ཐའེ་ཝན་གྱི་རྒྱལ་ས་ཐའེ་པེ་རུ་གསུམ་བཅུའི་དུས་དྲན་གྱི་ལས་འགུལ་མགོ་འཛུགས་ཀྱི་མཛད་སྒོའི་ཐོག་ཐའེ་ཝན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཧྥ་རི་ཌི་ལིམ་(Freddy Lim)ལགས་ཀྱིས་ཐའེ་ཝན་མི་མང་མི་རེ་ངོ་རེ་ནས་བོད་དོན་ལ་རྒྱལ་སྤྱིའི་ཐོག་ནས་རྒྱབ་སྐྱོར་ཐོབ་པར་འབད་བརྩོན་གནང་དགོས་སྐོར་གསུངས་འདུག
ཟླ་འདིའི་ཚེས ༥ ནས་གསུམ་བཅུ་དུས་དྲན་གྱི་ཉིན་མོའི་བར་དུ་ཐའེ་ཝན་གྱི་རྒྱལ་ས་ཐའེ་པེ་རུ། ཐའེ་ཝན་བོད་རིགས་ཚོགས་པ་དང་ས་གནས་གཞོན་ནུ་ཚོགས་པ་གཉིས་ཀྱི་གོ་སྒྲིག་འོག་ཐའེ་པེ་ཁྲོམ་སྐོར་ཆེན་མོ་མགོ་འཛུགས་བྱས་ཡོད་པ་དང་། ཁྲོམ་སྐོར་མགོ་འཛུགས་ཀྱི་མཛད་སྒོའི་ཐོག་ཐའེ་ཝན་གྲོས་ཚོགས་འཐུས་མི་དང་། བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཧྥ་རི་ཌི་ལིམ་(Freddy Lim)ལགས་དང་། ཐའེ་ཝན་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ཧྥེ་ཧན་ལགས། ཐའེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས། བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་ཚོགས་གཞོན་བཀྲ་ཤིས་ཚེ་རིང་ལགས། ཐའེ་པེ་ས་གནས་གྲོས་ཚོགས་འཐུས་མི་བོད་དོན་འབྲེལ་མཐུད་ཁང་གི་རྒྱུན་ལས་ཨཱ་མའོ་ལགས་དང་ལིན་ཞའོ་ཞའེ་ལགས་བཅས་གསར་འགོད་པ་དང་མི་མང་ཁྱོན་གྲངས་ ༧༠༠ ཙམ་མཉམ་ཞུགས་གནང་ཡོད་འདུག
མཛད་སྒོའི་ཐོག་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས། ནམ་རྒྱུན་བོད་དོན་ཐོག་རྒྱབ་སྐྱོར་བྱེད་མཁན་གྲོས་ཚོགས་འཐུས་མི་རྣམ་པ་དང་། ཐའེ་ཝན། ཧོང་ཀོང་། སོག་པོ་སོགས་ཀྱི་གྲོགས་པོ་མང་པོར་ཐེངས་ ༦༤ པའི་བོད་མིའི་རང་དབང་སྒེར་ལངས་ཀྱི་དུས་དྲན་ཆེད་དུ་ཕེབས་པར་བཀའ་དྲིན་ཆེ་ཞུ། མི་ལོ་ ༧༠ སྔོན་དུ་རྒྱ་ནག་གཞུང་གིས་བོད་ནང་དུ་བཙན་འཛུལ་བྱས་པ་ནས་ད་ལྟ་བར་དུ་བོད་ནང་གི་ཆབ་སྲིད་དང་། ཆོས་ལུགས། སྤྱི་ཚོགས་བཅས་འགྱུར་བ་གཏོང་པར་བོད་མི་ས་ཡ་གཅིག་དང་ཁྲི་ཉི་ཤུ་ལྷག་དམར་གསོད་བྱས་ཡོད། དགོན་སྡེ་དྲུག་སྟོང་ལྷག་གཏོར་བཤིག་བཏང་ཡོད། ཕྱི་ལོ་ ༢༠༠༩ ནས་ང་ཚོས་ཤེས་གསལ་ལྟར་ན་བོད་མི་ ༡༥༩ ཡིས་༧གོང་ས་མཆོག་བོད་དུ་ཕེབས་དགོས་པ་དང་། བོད་ཀྱི་སྐད་ཡིག ཆོས་ལུགས་དད་མོས། རང་དབང་གི་ཐོབ་ཐང་བཅས་ཀྱི་ཆེད་དུ་རང་ལུས་མཆོད་འབུལ་ཞུས་ཡོད་ལ། རྒྱ་ནག་གཞུང་གིས་བོད་དང་། ལྷོ་སོག ཤིན་ཅང་། ཧོང་ཀོང་བཅས་ལ་གདུག་རྩུབ་མནར་གཅོད་ད་དུང་མུ་མཐུད་དུ་གཏོང་བཞིན་ཡོད་པ་རེད། ཅེས་བརྗོད་འདུག
ཐའེ་ཝན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཧྥ་རི་ཌི་ལིམ་(Freddy Lim)ལགས་ཀྱིས། ང་ཚོ་ལོ་རེ་བཞིན་གསུམ་བཅུའི་དུས་དྲན་ཉིན་འདིར་འཛོམས་ནས་བོད་པའི་རང་དབང་ལ་རྒྱབ་སྐྱོར་མཉམ་ཞུགས་གནང་བཞིན་ཡོད་པ་རེད། ལོ་འདི་དག་གི་ནང་ཐའེ་ཝན་མི་མང་ནང་རྒྱབ་སྐྱོར་བ་ཇེ་མང་ནས་ཇེ་མང་དུ་འགྲོ་བཞིན་ཡོད་འདུག རྒྱལ་སྤྱིའི་ཐོག་ནས་ཐའེ་ཝན་ལ་རྒྱབ་སྐྱོར་ཤུགས་ཆེ་རུ་འགྲོ་མུས་ཡིན་པ་བཞིན། ང་ཚོས་ཀྱང་རྒྱལ་སྤྱིའི་ཐོག་ནས་བོད་དོན་རྒྱབ་སྐྱོར་གནང་བའི་རེ་སྐུལ་ཞུ་བཞིན་ཡོད། བོད་དོན་དང་འབྲེལ་བའི་ལས་འགུལ་ནང་དུ་མི་ལོ་ཉི་ཤུ་ལྷག་ལ་མཉམ་ཞུགས་བྱས་ཡོད་ལ། བར་ལམ་ཞིག་ནས་རྒྱལ་སྤྱིའི་ཐོག་བོད་དོན་ལ་རྒྱབ་སྐྱོར་བྱེད་པར་ཁུ་སིམ་དུ་གྱུར་སོང་། རྒྱལ་སྤྱིའི་བགྲོ་གླེང་ཁག་ཏུ་མཉམ་ཞུགས་བྱེད་སྐབས་རྒྱལ་སྤྱིའི་ཐོག་ནས་ཐའེ་ཝན་ཙམ་མ་ཟད། བོད་ཀྱི་གནད་དོན་ལ་རྒྱལ་སྤྱིའི་ཐོག་ནས་རྒྱབ་སྐྱོར་བྱེད་དགོས་པའི་དགོས་འདུན་བཏོན་ཡོད་ཅིང་། དེ་རིང་གི་འདུ་འཛོམས་འདི་ཙམ་མིན་པར། ཐའེ་ཝན་མི་མང་གིས་མི་རེ་ངོ་རེ་ནས་བོད་དོན་ལ་རྒྱལ་སྤྱིའི་ཐོག་ནས་རྒྱབ་སྐྱོར་ཐོབ་པར་འབད་བརྩོན་གནང་དགོས་སྐོར་སོགས་གསུངས་འདུག
ཐའེ་ཝན་གྲོས་ཚོགས་འཐུས་མི་ཧྥེ་ཧན་ལགས་ཀྱིས། དེ་རིང་ནི་བོད་མིའི་སྒེར་ལངས་བྱས་ནས་མི་ལོ་ ༦༤ འཁོར་བ་རེད། ༧གོང་ས་རྒྱལ་བ་རིན་པོ་ཆེ་མཆོག་དང་། བཙན་བྱོལ་བོད་མི་རང་ཉིད་ཀྱི་ཕ་ཡུལ་དང་ཁ་བྲལ་ནས་ལོ་ངོ་ཅི་ཙམ་འགོར་བ་མཚོན་ཡོད། ལོ་རེའི་ཕྱི་ཟླ་གསུམ་པར་ང་ཚོའི་སྐད་འབོད་བྱེད་བཞིན་པ་ཚང་མར་འགྲེལ་བཤད་མི་དགོས་པ་ཞིག་རེད། ང་ཚོས་མུ་མཐུད་བོད་པ་ཚོ་རང་ཉིད་ཀྱི་ཕ་ཡུལ་དུ་ལོག་མི་ཆོག་པའི་གནས་ལུགས་བཤད་ཀྱི་ཡོད་ཅིང་། འགྲོ་བ་མིའི་ཐོབ་ཐང་ལ་བརྩི་བཀུར་བྱེད་པར་མཉམ་དུ་ནུས་ཤུགས་འདོན་དགོས་པ་མ་ཟད། བོད་མི་ཚོ་རང་དབང་ཐོག་ནས་ཕ་ཡུལ་དུ་ལོག་ཐུབ་པའི་གོ་སྐབས་ཤིག་ཐོབ་པར་རྒྱབ་སྐྱོར་ཞུ་དགོས་པ་དང་། བོད་ནང་གི་བོད་མིའི་གནས་སྟངས་ཉིན་རེ་བཞིན་སྡུག་ཏུ་འགྲོ་བཞིན་ཡོད་ཅིང་། རྒྱལ་སྤྱིའི་ཞིབ་འཇུག་པ་ཁག་གི་སྙན་ཐོ་ལྟར་ན་བོད་པའི་བྱིས་པ་ས་ཡ་གཅིག་ལྷག་ལ་རང་ཉིད་ཀྱི་སྐད་ཡིག་དང་རིག་གཞུང་། བོད་མིའི་གོམས་གཤིས་སོགས་གཏན་འགོག་བྱེད་པའི་སྲིད་ཇུས་སྤེལ་ནས་ཉེན་ཁའི་ནང་གནས་ཡོད་སྐོར་གསུངས།
བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་ཚོགས་གཞོན་བཀྲ་ཤིས་ཚེ་རིང་ལགས་ཀྱིས། རྒྱ་ནག་མང་ཚོགས་ལ་སྡུག་ཕྱོགས་ཀྱི་གནས་ཚུལ་ཞུ་དགོས་རྒྱུ་གང་ཡང་མེད། རྒྱ་ནག་དམར་ཤོག་སྲིད་གཞུང་གི་འོག་ཏུ་ཡོད་པའི་རྒྱ་མི་རིགས་དང་། ཤིན་ཅང་། ཧོང་ཀོང་། བོད་སོགས་སུ་ཡིན་ཡང་རང་དབང་གི་ཐོབ་ཐང་ཅི་ཡང་མེད་པར་གདུག་རྩུབ་མནར་གཅོད་ཀྱི་དཀའ་ངལ་ནང་དུ་འཚོ་སྡོད་བྱེད་བཞིན་ཡོད་པ་མ་ཟད། མི་མང་པོས་རང་ཉིད་ཀྱི་ཚེ་སྲོག་བློས་གཏོང་བྱས་ནས་མ་འོངས་བར་རང་དབང་གི་བདེ་སྐྱིད་འཐོབ་ཆེད་དུ་དཀའ་ལས་ཞེ་དྲགས་རྒྱག་བཞིན་ཡོད་པ་རེད། རྒྱ་ནག་སྐམ་ས་ཆེན་མོའི་གཞོན་སྐྱེས་རྣམས་ལ་རང་དབང་དང་དམངས་གཙོའི་ཐོབ་ཐང་དགོས་ཀྱི་ཡོད་ན། མི་རབས་རྒན་པ་ཚོས་བཀག་འགོག་བྱས་ནས་བསྡད་ཚེ་མི་རབས་ནས་མི་རབས་བར་དམངས་གཙོའི་ཐོབ་ཐང་མེད་པ་ཆགས་འགྲོ་པས། རྒྱ་ནག་མི་མང་ཡིན་ཡང་འཇམ་ཐིང་ངེར་མ་བསྡད་པར་དམངས་གཙོ་དང་རང་དབང་ཆེད་དུ་ནུས་པ་འདོན་དགོས་ཀྱི་འདུག་པའི་འབོད་སྐུལ་ཞུ་ཡི་ཡོད་ཅེས་བརྗོད་འདུག
ཐའེ་ཝན་དུ་གསུམ་བཅུ་དུས་དྲན་ཉིན་འགའི་སྔོན་ནས་བརྩི་སྲུང་བྱེད་དགོས་དོན་ནི་ཐའེ་ཝན་སྤྱི་ཚོགས་ཁྲོད་དུ་བོད་དོན་གྱི་གོ་རྟོགས་རྒྱ་ཆེར་སྤེལ་ཆེད་ཡིན་འདུག་ཅིང་། ཐེངས་འདིའི་ཁྲོམ་སྐོར་གྱི་སྐབས་སུའང་མི་འགས་མ་དགའ་བའི་རྣམ་འགྱུར་བསྟན་ཡོད་པ་མ་ཟད། ཁ་སྔོན་བོད་དོན་རྐང་འཁོར་སྐོར་བསྐྱོད་ཀྱི་སྐབས་སུ། རྒྱ་མིས་གྲ་སྒྲིག་ཡོད་པའི་ཐོག་ནས་རྐང་འཁོར་བསྐོར་བསྐྱོད་པའི་མདུན་དུ་མཆོངས་པ་དང་། ལམ་དུ་འགྱེལ་ཁུལ་བྱས་ནས་ལམ་ཁ་འགོག་རྩིས་ཐེངས་མང་བྱས་ཡོད་ཀྱང་། ཐའེ་ཝན་ཉེན་རྟོག་པས་ལས་འགུལ་བ་རྣམས་ལ་སྲུང་སྐྱོབ་གང་ལེགས་བྱས་ཡོད་འདུག
གསར་འགོད་པ། བྱམས་པ་ཚེ་རིང་།
