་སྐྱོང་མཆོག་གིས། བོད་ཀྱི་མི་རབས་གསར་པ་ཚོར་ལོ་རྒྱུས་ཀྱི་སྐོར་ལ་གོ་རྟོགས་སྤེལ་རྒྱུ་དང་། བོད་ཀྱི་བུད་མེད་རིག་པའི་དུས་དེབ་གཡུ་མཚོ་བསྐྱར་གསོ་གནང་རྒྱུ་ཡིན་པ་སོགས་མུ་མཐུད་ཞིབ་འཇུག་གི་ཕྱག་ལས་གནང་རྒྱུ་དང་། དེ་ཡང་གཙོ་བོ་ལོ་རྒྱུས་ཞིབ་འཇུག་གི་དཔེ་དེབ་རིགས་གདོན་རྒྱུ་ཡིན་སྐོར་གསུངས་སོང་།

དེའི་ཐད་སྨོན་ལམ་བོད་ཀྱི་བརྡ་འཕྲིན་ཁང་གི་སྤྱི་ཁྱབ་རྩོམ་སྒྲིག་པ་དང་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་མཁན་པོ་འཇུ་བསྟན་སྐྱོང་ལགས་ཀྱིས། སྤྱིར་བཏང་ངས་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་དུ་སྤྱི་ཁྱབ་རྩོམ་སྒྲིག་པའི་ལས་ཀ་བྱེད་བསྡད་ཀྱི་ཡོད་དུས། དེར་ལས་ཀ་ཧ་ལས་པའི་མང་པོ་འདུག་ལ། དུས་ཚོད་ཀྱང་མང་པོ་ཞིག་གཏང་དགོས་ཀྱི་ཡོད་སྟབས། ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་དེ་ཡོང་གི་ཡོད་ན་མེད་ན་བསམ་བྱུང་། རྗེས་སུ་བསམ་བློ་གཏོང་དུས་རྒན་རབས་པ་ཚོས་དཀའ་ལས་བརྒྱབ་པ་དེ་མིན་ལབ་ན་ཡག་པོ་མི་འདུག་བསམ་སྟེ། ངས་ཚིག་མཛོད་ཀྱི་ལས་ཀ་དེ་བྱེད་ཀྱིན་བྱེད་ཀྱིན། འདིར་ངའི་རོགས་པ་ལྕགས་མོ་དང་བཀྲིས་གཉིས་ལ་འགན་ཞིག་ཁུར་དུ་བཅུག་ནས། ངས་སྤྱི་ཁྱབ་ཀྱི་ལམ་སྟོན་ནམ། ཕྱོགས་ཡོངས་ནས་ག་རེ་བྱ་དགོས་ཀྱི་སྤྱི་ཁྱབ་ཀྱི་འགན་ཁུར་ཏེ། ཉིན་རྟག་པར་ལུས་ཁུངས་སུ་ལས་ཀ་བྱ་རྒྱུ་དེ་ཁོང་གཉིས་ཀྱིས་འགན་ཞིག་ཁུར་བཞག་ན་འགྲིག་གི་རེད་བསམ་ནས། ང་ཚོས་ལས་ཁུངས་འདི་རྩིས་བླངས་བཞག་པ་རེད། ལས་ཁུངས་འདིས་ལོ་ ༣༠ རིང་ལ་བོད་ཀྱི་ལོ་རྒྱུས་ཀྱི་སྐོར་ལ་དཀའ་ལས་བརྒྱབ་ཡོད་སྟབས། ང་ཚོས་ཁ་ཕྱོགས་ལོག་ག་ཞིག་ཏུ་འགྲོ་བ་ཡིན་ན། མི་རབས་སྔ་མ་ཚོས་ཐུགས་རེ་དང་མི་མཐུན་པ་འདྲ་བོ་ཞིག་ཆགས་ཀྱི་རེད་བསམ་ནས། ང་ཚོས་ལོ་རྒྱུས་སྐོར་གྱི་དཔེ་དེབ་གདོན་རྒྱུ་དང་། དཔར་སྐྲུན་བྱ་རྒྱུ་སོགས་གཙོ་བོ་ལོ་རྒྱུས་ལ་ཁ་ཕྱོགས་ནས་ལས་ཀ་ཞིག་བྱ་ཨེ་ཐུབ་བསམ་པའི་རེ་བ་ཞིག་བྱེད་ཀྱིན་ཡོད། ཅེས་གསུངས་སོང་།

ཡང་མཁན་པོ་ལགས་ཀྱིས། ང་ཚོ་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གིས་རྒན་རབས་པ་རྣམས་ཀྱི་ཐུགས་རེ་བཞིན་ཅི་ཐུབ་གང་ཐུབ་ཀྱིས་གོམ་པ་སྤོ་ཐབས་བྱ་རྒྱུ་ཡིན། རིག་གནས་ཀྱི་ལས་དོན་ལ་ཁ་ཕྱོགས་ཐུབ་ན་ཕན་ཐོགས་ཀྱི་རེད་བསམ་གྱི་འདུག ཡིན་ན་ཡང་། ང་ཚོས་འདི་འདྲ་ཞིག་བྱེད་ཐུབ་ཀྱི་རེད་ཟེར་བའི་སྤོབས་པ་མེད་དེ། སོ་སོ་ལ་ནུས་པ་ག་རེ་ཡོད་པ་དེ་གདོན་རྒྱུར་རེ་བ་ཡོད་མ་གཏོགས། ང་ཚོར་ག་རེ་དགོས་ཚོད་བྱ་ཐུབ་རྒྱུ་ཁག་པོ་རེད་བསམ་གྱི་ཡོད། ཡིན་ཡང་། ང་ཚོར་ནུས་པ་ག་རེ་ཡོད་པ་དེ། རྒྱ་གར་དུ་བསླེབས་ནས་ལོ ༢༠ རིང་ལ་ང་ཚོས་མ་འཇོན་པ་དེ་མ་འཇོན་པ་རེད་མ་གཏོགས། དྷ་སར་བསྡད་ནས་རིག་གཞུང་གི་སྒང་ལ་བསམ་བློ་ཞིག་བཏང་བསྡད་ཡོད་རེད། མ་འོངས་པ་ཡིན་ན་ཡང་། དེ་ག་ནང་བཞིན་ནུས་པ་གང་ཡོད་བོད་ཀྱི་རིག་གཞུང་གི་ཐོག་ཏུ་བྱ་ཐུབ་ན་བསམ་ཡོད། ང་འདྲ་བོ་ཞིག་ཡིན་ན་རྒྱ་སྐད་དང། དབྱིན་ཇི་སོགས་ཤེས་ཀྱི་ཡོད་མ་རེད། ངའི་རོགས་པ་གཉིས་ཀྱིས་ཨོ་ཙམ་ཤེས་ཀྱང་། ང་ཚོས་སྔོན་མའི་བོད་ཀྱི་རིག་གཞུང་། ལྷག་པར་དུ་ལོ་རྒྱུས་ཀྱི་སྐོར་དེ་ང་ཚོའི་མི་རབས་གཞོན་པ་རྣམས་ལ་ངོ་སྤྲོད་ཅིག་བྱ་ཐུབ་ན། ཕན་ཐོགས་ཤིག་ཡོད་རེད་བསམ་གྱི་འདུག ང་ཚོ་ནི་མཚམས་སྦྱོར་གྱི་མི་རིགས་ཀྱི་སྡེ་ཚན་ཞིག་ཆགས་བསྡད་ཡོད་དུས། ང་ཚོས་མི་རབས་གཞོན་པ་ཚོར་གཞན་ལ་གང་ཡོད་པ་དེ་ངོ་སྤྲོད་ཅིག་མ་ཐུབ་ཀྱང་། རང་ལ་གང་ཡོད་པ་དེ་རང་གི་མི་རིགས་ལ་ངོ་སྤྲོད་ཅིག་བྱ་རྒྱུ་དེ་དཔེ་གལ་ཆེན་པོ་རེད་བསམ་གྱི་འདུག དེ་ལྟར་མ་བྱས་ཚེ་ང་ཚོའི་རང་གི་རིག་གཞུང་དེ་ཉམས་འགྲོ་བའི་ཉེན་ཁ་ཆེ་ཤོས་ཤིག་མཐོང་བ་མ་གཏོགས། ང་ཚོའི་ན་གཞོན་ཚོས་ཕྱིའི་རིག་གཞུང་མ་ཤེས་པའི་དཀའ་ངལ་ཞིག་འཕྲད་ཀྱི་རེད་བསམ་གྱི་མི་འདུག དེང་གི་འགྲོ་སྟངས་ཀྱི་ཐོག་ནས། ང་ཚོའི་མི་རབས་གསར་པ་ཚོས་རང་གི་རིན་ཐང་མ་ཚོར་བའི་དཀའ་ངལ་ཞིག་འཕྲད་ཀྱི་འདུག་ལ། མ་འོངས་པའང་དེ་འཕྲད་ཀྱི་རེད་བསམ་པའི་བློ་འཚབ་ཡོད་དུས། ང་ཚོའི་རང་ལ་ཡོད་པའི་རིག་གཞུང་གི་ཁྱད་ཆོས་དང་རིན་ཐང་དེ་མི་རིགས་གསར་པ་ལ་རྩིས་སྤྲོད་བྱ་ཐུབ་ན་བསམ། དེ་ནི་ང་སྒེར་གྱི་རེ་བ་ཆེ་ཤོས་ཤིག་ཡིན། ཞེས་གསུངས་སོང་།

རིག་གཞུང་ཞིབ་འཇུག་ཁང་ནས་བོད་ཀྱི་བུད་མེད་རིག་པའི་གཡུ་མཚོ་དུས་དེབ་ཅེས་པ་ཞིག་སྔོན་ཆད་བཏོན་ཡོད་ཀྱང་ཕྱིས་སུ་མཚམས་བཞག་ཡོད་སྟབས། དུས་དེབ་དེ་བསྐྱར་གསོ་གནང་རྒྱུ་ཡིན་པའི་སྐོར་ལ་མཁན་པོ་ལགས་ཀྱིས། གཡུ་མཚོ་དུས་དེབ་དེ་ངས་བཙན་བྱོལ་ནང་གི་དུས་དེབ་ཀྱི་ཁྲོད་ནས་དམིགས་བསལ་བ་ཞིག་ཏུ་མཐོང་སོང་། གང་ཡིན་ཟེར་ན། དེ་བུད་མེད་ཀྱི་སྐོར་རྐྱང་པ་ཡིན་པའི་དུས་དེབ་ཅིག་རེད། ངས་ད་ལྟ་བར་དུ་བོད་ཕྱི་ནང་གཉིས་ཀ་ནས་བུད་མེད་སྐོར་གྱི་རྐྱང་པའི་དུས་དེབ་ཅིག་མཐོང་མ་སོང་། ད་ལྟའང་ང་ཚོས་བུད་མེད་ཀྱི་ནུས་སྤོབས་གོང་འཕེལ་དང་། བུད་མེད་རྩ་ཆེན་པོ་ཡིན་པ། བུད་མེད་ཚོས་ཀྱང་སོ་སོ་རང་ཉིད་རྩ་ཆེན་ཡིན་པ་དང་། དེང་སྐབས་མོ་གཙོ་རིང་ལུགས་ཀྱི་ཐོག་ཏུ་ཤུགས་བརྒྱག་གི་ཡིན་ལབ་ཀྱི་ཡོད་ཀྱང་། ང་ཚོས་དང་པོ་རང་གི་རིན་ཐང་དེ་ཤེས་པ་བྱ་དགོས་པ་ལས། རང་གི་རིན་ཐང་མ་ཤེས་ན་ག་ཚོད་བྱས་ཀྱང་ཞེ་དྲགས་གདེང་ཚོད་ཁེལ་བ་ཞིག་བྱེད་ཐུབ་ཀྱི་མ་རེད། ཡིད་སྨོན་རྐྱང་རྐྱང་གིས་ང་ཚོས་ལམ་ཞིག་འཚོལ་ཐུབ་ཀྱི་མ་རེད་བསམ་གྱི་འདུག དེ་བས་སྤོབས་པ་དང་གདེང་ཚོད་ཀྱི་སྒོ་ནས་བྱ་དགོས་རེད་མ་གཏོགས། རེ་བ་དང་རྨི་ལམ་གྱི་ཁྲོད་ནས་ཞེ་དྲགས་ཡོང་གི་མ་རེད་བསམ་གྱི་ཡོད། དེའི་ཕྱིར་བོད་རང་གི་བུད་མེད་ཀྱི་སྤོབས་པ་དང་གཟི་བརྗིད། དམིགས་བསལ་བོད་ནང་གི་བླ་ན་མེད་པའི་བུད་མེད་དེ་དག་གིས་ཕྱག་ལས་ག་རེ་གནང་འདུག སྙིང་སྟོབས་ག་རེ་སྐྱེད་འདུག དཀའ་སྡུག་ལ་གདོང་ལེན་ག་རེ་བྱས་པ་ངོ་ཤེས་ན། ང་ཚོའི་བུད་མེད་དེ་ཚོ་ལའང་བོད་ཀྱི་བུད་མེད་ཅེས་པ་གང་འདྲ་ཡིན་པའི་སྙིང་སྟོབས་སྐྱེད་པ་དང་། དེ་དག་ལ་ཕན་ཐོགས་ཀྱི་རེད་བསམ་གྱི་འདུག དེ་འདྲ་ཡིན་དུས་ང་ཚོས་གཡུ་མཚོའི་དུས་དེབ་དེ་བསྐྱར་་དཔར་བྱ་རྒྱུ་བདམས་པ་ཡིན། ཞེས་གསུངས་སོང་།

 ཨ་མྱེས་རྨ་ཆེན་བོད་ཀྱི་རིག་གཞུང་ཉམས་ཞིབ་ཁང་ནི་ཕྱི་ལོ ༡༩༩༢ ལོར་མཁས་དབང་བཀྲིས་ཚེ་རིང་ལགས་དང་། རྩོམ་པ་པོ་འཇམ་དབྱངས་ནོར་བུ་ལགས། ལྷ་བཟང་ཚེ་རིང་ལགས་སོགས་ཀྱིས་གསར་འཛུགས་གནང་སྟེ།  བོད་ཀྱི་ལོ་རྒྱུས་དང་རིག་གཞུང་འབྲེལ་བའི་ཉམས་ཞིབ་ཀྱི་དཔེ་དེབ་འགྲེམས་སྤེལ་སོགས་བྱེད་ཀྱིན་འདུག་ལ། འདི་ལོའི་ཕྱི་ཟླ ༦ ཚེས ༢༦ ཉིན་བཀྲིས་ཚེ་རིང་ལགས་ནས་མཁན་པོ་འཇུ་བསྟན་སྐྱོང་ལགས་སུ་རྩིས་སྤྲོད་གནང་ཡོད་འདུག

གསར་འགོད་པ། དཔལ་ལྡན།