དགའ་བསུའི་ཟློག་པ་བརྒྱབ་པ་རེད་དམ། ཡང་ན་དགའ་བསུའི་ཐལ་མོ་བརྡབས་པ་རེད།

ཀླུ་སྨྱོན་ཧེ་རུ་ཀ

ཉེ་ཆར་ཡུའུ་ཁི་རིན་གྱི་སྲིད་འཛིན་འཛམ་གླིང་སུ་དགའ་མཆོག་ཨ་རིར་ཕེབས་ཏེ། ཨ་རིའི་སྲིད་འཛིན་ཇོ་དཔལ་ལྡན་ལ་མཇལ་འཕྲད་དང་འབྲེལ། ཨ་རིའི་གྲོས་ཚོགས་ནང་གཏམ་བཤད་ཡིད་འགུལ་ཐེབས་པ་ཞིག་གནང་བ་རེད། གནད་དོ་འདི་ནི་ཡུ་ཨུའི་གཡུལ་འགྱེད་དམག་འཁྲུག་ཆེན་མོའི་ཁྲོད་ཀྱི་གལ་གནད་ཧ་ཅང་ཆེ་བ་ཞིག་ཡིན་ཞིང་། དུས་བབ་འདི་འདྲ་ཞིག་ལ་ཡུའུ་ཁི་རིན་རྒྱལ་ཁབ་ཀྱི་སྲིད་འཛིན་ཕྱི་རྒྱལ་དུ་ཕེབས་རྒྱུར་ཉེན་ཁ་ཧ་ཅང་ཆེ།

ཡུའུ་ཁི་རིན་གྱི་སྲིད་འཛིན་འཛམ་གླིང་སུ་དགའ་མཆོག་ནི་སྲིད་འཛིན་ལ་མ་བཞེངས་སྔོན་ནས་ཁོ་ཚོའི་མི་དམངས་ཀྱིས་དགའ་བསུ་ཧ་ཅང་ཆེན་པོ་ཐོབ་པའི་སྒྱུ་རྩལ་པ་ཞིག་ཡིན་པ་མ་གཏོགས། ཨ་རིའི་སྲིད་ཟུར་བྲོ་ནད་ཁྲམ་ལྟ་བུའི་གཡོ་སྒྱུ་གདུག་རྩུབ་ཆེ་བར་གྲགས་པའི་ཚོང་བ་ཞིག་མ་རེད།

ཉེ་ཆར་སྲིད་འཛིན་འཛམ་གླིང་སུ་དགའ་མཆོག་ཨ་རིར་ཕེབས་པའི་སྐོར་ཨ་རིའི་རླུང་འཕྲིན་ཁང་གི་དྲ་ཚིགས་སུ་གསར་འགྱུར་ཁག་ཅིག་ཡོད་པའི་ཁྲོད་ཀྱི་ལས་བྱེད་ཆེ་གེ་མོས་བཤད་པའི་གསར་འགྱུར་དེར་ཉན་པའི་སྐབས་སུ། ཡུཀ་རེན་སྲིད་འཛིན་གྱིས་ཨ་རིར་ཐུགས་རྗེ་ཆེ་ཞུ་བ་དང་དམག་འཁྲུག་ནང་ཁ་ཕྱོགས་བསྒྱུར་བའི་གནས་བབས་ཡོད་ཚུལ་གསུངས་པ། (voatibetan.com) མོས་ཨ་རིའི་གྲོས་ཚོགས་འཐུས་མི་ཚོས་སྲིད་འཛིན་འཛམ་གླིང་སུ་དགའ་ལ་དགའ་བསུའི་ཟློག་པ་བརྒྱབ་པ་རེད་ཅེས་བརྗོད་སོང་། བོད་ཀྱི་སྐད་དང་ཡི་གེའི་བརྗོད་སྟངས་དང་དེའི་གོ་དོན་ངོ་མར་བྱང་ཚད་ཅི་ཡང་མེད་པའི་བོད་མི་ཚོར་མཚོན་ན་འདི་ནི་གནད་དོན་ཅི་ཡང་མིན་མོད། ཐལ་མོ་བརྡབས་པ་དང་ཟློག་པ་བརྒྱབ་པ་ཞེས་པའི་ཐ་སྙད་འདི་གཉིས་ཀྱི་གོ་དོན་དང་དམིགས་ཡུལ་གྱི་ཕྱོགས་སུ་དོ་སྣང་ཡོད་མཁན་ཞིག་ཡིན་ཚེ། ལས་བྱེད་ཆེ་གེ་མོས་བཤད་པའི་གསར་འགྱུར་དེའི་ནང་གི་ཟློག་པ་བརྒྱབ་ཅེས་པའི་ཚིག་དེས། ཉན་པ་པོའི་སེམས་ནང་མི་བདེ་བའི་ཚོར་བ་ཞིག་ངམ་ངམ་ཤུགས་ཀྱིས་བསྐྲུན་ཡོང་གི་རེད།

ང་ཚོའི་འཚོ་བའི་ཁྲོད་དུ་མི་ཞིག་ལ་ཐལ་མོ་བརྡབས་པ་དང་ཟློག་པ་བརྒྱབ་པ་གཉིས་ཀྱི་ངོ་བོ་དང་དམིགས་ཡུལ་རྩ་བ་ཉིད་ནས་མི་འདྲ་བ་སྟེ། ཐལ་མོ་བརྡབས་པ་ནི་མི་དེར་དགའ་བསུ་ཕེབས་བསུའི་རྣམ་འགྱུར་ཞིག་དང་། མི་ཞིག་ལ་ཟློག་པ་བརྒྱབ་ནི་མི་དེར་ངོ་རྒོལ་ཕར་རྒོལ་ཕར་རྒྱུགས་སོགས་ཀྱི་རྣམ་འགྱུར་བསྟན་པ་ཞིག་རེད།

སྤྱིར་བཏང་བོད་མི་རིགས་ཀྱི་འཚོ་བའི་ཁྲོད་དུ་དགའ་བསུའི་ཐལ་མོ་རྡེབ་པ་འདིའི་ལོ་རྒྱུས་དུས་ཡུན་ཧ་ཅང་ཐུང་ཞིང་། ཕལ་ཆེར་དུས་རབས་ཉི་ཤུ་བའི་དུས་མགོ་ཙམ་ནས་ནུབ་ཕྱོགས་པ་དང་རྒྱའི་རིག་གཞུང་གི་ཤན་ཤུགས་བོད་ཀྱི་འཚོ་བའི་ཁྲོད་དུ་ཐེབས་ཚབས་ཆེ་རུ་སོང་བའི་སྐབས་ཏེ། སྲིད་དོན་མི་སྣའི་ཚོགས་འདུ་དང་ཕེབས་བསུ་སོགས་ཀྱི་དགའ་བའམ་མོས་མཐུན་གྱི་རྣམ་འགྱུར་མཚོན་བྱེད་ཐལ་མོ་རྡེབ་པ་འདི་བོད་ཡུལ་དུ་དར་ཁྱབ་འགྲོ་མགོ་ཚུགས་པ་རེད།

ཡིན་ཡང་བོད་མིའི་ལོ་རྒྱུས་ཁྲོད་དུ་མི་འདོད་པའི་ཆག་ཆེ་ཉམ་ང་བར་ཆད་གདོན་བགེག་མི་དང་མི་མིན་སོགས་ཕར་སྐྲོད་པ་དང་། དེ་དག་གི་གནོད་པའི་ཁ་ཕྱོགས་བསྒྱུར་བ་སོགས་ཀྱི་རེ་སྨོན་བཅངས་ནས། ཆོས་ལུགས་ཀྱི་ཆོ་ག་དཔེར་ན་གདུགས་དཀར་ཟློག་བསྒྱུར་དང་སེང་གདོང་མའི་ཟློག་བསྒྱུར་ལྟ་བུའི་སྒོ་ནས་ཕ་རོལ་པོར་ཟློག་པ་རྒྱག་སྲོལ་ཤུགས་ཆེན་པོ་ཞིག་ཡོད་པ་རེད།

དེའི་ཕྱིར། ཨ་རིའི་གྲོས་ཚོགས་འཐུས་མི་ཚོས་སྲིད་འཛིན་འཛམ་གླིང་སུ་དགའ་མཆོག་དང་ཁོང་གི་གཏམ་བཤད་ལ་དགའ་བསུ་ཡི་རང་གི་ཐལ་མོ་བརྡབས་པ་མ་གཏོགས། ཟློག་པ་བརྒྱབ་པ་ཞིག་རྩ་བ་ཉིད་ནས་མིན་པ་དེ་ཨ་རིའི་བོད་ཀྱི་རླུང་འཕྲིན་ཁང་སོ་སོའི་གསར་འགྱུར་བཤད་མཁན་རྣམ་པས་མཁྱེན་གལ་ཆེའོ།།

*གོང་གསལ་འདྲ་པར་ཡོང་ཁུངས་ཨ་རིའི་རླུང་འཕྲིན་ཁང་།