རྒྱ་ནག་གཞུང་གིས་བོད་གསེར་རྟ་ཁུལ་ནས་བོད་མི་ལྔ་འཛིན་བཟུང་བྱས་པའི་ཁྲོད་བོད་མི་ཕྱུག་དར་ལགས་གཅར་རྡུང་བྱས་ཏེ་བསད་ཡོད་འདུག
འདི་ལོའི་ཕྱི་ཟླ ༨ ཚེས ༢༤ ཉིན་རྒྱ་ནག་གཞུང་གི་ཉེན་རྟོག་པས་བོད་མི་ཚོས་བསང་གསོལ་དང་ལབ་རྩེ་བསྟད་པ། ཞབས་རིམ་བསྒྲུབས་པ་སོགས་ཆོས་ཕྱོགས་ཀྱི་བྱེད་སྒོ་ཁག་བྱས་པའི་ཉེས་མིང་གི་འོག་ནས། བོད་གསེར་རྟ་རྫོང་གི་ཁེས་སྐོར་ཡུལ་ཚོའི་ཨ་བོས་དཀྱིལ་རི་མགོ་སྡེ་བ་ནས་ཡིན་པའི་བོད་མི་ཕྱུར་དར། དགེ་ལོ། ཚེ་རྡོ། འབའ་མོ། ཀོ་རིས་བཅས་འཛིན་བཟུང་བཙན་ཁྲིད་བྱས་ཏེ་གསེར་རྟ་རྫོང་གི་བཙོན་ཁང་དུ་ཁྲིད་རྗེས། བོད་མི་ཕྱུག་དར་ལ་རྒྱ་གཞུང་ཉེན་རྟོག་པས་གཅར་རྡུང་དང་རྡུང་རྡེག་བྱས་ཏེ་དམར་གསོད་བཏང་ཡོད་འདུག་པ་མ་ཟད། ད་ལྟ་བོད་མི་གཞན་བཞི་པོ་དེ་དཀར་མཛེས་རྫོང་གི་བཙོན་ཁང་དུ་བཀག་ཉར་འོག་བཅུག་ཡོད་འདུག
དེ་རིང་འདི་གར་བོད་ནས་ཁུངས་ལྡན་གནས་ཚུལ་ཞིག་འབྱོར་བ་ལྟར་ན། འདི་ལོའི་ཕྱི་ཟླ ༨ ཕྱི་ཚེས ༢༥ ཉིན་འཛིན་བཟུང་བྱས་པའི་བོད་མི་དེ་དག་གི་ནང་མི་ཚོ་བཙོན་ཁང་དུ་ཕྱིན་ནས། བོད་མི་དེ་དག་ལ་ཁ་ཟས་སྤྲོད་ཐབས་བྱས་ཀྱང་། ཉེན་རྟོག་པས་ནང་མི་རྣམས་ཕྱིར་ལོག་བཏང་བ་ལས་ཁ་ཟས་སོགས་གཏན་ནས་སྤྲོད་བཅུག་མེད་པ་རེད། འོན་ཀྱང་། ཕྱི་ཟླ ༨ ཚེས ༢༦ ཉིན་ཉེན་རྟོག་པས་ཕྱུག་དར་གྱི་ནང་མིར་ཁོང་བཙོན་ཁང་དུ་ཤི་སོང་བས། ཕུང་པོ་ལ་བདག་པོ་རྒྱག་པར་ཤོག ཅེས་སྐད་བཏང་བར་བརྟེན། ལོ་ ༧༡ ཡིན་པའི་བོད་མི་ཕྱུག་དར་གྱི་ཕ་ཐུབ་འོད་ཀྱིས་གཙོས་ཉེ་འབྲེལ་ཁ་ཤས་གསེར་རྟ་རྫོང་གི་ཉེན་རྟོག་ཁང་དུ་ཕྱིན་པར། ཉེན་རྟོག་པས་བོད་མི་ཕྱུག་དར་བཙོན་ཁང་ནང་གློ་བུར་དུ་ཤི་སོང་། ང་ཚོས་ཉེས་རྡུང་བཏང་ནས་བསད་པ་མིན། དེར་བརྟེན་བོད་མི་ཕྱུག་དར་གྱི་ནང་མིས་ཕྱུར་དར་རྒྱ་ནག་ཉེན་རྟོག་པས་དམར་གསོད་བཏང་བ་མིན་པའི་ས་ཡིག་བརྒྱབ་ན་མ་གཏོགས། ཁོང་གི་ཕུང་པོ་སྤྲོད་རྒྱུ་མིན་ལུགས་བཤད་ནས་འཇིགས་སྐུལ་བྱས་ཡོད་སྟབས། ཕྱུག་དར་གྱི་ཉེ་འབྲེལ་ཚོས་ཁོང་ནམ་རྒྱུན་ནས་ན་ཚ་ཅི་ཡང་མེད། ད་ཐེངས་ཁྱོད་ཚོས་ཁོང་བསད་པ་རེད་ཅེས་བརྗོད་ཡོད་ཀྱང་། རྒྱ་གཞུང་ཉེན་རྟོག་པས་ཁས་ལེན་གཏན་ནས་བྱས་མེད་པ་སྐོར་འགྲེལ་བརྗོད་བྱས་སོང་།
བོད་མི་ཁོང་གིས། ཕྱུག་དར་གྱི་ནང་མིས་ཁོང་ཕ་མ་རྒན་རྒོན་གཉིས་དང་། བཟའ་ཟླ། བུ་ཕྲུག་བཅས་ཀྱི་འཚོ་ཐབས་གཅིག་པུར་བརྟེན་ཡོད་པ་མ་ཟད། དེ་སྔ་ཁོང་ལ་ན་ཚ་གང་ཡང་མེད་ཀྱང་། ད་ལན་ཉེན་རྟོག་པས་གཅར་རྡུང་བྱས་ནས་གློ་བུར་བསད་ཡོད་སྐོར་བཤད་མཐར། གསེར་རྟ་རྫོང་གི་ཉེན་རྟོག་པས་ཁོང་ཚོས་ཕྱུག་དར་བསད་མེད་ཀྱང་། ཉེན་རྟོག་པས་ཕྱུར་དར་གྱི་ཤུལ་ལུས་ནང་མི་རྣམས་ལ་རྒྱ་སྒོར་འབུམ་གཅིག་དང་། ནང་མི་རེ་རེར་ལོ་ལྟར་སྒོར་ཁྲི་གཅིག་རེ་སྤྲོད་རྒྱུ་བྱས་ཡོད་ཀྱང་། དེ་ནི་རྒྱ་ནག་ཉེན་རྟོག་པས་ཕྱུག་དར་གྱི་ནང་མི་དང་ཉེ་འབྲེལ་ཚོས་ཁོང་གི་ཕུང་པོ་གང་མགྱོགས་ཁྱིམ་དུ་ཁྱེར་ཆེད་ཡིན་པ་ལས། ད་བར་ཁོང་གི་ཤུལ་ལུས་ནང་མིར་སྒོར་མོ་གཅིག་ཀྱང་སྤྲད་མེད་སྐོར་འགྲེལ་བརྗོད་བྱས་སོང་།
ཡང་ཁོང་གིས། འདི་ལོའི་ཕྱི་ཟླ ༨ ཚེས་ ༢༤ ཉིན་རྒྱ་ནག་གཞུང་གི་ཉེན་རྟོག་པས་བོད་མི་དེ་དག་གསེར་རྟ་རྫོང་གི་བཙོན་ཁང་དུ་འཛིན་བཟུང་བཙན་ཁྲིད་བྱས་ཡོད་པ་དང་། བོད་མི་དགེ་ལོ། ཚེ་རྡོ། འབའ་མོ། ཀོ་རིས་སོགས་བདུན་ཕྲག་གཅིག་རིང་གསེར་རྟ་རྫོང་གི་བཙོན་ཁང་དུ་བཀག་ཉར་བྱས་རྗེས། ཕྱི་ཟླ་༨ ཚེས་ ༣༡ ཉིན་བོད་མི་བཞི་པོ་དེ་དཀར་མཛེས་རྫོང་གི་བཙོན་ཁང་དུ་བཙན་ཁྲིད་བྱས་ཏེ། ད་ལྟ་དཀར་མཛེས་ཀྱི་བཙོན་ཁང་དུ་བཀག་ཉར་བྱེད་བཞིན་ཡོད་པར་མ་ཟད། ཁོ་ཚོར་ཁྲིམས་ཐག་གཅད་རྒྱུའི་ཉེན་ཁ་ཡོད་སྐོར་དང་། དེ་སྔོན་རྒྱ་གཞུང་གིས་བོད་མི་ཚོ་བཙོན་འཇུག་བྱས་རྗེས་ཁྲིམས་ཐག་མ་བཅད་བར་དུ་བཙོན་པ་ཕལ་ཆེ་བ་རང་རང་གི་ས་གནས་རྫོང་གི་བཙོན་ཁང་ནང་བཀག་ཉར་བྱེད་སྲོལ་ཡོད་ཀྱང་། དེང་སྐབས་སྔོན་དང་མི་འདྲ་བར་བདུན་ཕྲག་རེ་ཙམ་ལས་སོ་སོའི་རྫོང་གི་བཙོན་ཁང་དུ་མི་འཇོག་པར། རྫོང་ཁག་གཞན་དང་གཞན་གྱི་བཙོན་ཁང་དུ་བཙན་ཁྲིད་བྱེད་བཞིན་ཡོད་འགྲེལ་བརྗོད་གནང་སོང་།
བོད་མི་དེ་དག་གྲོང་སྡེའི་མི་མང་གིས་ཆེད་དུ་བསྐོ་བཞག་བྱས་ཏེ། ཁོང་ཚོས་རྒྱུན་དུ་ཆོས་ཕྱོགས་ཀྱི་བྱེད་སྒོ་ཁག་གོ་སྒྲིག་བྱེད་ཀྱི་ཡོད་འདུག་ལ། ཁོང་ཅག་ནི་ཀུན་སྤྱོད་དང་། སྤྱི་སེམས། ལྷག་བསམ་ལྡན་པའི་མི་ལྔ་པོ་དེ་ཡིན་པར་བརྟེན། གྲོང་པའི་མང་ཚོགས་ཀྱིས་ཁོང་ཚོར་ལྔ་བཟང་( མི་བཟང་པོ་ལྔ། ) ཞེས་འབོད་སྲོལ་ཡོད་ཅིང་། རྒྱ་ནག་གཞུང་གིས་གཅར་རྡུང་བྱས་ནས་བསད་པའི་བོད་མི་ཕྱུག་དར་ནི་རང་ལོ་ ༥༢ ཡིན་པ་དང་། ཁོང་ལ་ལོ ༧༡ ཡིན་པའི་ཨ་ཕ་ཐུབ་འོད་དང་། རང་ལོ་ ༧༥ ཅན་གྱི་ཨ་མ། བཟའ་ཟླ་དང་བུ་ཕྲུག་བཅས་སོགས་ཡོད་འདུག
གསར་འགོད་པ། དཔལ་ལྡན།
