རྒྱ་ནག་གཞུང་ནས་མ་འོངས་པའི་ཟླ་གཉིས་གསུམ་ནང་ཏོག་དབྱིབས་འགོས་ཁྱབ་ཤུགས་ཆེ་ཤོས་འགྲོ་ཉེན་ཡོད་སྐོར་དང་ནད་པའི་གནས་བབ་ལ་དཔག་པའི་ཟུར་འཇོག་དང་སྨན་བཅོས་ཀྱི་དབྱེ་གསེས་ལེགས་པོ་དགོས་སྐོར་བརྗོད་འདུག
རྒྱ་ནག་གཞུང་གི་ཏོག་དབྱིབས་གཙང་སེལ་ཞེས་པའི་སྲིད་ཇུས་ལག་བསྟར་བྱས་ཏེ་ཡུན་རིང་ཕྱིན་པའི་རྐྱེན་གྱིས་སློབ་ཆེན་ཁག་མང་པོ་དང་མི་མང་ནས་ཞི་ཅིན་ཕིང་གིས་སྣེ་འཁྲིད་པའི་དམར་ཤོག་གཞུང་གི་སྲིད་དབང་མགོ་རྟིང་སློག་པའི་འབོད་ཚིག་དང་ཕྲེད་དར་འཕྱར་ཏེ་གྱེན་ལངས་བྱེད་བཞིན་ཡོད་པར་བརྟེན། ཟླ་འདིའི་ཕྱི་ཚེས་ ༡༠ ཡས་མས་ནས་བཟུང་རྒྱ་ནག་གཞུང་གིས་ཏོག་དབྱིབས་གཙང་སེལ་ཞེས་པའི་བཀག་སྡོམ་བཙན་པོ་ཀློད་ཟིན་པའི་གནས་ཚུལ་མང་པོ་ཞིག་གསར་ལམ་དུ་ཐོན་ཡོད་པ་རེད། འོན་ཀྱང་། ད་ལྟའང་བོད་ཁུལ་གྱི་ས་ཆ་མང་པོར་འགྲོ་སྐྱོད་ལ་བཀག་སྡོམ་བྱེད་བཞིན་ཡོད་པ་མ་ཟད། ཀློད་ཟིན་པའི་ས་ཁུལ་ཁག་གི་མི་མང་ནས་བཀག་སྡོམ་གློ་བུར་དུ་ཀློད་པ་དེས་རིམས་ནད་འགོས་ཁྱབ་ཚབས་ཆེན་འགྲོ་ཉེན་ཡོད་པའི་དངངས་སྐྲག་བྱེད་ཀྱི་འདུག་ལ། ཁོངས་སོ་སོས་བདེ་འཇགས་འགན་ལེན་བྱེད་དགོས་པའི་གནས་སྟངས་ཆགས་ཡོད་སྟབས། བོད་ཁུལ་གྱི་སློབ་གྲྭ་མང་པོ་ཞིག་དུས་ངེས་མེད་དུ་གུང་སེང་བཏང་དགོས་བྱུང་ཡོད་འདུག
དེའི་ཐད་བོད་གནས་ལྟ་ཞིབ་ཁང་གི་ཉམས་ཞིབ་པ་པདྨ་རྒྱལ་ལགས་ཀྱིས་འདི་གའི་གསར་འགོད་པར། སྤྱི་ཚོགས་དྲ་ལམ་ནས་བལྟས་ན། ད་ལྟའི་ཆར་བོད་ནང་གི་ས་ཆ་མང་པོའི་ནང་ཚོང་འདྲེན་དང་། མེ་འཁོར་དང་སྤྱི་སྤྱོད་རླངས་འཁོར་ནང་འགྲོ་སྐྱོད་བྱེད་ཆོག་པ་སོགས་སྒོ་རྒྱ་ཕྱེ་ཡོད་ས་རེད། འོན་ཀྱང་། ཁྱིམ་སྡོད་བཀག་རྒྱའི་འོག་ཡོད་མཁན་རྣམས་ལ་ནད་རྟགས་ཡོད་མེད་གསལ་པོ་མེད་པ་དང་། བོད་ནང་དུ་སྒོ་རྒྱ་ཡོངས་སུ་ཕྱེ་པ་ཞིག་རེད་མི་འདུག དེ་ཡང་རྒྱལ་སྲིད་སྤྱི་ཁྱབ་ཁང་གིས་དོན་ཚན་བཅུ་བཏོན་ཡོད་པ་དེ་གཞིར་བཟུང་། ད་ལྟའི་ཆར་སྒོ་རྒྱ་ཕྱེ་པ་གང་ཞིག་ལ་ནང་ནས་གཟབ་གཟབ་བྱ་དགོས་པ་དང་འདུ་འཛོམས་རིགས་དང་འབྲེལ་འདྲིས་རིགས་བྱེད་མི་ཆོག་པ་སོགས་མུ་མཐུད་དུ་ལག་བསྟར་བྱེད་བཞིན་པ་ཡིན་ས་རེད། ད་ལྟའི་ཆར་བོད་ནང་དུ་ནད་ཡམས་ཚབས་ཆེན་ཡོད་སྲིད་པ་རེད། རྒྱུ་མཚན་ནི་རྒྱ་ནག་གི་གྲོང་ཁྱེར་མང་པོར་སྒོ་ཕྱེས་ཡོད་པས་ནད་ཡམས་ཁྱབ་གདལ་དུ་འགྲོ་བཞིན་ཡོད་པས་ཏོག་ནད་ཕོག་མཁན་སྔར་ལས་ཇེ་མང་དུ་འགྲོ་བའི་ཉེན་ཁ་ཡོད་འགྲེལ་བརྗོད་བྱས་བྱུང་།
ད་དུང་ཁོང་གིས། དེ་སྔ་རྒྱ་ནག་གཞུང་གིས་ནད་ཡམས་ཁྱབ་བརྡལ་འགྲོ་ཡི་ཡོད་པ་ཤེས་བཞིན་དུ་ཁྱབ་གདལ་དུ་བཏང་ནས་ནད་པ་དང་སྨན་པ། ཁྱིམ་མི་དང་སློབ་མ་། དགེ་རྒན་སོགས་མི་ཚང་མའི་འཚོ་བ་དང་བསམ་བློ་སོགས་ཕྱོགས་གང་སར་དཀའ་ངལ་མང་པོ་འཕྲད་ཡོད་པས་འུ་ཐུག་ནས་སྒེར་ལངས་དང་ངོ་རྒོལ་བྱས་པར་བརྟེན། ད་ལྟ་བཀག་སྡོམ་གྱི་སྲིད་ཇུས་གུ་ཡངས་སུ་བཏང་ཡོད་ཀྱང་། དེ་སྔོན་ནས་འགོས་ཁྱབ་བྱུང་ཡོད་པའི་རྐྱེན་གྱིས་མང་ཚོགས་ཁྲོད་ཏོག་དབྱིབས་ཀྱི་གནས་སྟངས་ཛ་དྲག་པོ་ཆགས་ཡོད་རེད་བསམ་གྱི་ཡོད། ཅེས་བརྗོད་བྱུང་།
ཟླ་འདིའི་ཕྱི་ཚེས་ ༡༢ ཉིན་ཀྲུང་གོའི་བོད་ལྗོངས་དྲ་བ་ཟེར་བས་གནས་ཚུལ་སྤེལ་བ་ལྟར་ན། རྒྱ་ནག་སྔོན་འགོག་གསོ་རིག་མཐུན་ཚོགས་ཀྱི་ནད་ཡམས་ཡན་ལག་ལས་ཁུངས་ཀྱི་རྒྱུན་ལས་དང་དྲུང་ཆེ་གཅིག་ལྕོགས་ལིན་པིང་ལེ་ཞེས་པ་ཞིག་གིས། མ་འོངས་ཟླ་བ་གཉིས་དང་གསུམ་ནང་མང་ཚོགས་ཁྲོད་ཏོག་ནད་ཕོག་མཁན་མང་ཤོས་ཆགས་སྲིད་པས། ནད་པ་ཁག་གི་ནད་གཞིའི་གནས་སྟངས་ལ་བལྟས་པའི་ཐོག་ནས་བགོ་བཤའ་ལེགས་པོ་རྒྱག་རྒྱུ་གལ་ཆེན་པོ་ཡིན་པ་དང་། ཉེན་ཁ་ཆེ་བའི་ནད་པ་དང་མི་མང་། ནད་གཞི་ལྕི་བ་ཁག་ལ་སྨན་བཅོས་ཚད་ལྡན་བྱ་དགོས་སྐོར་དང་། ཨོ་མི་ཁུ་རོན་ (Omicron) ནད་རྟགས་ཡོད་པའི་མི་མང་གི་བརྒྱ་ཆ་ ༩༠ ཙམ་ལ་ནད་གཞི་ཡང་བའམ་ནད་རྟགས་མེད་པའི་ནད་པ་ཡིན་པ་དང་། ནད་གཞི་ཡང་བའི་རིགས་ལ་ཚ་བ་རྒྱས་པ་དང་། གློ་ལུ་བ། མིད་པ་ན་བ། ཤ་གནད་ན་བའི་ནད་རྟགས་ཡོད་པ་དང་། ནད་པ་དེ་དག་ནད་གཞི་ལྕི་བར་འགྱུར་བའི་ཉེན་ཁ་མེད་པ་ཡིན་ན། རང་ཁྱིམ་དུ་ལོག་རྗེས། དེ་འབྲེལ་གྱི་སྨན་བསྟེན་པ་ཙམ་ལས་དངངས་སྐྲག་བྱེད་མི་དགོས་ཤིང་། ཨོ་མི་ཁུ་རོན་གྱི་ནད་རྟགས་ཡོད་མཁན་མང་ཆེ་བ་ཉིན་གྲངས་བདུན་ཙམ་གྱི་ནང་དྲག་སྐྱེད་ཡོང་གི་ཡོད་པར་བརྟེན། ནད་པ་དེ་དག་གིས་སྨན་བཅོས་ཀྱི་ཐོན་ཁུངས་བེད་སྤྱོད་གཏོང་དགོས་དོན་མེད་ཀྱང་། ཉིན་མང་པོར་ཚ་འཇོམས་ཀྱི་སྨན་བསྟེན་ཡང་ཕན་ཐོགས་མེད་པ་དང་། ནད་གཞིར་འགྱུར་ལྡོག་བྱུང་རིགས་དུས་ལྟར་སྨན་ཁང་དུ་ཕྱིན་ནས་སྨན་པར་བསྟེན་དགོས་ཚུལ་སོགས་བརྗོད་འདུག
ཟླ་འདིའི་ཕྱི་ཚེས་ ༧ ཉིན་རྒྱ་ནག་རྒྱལ་སྲིད་སྤྱི་ཁྱབ་ཁང་གི་མཉམ་འགོག་མཉམ་བཅོས་ལམ་སྲོལ་གྱི་ཕྱོགས་བསྡུས་ཚོགས་ཆུང་ཟེར་བ་ཞིག་གིས། རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་ལེགས་བཅོས་བྱེད་པའི་དོན་ཚན་གསར་པ་བཅུ་སྤེལ་བའི་ནང་དུ། ཁ་རས་ཚད་ལྡན་གྱོན་དགོས་པདང་ལག་པ་ཡང་ཡང་བཀྲུ་དགོས་པ། མཁའ་རླུང་འཁོར་རྒྱུག་འོས་འཚམ་དགོས་པ། འདུ་འཛོམས་ཉུང་ཙམ་བྱེད་དགོས་པ། ཁོར་ཡུག་གཙང་སྦྲ་རྒྱུན་འཁྱོངས་བྱེད་དགོས་པ་སོགས་བཀོད་འདུག་ལ། ཏོག་དབྱིབས་བརྟག་དཔྱད་བྱས་ཏེ་ནད་འབུ་འགོས་པ་ཤེས་རྟོགས་ཚེ། ལས་ཀ་དང་སློབ་གྲྭ། དེ་བཞིན་འདུ་འཛོམས་བྱེད་སར་མི་འགྲོ་བ་དང་། མི་འགྲོ་ཐབས་མེད་བྱུང་ཚེ་ཁ་རས་བརྒྱབ་ནས་རྒྱང་བཀྱེད་སོགས་ཀྱི་བྱེད་ཐབས་ལག་བསྟར་དགོས་སྐོར་དང་། འགོག་ཁབ་ལ་འཛེམ་ཟོན་མེད་པར་ཐེངས་གསུམ་རྒྱག་དགོས་ཤིང་། རྒན་རྒོན་དང་གཞི་རྩའི་ནད་གཞི་ཡོ
གསར་འགོད་པ། བསྟན་འཛིན་ཕུར་བུ།
