བོང་ལི་སྐྱབས།
ནུབ་ཕྱོགས་པའི་སྤྱི་ཚོགས་ཁྲོད་དཀར་ཟས་བསྟེན་མཁན་དང་དམར་ཟས་སྤྱོད་མཁན་གྱི་དབར་ལ་ཁ་རྩོད་དང་། མཚང་འབྲུ། སྡང་ཟུག ཐ་ན་གྲིས་རྒྱག་རེས་བྱས་པའི་གནས་ཚུལ་ཡང་བྱུང་ཡོད།
ཕ་ཡུལ་ཨོ་གླིང་ནས་ཡིན་པའི་སྨན་ཤར་བུ་མོ་ ཕྲ་གཤའ ཕེ་ཊར་སན་ཟེར་བས་རང་ལུས་ལ་ཁྲག་རྫུན་འབྱུག་པ་དང་། ལུས་གཅེར་ཧྲེང་མའི་ངོ་ལ་ཚོན་རྩི་དཀར་པོ་དང་ནག་པོའི་རྒྱན་བཏང་དེ་བ་གླང་ཁྲ་ཁྲའི་ཤ་ཚུགས་སུ་བྱས་པ། ཁྲག་ཚོན་གཏོར་བའི་ལུས་རྗེན་ཕྱི་ནང་གསལ་བའི་འགྱིག་ཤོག་ནང་བཏུམ་ཏེ་བཤས་ཤའི་ཚུལ་དུ་བྱས་པ། སྐེ་གཏུབས་ཁྲག་དམར་འཛར་བའི་རྣམ་པ་ཅན་གྱི་དུད་འགྲོའི་མགོ་གཟུགས་ལག་ཏུ་ཐོགས་པ། ལྕགས་ཟྭ་བརྒྱབ་པའི་སྒྲོག་ཐག་སྐེ་ལ་བསྒྲིལ་པ་སོགས་ཐབས་ཚུལ་འདྲ་མིན་སྤྱད་དེ། KFC དང་ མ་ཁི རྡོ་ནྭ་ཟ་ཁང་དང་། བཤས་ཤ་འཚོང་ས། རྟ་རྒྱུག་བྱེད་ས། དུད་འགྲོའི་པགས་པ་དང་བ་སྤུ་རུས་སོའི་རྒྱུ་ཆ་ལས་བྱས་བའི་ཆས་གོས་ཚོང་ཁང་སོགས་སུ་ཕྱིན་ནས། ཐང་ལ་ཁྲག་ཚོན་བྱོ་བ་དང་། ཕྱུགས་ཟོག་བཤའ་སྐབས་བཤས་རྭ་ནས་ངུ་རྒྱངས་བྱེད་པའི་སྒྲ་འཇུག་སྐད་ཆེན་པོས་གཏོང་ཞོར། “ཁྱོད་ཚོ་ཕྱུགས་ཟོག་ལ་མནར་གཅོད་གཏོང་མཁན་རེད། “ “ཁྱོད་ཚོ་ལག་དམར་རེད།” “སྔོ་ཟས་གཙང་མ་བསྟེན་རོགས། ” “སྔོ་ཟས་བསྟེན་ན་རྒྱོ་ཡུན་རིང་།”་ ཟེར་བ་མཚོན་པའི་སྦྱར་བྱང་འཁུར་བ་དང་འབོད་སྒྲ་སྒྲོག་པ་སོགས་དུད་འགྲོའི་རང་དབང་ཆེད་དུ་ལས་འགུལ་སྤེལ་བ་ལ་ཝེ་རྒན་སྤྱི་ཚོགས་ཀྱིས་ཁོ་མོ་ལ་དགའ་བསུ་རྒྱབ་སྐྱོར་དང་། དམར་ཟས་བསྟེན་མཁན་གྱིས་ཁོང་ཁྲོ་དང་སྡང་ཟུག ཁྱི་མོ་དང་བཤང་འཚོང་མར་ཡང་འབོད།
ཁོ་མོ་ནི། རང་ལོ་ཉེར་གསུམ་སྟེང་དམར་ཟས་སྤངས་དེ་དཀར་ཟས་ལ་ཞུགས་ཏེ། དུད་འགྲོའི་ཐོབ་ཐང་དང་རང་དབང་ཆེད་དུ་ལས་འགུལ་སྤེལ་མཁན་ཁྲོད་གྲགས་ཆེ་བ་དང་དོ་སྣང་འདྲེན་ཡུལ་ཞིག་ཏུ་གྱུར་ཡོད།
ཡང་ཁོ་མོའི་ལྡོག་ཕྱོགས་ལྟ་བུར། གསར་འགོད་པ་དང་བརྙན་འཕྲིན་ལེ་ཚན་གཙོ་སྐྱོང་བ། རྩོམ་པ་པོའི་མིང་ཐོབ་ཡོད་པའི་དབྱིན་ཇི་བ་ཕིར་སི མོར་རྒན་ལགས་ནི་ཝེ་རྒན་སྤྱི་ཚོགས་ལ་སྡང་ཟུག་དང་ངོ་རྒོལ་བྱེད་མཁན་གྱི་ཚབ་མཚོན་ལྟ་བུར་བགྲངས་ཆོག ཁོ་རང་གིས་གཙོ་སྐྱོང་བགྱི་བའི་ ༼ ཕིར་སི མོར་རྒན་ཁ་རུ་ཁ་ཐུག༽་ཅེས་པའི་རྒྱང་བསྲིང་བརྙན་འཕྲིན་ལེ་ཚན་དུ། ༼དུད་འགྲོ་གྱེན་ལངས་ཚོགས་པའི་༽་མགྲིན་ཚབ་པ་བུ་མོ་ འོར་ལ ཁ་གྭི་ལིན་ ཞེས་པ་སྐད་བཏང་དེ་བཅར་འདྲི་བྱེད་དུས། ཁོ་མོས་ཤན་འཚོང་ཕྱུགས་ལས་ཀྱིས་ཁོར་ཡུག་ལ་གནོད་འཚེ་ག་འདྲ་བྱེད་ཀྱི་ཡོད་པའི་སྐོར་ལ་འགྲེལ་བཤད་རྒྱག་ཐབས་ལན་ཤས་བྱས་ཀྱང་། དེ་ལྟར་བྱེད་དུ་མ་བཅུག་པར་ཁོ་མོའི་ཁ་བཀག་ཏེ། “ … …ཁྱོད་ཀྱི་ཟ་མ་ག་རེ་ཟ་གི་ཡོད། ཁྱོད་ཀྱི་ཁམ་ལེབ་ཟ་གྱི་ཡོད་དམ། ཁམ་ལེབ་ཀྱི་གཤེར་ཁུ་འཐུང་གི་ཡོད་དམ། … ཁྱོད་ཀྱིས་་སྣུམ་ལྡན་སིལ་ལྗང་ཟ་གི་ཡོད་དམ།” ཞེས་ཕར་ཁོ་མོའི་གདོང་ལ་གཟས་ཏེ་དྲི་བ་ཚ་ནན་བཏང་བ་ལ། ཁོ་མོ་འུ་ཐུག་ཏེ་ལན་དུ། “ཡོད། ངས་རྩི་ཤིང་ལས་བྱུང་བའི་ཁམ་ལེབ་ཀྱི་གཤེར་ཁུ་འཐུང་གི་ཡོད།…རྩི་ཤིང་ལས་གྲུབ་པའི་སྣུམ་ལྡན་སིལ་ལྗང་ཟ་གི་ཡོད”་ཅེས་པར། ཁམ་ལེབ་དང་སྣུམ་ལྡན་སིལ་ལྗང་གི་རྭ་བར་ཤིང་སྡོང་ལ་མེ་ཏོག་བཞད་དུས་དེར་མེ་ཏོག་གི་ཟེ་འབྲུ་ཕོ་མོ་མཚམས་སྦྱོར་ཆེད་དུ་དབོར་འདྲེན་བྱས་པའི་ཁྱིམ་གསོས་བུང་བ་ཕོན་ཆེན་དུག་རྫས་ཀྱིས་རྐྱེན་ལམ་དུ་གཏོང་གི་ཡོད་པ་དཔེ་མཚོན་དུ་དྲངས་ཏེ། “ བུང་བ་སེམས་ཅན་རེད་དམ། …ཁྱེད་ཅག་གིས་དུད་འགྲོ་སེམས་ཅན་ལ་སེམས་འཁུར་བྱེད་ཀྱི་ཡོད་རེད། ཡིན་ནའང་། སེམས་ཅན་ཉག་ཕྲ་བའི་རིགས་སྣང་མེད་དུ་བཞག་ཡོད…། ཅེས་ཝེ་རྒན་དཀར་ཟས་གཙང་མར་འབོད་པའང་ལག་དམར་བ་ཡིན་པའི་མཚང་འབྲུ་བྱས་ཡོད།
ད་དུང་ཁོས་བརྙན་འཕྲིན་སྡིངས་ཆ་དེ་རང་དུ། “ཁྱེད་ཅག་གིས་ང་ནམ་ཡང་འགྱུར་བ་གཏོང་ཐུབ་ཀྱི་མ་རེད ….འདི་ནི་རང་དབང་དང་དམངས་གཙོའི་ལུང་བ་ཞིག་དང་ངས་ཤ་ཟ་ཆོག་གི་ཡོད་རེད། ཁ་ཅིག་གིས་བུང་བ་བསད་དེ་སྣུམ་ལྡན་སིལ་ལྗང་ལ་རོལ་ཆོག་ན་ངས་ཤ་ཟ་རུང་བར་ངེས”་ ཞེས་ད་ལྟ་རང་མ་ཁི་ རྡོ་ནྭ་ཟ་ཁང་ནས་སྐྱེལ་ཡོང་བའི་གླང་ཤ་བར་བཙུད་ཅན་Big Mac་འབོད་པའི་ཁ་ཟས་བག་ལེབ་ཞིག་གི་མགོ་ལ་སོ་འདེབས་བཞིན་ཟོས། ཁོས་ད་དུང་དུས་སྐབས་གཞན་ཞིག་ཏུ། རང་གིས་གཙོ་སྐྱོང་བགྱིད་པའི་ལེ་ཚན་དེ་ག་རང་དུ། དུད་འགྲོ་རང་དབང་རྩོད་ལེན་པ་དང་དཀར་ཟས་པ་ཝེ་རྒན་ཕོ་གསར་ཞིག་ལ་ཁ་རྩོད་རྒྱག་ཞོར་གླང་ཤ་བསྲེག་མ་སྡེར་མ་གང་མདུན་ཅོག་སྟེང་བཞག་ཏེ་གྲིས་གཞར་བཞིན་ཟོས། ཕིར་སི མོ་རྒན་ལགས་ཀྱིས་མི་ས་ཡ་མང་པོས་ལྟ་ཉན་བྱེད་པའི་སྡིངས་ཆ་དེ་འདྲ་ཞིག་ནས་དཀར་ཟས་ཝེ་རྒན་རྗེས་འཇུག་པ་ལ་དེ་འདྲ་ཁ་རུ་ཁ་ཐུག་གི་རྒོལ་རྡུང་བྱེད་སྟངས་ནི་དངོས་གནས་སྐྱི་གཡའ་བ་ཞིག་རེད།
དམར་ཟས་ལ་བསྟེན་མཁན་ཞིག་ཡིན་ཚེ་རང་གི་སེམས་ཀྱི་གཏིང་རིམ་ན་གསལ་ལེར་ཡོད་པ་ནི། དུད་འགྲོའི་ཤ་ཟ་ཐེངས་རེ་དང་ཁུ་ཁྲག་འཐུང་ཐེངས་རེར། དེ་ནི་ཞེད་པའི་མིག་གིས་རིག་རིག་ལྟ་ཞིང་། སྐྲག་པའི་སྙིང་ཆུང་ལྟིག་ལྟིག་ལྡིང་བའི་སྲོག་ལྡན་མགོན་མེད་སྐྱབས་མེད་ཅིག་གསོད་གཏུབ་བཅད་གསུམ་གྱི་སྡུག་བསྔལ་ལ་སྦྱར་བའི་ཤ་ཁྲག་ཡིན་པར་རྩོད་པ་མེད་ལ། སྡིག་ལས་དེ་ནི་ཆོས་དང་འཇིག་རྟེན་གང་གི་ཕྱོགས་ནས་ཀྱང་བདེན་པར་སྒྲུབ་མི་ཐུབ་པ་དང་དེ་བདེན་པར་སྒྲུབ་པའི་ཚུལ་ཙམ་ཡང་བྱ་མི་འོས་པ་ཞིག་ཡིན། དེ་ལ་སངས་རྒྱས་ཀྱི་གསུང་དང་འདུལ་བའི་ལུང་འདྲེན་པ་དང་རྣམ་གསུམ་དག་པའི་ཤ་ཡིན་ཟེར་བ་སོགས་ཀྱིས་འགྲེལ་བཤད་གཏན་ནས་མི་འགྲོ་བ་ཞིག་ཡིན། དེ་མཚུངས། སྔོ་ཟས་ལ་བསྟེན་མཁན་གྱི་ཕོར་སྡེར་ནང་གི་མིག་ལ་མཛེས་ཤིང་དམར་དྲི་མི་བྲོ་བའི་དཀར་ཟས་ཀྱི་རྒྱབ་ངོགས་ན་འབུ་སྲིན་ཐེར་འབུམ་བརྒལ་བའི་ཚེ་སྲོག་གིས་རྒྱང་འབོད་བྱེད་པའི་དམྱལ་ཁམས་ཆེན་པོ་ཞིག་ཡོད་པ་དེ་ཡང་དེ་འདྲ་མཁྱེན་དཀའ་བ་ཞིག་མིན།
ངེད་ཁྱིམ་གྱི་ཕར་ངོས་ནི་ས་ཁྱོན་ཡངས་ལ་ཁ་ཞེང་ཧ་ཅང་ཆེ་བའི་མ་རྨོས་ལོ་ཏོག་དང་སོ་ཡ་སྦིན་སྲེན་སེར་གྱི་ཞིང་ས་ཡིན། འཕྲུལ་ཆས་ཀྱིས་ཞིང་ས་ཕྲུ་སློག་བྱས་མ་ཐག་གྲངས་ཀྱིས་མི་ལངས་པའི་བྱ་དང་བྱེའུ་ཞིང་ཁ་དེར་བབས་ནས་ས་ཁར་དེད་པའི་འབུ་གསོན་པོའི་རྒུམ་བུ་འཐུ་དུས། སྙིང་ལ་ཙག་ཤད་ཅིག་རྒྱུག་ལ། ཁ་ནས་ཨ་ཁ་ཟེར་བའི་སྐད་ངན་ཞིག་རང་དབང་མེད་པར་ཤོར་འགྲོ། ད་དུང་། ཞིང་ལ་ཆུ་ལུད་སྦྱོར་སྐབས་དང་བཙས་བརྔ་སྟོན་སྡུད་ཀྱི་དུས་སུ་དེར་གནས་ཙི་ཙི་དང་ཨ་བྲ། ཚང་སྦུབས་ཀྱི་བྱེའུ་ཕྲུག་དམར་རྗེན། རི་བོང་། སའི་སྟེང་འོག་དང་ལོ་ཏོག་གི་འབྲས་བུ་དང་ལོ་འདབ། རྩ་བ། གཞུང་རྟ། ཤུན་བུར་སྐྱབས་འཚོལ་བའི་སེམས་ཅན་ཕྲ་མོ་ག་ཚོད་མང་པོ་ཞིག་རྐྱེན་ལམ་དུ་གཏོང་གི་ཡོད་པ་ཚོད་དཔག་མི་ཐུབ་པ་ཞིག་ཡིན། དེ་ནི། འབྲུ་རིགས་འདེབས་ལས་གཅིག་པུ་མིན་པར། སྔོ་ཚལ་དང་ཤིང་འབྲས་ཐོན་བསྐྱེད་སོགས་ལའང་རིགས་བགྲེས་ཆོག། འབྲུ་རིགས་དང་སྔོ་ཚལ། ཤིང་འབྲས་འདེབས་འཛུགས་ཁྲོད་འབྲུ་སྲིན་དང་སེམས་ཅན་ཉག་ཕྲ་བའི་རིགས་ཀྱི་སྲོག་གཅོད་ཀྱི་གཤེད་མ་ཆེན་མོ་ནི་དུག་རྫས་ཡིན་འདུག
རི་སྤྱང་ཁེར་འགྲོའི་༼རང་བྱུང་ཁོར་ཡུག་གི་ན་ཚ་ཞིག་གླེང་བ༽་ཞེས་པའི་རྩོམ་ཡིག་ལྟར་ན། “ཨ་རི་ལྟ་བུར་མཚོན་ན། བརྒྱ་ཕྲག་ཉི་ཤུའི་དཀྱིལ་དུ་ཞིང་ས་དང་ཤིང་ནགས་ཀྱི་གནོད་འབུ་དང་ །རི་འགོའི་ཨ་བྲ་སོགས་ལ་ཁ་གཏད་གཅོག་བྱེད་དུག་འདུས་སྦྱར་རྫས་སྟོང་ཕྲག་བཞི་ལྔ་ལྷག་ཡོད་འདུག་ལ། ཉེ་ཆར་ཁོར་ཡུག་སྲུང་སྐྱོབ་ལས་ཁུངས་ཤིག་གི་ཞིབ་འཇུག་སྙན་ཐོ་ལྟར་ན། ད་ལམ་ཨ་རིའི་ནང་ལོ་རེར་དུག་རྫས་ལྗིད་ཚད་ཏུན་དུང་ཕྱུར་མང་པོ་མིང་བྱང་མི་འདྲ་བ་༡༨༠༠༠་ཙམ་གྱི་འོག་ཚོང་འགྲེམས་བྱེད་ཀྱིན་ཡོད་པའི་ཁྲོད། བརྒྱ་ཆའི་བདུན་ཅུ་ནས་བརྒྱུད་ཅུ་དེ་ཞིང་ཁར་གཏོར་ཀྱིན་ཡོད་འདུག ”་ལ། དེ་རྣམས་ཀྱི་ཁྲོད་ཆེས་གནོད་འཚེ་དང་གདུག་པ་ཅན་གྱི་དུག་རྫས་ནི་སྒྲི་སྒྲི་ཐྲི་ཞེས་པ་དེ་ཡིན་འདུག ཕྱིས་སུ་༼ཁུ་སིམ་པའི་དཔྱིད་ཀ༽་ཞེས་པའི་དཔེ་དེབ་དེའི་ཤུགས་རྐྱེན་ལས་ཨ་རི་དབུས་གཞུང་ཁོར་ཡུག་སྲུང་སྐྱོབ་ལས་ཁུངས་ཟེར་བ་ཆེད་བཙུགས་གནང་ནས། ཨ་རི་ནང་སྐབས་དེར་ཅི་ཡོད་དུག་རྫས་ཐོན་བསྐྲུན་གྲངས་བཤེར་ཐོ་འགོད་དང༌། ཁྲིམས་ཐོག་ནས་དུག་རྫས་སྦྱོར་སྟངས་ལེགས་སྤེལ་དང་བེད་སྤྱོད་བྱེད་སྟངས་ཚད་ལྡན་གྱི་ཕྱོགས་སུ་སྐུལ་འདེད་ཀྱི་ཁྲིམས་གཞི་བསྐྱར་བཅོས་དང་གསར་བཟོས་བྱས་པ་མ་ཟད། ༡༩༧༢ ལོར་སྒྲི་སྒྲི་ཐྲི་དུག་སྦྲང་གི་འདར་ཟིག་ན་ཚ་སྔོན་འགོག་ཆེད་མ་གཏོགས་ཞིང་ས་དང་ནགས་ཚལ། འབངས་ཀྱི་སྐྱེད་མོའི་ཚལ་སོགས་སུ་བེད་སྤྱོད་གཏོང་མི་ཆོག་པའི་་ཁྲིམས་གཞི་བཅོས་ཟིན། ཡིན་ནའང་། སྒྲི་སྒྲི་ཐྲི་ལྔ་ལམ་དུ་སྐྱེལ་མ་བྱས་ནས་མི་ལོ་ཉི་ཤུ་ལྷག་གི་རྗེས་ཀྱི ལོ་རབས་དགུ་ཅུའི་ནང་དེའི་གདོན་སྤྲུལ་ལྟ་བུར་ཎི་འོན་ ནི་གུ ་ཞེས་པའི་དུག་རྫས་ཀྱི་རིགས་ཤིག་འཛམ་གླིང་ཁྲོམ་རྭ་ལ་ཐོན་ནས་འབྲུ་རིགས་དང་སྔོ་ཚལ། སིལ་སྡོང་སོགས་ཀྱི་ཞིང་རྭ་དང་། སྡོད་ཁྱིམ་གྱི་སྐྱེད་ཚལ་སོགས་སུ་འབུ་སྲིན་གསོད་བྱེད་དུ་སྤྱད་དང་སྤྱོད་བཞིན་ཡོད་ལ། སྦྱར་དུག་དེ་འབྲུའི་ས་བོན་ལ་འབྱུག་པ་དང་། ཤིང་སྡོང་གི་རྩ་བ་དང་ས་འོག་ལ་སྦེད་པ། ཞིང་རྭའི་ཡུར་ཆུ་ནང་འདྲེན་པ། གཤེར་ཁུ་ལ་བསྲེས་ཏེ་ཆུ་གཏོར་ཡང་བྱེད་ཀྱི་ཡོད།
ཎི་འོན་ ནི་གུ་ལ་ནང་ཚན་རིགས་བརྒྱད་ཙམ་དང་། དེའི་ཁྲོད་ཀྱི་རྫས་སྦྱོར་དུག་ཤེད་ཆེ་བ་ཁག་ཅིག་ཡོ་རོབ་དང་ཨ་རིའི་ས་ཆ་ཁ་ཤས་ནང་འགོག་ཐུབ་ཡོད་ནའང་། རྫས་སྦྱོར་ཚོང་ལས་ཁང་སྟོབས་ཆེན་ སྦེད་ཡིར ་གྱིས་རྒྱུ་སྟོབས་ལ་མ་དོ་ནས་དེ་ཆ་ཚང་བ་འགོག་ཐུབ་མེད། ཁོར་ཡུག་སྲུང་སྐྱོབ་ཚོགས་པ་དང་ཚན་རིག་པ་དང་དོ་སྣང་ཅན་མི་སྒེར་མཉམ་རུབ་ཐོག་དུག་རྫས་དེ་གཏན་འགོག་ཆེད་ཨ་རིའི་དབུས་གཞུང་ཁོར་ཡུག་སྲུང་སྐྱོབ་ལས་ཁུངས་ལ་གཏུགས་བཤེར་དང་། ཨ་རིའི་དབུས་གཞུང་ཁོར་ཡུག་སྲུང་སྐྱོབ་ལས་ཁུངས་ཀྱི་ནང་ཚན་འབུ་གསོད་དུག་རྫས་ཞིབ་གཤེར་ཐོ་འགོད་སྡེ་ཚན་གྱི་ལས་ཀ་ཚད་ལྡན་མེད་པའི་ཁྲིམས་གཏུགས་བྱས་པ་སོགས་བྱུང་ཡོད ། ད་དུང་གཞུང་ཁུངས་མིན་པའི་ཁོར་ཡུག་སྲུང་སྐྱོབ་ཚོགས་པ་ཞིག་གི་དྲ་ངོས་སུ་ཨ་རིའི་གཞུང་ཁོངས་ཁོར་ཡུག་སྲུང་སྐྱོབ་ལས་ཁུངས་ནི་ Department of Yes ་རེད་ཅེས་མཚང་མིང་ཡང་བཏགས་ཡོད། དེ་ནི་དཔལ་འབྱོར་གྱི་དཔུང་ཤེད་ཆེ་བའི་དུག་རྫས་ཚོང་ལས་ཁང་གིས་གང་བགྱི་ལ་ལགས་སོ་ཟེར་བ་ལས་དུག་རྫས་སྦྱོར་བ་ཚད་འཕེར་ལྡན་མིན་ལ་ཞིབ་འཇུག་རང་རྐྱ་འཕེར་བ་གནང་ཐུབ་མེད་པའི་གོ་བརྡ་སྟོན་གྱི་ཡོད།
ཎི་འོན་ ནི་གུ་དུག་རྫས་འདི་ཨ་རི་ནང་དུ། མ་རྨོས་ལོ་ཏོག་དང་ཡོངས་དཀར། སྲིང་བལ། བུ་རམ་མངར་ཤིང་གི་ཞིང་ཁའི་བརྒྱ་ཆ་གོ་ལྔ་དང་སྲན་སེར་ཞིང་ཁའི་བརྒྱ་ཆ་ལྔ་བཅུ་ལ་བཀོལ་སྤྱོད་བྱེད་ཀྱི་ཡོད་ལ། དེ་མིན། ཀུ་ཤུ་དང་ སེའུ་རིགས། ཁམ་བུ། ཚ་ལི་མ། རྒུམ་འབྲུམ། སྔོན་ཚལ་རིགས། ཞོག་ཁོག ཀྲོ་མ་ཀྲོ་སོགས་ཤིང་ཏོག་དང་སྔོ་ཚོད་མང་ཆེ་བའི་ཐོག་བེད་སྤྱོད་གཏོང་གི་ཡོད་འདུག སྦྱར་དུག་འདིའི་བྱེད་ལས་འབུ་སྲིན་གྱི་དབང་རྩའི་ཕྲ་ཕུང་ལ་འབྱར་ཏེ། དབང་རྩའི་མ་ལག་གཏོར་བཅོམ་དང་། དུག་རྫས་ཕོག་ཤེད་ལྕི་བའི་རིགས་དབང་རྩའི་མ་ལག་ཞ་བོར་གྱུར་ནས། ལུས་པོ་འདར་གསིག་རྒྱག་བཞིན་ག་ལེར་འཆི། དུག་ཤེད་ཆེར་མ་ཕོག་བའི་རིགས་ལུས་སྲུང་ནུས་པ་ཉམས་པ་དང་། དྲན་ཤེས་བགས་ལ་ཞྭ་བ། རིགས་རྒྱུད་སྤེལ་བའི་ནུས་པ་ཆག་པ་སོགས་ཀྱི་གནོད་འཚེ་ཕོག་པར་བྱེད།
ཚན་རིག་ཞིབ་འཇུག་པས་ཎི་འོན ཎི་གུས་བསྒོས་པའི་མ་རྨོས་ལོ་ཏོག་འབྲུ་རྡོག་གཅིག་ལ་བུང་བ་ཉིས་འབུམ་ལྔ་ཁྲི་འམ་དེ་ལས་མང་བ་གཞོམ་གཞིག་བྱེད་ནུས་ཡོད་པར་སྨྲ་ལ། ཎི་འོན་ ནི་གུའི་དམིགས་འབེན་ལྟེ་བ་ནི་ལོ་ཏོག་དང་སྔོ་ཚལ་ཤིང་འབྲས་ལ་གནོད་པའི་འབུ་སྲིན་ཡིན་ནའང་། དེ་ནི་དུག་ཤེད་ཧ་ཅང་ཆེ་བ་ཞིག་ཡིན་ཕྱིར། གནོད་འབུ་ལས་གཞན་ཞིང་ས་ལ་ཕན་པའི་འབུ་རིགས་གཞན་ཡང་ཐག་ཞོར་འབྲེང་འདྲུད་ཀྱིས་གཞིགས་ནས་ཞིང་ས་གཤིན་པོ་ལ་གཏོར་བརླག་དང་། དེ་ལས་གཞན། དུག་རྫས་དེ་ཁོར་ཡུག་ནང་མི་ཞུ་བར་ཡུན་རིང་སྡོད་མཁན་ཞིག་ཡིན་པས། སའི་རྟིང་ལ་བསྟིམས་པ་དང། ས་ཁར་ཆར་ཆུ་དང་རླུང་བུས་འཁྱེར་ནས་དུག་དེ་གཏོར་ཟིན་པའི་ཁོར་ཡུག་གི་དཀྱིལ་འཁོར་ཡོངས་ལ་བཀྲམ་འཐོར་འགྲོ་བར་བྱེད། ད་དུང་དུག་རྫས་དེ། ས་བོན་བརྒྱུད་ནས་རྩ་བ་དང་གཞུང་རྟ། ཤུན་པ། ཡལ་ག ལོ་མ། ཟེ་འབྲུ། གང་བུའི་མངར་ཆུ། འབྲས་བུ་སོགས་ཀྱི་ནང་འཐིམས་དེ་ལོ་ཏོག་དང་སྔོ་ཚོད། ཤིང་སྡོང་གི་ཆ་གང་སར་གནས་བ་དང་དེ་རྣམས་ལོངས་སྤྱོད་བྱེད་མཁན་འབུ་སྲིན་གྱི་རིགས་གཙོས་སེམས་ཅན་གྲངས་ཀྱིས་མི་ལང་བ་ལ་གནོད་འཚེ་ཕོག་ཀྱི་ཡོད་འདུག
འཛམ་གླིང་གི་མིས་སྤྱོད་པའི་ཟས་ཀྱི་སུམ་ཆའི་གཅིག་ནི་བུང་བ་གཙོ་བའི་ཕྱེ་མ་ལེབ་དང་། ཕ་ཝང་། བྱེའུ་ཕྲན། རང་བྱུང་རླུང་བུ་སོགས་ཀྱིས་ཟེ་འབྲུ་ཕོ་མོ་དབོར་འདྲེན་དང་མཚམས་སྦྱོར་བགྱིད་པའི་ཉེར་ལེན་ལ་བརྟེན་ནས་སྟོན་འབྲས་སྨིན་ལེགས་བྱུང་བ་ཞིག་ཡིན་འདུག་ལ། ཨ་རིའི་མངའ་སྡེ་ཁ་ལི་ཧྥོར་ཉི་ཡ་ལྟ་བུར་མཚོན་ན། དེ་ནི། འཛམ་གླིང་གི་ཁམ་ལེབ་བརྒྱ་ཆ་ལྔ་བཅུའི་ཐོན་ཁུངས་དང་ཨ་རི་རྒྱལ་ཡོངས་ཀྱི་སྣུམ་ལྡན་སིལ་ལྗང་ཕོན་ཆེ་ཐོན་སའི་ཕ་ས་ལ། རྒྱ་ཁྱོན་ཨི་ཀ་བརྒྱད་འབུམ་ལོང་བའི་ཁམ་ལེབ་ཀྱི་སིལ་སྡོང་རྭ་བ་ལ་དཔྱིད་ཀྱི་མེ་ཏོག་བཞད་དུས་། ཨ་རིའི་རྒྱལ་ཡོངས་ཀྱི་མིས་གསོས་བུང་བ་ས་ཡ་གཅིག་དང་དྲུག་འབུམ་ཙམ་དེ་གར་དབོར་འདྲེན་གྱིས་ཤིང་སྡོང་གི་མེ་ཏོག་ཟེ་འབྲུ་ཕོ་མོ་མཚམས་སྦྱོར་གྱི་ལས་ལ་བསྐུལ་གྱི་ཡོད་པའི་ཁྲོད། ཎི་འོན་ ནི་གུའི་དུག་ཕོག་ནས་ཤིག་རྐྱེན་ཐེབས་པ་བརྒྱ་ཆ་བཞི་བཅུ་ནས་ལྔ་བཅུ་ལ་ཟིན་པར་བཤད། དེ་ལ། ཁོར་ཡུག་སྲུང་སྐྱོབ་ཆེད་མཁས་པ་དང་འབུ་སྲིན་རིག་པ་ཞིག་འཇུག་པས་མགྲིན་དབྱངས་གཅིག་གྱུར་ཏུ་ ནི་འོན ནི་གུ་ནི ་ཁྲིམས་ཐོག་ནས་བཀག་ཟིན་པའི་སྒྲི་སྒྲི་ཐྲི་དུག་རྫས་ལྟར་གནོད་འཚེ་ཅན་ཞིག་དང་། སྦྲང་རྩི་གསོག་མཁན་བུང་བ་དང་འབུ་སྲིན་གྱི་ཐོག་ལྡབ་མང་གིས་གནོད་ཚབས་ཆེ་བར་བརྗོད།
ང་ཚོས་རང་གི་ཁ་ཟས་ཆེད་འབུ་སྲིན་ཉམ་ཆུང་ཐོག་དུག་བཏབ་སྟེ་ཁོང་ཚོའི་སྐྱིད་པའི་ཚང་གནས་གཏོར། གཅེས་པའི་ཚེ་སྲོག་འཕྲོག་ཤུལ་དུ། ད་དུང་དཀར་ཟས་དང་རྣམ་དག་དཀར་ཟས་ཞེས་འབོད་རྒྱུ་ཞིག་གང་ན་ལྷག་ཡོད།
མགོ་བོ་རུམ་ལ་བཅུག་ཏེ་བསམ་གཞིགས་ཤིག་བྱས་ཚེ། རྣམ་དག་དཀར་ཟས་ལ་རོལ་མཁན་ངོ་མ་ཞིག་འཇོག་དགོས་ན་ཧ་ཅང་ཁག་པོ་རེད། རྫུ་བག་ཅན་གྱི་ཝེ་རྒན་ཚོ་དཔེ་མཚོན་དུ་མི་འོས་ལ། ། རྒྱ་གར་གྱི་གཅེར་བུ་བ་ཚོ་ཡང་མི་རུང་ན། བྲག་དཀར་རྟ་སོར་ཟྭ་ཆིག་སྔོ་ལྡུམ་ལ་རོལ་མཁན་རྗེ་མི་ལ་ཁོང་འོས་པ་འདུག་གམ་འདྲི་བཞིན་རྗེ་མི་ལའི་རྣམ་མགུར་སླར་ཡང་བམ་ཀློག་ཅིག་བྱ་དགོས་བྱུང་། རྗེ་མི་ལ་བྲག་དཀར་རྟ་སོར་སྒོམ་སྒྲུབ་ལ་ཕེབས་དུས། ཨ་ནེས་ཞིང་རིན་ལ་ཕུལ་བའི་ཕྱེ་ཁལ་གསུམ་དང་། ཐུལ་གོག་གཅིག རས་གོས་ལྡང་གཅིག ད་དུང་མར་ཚིལ་འདྲེས་པའི་ཆུ་སྡོར་ཕུལ་བའང་བསྣམས་འདུག འདིའི་སྐབས་ཀྱི་ཚིལ་ནི་ཤ་ཚིལ་ཡིན་ཚེ། རྗེ་ཁོང་རི་ལ་ཡེངས་མེད་སྒོམ་སྒྲུབ་ལ་ཕེབས་དུས་ད་དུང་རྣམ་དཀར་དགེ་ཟས་ལ་རོལ་མཁན་ཞིག་རེད་མི་འདུག དེར་སྒོམ་སྒྲུབ་ལོ་བཞི་ཙམ་སོང་བ་ན། འཚོ་རྒྱགས་ཟད་ནས་སྒྲུབ་ཕུག་གི་སྒོ་ཕྱི་ལ་བུད་ནས་ཟས་འཚོལ་ཏུ་ཞབས་ཐང་ལ་ཕེབས་པ་ན། ཉི་མ་དྲོ་ས། ཆུ་བཟང་ས་ཞིག་ན། ཟྭ་ཚོད་མང་པོ་སྐྱེས་པ་མཇལ་འདུག ཟྭ་ཚོད་བཟང་བའི་གནས་དེ་ནི་ཁོད་ཡངས་ཤིང་མཐོང་ཡེལ་ཆེ་བ། ཡིད་ལ་དྭངས་བ་འདྲེན་པ་ཞིག་ལགས་པས་དེ་གའི་ཕུག་པ་ཞིག་ནང་གནས་སྤོར་ཏེ་ཟས་སུ་ཟྭ་ལྡུམ་རང་བསྟེན་ཏེ་སྒོམ་སྒྲུབ་ལ་གཞོལ། ཟྭ་ཆིག་ཁོ་ན་བསྟེན་ཕྱིར་ལུས་ཀེང་རུས་ལྟར་སོང་ཞིང་སྐུ་མདོག་ཟྭ་པོའི་མདོག་རང་དུ་གྱུར་ནས། ཐ་ན་སྐུ་ལུས་ཀྱི་བ་སྤུའང་སྔོ་ཞོ་ལེ་བྱུང་ཡོད་འདུག གྲོད་གསུས་མ་བདེ་བ་དང་ཟྭ་བཞེས་པའི་སྒྲེག་པ་ཆིལ་ལི་ལི་བྱུང་བའང་གསུངས་འདུག དུས་སྐབས་དེའི་རྗེ་བཙུན་མཆོག་ནི་དཀར་ཟས་རྣམ་དག་སྤྱོད་མཁན་གྱི་དཔེ་མཚོན་དུ་བགྲང་ན་མི་འོས་པ་མེད་པ་འདྲ།
དེ་ལྟར། ཟྭ་ལྡུམ་རང་བཞེས་ནས་ལོ་གཅིག་སོང་བ་དང་། སྐུ་ཡི་ན་བཟའ་ཡང་ཟད་པས། ཨ་ནེས་ཕུལ་བའི་གོས་དང་ཕྱེ་སྒྱེ་རལ་བོ་ཆད་མ་མཐུད་དེ་སྐུ་ལུས་ལ་གསོལ་དེ་མུ་མཐུད་སྒོམ་སྒྲུབ་ལ་ཞུགས་ཏེ་ཡང་ལོ་གཅིག་སོང་། སྐབས་དེ་ཤད་ཅིག་ལ་ཁྱི་ར་བ་འགའ་རྗེའི་བྲག་ཕུག་ནང་འཛུལ་ནས་ཡར་བལྟ་མར་བལྟ་བྱེད་དུས། ཟས་སུ་ཟྭ་ཁོ་ན་དང་སྐུ་ལུས་ཧ་ཅང་ཉག་ཕྲ་བའི་གནས་སུ་གྱར་ཡོད་པ་མཐོང་འདུག དེར་ཁྱི་ར་བས་ཤ་མང་པོ་དང་རྒྱགས་ཕྱེ་ལྷག་མ་གང་ཡོད་པ་རྗེ་ལ་ཕུལ་བ་རྗེས་མི་ཟས་ཟ་རྒྱུ་རྙེད་སོང་ཞེས་དགའ་ཚོར་དང་བཅས་ཤ་བཞེས་འདུག་ལ། ཤ་ཚོད་བཞེས་པར་སྐུ་ལུས་བདེ་འབོལ་ལེ་དང་ཁམས་དྭངས་སིང་བ། རིགས་པ་ངར་ཆིལ་ལེ་བྱུང་འདུག ཕྱིས་སུ་སྲིང་མོ་དང་མཛེས་སེ་ཡང་བྲག་དཀར་རྟ་སོར་རྗེ་བཙུན་མཇལ་དུ་སླེབས། པེ་ཏ་མགོན་སྐྱིད་ཀྱིས་རྒྱགས་རྟེན་དུ་ཤ་ཕུལ་བ་མི་གསལ་ཡང་། མཛེས་སེས་རྗེ་ལ་ཤ་མར་རྙིང་བའི་འཚོ་རྟེན་ཕུལ་འདུག
ཕྱིས་སུ་རྗེ་ཁོང་ལ་ཕྱི་གངས་གཟིགས་ལ་ཕེབས་སྐབས་གཉའ་ནང་དུ་རྩར་མ་པ་རྣམས་ཀྱིས་འཚོ་ཆས་སུ་ཕྱེ་བྲེ་དོ། འབྲས་བྲེ་གང་། ཤ་གཟུག་གཅིག མར་ཞོགས་གཅིག་ཕུལ་བ་རྣམས་བསྣམས་ཏེ་བདུད་འདུད་ཕུག་མོ་ཆེར་བྱོན་ནས་བཞུགས་འདུག དེར་བཞུགས་རིང་ནུབ་ཅིག་ཁ་བ་འབབ་འགོ་ཚུགས་ཏེ་ཉིན་མཚན་བཅོ་བརྒྱད་ལ་གངས་བབས་པས་འགྲུལ་ལམ་ཆད་ནས་ཟླ་བ་དྲུག་སོང་བ་ན། སློབ་འབངས་ཚོས་རྗེ་བཙུན་སྐུ་གྲོངས་བར་ཐག་བཅད་ནས་དགོངས་རྫོགས་མཆོད་འབུལ་བགྱིས། ཕྱིས་ལོའི་ས་ག་ཟླ་བ་ལ་གངས་ལམ་སྟ་རེས་གསིལ་ཏེ་རྗེའི་སྐུ་པུར་གདན་འདྲེན་དུ་ཕྱིན་པ་ན་རྗེས་མགུར་ལེན་ཞིང་བཞུགས་པ་མཇལ། རྗེ་བཙུན་གྱིས་སྔོན་ལོ་འཁྱེར་བའི་འཚོ་ཆས་ལས་ཕྱེ་བྲེ་གང་མ་གཏོགས། འབྲས་དང་ཤ་བཞེས་ཡོད་མི་འདུག དེར་སློབ་བུ་གཤེན་རྡོར་མོས་རྗེ་བཙུན་ན་ནིང་ལས་ཀྱང་སྐུ་མདངས་ཤིན་ཏུ་བཟང་བ་འདུག་པ་ལྷ་འདྲེས་ཞབས་ཏོག་བགྱིས་སམ་རི་དྭགས་ཀྱི་ཐེད་རོ་རྙེད་ནས་བཞེས་སམ་དྲིས་བར། རྗེ་བཙུན་གྱིས་ཁོང་ཏིང་ངེ་འཛིན་ལ་ནང་བྱན་ཆུབ་ཟིན་པས་ཟས་རགས་པ་ཆེར་བརྟེན་མི་དགོས་པ་གསུངས་འདུག་པས། ཏིང་འཛིན་ཟས་སུ་སྤྱོད་པའི་གྲུབ་པ་བརྙེས་ནས་བཟུང་འཚེ་བའི་སྡིག་ཟས་གཏན་སྤངས་ཀྱིས་ཏིང་འཛིན་དང་སྔོ་ཟས་སྤེལ་མར་བསྟེན་ནས་བཞུགས་པ་ཨེ་ཡིན་ནམ་སྙམ།
རྗེས་སུ། རྗེ་བཙུན་མཆོག་གིས་བྱང་ཆུབ་རྫོང་དུ་ཡོན་བདག་ལྷ་འབར་ལ། “ ང་རིགས་དྲུག་འཁྲུལ་བའི་གྲོང་ཁྱེར་དུ།། རྣམ་ཤེས་འཁྲུལ་བའི་ཁྱེའུ་ཆུང་འཁྱམས།། ལས་ཀྱི་འཁྲུལ་སྣང་སྣ་ཚོགས་མྱོང་།། རེས་འགའ་ལྟོགས་པའི་འཁྲུལ་སྣང་བྱུང་། །རོ་སྙོམས་ལྡུམ་བུ་ཟས་སུ་ཟོས།། … … ང་ནི་ཟས་མེད་ལྡུམ་བུ་བ།། ང་ནི་གོས་མེད་གཅེར་བུ་བ།།”་ཞེས་དང་ གཉི་ཤང་འགུ་རྟ་རུ་ཁྱི་ར་བ་མགོན་པོ་རྡོ་རྗེ་ལ། “ཟྭ་དང་རུག་པ་ཐུལ་བ་གསུམ།། འདི་གསུམ་མི་ལའི་ཁ་ཟས་ཡིན།། ཟས་འདི་གསུམ་གྱི་ཡོང་ན་རས་པའི་ཕྱི་ལ་ཤོག ” ཅེས་གླུ་བླངས་འདུག
༢༠༢༢་ལོའི་ཕྱི་ཟླ་ ༡༢ ཚེས ༢༢ ལ།
