བྷར་ཛིལ་གྱི་སྲིད་འཛིན་གསར་པར་འཚམས་འདྲི་མཛད།

༧གོང་ས་རྒྱལ་བ་རིན་པོ་ཆེ་མཆོག་གིས་བྷར་ཛིལ་གྱི་སྲིད་འཛིན་གསར་པར་འཚམས་འདྲིའི་གསུང་འཕྲིན་སྩལ།

ཁ་སང་བྷར་ཛིལ་གྱི་སྐུ་ཞབས་ལུ་ལ་དྷ་སིལ་ཝ་ (Lula da Silva) ལགས་ལ་སླར་ཡང་རྒྱལ་ཁ་ཐོབ་ནས་སྲིད་འཛིན་དུ་འདེམས་ཐོན་བྱུང་ཡོད་པ་ལྟར། དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་གནས་མཆོག་རྡོ་རྗེ་གདན་ནས་ཁོང་ལ་འཚམས་འདྲིའི་གསུང་འཕྲིན་སྩལ་ཏེ། ཁོང་དང་ཁོང་གི་ཆབ་སྲིད་ཚོགས་པར་འཚམས་འདྲི་གནང་བ་དང་སྦྲགས། བྷར་ཛིལ་མི་མང་གི་རེ་བ་དང་མངོན་འདོད། ད་དུང་འཛམ་གླིང་འདིར་སླར་ལས་ལྷག་པའི་བདེ་སྐྱིད་ལྡན་ཞིང་ཞི་བདེའི་ཕྱོགས་སུ་བསྐྱོད་པའི་ཕུགས་འདུན་མངོན་འགྱུར་ཐུབ་པའི་བཀའ་སློབ་སྩལ་ཡོད་འདུག

༧གོང་ས་རྒྱལ་བ་རིན་པོ་ཆེ་མཆོག་གིས་སྩལ་བའི་འཚམས་འདྲིའི་གསུང་འཕྲིན་ནང་། ངོས་ཁྱེད་ཀྱི་རྒྱལ་ཁབ་ཏུ་ལན་འགར་བསྐྱོད་པའི་གོ་སྐབས་བྱུང་། ངོས་ཀྱི་འགྲོ་བ་མིའི་གཞི་རྩའི་རིན་ཐང་གཅེན་གཅུང་ཕན་ཚུན་གྱི་བདེ་སྡུག་ལ་སེམས་ཁུར་དང་སེམས་བཟང་པོ་གོང་མཐོར་གཏོང་ཐབས་ཀྱི་ལས་དོན་ལ་མི་མང་གིས་དོ་སྣང་བྱེད་བཞིན་པར་ཡི་རང་དང་བསྔགས་བརྗོད་ཞུ། ཞེས་གསུངས་འདུག

ཡང་༧མགོན་པོ་གང་ཉིད་ཀྱིས། སྐུ་ཉིད་ནས་བཀྲེས་སྐོམ་གྱིས་མནར་བཞིན་པའི་དཀའ་ངལ་སེལ་རྒྱུ་དང་། དབུལ་ཕྱུག་སྙོམས་སྒྲིག གནམ་གཤིས་འགྱུར་ལྡོག་དང་ལྷག་པར་ཨེ་མཱ་ཛོན་ཤིང་ནགས་ཀྱི་སྣོད་བཅུད་སྲུང་སྐྱོབ་བྱ་རྒྱུར་ཁས་ལེན་གནང་བར་བསྔགས་བརྗོད་བྱེད་ཀྱིན་ཡོད་ལ། སྐུ་ཉིད་ཀྱིས་བྷར་ཛིལ་མི་མང་གི་རེ་བ་དང་མངོན་འདོད་བསྐོངས་པ་དང་། ད་དུང་འཛམ་གླིང་འདིར་བདེ་སྐྱིད་ལྡན་ཞིང་སླར་ལས་ལྷག་གིས་ཞི་བདེའི་ཕྱོགས་སུ་བསྐྱོད་ཐུབ་པའི་ཕུགས་འདུན་མངོན་འགྱུར་ཡོང་བའི་སྨོན་ལམ་ཞུ། ཞེས་གསུངས་འདུག

ད་ལྟ་རང་ལོ ༧༧ ཡིན་པའི་སྐུ་ཞབས་ལུ་ལ་དྷ་སིལ་ཝ་ལགས་ནི་བྷར་ཛིལ་གྱི་བྱང་ཤར་ཁུལ་གྱི་སི་ཁྲི ( Caetés) ས་གནས་སུ་སྐྱེས་ཡོད་ཅིང་། ཁོང་ཆུང་དུས་ནང་མིའི་དཔལ་འབྱོར་གྱི་དཀའ་ངལ་དབང་གིས་སློབ་གྲྭ་བསྐྱུར་ནས་ཁྱིམ་དུ་ལོག་སྟེ། ཕ་མ་གཉིས་ལ་རོགས་རམ་གནང་ནས་བསྡད་ཡོད་ཀྱང་། ཁོང་ནི་བྷར་ཛིལ་གྱི་གྲགས་ཆེ་བའི་ཆབ་སྲིད་པ་དང་བྷར་ཛིལ་ངལ་རྩོལ་ཚོགས་པ་འཛུགས་མཁན་གྲས་ཡིན་པ་དང་། ཁོང་དེ་སྔོན་ ༡༩༨༩ དང་ ༡༩༩༤ ། ༡༩༩༨ བཅས་ཐེངས་གསུམ་ལ་སྲིད་འཛིན་འོས་མིར་ལངས་ཏེ་རྒྱལ་ཁ་ཐོབ་མེད་ཀྱང་།   ཕྱི་ལོ ༢༠༠༣ དང་ ༢༠༠༦ ལོར་སྲིད་འཛིན་རྒྱལ་ཁ་ཐོབ་སྟེ་ ༢༠༡༡ ལོའི་ཟླ་ ༡ བར་བྷར་ཛིལ་གྱི་སྲིད་འཛིན་བྱས། ཁོང་འདི་ལོར་སླར་ཡང་བྷར་ཛིལ་གྱི་སྲིད་འཛིན་དུ་བདམས་ཡོད་ཅིང་། དེ་ནི་ཁོང་གིས་བྷར་ཛིལ་གྱི་སྲིད་འཛིན་གནང་ཐེངས་གསུམ་པར་གྱུར་ཡོད་འདུག

གསར་འགོད་པ། དཔལ་ལྡན།