སྨན་སྔགས་ཟུང་འབྲེལ་གྱིས་གཞན་ཕན་སྒྲུབ་སྟངས། (ཚན་པ་དང་པོ)

དོ་སྤྲུལ་ཆོས་དབྱིངས་ཡེ་ཤེས་སམ་ཀླུ་སྨྱོན་ཧེ་རུ་ཀ

—ཚོགས་མི་ལྔ་བརྒྱ་ཡོད་པའི་གསོ་བ་རིག་པའི་སྐད་འཕྲིན་ཚོམས་ཆེན་ཞིག་གི་སྟེང་དུ་བརྗོད་པའི་སྐད་ཆ།

ཨེ་ཝཾ་གསང་སྔགས་གླིང་གི་ཆོས་གྲོགས་ཚང་མ་ལ་འཚམས་འདྲི་བཀྲ་ཤིས་བདེ་ལེགས་ཞུ། དེ་ནས་དྲྭ་གྲོགས་འོད་ཟེར་གོ་ཆ་ཚང་གིས་བདུན་ཕྲག་གཅིག་གཉིས་ཤིག་གི་སྔོན་ལ། ང་ལ་ཨེ་ཝཾ་གསང་སྔགས་གླིང་དུ་སྨན་དང་སྔགས་ཀྱི་ཟུང་འབྲེལ་སྐོར་ནས་སྐད་ཆ་ཅུང་ཙམ་བཤད་རོགས་ཅེས་བཀའ་ཕབ་སོང་། སྐྱེས་བུ་དམ་པ་དེ་འདྲ་ཡིས་བཀའ་ཕབ་པ་ཡིན་ན། རང་ལ་ཤེས་ཡོན་དེ་འདྲ་མེད་ན་ཡང་། སྐྱེས་བུ་དམ་པ་དེ་འདྲ་ཡི་བཀའ་བཅག་ན་འགྲིག་གི་མི་འདུག་བསམས་ནས་ལགས་སོ་ཞུས་ཡོད། དེ་ཙམ་ཅིག་མ་གཏོགས། སྨན་དང་སྔགས་ཀྱི་སྐོར་ལ་སྐྱེས་སྟོབས་ཀྱི་ཤེས་རབ་དང་སྦྱངས་སྟོབས་ཀྱི་ཡོན་ཏན། མཁས་པ་མགུ་བའི་ལེགས་བཤད། བླུན་པོའི་བློ་ཁ་འགྱུར་བྱེད། དེ་འདྲ་དམིགས་བསལ་ཅིག་ཡོད་པ་རྩ་བ་ཉིད་ནས་མིན། དེ་མིན་པ་ང་རང་ལ་རྒྱུས་ཡོད་པ་ཀུན་གྱིས་ཧ་གོ་གི་ཡོད།

ད་ཡིན་ན་ཡང་། སོ་སོ་སྐྱེ་བ་སྔོན་མ་ནས་ཚོགས་ཉུང་ཉུང་ཅིག་བསགས་ནས། བོད་གངས་ཅན་གྱི་བོད་མི་ཞིག་གི་སྐྱེ་བ་བླངས། དེ་ནས་ཡང་ག་ལེར་ག་ལེར་ནར་སོན་ནས། ཆོས་བརྒྱུད་རིས་སུ་མ་ཆད་པ། རྙིང་མ། བཀའ་བརྒྱུད། ས་སྐྱ། དགེ་ལུགས་པ། འདི་འདྲའི་ཆོས་བརྒྱུད་དག་གི་དགེ་བའི་བཤེས་གཉེན་དམ་པ་དྲུག་བཅུ་ལྷག་གིས་རྗེས་སུ་བཟུང་ནས། དབང་དང་ལུང་དང་ཁྲིད་དང་། མདོ་དང་སྔགས་ལ་སོགས་པ་མང་པོ་ཅིག་ཞུས་ནས་ཐོབ་མཁན་ཞིག་ཡིན། དེའི་ནང་ནས་སྨན་དང་སྔགས་ཟེར་བ་འདིའི་སྐོར་ལ་ན་སོ་གཞོན་པའི་སྐབས་སུ་ཡང་དོ་སྣང་ཡོད་མཁན་ཞིག་ཡིན་། ང་ཚོའི་ཕ་ཡུལ་ནས་སྨན་པ་ཞིག་བྱེད་པའི་རེ་བ་བརྒྱབ་སྟེ། གསོ་རིག་རྒྱུད་བཞིའི་ནང་ནས་གང་ལ་གང་འཚམ་ཞིག་བློ་ལ་བཟུང་སྟེ། གསོ་རིག་མཁས་དབང་དགེ་བཤེས་བྱམས་པ་འཕྲིན་ལས་ཚང་ལས་དེའི་ཐད་ཀྱི་དཔེ་ཁྲིད་ཞུས། སྨན་ཡིག་འདྲ་མི་འདྲ་ལ་བལྟས། དང་པོ་དཔལ་ལྡན་རྒྱུད་བཞི། དེ་ནས་དེའི་འགྲེལ་བ་སྡེ་སྲིད་སངས་རྒྱས་རྒྱ་མཚོ་ཡི་བཻཌཱུརྱ་སྔོན་པོ་ཡི་སྟོད་ཆ་སྨད་ཆ་གཉིས་ཡོད་པ་དེ་ཚོ་ལ་སློབ་སྦྱོང་བྱས། དེའི་རྗེས་སུ་ཡང་སྨན་ཡིག་འདྲ་མིན་ལ་སློབ་སྦྱོང་བྱས་ནས། འདས་པའི་ལོ་ཉུང་མཐའ་ཡང་སུམ་ཅུ་ལྷག་ལ་གསོ་བ་རིག་པར་སློབ་སྦྱོང་དང་དཔེ་བལྟས་བྱས་པ་ཡིན། ཡིན་ན་ཡང་། དངོས་སུ་སྨན་པ་ཡི་ལག་འཁྱེར་བླངས་ནས་སྨན་སྤྲོད་མཁན་དེ་འདྲ་ཞིག་མིན། དེ་ཐོག་མར་ཁྱེད་རྣམས་ལ་ཞུ་གི་ཡོད།

དེ་འདྲ་བྱས་ནས་སོ་སོ་ལ་མཚོན་ན་ཆུང་དུས་ནས་ད་ལྟའི་བར་དུ་སྨན་དང་རྩིས་ལ་སོགས་པར་སློབ་སྦྱོང་བྱས་ཏེ་རང་ཉིད་ཀྱིས་དགོས་མཐོ་བྱུང་དུས་ལག་ལེན་བྱེད་མཁན་ཞིག་ཡིན། དེ་ནས། ང་རང་གི་ཨ་མ་ཡི་ཕུ་བོ། དགེ་བའི་བཤེས་གཉེན་ཞིག་ཡོད་པ་རེད། རྡོ་རྗེ་རྣལ་འབྱོར་མའི་རྣལ་འབྱོར་བ་ཆེན་པོ་ཞིག་ཡོད་པ་རེད། ཁོང་གིས་བོད་སྨན་གནང་གི་ཡོད་པ་དེ་འདྲ་ཞིག་ཡིན། དེ་ནས་ང་རང་གི་སྙན་ངག་གི་དགེ་རྒན། དགེ་བའི་བཤེས་གཉེན་ཆེན་པོ་ཞིག་ཡོད་པ་རེད། ཁོང་ཡིན་ན་ཡང་བསམ་གྱིས་མི་ཁྱབ་པའི་སྨན་པ་མཁས་པ་ཆེན་པོ་རེད། ང་རང་ལ་མཚོན་ན་ལོ་ཤས་རིང་ཁོང་གི་མདུན་དུ་གསོ་རིག་རྒྱུད་བཞི་ལ་སོགས་པ་སློབ་སྦྱོང་བྱས་པ་ཡིན། དེ་ནས་ང་རང་གི་སྒེར་ལ་མཚོན་ན་ཡང་སྨན་ཆ་ངེ་ཆུང་ངེ་ལག་ལེན་བྱེད་པ་དང་མཉམ་དུ་སྔགས་ཀྱང་ཉམས་ལེན་བྱེད་མཁན་ཅིག་ཡིན། དཔེར་བཞག་ན། ང་ཚོ་འཁྱུད་དཔྱད་ཟེར་བ་ཞིག་ཡོད་པ་རེད། འཁྱུད་དཔྱད་ཟེར་བ། སྤྱིར་གཏང་གི་གྲོང་ཆོག་པ་དེ་ཚོས་ལག་ལེན་བྱེད་པ་། དཔེར་ན་མི་ཚང་གི་ཕྲུ་གུ་ཆུང་ཆུང་དེ་ཚོ་མཚན་མོ་ངུས་ནས་དངངས་སྐྲག་ཡོད་པ་དེ་ལ་ཡང་། ཕྲུ་གུ་དེའི་སྐེ་ལ་འཁྱུད་དཔྱད་ལས་བྱུང་བའི་སྲུང་འཁོར་དེ་འདྲ་བཏགས་པ་ཡིན་ན། མཚན་མོ་མི་ངུ་བ་དང་། དེ་ནས་ཡང་དགུན་ཁའི་མཚན་མོར། མཚམས་རེར་ནོར་དང་ལུག་ལ་སོགས་པ་རི་སྒང་དུ་ཞག་གཅིག་གཉིས་རེར་བསྐྱུར་བ་ཡིན་ན། སྤྱང་ཀི་དེ་འདྲ་ཡི་གནོད་འཚེ་མི་ཡོང་བའི་ཆེད་དུ། ངའི་པ་ལགས་ཀྱིས་རྡོ་གཡའ་མ་ཞིག་གི་ངོས་སུ་སྤྱང་ཀི་དེ་འདྲ་ཡི་རྐང་ལག་བཞི་བོ་དང་མཆུ་ཏོ་སོགས་ཐག་པས་བསྡམས་པ་ཞིག་བྲིས་ཏེ། དེ་ལ་སྔགས་འདྲ་བོ་བརྒྱབ་ནས་ས་འོག་ཏུ་སྦས་པ་ཡིན་ན། སྤྱང་ཀི་ཡི་གནོད་འཚེ་མི་ཡོང་འདྲ་བོ། དེ་འདྲ་མང་པོ་བྱས་མྱོང་ཡོད། དེ་ནས་ཡང་ཕྲུ་གུ་ཆུང་ཆུང་དེ་ཚོ་མི་འདྲ་མིན་དང་སྲོག་ཆགས་འདྲ་མིན་ལ་སོགས་པ་སྐྲག་ཐག་ཆོད་ནས། མཚན་གང་བོར་གཉིད་མ་ཁུག་པར་ངུ་རྒྱངས་བྱེད་པ་ཞིག་ཡོད་པ་རེད། དེའི་སྐབས་ཐོག་དེ་ལ་ཕྲུ་གུ་ཆུང་ཆུང་དེ་སུ་ལ་སྐྲག་པ་ཧ་མ་གོ་བར་འདུག་ན། དེ་ལ་ག་རེ་བྱེད་གི་འདུག་ཟེར་ན། དེའི་སྐབས་ཐོག་དེ་ལ་ཁ་སང་དེ་རིང་ནང་བཞིན་ཧ་ཡང་ལ་སོགས་པ་ལས་སླ་བོར་རག་གི་མི་འདུག སྐབས་དེར། རྒྱ་མིའི་སོ་སྨན་ཅིག་ཡོད་པ་རེད་ལ། སོ་སྨན་དེ་འདྲ་རིགས་གཅིག་རང་ཡོད་པ་རེད། རྒྱ་སྐད་དུ་ཀྲུང་ཧྭ་ཡ་གོ་ཟེར་བ་ཞིག་ཡོད་པ་རེད། ཀྲུང་ཧྭ་ཡ་གོ་ཟེར་བའི་པགས་པ་དེ་ཞ་ཉེ་རེད།  ལྕགས་ཀྱི་ཐོམ་བུ་ཞིག་གི་ནང་དུ་སྣུམ་བླུགས་ནས་ཁོལ་དུ་བཅུག་ཅིང་། དེའི་ནང་དུ་ཀྲུང་ཧྭ་ཡ་གོ་ཡི་པགས་པ་དེ་འཕངས་ནས་ཞུ་རུ་བཅུག་སྟེ། དེ་ཕྲུ་གུ་དེའི་མགོ་ཐོག་ཏུ་བསྐོར་ནས། སྔགས་འདྲ་པོ་ཞིག་སྟེ། ཕྲུ་གུ་དེ་གང་ལ་སྐྲག་པ་དེ་ང་ལ་སྟོན་རོགས་གནང་ཟེར་ནས། བོད་སྐད་དུ་བཏོན་བཞག་པ་མ་གཏོགས་སྔགས་ཟེར་བ་དེ་ཡང་དེ་རེད། སོ་སོའི་འདོད་པའི་དོན་དེ་རྒྱ་གར་གྱི་ཡི་གེར་བྲིས་པ་ལ་སྔགས་ཟེར། བོད་པའི་ཡི་གེའི་ནང་དུ་ཡོད་ན་ཡང་སྔགས་རེད་ལ། དེ་འདྲ་ཚར་ཁ་ཤས་བཏོན་ནས་ཕྲུ་གུའི་མགོ་ལ་བསྐོར་ནས་བཞུས་ཚར་བའི་སྣུམ་ནང་གི་ཞ་ཉེ་དེ་ཆུ་གྲང་མོ་ཞིག་གི་ནང་དུ་བླུགས་པ་ཡིན་ན། དེའི་ནང་དུ་ཕྲུ་གུ་དེ་མི་འདྲ་བོ་དང་སེམས་ཅན་འདྲ་པོ་གང་ལ་སྐྲག་པ་ཡིན་ན། དེའི་གཟུགས་བརྙན་དེ་ཡང་དག་པ་ཅིག་ཕབ་གི་རེད་ལ།  དེ་ཡང་ཧངས་སང་བ་ཞིག་ཕབ་ཡོང་གི་རེད། ངའི་ཚ་བོ་ཅིག་ཡིན་ནམ་སྤུན་ཆུང་བ་ཞིག་ཡིན་། གང་ལྟར་ཅི་ཞིག་ལ་སྐྲག་པ་མ་ཤེས་ནས། ང་ཚོས་དེ་འདྲ་བྱས་པ་ཡིན། དེ་ལྟར་བྱས་པའི་རྗེས་སུ། ཞ་ཉེའི་དེའི་ངོས་སུ་མི་རྒན་ཚར་ཞྭ་གོན་པ་ཞིག་ཕབ་ཡོང་བ་རེད། དེ་ནས་ང་ཚོས་ཚར་ཞྭ་གོན་པའི་ཞ་ཉེ་ལེབ་མོ་དེ་ལ་ཨི་ཁུང་ཅིག་བརྟོལ་ནས་ཕྲུ་གུ་དེའི་སྐེ་ལ་བཏགས་པ་ཡིན། དེ་ལྟར་བྱས་པ་ཡིན་ན་འཇིགས་སྐྲག་འདྲ་བོ་དེ་རང་ཤུགས་སུ་ཡལ་འགྲོ་གི་འདུག

འདིར་བརྗོད་འདོད་པ་ཞིག་ལ། ལོ་གཉིས་སྔོན་ཁོ་བོས་དབྱིན་ཡིག་དང་པ་ལི་ནས་བོད་ཡིག་ཏུ་བསྒྱུར་པའི་ཆོས་ཀྱི་ཚིགས་སུ་བཅད་པའི་གླེང་གཞིའི་གཏམ་རྒྱུད་སུམ་བརྒྱ་ཞེས་པ་དེའི་ཁྲོད་དུ། གནས་བརྟན་སྡེ་བའི་ལུགས་ཀྱི་བཅོམ་ལྡན་འདས་ཀྱིས་གཏན་འབེབས་གནང་བའི་དགེ་ཚུལ་སློང་གི་བཅས་ཁྲིམས་དག་གི་ཁྲོད་དུ། ཁོང་གིས་རྗེས་འཇུག་གྲྭ་པ་ཚོས་གསོ་བ་རིག་པར་སྦྱངས་ནས་དམངས་ཁྲོད་དུ་སྨན་བཅོས་བྱེད་མི་ཆོག་པའི་འདུལ་ཁྲིམས་ཤིག་བཟོས་འདུག་ཅིང་། སྐབས་རེར་གྲྭ་པ་ལ་ལ་བཙུན་པའི་སྡོམ་ཁྲིམས་མ་ཞུས་པའི་སྔ་རོལ་ཏུ་སྨན་པ་ཡིན་ཞིང་། གྲྭ་བཙུན་གྱི་སྡོམ་པ་ཞུས་པའི་རྗེས་སུ་ཡང་དམངས་ཁྲོད་དུ་སོང་ནས་ནད་པར་སྨན་བཅོས་བྱེད་པ་ལ། གནས་བརྟན་དག་གིས་བཅོམ་ལྡན་འདས་ཀྱི་བཅས་ཁྲིམས་དང་འགལ་མཁན་ཞེས་ལྟ་སྟངས་ངན་པ་བཟུང་པའི་སྐོར་གྱི་གཏམ་རྒྱུད་ཅིག་འདུག ཡིན་ན་ཡང་། བོད་བརྒྱུད་ནང་བསྟན་འདི་ནི་ཐེག་པ་གསུམ་པོ་ཐུག་པ་བཞིན་དཀྲུགས་ཏེ་བཟོས་པའི་བསྟན་པ་ཞིག་ཡིན་པས། གྲྭ་པས་གསོ་བ་རིག་པར་སྦྱངས་ཏེ་དམངས་ཁྲོད་དུ་ནད་པར་གསོ་བཅོས་བྱེད་པ་དང་། དགེ་སློང་ཡིན་ཡང་བུད་མེད་ཀྱི་ལག་པར་འཇུས་ཏེ་རྩ་ལ་བརྟག་དཔྱད་བྱེད་བཞིན་ཡོད་པ་ལ་ལྟ་སྟངས་ངན་པ་འཛིན་མཁན་ཞིག་ཧ་ལམ་མི་འདུག

ད་དེ་ནས་དམངས་ཁྲོད་ན་ཡང་གསོ་བཅོས་ཀྱི་རིགས་འདིར། དངོས་སུ་ལེགས་སྦྱར་གྱི་སྔགས་དང་། བོད་པ་ཡི་བོད་ཀྱི་ནང་དུ་ཡོད་པའི་སྔགས་ཚིག་འདྲ་བོ། དེ་འདྲ་དང་ལྷན་དུ་ལག་ལེན་བྱེད་རྒྱུ་མང་པོ་ཡོད་པ་རེད། དེ་དཔེ་མཚོན་ཆུང་ཆུང་ཞིག་རེད། དེ་ནས་ཡང་དཔེ་བཞག་ན། ང་ཚོ་ཕྲུ་གུ་ཆུང་ཆུང་གི་སྐབས་དེ་ལ་གྲོད་ཁོག་ན་རྒྱུ་ཡོད་པ་རེད། ང་ཚོ་ཕ་ཡུལ་ནས་དེ་གླང་འཐབ་ཟེར་གྱི་རེད། དེའི་སྐབས་ཐོག་དེ་ལ་ཡང་། གཙོ་ཆེ་ཤོས་ང་ལ་མཚོན་ན་ཨ་མ་དེ་རེད། གོ་ཁའི་ནང་གི་ཐལ་བ་དཀར་པོ་དེ་ཞིབ་ཞིབ་ཏུ་བཟོས་ནས། དེ་ནས་ཨ་མ་མོ་རང་གི་ལག་པའི་ནང་དུ་བཟུང་སྟེ་ང་ཚོའི་གྲོད་ཁོག་སྟེང་འཕུར་བཞིན། ངག་ནས་ངའི་ཕྲུ་གུའི་གྲོད་ཁོག་ན་བ་དེ་དྲག་པར་ཤོག། རྗེ་བཙུན་སྒྲོལ་མ་ལ་གསོལ་བ་འདེབས། ཟེར་ནས་དབྱངས་ལ་འགུག་བཞིན་ག་ལེར་ག་ལེར་ཕུར་བ་ཡིན་ན། ན་ཟུག་རིམ་གྱིས་འཇགས་འགྲོ་བ་རེད། དེ་ཡང་དཔེ་མཚོན་གཅིག་རེད། ད་དེ་ནས་སྨན་དང་སྔགས་ཟུང་དུ་འབྲེལ་གི་ཨེ་རེད་ཟེར་ན། བོད་པའི་རིག་གཞུང་ནང་དུ་སྨན་དང་སྔགས་ཟུང་འབྲེལ་ཤུགས་ཆེན་པོ་བྱེད་ཀི་རེད། རྒྱ་ནག་འདྲ་བོ་མཚོན་ན། ཕལ་ཆེར་ཤུགས་ཆེན་པོ་ཞིག་ཡོད་རྒྱུ་མ་རེད། ཡིན་ནའང་། ཁོ་རང་ཚོ་ལ་མཚོན་ན་ཏའོ་ཆོས་ལུགས་ཟེར་བ། དབྱིན་ཇིའི་སྐད་དུDaoism ཟེར་བ། ཏའོ་ཆོས་ལུགས་ཀྱི་ནང་དུའང་གཟུངས་སྔགས་འདྲ་བོ་བགྲང་བཞིན་སྨན་འདྲ་མི་འདྲ་བསྐོལ་བ་དང་། འཆི་མེད་ཚེ་ཡི་རིལ་བུ་བསྒྲུབས་པ་ཟེར་བ་སོགས་འདྲ་མི་འདྲ་ཡོད་པ་རེད།

ང་ཚོ་བོད་པའི་ནང་དུ་དེ་ལས་ལྷག་ཅིག་ཡོད་པ་རེད། མང་པོ་ཅིག་འདུག་དཔེ་བཞག་ན། བླ་མ་མི་ཕམ་ཚང་གི་གསུང་འབུམ་ཉི་ཤུ་རྩ་ལྔ་རྩ་དྲུག་ཙམ་ལས། པོད་གཅིག་དེ་གསོ་རིག་གི་སྐོར་རེད། གསུང་འབུམ་དེ་ཀློག་ཡོང་ན་ཤེས་པར་འདུག་ལ།  དེའི་ནང་དུ་གསོ་བ་རིག་པའི་སྨན་གྱི་སྦྱོར་སྡེབ་འདྲ་མིན་ཧ་ཅང་མང་པོ་ཞིག་དང་། དེ་དང་མཉམ་དུ་སྔགས་ག་རེ་ཞིག་བགྲང་དགོས་པ་སོགས། དཔེར་ན་མགོ་ནད་དང་མིག་ནད་ཁ་ནད་སྣ་ནད་ལ་སོགས་མང་པོ་ཞིག་ལ། སྨན་རེ་རེ་ལ་སྔགས་རེ་རེ་ཕལ་ཆེར་འདུག་ལ། དེ་ཚོ་ལ་བལྟས་ཡོང་ན་ངོ་མ་བསམ་གྱིས་མི་ཁྱབ་པ་རེད། དངོས་གནས་དྲང་གནས་སྨན་དང་སྔགས་གཉིས་ཁ་བྲལ་ཐབས་མེད་པ་ཞིག་རེད། སྔོན་མ་ཡིན་ན་ང་ཚོ་བོད་ཀྱི་ཆོས་བརྒྱུད་སྤྱི་དང་། ཁྱད་པར་དུ་སྔ་འགྱུར་རྙིང་མ་བ་ལ་སྔགས་འཆང་མང་པོ་ཡོད་པ་རེད། ཁོ་རང་ཚོའི་ལུགས་སྲོལ་དེ་ལ་ཡང་། གལ་སྲིད་སློབ་སྦྱོང་གི་ཆ་རྐྱེན་དང་གོ་སྐབས་ཡོད་ན་སྨན་དང་སྔགས་གཉིས་ཀ་ལ་མཁས་དགོས་པ་ཞིག་རེད་འདུག་ལ། དཔེར་ན་ཁ་སང་དེ་རིང་གི་རེབ་གོང་གི་སྔགས་པ་མང་པོ་ཅིག་འབག་བཟོ་བར་མཁས་པ་དང་ཐང་ག་བཟོ་བར་མཁས་པ། དེ་ལྟ་བུའི་རེབ་གོང་ལ་ལུགས་སྲོལ་ཅིག་ཡོད་པ་རེད། དེ་ནང་བཞིན་སྔོན་མ་ཡིན་ན། བོད་ཀྱི་མདོ་དབུས་ཁམས་གསུམ་ནང་གི་སྔགས་པ་མང་པོ་སྔགས་ལ་མཁས་དགོས་པ་རེད་ལ། མཁས་ཟེར་ན་ད་སྔགས་ཀྱི་ནུས་པ་ཐོན་དགོས་པ་རེད། དེ་དང་མཉམ་དུ་སྨན་ཡང་སྦྱངས་ཏེ། གསོ་རིག་རྒྱུད་བཞི་མགོ་ནས་མཇུག་བར་དུ་སྦྱངས་ནས་ཁྱད་དུ་འཕགས་པ་ཐོབ་མཁན་ཡོད་པ་རེད། དེ་མ་ཡིན་པའི་སྤྱིར་གཏང་གི་གསོ་བ་རིག་པའི་ལག་ལེན། མེ་བཙའ་ལྟ་བུ་དང་། སྐམ་ཁབ་ལྟ་བུ། དེ་འདྲ་བའི་གནས་སྐབས་གནས་སྐབས་གསོ་རིག་གི་ཉེ་བར་མཁོ་བའི་བཅོས་ཐབས་སྟབས་བདེ་བོ་དེ་འདྲ་མང་པོ་སྦྱོང་གི་ཡོད་པ་རེད།

དེ་ནས་ལྷ་ས་སྨན་རྩིས་ཁང་གི་འགན་འཛིན་བྱམས་པ་འཕྲིན་ལས་གྱིས་བརྩམས་པའི་གངས་ལྗོངས་གསོ་རིག་མཁས་དབང་རིམ་བྱོན་གྱི་ལོ་རྒྱུས་ཤིག་ཡོད་པ་རེད། དེའི་ནང་དུ་ཕལ་ཆེར་གསོ་རིག་མཁས་པ་སུམ་བརྒྱ་ལྷག་གི་ལོ་རྒྱུས་ཡོད་བསམ་སོང་། དེར་ཕར་བལྟས་ཡོང་ན་མང་ཆེ་ཤོས་དེ་སྔ་འགྱུར་རྙིང་མ་བའི་སྔགས་འཆང་དེ་འདྲ་རེད་འདུག་ལ། སྔགས་ཉམས་སུ་ལེན་མཁན་ཡིན་པ་ལ་གསོ་བ་རིག་པ་ཉམས་སུ་ལེན་མཁན་ཡིན་པ། དེ་ནས་སྤྱིར་གཏང་སྔོན་མ་ང་ཚོ་བོད་ཀྱི་ལོ་རྒྱུས་སྒང་ལ་ཡིན་ན། སྨན་པ་ཞིག་ཡིན་ན་གཡུ་ཐོག་སྙིང་ཐིག་གི་དབང་ཞུ་དགོས་པ་དེ་ལྷ་ས་ལྕགས་པོ་རི་ནས་གཏན་ལ་ཕབ་ནས་ལུགས་སྲོལ་དུ་ཆགས་ཡོད་པ་རེད་ལ། གཡུ་ཐོག་སྙིང་ཐིག་དེ་ཤུགས་ཆེན་པོ་དར་སྤེལ་བྱེད་མཁན་དེ་ལ་བླ་སྨན་སྐད་གྲགས་ཆེན་པོ་ཞིག་ཡོད་པ་རེད་ལ། དེའི་མཚན་ལ་མཁྱེན་རབ་ནོར་བུ་ཞུ་གི་རེད། ཁོང་ཚོ་བརྒྱུད་ནས་སྨན་དང་སྔགས་ཀྱི་ཟུང་འབྲེལ་གྱི་སློབ་སྦྱོང་དར་ཁྱབ་ཆེན་པོ་བྱུང་འདུག

འདིའི་སྐབས་ཐོག་གི་སྔགས་ཟེར་བ་དེ་སངས་རྒྱས་སྨན་བླ་དང་། སྨན་པའི་རྒྱལ་བོ་གཡུ་ཐོག་ཡོན་ཏན་མགོན་པོ་ཡི་གཡུ་ཐོག་སྙིང་ཐིག་དང་འབྲེལ་ནས། སྨན་པ་ཞིག་ཡིན་ཕྱིན། གཡུ་ཐོག་སྙིང་ཐིག་གི་བླ་སྒྲུབ། ཕྱི་སྒྲུབ། གསང་སྒྲུབ། ནང་སྒྲུབ། རྫོགས་རིམ་སོགས་མང་པོ་ཞིག་འདུག་པ་དེ་དག་སྨན་པ་མང་པོས་བླ་མ་ལས་ཞུས་ཏེ་ཉམས་སུ་ལེན་དགོས་གི་ཡོད་པ་རེད། མ་མཐའ་ཡང་གསོ་བ་རིག་པའི་སྨན་པ་ཞིག་ཡིན་ན། གཡུ་ཐོག་སྙིང་ཐིག་གི་ལུང་ཞིག་ཞུ་དགོས་གི་ཡོད་པ་རེད། ཁྱད་པར་དུ་ལྷ་ས་སྨན་རྩིས་ཁང་གི་ཁྱབ་ཁོངས་ནང་། སྔོན་མ་ཡིན་ན་དེའི་ལུགས་སྲོལ་དེ་ཡོད་པ་རེད། དེ་ནས་རིག་གནས་གསར་བརྗེ་སོགས་བྱུང་སྟེ། བར་སྐབས་དེ་ནས་དེའི་རྒྱུན་ཆད་པ་དང་། ཁྱད་པར་དུ་མདོ་སྨད་ནས་གཡུ་ཐོག་སྙིང་ཐིག་གི་དབང་ལུང་ཞེས་པ་ཞིག་ཡོད་པ་ཤེས་མཁན་དང་ཞུ་མཁན་ཉུང་ཉུང་རེད།  ད་ཡིན་ན་ཡང་ཁམས་ཀྱི་ཕྱོགས་དང་འབྲེལ་ནས་གང་ལ་གང་འཚམ་ཞིག་ནས། དེ་ག་ལེ་ག་ལེར་ཉམས་གསོ་གནང་གི་འདུག སྔོན་མ་ཡིན་ན་མཁན་པོ་ཁྲོ་རུ་ཚེ་རྣམ་ཟེར་བ་ལ་སོགས་པ། ཁོ་ཚོས་ལྷ་ས་སྨན་རྩིས་ཁང་གི་ལུགས་སྲོལ་དེ་གཞིར་བཟུང་བ་བྱས་ནས་གཡུ་ཐོག་སྙིང་ཐིག་གི་དབང་ལུང་གང་འཚམ་ཞིག་སྤེལ་གནང་བ་རེད། ཁམས་ཀྱི་ཕྱོགས་ནས་ཡིན་ན་འཇམ་དབྱངས་མཁྱེན་བརྩེ་དབང་པོ་དང་། ཀོང་སྤྲུལ་ཡོན་ཏན་རྒྱ་མཚོ་ཁོང་རྣམ་པ་ཡི་བཀའ་དྲིན་ལ་བརྟེན་ནས། སྨན་གྱི་སློབ་སྦྱོང་བྱེད་པ་དེ་ཚོ་ལ་གཡུ་ཐོག་སྙིང་ཐིག་ཉམས་སུ་ལེན་དགོས་པ་དང་། དབང་དང་གདམས་ངག་ཞུ་དགོས་པ་སོགས་གལ་ཆེ་ཚུལ་གསུངས་པ་རེད།

དེ་ནས་མར་མགོ་ལོག་གི་ཕྱོགས་ནས་སྔ་འགྱུར་རྙིང་མ་བ་འདི་ཤུགས་ཆེན་པོ་རེད། མགོ་ལོག་འདི་སྔ་འགྱུར་རྙིང་མ་ཡི་ལྟེ་བ་འདྲ་བོ་ཞིག་ཆགས་ཡོད་པ་རེད། སྔ་འགྱུར་རྙིང་མ་ཡི་གཏེར་སྟོན་ནང་ན་སྨན་པ་མཁས་པ་མང་པོ་ཞིག་ཡོད་པ། དཔེར་ན་ཁམས་གཙང་གཏེར་སྟོན་ཟེར་བ་འདི་གཏེར་སྟོན་ཆེན་པོ་ཡིན་པ་ལ་སྨན་པ་ཡང་མཁས་པ་ཆེན་པོ་ཞིག་རེད། ཁོང་ངའི་བརྒྱུད་པའི་བླ་མ་ཡང་ཡིན། དེ་ནས་ངའི་ཕ་ཡུལ་གྱི་ཐག་ཉེ་ས་ན་ཡོད་པ་ང་རང་གི་སྐྱེ་བ་སྔོན་མ་ཡིན་ཟེར་བ་སྐུ་ཕྱོགས་དོ་རྡོའི་འཁྲུངས་ས་དེ་ན་ཨ་ལགས་འཇམ་དབྱངས་ཞུ་བ་ཞིག་ཡོད། ཨ་ལགས་འཇམ་དབྱངས་ཡིན་ན་སྔགས་པའི་བླ་མ་ཧ་ལས་པ་ཚད་ལྡན་ཡིན་པ་རེད། ཁོང་དབུས་གཙང་དུ་ཕེབས་པའི་སྐབས་སུ། གུ་རུ་རིན་པོ་ཆེའི་སྐུ་བརྙན་ཞིག་གིས་དངོས་སུ་ཞལ་གསུང་བྱོན་པ་དེར་བཞུགས་ཀྱི་དབུས་གྲོགས་ཚོ་དང་ལྷ་ཁང་དཀོར་གཉེར་སོགས་མང་པོ་ཞིག་གིས་དངོས་སུ་མཇལ་བ་རེད།

མུ་འགོད།