སྨན་སྔགས་ཟུང་འབྲེལ་གྱིས་གཞན་ཕན་སྒྲུབ་སྟངས། (ཚན་པ་གཉིས་པ)

དོ་སྤྲུལ་ཆོས་དབྱིངས་ཡེ་ཤེས་སམ་ཀླུ་སྨྱོན་ཧེ་རུ་ཀ

—ཚོགས་མི་ལྔ་བརྒྱ་ཡོད་པའི་གསོ་བ་རིག་པའི་སྐད་འཕྲིན་ཚོམས་ཆེན་ཞིག་གི་སྟེང་དུ་བརྗོད་པའི་སྐད་ཆ།

ཁོང་གིས་ཀུན་བཟང་བླ་མའི་ཞལ་ལུང་དང་སྤྱོད་མཇུག་ཆེན་མོ། གསོ་རིག་རྒྱུད་བཞི་ལ་སོགས་པ་རྒྱས་འགྲེལ་བྱས་ཡོད་པ་མང་པོ་ཞིག་ཁ་སང་དེ་རིང་སྒྲ་འཇུག་བྱས་འདུག་ལ། ཁོང་ཡིན་ན་ལོ་བཅུ་གྲངས་ཤིག་གི་སྔོན་ལ་ཞིང་ཁམས་སུ་ཕེབས་ཚར་བ་རེད། ཁོང་ལྟ་བུ་ཡིན་ན་སྔགས་པའི་བླ་མ་ཚད་ལྡན་དང་སྒྲུབ་པ་ཉམས་ལེན་མཐའ་འཁྱོལ་བ། མདོ་སྔགས་རིག་གནས་དང་བཅས་པ་ལ་མཁས་པ། ཁྱད་པར་དུ་གསོ་བ་རིག་པ་ལ་མཁས་པའི་སྐྱེས་བུ་དམ་པ་ཞིག་རེད། གང་ལྟར་རྙིང་མའི་བླ་མ་ཆོས་སྨན་གཉིས་ལ་ཁམས་པ་མང་པོ་ཞིག་འདུག མགོ་ལོག་གི་ཕྱོགས་ན་ཡང་མང་པོ་འདུག མདོ་སྔགས་ལ་མཁས་པ་ཡིན་པ་ལ་སྨན་པ་ཡང་ཡིན་པ། དཔེར་ན་བླ་མ་འཇམ་མགོན་མི་ཕམ་ལྟ་བུ་རེད་ལ། མདོ་སྔགས་རིག་གནས་ལ་མཁས་པ། སྨན་གྱི་ཕྱོགས་ལ་ཡང་བསམ་གྱིས་མི་ཁྱབ་པར་མཁས་པ་རེད། ཁོ་རང་གིས་བོད་སྨན་གསར་བཟོ་གནང་བ་གང་འཚམ་ཞིག་ཡོད་པ་རེད། དེ་ཚོ་ནི་ཁོང་གི་གསུང་འབུམ་ཁྲོད་ཀྱི་སྨན་སྦྱོར་བདུད་རྩིའི་ཐིག་ལེ་ཞེས་པ་དང་། གསོ་བ་རིག་པའི་མན་ངག་གཅེས་བཏུས་དང་ལག་ལེན་དམར་ཁྲིད་ཀྱི་སྐོར་ཕན་བདེའི་བང་མཛོད་ཅེས་པ་དེར་གཟིགས་ན་ཤེས་ཐུབ། བླ་མ་མི་ཕམ་རིན་པོ་ཆེ་མཆོག་གི་གསོ་བ་རིག་པའི་སྐོར་དེ་ལ་གསུང་འབུམ་པོད་བཅུ་པ་གསོ་རིག་སྐོར་ཕྱོགས་སྒྲིག་ཅིག་ཡོད་པ་རེད། དེའི་ནང་ན་སྨན་གྱི་སྦྱོར་སྟངས་མང་པོ་ཡོད་པ་རེད། སྨན་ཁ་ཤས་ཤིག་ཁོང་རང་ལ་སྐུ་བསྙུང་བཞེས་ནས། ཁོང་གི་མཚན་ལམ་ལ་སྨན་དེ་འདྲའི་སྡེབ་སྦྱོར་དེ་གཟིགས་སྣང་ཡིན་ན་འདྲ་དགོངས་གཏེར་ལ་ཕབ་ནས་སྨན་གསར་དུ་སྡེབ་སྦྱོར་མཛད་པ་རེད། ཁོང་གི་གསུང་འབུམ་བཅུ་གཅིག་པའི་ནང་དུ། ནད་སྣ་ཚོགས་ཞི་བའི་སྔགས་བདུད་རྩིའི་ཆར་བ་ཞེས་པ་དང་། ནད་བརྒྱ་སྔགས་གཅིག་གི་སྐོར། འགོས་ནད་ཀུན་འཇོམས་སྔགས་ཀྱི་མཚོན་ཆ། ནད་ཀྱི་མཁྱུད་དཔྱད་སྣ་ཚོགས་ཕྱོགས་གཅིག་ཏུ་བཀོད་པ་ཟུག་རྔུ་ཀུན་སེལ། མཁྱུད་སྤྱད་སྣ་ཚོགས་ཕྱོགས་བསྡུས་ཙིནྟ་མ་ཎི་ཞེས་པ་སོགས་སྨན་སྔགས་ཟུང་འབྲེལ་གྱི་གདམས་པ་ཧ་ཅང་རྩ་ཆེན་པོ་མང་པོ་ཞིག་ཡོད་པ་རེད།

དེ་ནས་བོད་གངས་ཅན་གྱི་སྔགས་པ་སྔགས་མའི་ནང་ནའང་། སྨན་གསར་བ་སྡེབ་སྦྱོར་བྱས་པའང་མང་པོ་ཡོད་པ་རེད། བོད་གངས་ཅན་གྱི་སྔགས་མའི་ནང་ནས་ཉི་མ་ལྟ་བུ་དེ་མཁའ་འགྲོ་ཡེ་ཤེས་མཚོ་རྒྱལ་ཡིན་ན། ཟླ་བ་ལྟ་བུ་དེ་མ་ཅིག་ལབ་ཀྱི་སྒྲོན་མ་ཡིན་པ་རེད། མ་ཅིག་ལབ་ཀྱི་སྒྲོལ་མ་ཁོང་ལ་མཚོན་ན་ཡང་། བུད་མེད་ཀྱི་མོ་ནད་ལ་ཕན་པའི་སྨན་སྐད་གྲགས་ཆེན་པོ་ཡོད་པ་གཉིས་གསར་དུ་སྡེབ་སྦྱོར་མཛད་པ་རེད། སྨན་དེ་གཉིས་ཁ་སང་དེ་རིང་ཡང་དངོས་སུ་ཡོད་པ་རེད། དཔེ་བཞག་ན་དེ་ལྟ་བུ་རེད། འདི་ཚོ་སྤྱིར་བཏང་གི་སྨན་པ་དཀྱུས་མ་ཞིག་གིས་སྨན་སྡེབ་སྦྱོར་མཛད་པ་དང་རྩ་བ་ཉིད་ནས་གཅིག་གི་མ་རེད།

ཁོང་རྣམ་པ་ཡིན་ན་སངས་རྒྱས་བྱང་སེམས་ཀྱི་སྤྲུལ་བ་ཤ་སྟག་རེད་ལ། ཁོང་རྣམ་པ་ཡི་ཐུགས་རྗེ་བྱིན་རླབས་དང་ཐུགས་རྒྱུད་ཀྱི་རྟོགས་པ་དེ་སྔགས་ཀྱི་གདངས་སུ་འཕོས་ནས། སྨན་དེ་ལ་བྱིན་རླབས་བྱས་པ་ཡིན་ན། དེས་འགྲོ་བ་སེམས་ཅན་ལ་ཚེ་འདིའི་ནད་རིགས་བཞི་བརྒྱ་རྩ་བཞི་ལ་ཕན་པ་མ་ཟད། སྤྱིར་གཏང་གི་ཉོན་མོངས་དུག་གསུམ་ལའང་ཕན་པ་ཡོད་པ་དེ་འདྲ་ཞིག་རེད། སྔོན་མ་ང་རང་ལ་སྨན་གྱི་དགེ་རྒན་ཞིག་ཡོད། ཁོང་ནི་སྨན་ལ་ཧ་ཅང་མཁས་པའི་དགེ་སློང་ཞིག་རེད། ཁོང་གིས་ང་རང་ཚོ་ལ་སྨན་སྡེབ་ཏུ་འཇུག་གི་རེད། སྨན་བསྡེབས་ཚར་དུས་ཁོང་གིས་སྨན་དེ་ལ་སངས་རྒྱས་སྨན་བླ་ལ་བརྟེན་ནས་འདོན་པ་གསུངས་ཏེ་བྱིན་རླབས་དེ་འདྲ་གནང་གི་འདུག སྐབས་དེར་ང་ཚོ་ལོ་ཆུང་ཆུང་རེད། དེའི་རྐྱེན་གྱིས་ཇི་ལྟར་བྱིན་རླབས་གནང་གི་ཡོད་པ་ཧ་གོ་གི་མ་རེད། ད་ལྟ་བསམ་བློ་བཏང་ན། གཡུ་ཐོག་སྙིང་ཐིག་ལ་བརྟེན་ནས་བྱིན་རླབས་གནང་བ་ཡིན་རྒྱུ་རེད་བསམ་གི་འདུག

གང་ལྟར་བོད་གངས་ཅན་ལ་ལུགས་སྲོལ་ཡོད་པ་རེད། སྨན་བསྡེབས་ཚར་ནས་སྨན་མཁོ་བའི་མི་ལ་མ་སྤྲད་པའི་སྔོན་ལ། སྨན་པ་རང་ངོས་ནས་ཀྱང་སངས་རྒྱས་སྨན་བླ་དང་སྨན་གྱི་རྒྱལ་བོ་གཡུ་ཐོག་པ་དེ་འདྲ་ཡི་བླ་སྒྲུབ་དང་མཚམས་བསྙེན་པ་ལ་བརྟེན་ཏེ། སྔགས་ཀྱི་སྒོ་ནས་སྨན་དེ་ནུས་པ་དང་ལྡན་པ། བཅུད་དང་ལྡན་པ། གེགས་དང་བྲལ་བ། ཕན་ཡོན་དང་ལྡན་པ་བྱས་ནས་དེ་ནད་པ་ལ་སྤྲད་པ་ཡིན་ན། ཕན་ཐོགས་ཆེན་པོ་ཡོང་གི་ཡོད་པ་རེད།

དེ་ནས་བདུད་རྩི་ཆོས་སྨན་ཟེར་བ་དེ་སྨན་དང་སྔགས་གཉིས་ཟུང་དུ་འབྲེལ་བའི་སྐུ་ཚབ་དང་མིག་དཔེའི་བསྡུས་གཟུགས་ཀྱི་རང་བཞིན་ཅན་ཞིག་རེད། བདུད་རྩི་ཆོས་སྨན་གྱི་ཁོངས་སུ་གཏོགས་པའི་རིལ་བུ་མང་པོ་ཡོད་པ་རེད། དེ་སྔ་འགྱུར་རྙིང་མ་བ་དང་། དཔལ་ལྡན་ས་སྐྱ་བ། རི་བོ་དགེ་ལྡན་པ། རྒྱལ་བ་ཇོ་ནང་བ། འགྲོ་མགོན་བཀའ་བརྒྱུད་པ་སོགས་སྒྲུབ་བརྒྱུད་ཤིང་རྟ་བརྒྱད་པོས་བདུད་རྩི་ཆོས་སྨན་བཟོ་གི་ཡོད་པ་རེད། བདུད་རྩི་ཆོས་སྨན་འདི་ཁ་སང་དེ་རིང་སྙིགས་མ་ལྔ་བདོ་བའི་སྐབས། ལྟ་བ་སྙིགས་མ། ཚེ་སྙིགས་མ། བསམ་བློ་སྙིགས་མ་ལ་སོགས་འདི་ལ། ད་གཟོད་སྨན་དང་སྔགས་ཟུང་དུ་འབྲེལ་ནས། བདུད་རྩི་ཆོས་སྨན་ག་ཚོད་ཐུབ་ཐུབ་ཀྱིས་མང་པོ་བསྡེབས་ཏེ། མིའི་སྤྱི་ཚོགས་ཀྱི་ནང་དུ་བཀྲམས། དུད་འགྲོ་སེམས་ཅན་རྣམས་ཀྱི་ཁ་ནང་ལ་ཡང་བླུགས་པ་ཡིན་ན། དེ་ཧ་ལས་པ་གལ་ཆེན་པོ་ཡིན་པ་མ་ཟད་ཕན་ཡང་རྒྱ་ཆེན་པོ་འཐོག་ཀི་རེད།

ཁ་སང་དེ་རིང་ལ་མཚོན་ན། ཏོག་དབྱིབས་ནད་དུག་འདིས་མནར་གི་ཡོད་པ་འདིའི་སྐབས་ཐོག་འདི་ལ། བདུད་རྩི་ཆོས་སྨན་དང་ནག་པོ་དགུ་སྦྱོར་ལྟ་བུ་དང་། དེ་ལྟ་བུའི་ང་ཚོས་སྔགས་དང་འབྲེལ་བའི་བདུད་རྩི་རིལ་བུ་ལ་སོགས་པ་གང་ཐུབ་ཐུབ་ཅིག་སྡེབ་ཐུབ་པ་ཡིན་ན། སེམས་ཅན་མང་པོ་ལ་ཕན་ཐོགས་ཆེན་པོ་འབྱུང་རྒྱུ་རེད་བསམ་གི སྤྱིར་གཏང་གི་ཆ་ནས་ཀྱང་། ང་ཚོ་བོད་ཀྱི་སྨན་པ་ཞིག་ཡིན་ན། སྨན་གྱི་སྡེབ་སྦྱོར་ལ་སྨན་གྱི་གཞུང་ན་གསུངས་ཡོད་པའི་རྒྱུ་ཆ་དེ་རྣམས་ཆ་ཚང་བ་བགྱིས། དེའི་སྟེང་དེ་ལ་སྐྱེས་བུ་དམ་པ་རྣམས་གྱིས་བསྒྲུབས་ཡོད་པའི་བདུད་རྩི་ཆོས་སྨན་དེ་འདྲ་གང་ལ་གང་འཚམ་གྱིས་སྨན་གྱི་ནང་ལ་བསྲེས་པ་ཡིན་ན། བརྒྱ་ཆའི་བརྒྱ་ཡིས་ཕན་ཐོགས་ཡོད་རྒྱུ་རེད་བསམ་གི དེ་ལ་རྩ་བ་ཉིད་ནས་གནོད་པ་ཡོད་རྒྱུ་མ་རེད། འདི་ལྟ་བུ་སྨན་པ་ཚོས་ཐུགས་ལ་འཛིན་དགོས་པ་ཞིག་ཡིན་རྒྱུ་རེད་བསམ་གི་ཡོད། དེ་མཐའ་གཅིག་ཏུ་ངས་སྨན་གྱི་ནང་ལ་བདུད་རྩི་ཆོས་སྨན་བླུགས་དགོས་གི་ཡོད་ཅེས་བཤད་པ་མིན། ཡིན་ན་ཡང་དེ་འདྲ་གནང་བ་ཡིན་ན་ཚེ་འདི་དང་ཕྱི་མ་གཉིས་ལ་ཕན་ཐོགས་གི་ཡོད་པ་རེད།

སྤྱིར་གཏང་གི་སྨན་ཞིག་ཡིན་ན་ཚེ་འདིའི་ནད་ལ་ཕན་ཐོགས་པ་ཞིག་ཡིན་ན་མ་གཏོགས་ཚེ་ཕྱི་མ་ལ་ཕན་གི་མ་རེད། རྒྱ་བོད་ཀྱི་མཁས་གྲུབ་སྐྱེས་བུ་སངས་རྒྱས་བྱང་ཆུབ་སེམས་དཔའ་རྣམས་ཀྱིས་བྱིན་གྱིས་བརླབས་པ་ཡི་རིལ་བུ་རྩ་ཆེན་པོ་དང་། ཁྱད་པར་དུ་སྔ་འགྱུར་རྙིང་མ་བ་ལ་མཚོན་ན་གུ་རུ་རིན་པོ་ཆེ་ཡི་ཆོས་སྨན་དང་མཁའ་འགྲོ་ཡེ་ཤེས་མཚོ་རྒྱལ་གྱི་གཏེར་སྨན། དེ་ལ་གཏེར་སྟོན་རྣམ་པའི་གཏེར་བྱོན་ཆོས་སྨན་རིལ་བུ་འདྲ་མི་འདྲ་མང་པོ་ཡོད་པ་དེ་ཚོ་བདུད་རྩི་ཆོས་སྨན་ལ་སྦྱར་ནས། སྨན་སྣ་ཚོགས་ཀྱི་ནང་དུ་བླུགས་ནས་དེ་ལ་སྔགས་བརྒྱབ་པ་ཡིན་ན། དེས་ནད་རིགས་བཞི་བརྒྱ་རྩ་བཞི་དང་བགེགས་རིགས་སྟོང་ཕྲག་བརྒྱད་ཅུ། ཡེ་འདྲོགས་སུམ་བརྒྱ་དྲུག་ཅུ་ལ་སོགས་ཟློག་པ། གང་ལྟར་ཀྱང་ཉོན་མོངས་དུག་ལྔ་དུག་གསུམ་ལ་སོགས་པ་འཇོམ་རྒྱུར་ཧ་ལས་པ་ཕན་རྒྱུ་རེད་བསམ་གི་འདུག

གནའ་བོའི་དུས་སུ་སྔ་རབས་པ་རྣམས་ཀྱིས་ནམ་མཁའ་ལ་ལྷ་གནས་པ། མཚོ་དང་ཆུ་ལ་ཀླུ་གནས། བྲག་སོགས་ལ་བཙན་གནས། མི་དང་ལྷན་དུ་བདུད་གནས་པ། རི་ལ་གཉན་གནས་པ། ས་འོག་ལ་ས་བདག་གནས་པ་ལ། གདོན་ཞེས་གོང་གི་ལྷ་ཀླུ་གཉན་གསུམ་གང་རུང་མ་རུངས་པར་གྱུར་བ་འདིར་གནས་པའི་གནོད་སྦྱིན་དང་བདུད་སྲིན་སོགས་ལ་འབྱུང་ནུས་ཕྲ་མོ་མངའ་བ་སྟེ་སྒྲ་དང་དབྱིབས་སོགས་ཀྱི་རྟེན་འབྲེལ་གྱི་ནུས་པ་ཤེས་པས། རྟེན་ནུས་དེས་ཞི་རྒྱས་དབང་དྲག་གི་ལས་བྱས་པ་བརྒྱུད་སྔགས་བཅོས་ཀྱི་རིག་པ་སོགས་བྱུང་བ་དང་། གདོད་མའི་མང་བཀུར་རྒྱལ་པོའི་དུས་ནས་ཆོས་ཀྱི་ཡུལ་གྲུ་ཞང་ཞུང་དང་། ཨོ་རྒྱན་ཡུལ། རྒྱ་གར་གྱི་དྲང་སྲོང་རྣམས་ལས་རིམ་བཞིན་དར་ཞིང་མཆེད་པ་དང་། གནའ་བོའི་བོད་ལའང་སྔགས་བཅོས་དར་ཆེ་བར་མངོན་ཏེ། ཐོག་མར་ཡུལ་མིང་ལ་བོན་ཞེས་གྲགས་པའི་ཐ་སྙད་དེ་སྔགས་བཟླ་བའི་དོན་དང་། བོན་པོ་ཞེས་པ་ནི་སྔགས་བཟླ་མཁན་ལ་འཇུག བོན་ཤེས་པ་ཅན་བཅུ་གཉིས་ཀྱི་ཁྲོད་དུ་སྔགས་ཀྱི་ཆོ་ག་དང་དེའི་སྐོར་གྱི་ཤེས་བྱ་བསྟན་ཡོད་པ་དང་། ཐང་ཡིག་གསར་མར་བོད་མིའི་འཚོ་སྟངས་བཤད་དུས་སུ་མི་རྣམས་ཆོས་ལ་དགའ་ཞིང་སྔགས་ལ་སྦྱོང་། ཞེས་བསྟན་ཡོད་པ་དང་བོན་སྟོན་གཤེན་རབ་དུས་སུ། འཚོ་བྱེད་དཔྱད་བུ་ཁྲི་ཤེས་ཀྱིས་གསོ་རིག་དཔེ་རྙིང་འབུམ་བཞི་ཕྱོགས་བསྒྲིགས་གནང་པ་དང་། དེའི་ནང་གདོན་ནད་དང་དུག་བཅོས་དང་བྱིས་ནད་སོགས་ལེའུ་མང་པོར་སྔགས་བཅོས་ཀྱི་སྐོར་བསྟན་ཡོད། དྲན་པ་ནམ་མཁའ་སོགས་བོན་གྱི་བླ་ཆེན་མང་པོས་སྤེལ་བའི་སྔགས་བཅོས་ཀྱི་ཆོ་ག་རྣམས་དང་། ཕྱིས་སུ་གཏེར་ནས་བཏོན་པའི་ནད་སྔགས་སྐོར་གྱི་གཏེར་ཡིག་རྣམས་ནི་སྔགས་བཅོས་ཀྱི་ཐོག་མའི་གྲས་ཡིན་འདུག དུས་རབས་དྲུག་པ་ལ། མིག་ནད་ལ་མཁས་པའི་མདོ་ཁམས་ཀྱི་ཨ་ཞ་སྨན་པ་ལགས་ཀྱིས་སྔགས་བཅོས་ལག་ལེན་བྱས་ཡོད་པ་དང་། མིག་ནད་སྔགས་ཀྱིས་བཅོས་པའི་ལག་ལེན་ནི་ད་ལྟའི་བར་དུ་ཉམས་མེད་དར་ཁྱབ་ཆེའོ། །དུས་རབས་བདུན་པ་ལ། བོད་རྒྱལ་སྲོང་བཙན་སྒམ་པོས་རིག་སྔགས་མ་ཎི་ཡིག་དྲུག་དར་སྤེལ་བྱས་པ་དང་། དེ་ནས་བཟུང་སྔགས་བཅོས་འདུས་པའི་རྒྱ་གར་གྱི་དཔེ་ཆ་སོགས་མང་པོ་འགྱུར་ནས་ཆོ་ག་འདི་དར་ཁྱབ་བྱུང་། དུས་རབས་བརྒྱད་པའི་དུས། གཡུ་ཐོག་ཡོན་ཏན་མགོན་པོ་མཆོག་གིས་བརྩམས་པའི་རྒྱུད་བཞི་རུ་སྔགས་བཅོས་གང་མང་བཀོད་ཡོད་པ་དང་། སློབ་དཔོན་པདྨ་འབྱུང་གནས་ཀྱིས་བོད་ཡུལ་དུ་རྡོ་རྗེ་ཐེག་པའི་གསང་སྔགས་སྲོལ་བཏོད་ཅིང་གོས་དཀར་ལྕང་ལོའི་སྡེ་བཙུགས་པས་སྔགས་བཅོས་རིག་པའང་སྔགས་པའི་ཤེས་རིག་གི་གྲུབ་ཆ་གཙོ་བོ་ཞིག་ཏུ་གྲུབ་ལ། སློབ་དཔོན་མཆོག་ནས་ཀྱང་སྔགས་བཅོས་ལ་རྩིས་མཐོང་ཆེན་པོ་གནང་ཡོད་དེ། སྔགས་ཀྱི་བསྲུང་བཅོས། སྲུང་འཁོར་དང་ཟ་ཡིག རྫས་སྔགས་ཀྱི་བཅོས་ཐབས་སོགས་སྔགས་བཟླ་བའི་གྲངས་དང་དེའི་ཕན་ཡོན་དང་། ཇི་ལྟར་འདོགས་པའི་ཐབས་ཤེས་སོགས་ཞལ་གསལ་ཞིང་གདེང་ཚོད་ཆེན་པོའི་སྒོ་ནས་གསུངས་ཡོད། བུད་མེད་སྔགས་མཁན་ཡེ་ཤེས་མཚོ་རྒྱལ་ཡང་དུས་དེར་བྱུང་བ་དང་། སྨན་སྔགས་ཟུང་སྤྱོད་ཉམས་ལེན་བྱས་པས་རྟེན་ཡང་སྨན་སྔགས་དཀྱུས་མ་ཡིན་ཟེར། དུས་རབས་དགུ་པར། གཉན་ནད་སྨན་བཅོས་ལ་མཁས་པའི་བོད་ཀྱི་སྨན་པ་ཐོག་མ་གཏེར་སྟོན་རྡོར་འབུམ་ཆོས་གྲགས་བྱོན་པ་དང་། བདུད་རྩི་བུམ་པ་ཆེ་ཆུང་ཞེས་པ་གཏེར་ནས་བཏོན་ལ། དེའི་ཁྲོད་གཉན་ནད་ལ་སྔགས་བཅོས་ཀྱི་ཆོ་ག་དགོས་པར་བསྟན་ཡོད་པར་མངོན། དུས་རབས་བཅུ་པར། སྔགས་ཀྱི་ཉམས་ལེན་ལ་མཁས་པའི་གཏེར་སྟོན་དབོན་སྲས་ཁྱུང་རྒོད་བྱོན་པ་དང་། སྔགས་ཀྱི་ནུས་པ་མཆོག་ཏུ་གྲུབ་པའི་རྟགས་ཀྱིས། སྐུ་གཤེགས་དུས་སྐུ་གཟུགས་འོད་ཕུང་ཨ་ཡི་གཟུགས་ཅན་དུ་གྱུར་ནས་གཤེགས་སྐད། དུས་རབས་བཅུ་གཅིག་པར། མཉམ་མེད་དྭགས་པོ་ལྷ་རྗེ་བྱོན་ནས་དྭགས་པོ་ཐོར་འབུམ་ཞེས་པ་བརྩམས་པ་དང་། གཏེར་སྟོན་གྲ་པ་མངོན་ཤེས་ཀྱིས་ཞང་བློན་སྒྲུབ་ཐབས་སོགས་གཏེར་ནས་དྲངས་ཏེ་དར་སྤེལ་གནང་། དེ་མིན་བོན་པོ་ཨ་ཡ་ལྷ་འབུམ་མམ་གུ་རུ་རྣོ་རྩེ་ཡིས་སྨན་རྩིས་སྔགས་བཅོས་ཀྱི་ཆོ་ག་སོགས་གཏེར་ལས་དྲངས་ནས་སྤེལ་བར་གནང་།

དུས་རབས་བཅུ་གཉིས་པར།གཡུ་ཐོག་གསར་མ་ཡོན་ཏན་མགོན་པོས་གསོ་རིག་རྒྱུད་བཞི་ལ་ཁ་སྐོང་དང་ལག་ལེན་གྱི་ཞིབ་འཇུག་གནང་བ་དང་སློབ་མ་སུམ་སྟོན་ཡེ་ཤེས་གཟུངས་སོགས་ལ་སྤེལ། ཁོང་གིས་གཡུ་ཐོག་སྙིང་ཐིག་གི་ཕྱི་ནང་གསང་བའི་བླ་སྒྲུབ་སོགས་སྨན་ཆོས་ཟུང་འབྲེལ་སྐོར་གསུངས་པའི་ནང་སྔགས་བཅོས་སྐོར་བསྟན་ཡོད། མངའ་བདག་ཉང་རལ་གྱིས་གཏེར་ཆོས་བཏོན་ནས་སྔགས་བཅོས་ཀྱི་ཐད་ལ་ཕྱག་རྗེས་ཆེ་བ་དང་།ས་སྐྱ་གྲགས་པ་རྒྱལ་མཚན་གྱིས་གསོ་དཔྱད་རྒྱལ་པོའི་དཀོར་མཛོད་ཅེས་པར་སྔགས་བཅོས་ཀྱི་ཆོ་ག་མང་དུ་གསུངས་ཡོད།དུས་རབས་བཅུ་གསུམ་པར།གུ་རུ་ཆོས་ཀྱི་དབང་ཕྱུག་དང་གཏེར་སྟོན་ར་མོ་ཤེལ་སྨན་སོགས་ཀྱིས་གསོ་རིག་ཁྱབ་སྤེལ་མཛད་པ་དང་། བྲང་ཏི་འཇམ་དཔལ་བཟང་པོས་ས་སྐྱ་དགོན་དུ་སློབ་བརྒྱུད་སྤེལ་ནས་ས་སྐྱ་སྨན་གྲོང་ལུགས་ཞེས་གྲགས་པ་དང་སྔགས་བཅོས་ལག་ལེན་ཤ་སྟག་གནང་བ་རེད། སྐལ་ལྡན་བྱིས་པ་ཞེས་པས་གཉན་ནད་རིམས་ནད་སྐོར་བཅོས་པའི་སྔགས་ལྡན་མཁྱུད་དཔེ་གཏེར་ལས་དྲངས་ནས་གསོ་དཀའ་བ་མང་པོ་བཅོས། དུས་རབས་བཅུ་བཞི་པར། གསང་སྔགས་ཀྱི་གཞུང་ལ་མཁས་ཤིང་སྔགས་བཅོས་བྱང་ཆུབ་པའི་བྱང་པ་རྣམ་རྒྱལ་གྲགས་བཟང་གིས་བྱང་ལུགས་ཏེ་བོད་གསོ་རིག་གི་སྲོལ་གྲགས་ཅན་འདིའི་སྲོལ་བཏོད། དུས་རབས་བཅོ་ལྔ་པའི་ནང་། ཟུར་མཁར་མཉམ་ཉིད་རྡོ་རྗེ་བྱོན་ནས་ཟུར་ལུགས་ཀྱི་སྲོལ་བཏོད་པ་དང་། ཁོང་གིས་བརྩམས་པའི་དེབ་མན་ངག་བྱེ་བ་རིང་བསྲེལ་ཞེས་པའི་ནང་སྔགས་བཅོས་སྐོར་མང་དུ་གསུངས་ཡོད། དུས་རབས་བཅུ་དྲུག་པར། འབྲི་གུང་ཆོས་ཀྱི་གྲགས་པས་འབྲི་གུང་ལུགས་ཀྱི་སྲོལ་བཏོད་པ་དང་། ཟུར་མཁར་བློ་གྲོས་རྒྱལ་པོས་རྒྱུད་བཞིའི་གཞུང་དོན་གསལ་བར་བཀྲལ། དུས་རབས་བཅུ་བདུན་པ་ལ། སྡེ་སྲིད་སངས་རྒྱས་རྒྱ་མཚོས་བརྩམས་པའི་མན་ངག་ལྷན་ཐབས་ཞེས་པར་སྔགས་བཅོས་སྐོར་བསྟན་ཡོད་ཅིང་། དར་མོ་སྨན་རམས་པ་བློ་བཟང་ཆོས་གྲགས་ལགས་ཀྱིས་སྔགས་བཅོས་སྐོར་མང་དུ་བསྟན་པའི་མན་ངག་བཀའ་རྒྱ་མ་ཞེས་པ་གཅེས་སུ་བཏུས་པ།བདུད་རྩི་འགྱུར་མེད་དང་རྣམ་རྒྱལ་རྡོ་རྗེ་སོགས་ཀྱིས་ལྷུན་སྡིང་སྨན་གྲོང་ལུགས་སོགས་སྲོལ་བཏོད་པ། གཏེར་སྟོན་གནམ་ཆོས་མི་འགྱུར་རྡོ་རྗེས་སྔགས་རྫས་ཀྱི་ཕན་ཡོན་སོགས་མང་དུ་གསུངས། དུས་རབས་བཅོ་བརྒྱད་པའི་དུས་སུ། དེའུ་དམར་བསྟན་འཛིན་ཕུན་ཚོགས་ཀྱིས་སྔགས་བཅོས་སྐོར་ལ་ཡི་དམ་འཇིགས་བྱེད་དང་བསྟུན་ནས་བཅོས་ཐབས་སོགས་བསྟན་ཡོད། སྨན་པ་ཀརྨ་ངེས་ལེགས་བསྟན་འཛིན་གྱི་གསུང་རྩོམ་ཕན་བདེའི་བསིལ་ཟེར་སྤྲོ་བའི་ཟླ་གསར་ཞེས་པའི་ནང་སྔགས་བཅོས་སྐོར་བསྟན་ཡོད། དུས་རབས་བཅུ་དགུ་པའི་ནང་། ཀོང་སྤྲུལ་ཡོན་ཏན་རྒྱ་མཚོས་ཟིན་ཏིག་ཅེས་པའི་སྨན་དཔེ་བརྩམས་ཤིང་དེ་རུ་ཁྱུང་སྔགས་ཀྱིས་ནད་གཞི་བཅོས་ཐབས་བསྟན་ཡོད་པ་དང་། མི་ཕམ་རྣམ་རྒྱལ་རྒྱ་མཚོས་སྔགས་དང་དཔེ་མཁྱུད་ཀྱི་བཅོས་ཐབས་བསྟན་ཡོད། དུས་རབས་ཉི་ཤུ་པའི་ནང་། མགོ་ལོག་སྟག་བླ་ནོར་བུས་སྔགས་བཅོས་སྐོར་གསུངས་པ་དང་། ཁམས་གཙང་འབྲུག་རྒྱལ་གྱི་གཏེར་མར་གཉན་ནད་སྔགས་བཅོས་ཀྱི་སྐོར་གསུངས་པ། བདུད་འཇོམས་འཇིགས་བྲལ་ཡེ་ཤེས་རྡོ་རྗེས་སྔགས་ཀྱི་ལས་ཚོགས་མང་དུ་གསུངས་ཡོད་པ་སོགས། སྔགས་བཅོས་ནི་གསོ་རིག་གི་གཞུང་དང་ལག་ལེན་ཆེར་དར་ཐུབ་མེད་པའི་དུས་ཤིག་ནས་བྱུང་བའི་ཡ་ཐོག་སྨན་བཅོས་བྱ་ཐབས་ཤིག་ཡིན་པ་དང་། ཕྱིས་སུ་འབྱུང་བའི་ལུས་ཁམས་གསོ་བའི་གསོ་བ་རིག་པའི་ཤེས་བྱ་དང་བསྟུན་ནས་འཕེལ་རྒྱས་བྱུང་བར་མངོན། དེ་བཞིན་རྒྱ་གར་དང་ཨོ་རྒྱན་ཡུལ་སོགས་ཀྱི་ལུགས་དང་གྲུབ་མཐའ་ནས་རང་སོ་སོའི་སྔགས་བཅོས་ཀྱི་ཆོ་ག་བྱུང་བ་ཡུལ་ལུང་སོ་སོ་ནས་རང་རང་གི་འཚོ་བའི་དགོས་མཁོ་དང་མཐུན་པའི་སྒོ་ནས་སློབ་སྦྱོང་དང་དར་སྤེལ་གནང་ནས་རྒྱུན་འཛིན་བྱུང་བ་ཡིན། (1)

ང་ཚོ་བོད་ཀྱི་རིག་གཞུང་འདིའི་ནང་དུ་སྨན་དང་སྔགས་འདི་གཉིས་ཟུང་དུ་སྦྲེལ་དགོས་པ་འདི་ཧ་ལས་པའི་གལ་ཆེན་པོ་རེད། ཁྱད་པར་དུ་ཁ་སང་དེ་རིང་གི་སྙིགས་མ་ལྔ་བདོ་འདིའི་ནང་ལ། སྨན་དེ་ཚོའི་ནང་ལ་ངེས་པར་དུ་བདུད་རྩི་ཆོས་སྨན་ལ་སོགས་པ་བླུགས་ནས་སྔགས་བརྒྱབ་པ་ཡིན་ན་ཕན་ཐོགས་ཆེན་པོ་ཡོད་རྒྱུ་རེད་མ་གཏོགས། འབྱུང་བ་བཞིའི་ནུས་པ་དེ་སྔོན་མའི་ལོ་སྟོང་ཕྲག་དང་བསྡུར་ན་ཉམས་ཚར་བ་ཡིན་པས། སྨན་སྣ་ཚོགས་སྤྱིར་གཏང་གི་དཔེ་ཆ་ནང་དུ་ཡོད་པའི་སྒྲིག་སྦྱོར་དེ་བཞིན་སྡེབ་པ་ཡིན་ན་ཡང་སྨན་གྱི་ནུས་པ་ཐོན་ཅིང་ཕན་ཐོགས་འབྱུང་རྒྱུ་དེ་ཧ་ཅང་ཆུང་ཆུང་ཡིན་རྒྱུ་རེད་བསམ་གི དེ་བས་སྨན་གྱི་ནང་དུ་བདུད་རྩི་ཆོས་སྨན་ལ་སོགས་པ་བླུགས་ནས་སྔགས་བརྒྱབ་ནས་མི་ལ་སྤྲད་པ་ཡིན་ན། དེ་ད་གཟོད་ཕན་ཐོགས་རྒྱ་ཆེན་པོ་ཡོད་རྒྱུ་རེད་བསམ་གི་འདུག སྔོན་མས་ངས་ང་རང་གི་རྙིང་མའི་ཕྱོགས་ཀྱི་རྩ་བའི་བླ་མ་སྐྱབས་རྗེ་འཁྲུལ་ཞིག་རྡོ་རྗེ་འཆང་ཆེན་པོ་མཆོག་ལ། ང་རང་མཚམས་རེར་རི་ཁྲོད་འགྲིམ་ནས་སྒྲུབ་པ་ཉམས་ལེན་རེ་བྱེད་ཨེ་ཐུབ་བསམ་གི་འདུག དེ་ལ་དམིགས་པའི་བཅུད་ལེན་གྱི་གདམས་པ་རེ་ཐུགས་རྗེས་གཟིགས་ཞུས་པ་ན། ཁོང་གིས། བོད་ཀྱི་རྩྭ་དང་མེ་ཏོག་སོགས་རྗེ་བཙུན་མི་ལ་རས་པའི་སྐབས་དང་བསྡུར་ན། དེང་སང་རྩྭ་སྨན་གྱི་ནུས་པ་ཧ་ལས་པ་ཞིག་ཉམས་ཚར་བ་རེད། རྗེ་བཙུན་མི་ལའི་དུས་ཀྱི་ཟྭ་ཡི་ནུས་པ་དེ་དེང་སང་ཉམས་ཚར་ཡོད་པ་རེད། དེ་བས་དེང་སང་བཅུད་ལེན་ལ་སྡོད་ཁག་པོ་ཡོད་པ་རེད། གསུངས་སོང་། དེ་ལ་བསམས་ན་ཡང་སྨན་གྱི་ནུས་པ་རྒྱས་པའམ་གསོ་བའི་ཆེད་དུ། བོད་ཀྱི་སྨན་དང་སྔགས་གཉིས་ཟུང་འབྲེལ་བྱེད་རྒྱུ་དེ་ཅི་ཙམ་ཞིག་གལ་ཆེན་པོ་ཡིན་པ་དེ་ཤེས་ཐུབ་ཀྱི་འདུག ད་དེ་ཙམ་ཞུས་པ་ཡིན། བཀྲ་ཤིས་བདེ་ལེགས་ཞུ།

རྫོགས་སོ།།

ཚན་པ་དང་པོ། https://tibettimes.net/2023/03/02/224422/

ཡེ་ཤེས་མཁའ་འགྲོས་ཡི་གེར་ཕབ།