ཞི་ཅིན་ཕིན་དང་པུ་ཊིན་གཉིས་ཐུག་འཕྲད་བྱས།

ཞི་ཅིན་ཕིན་གྱིས་ཨུ་རུ་སུར་ཡུ་ཀེ་རེན་གྱི་དམག་འཁྲུག་མཚམས་འཇོག་དགོས་པ་དང་དམག་མི་རྣམས་ཕྱིར་འཐེན་བྱེད་པའི་སྐུལ་མ་གཏོང་དགོས་སྐོར་ཨ་རིས་བརྗོད།

Russian matryoshka dolls with portraits of the Chinese and Russian presidents have been on sale in Moscow

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། ཨ་རིའི་གཞུང་གིས་རྒྱ་ནག་གི་སྲིད་འཛིན་ཞི་ཅིན་ཕིན་ཨུ་རུ་སུའི་སྲིད་འཛིན་པུ་ཊིན་ (Vladimir Putin) དང་ཐུག་འཕྲད་བྱེད་སྐབས། ཨུ་རུ་སུས་ཡུ་ཀེ་རེན་བར་གྱི་དམག་འཁྲུག་མཚམས་འཇོག་དང་དམག་མི་ཕྱིར་འཐེན་དགོས་པའི་སྐུལ་མ་གཏོང་དགོས་སྐོར་ནན་བརྗོད་བྱས་འདུག

དེ་འབྲེལ་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ནས་ཉིན་གྲངས་གསུམ་རིང་རྒྱ་ནག་གི་སྲིད་འཛིན་ཞི་ཅིན་ཕིན་དང་ཨུ་རུ་སུའི་སྲིད་འཛིན་པུ་ཊིན་གཉིས་རྒྱལ་ས་མོ་སི་ཁོ་ (Moscow) རུ་ཐུག་འཕྲད་ཀྱིས་རྒྱལ་ཁབ་གཉིས་ཀྱི་མཉམ་འབྲེལ་སོགས་ཀྱི་ཐོག་གླེང་སློང་བྱེད་བཞིན་ཡོད་པར་བརྟེན། དེ་རིང་ཨ་རིའི་ཕོ་བྲང་དཀར་པོའི་རྒྱལ་སྲུང་ལྷན་ཁང་གི་མགྲིན་ཚབ་པ་ཇོན་ (John Kirby) ལགས་ཀྱིས། རྒྱ་ནག་གི་སྲིད་འཛིན་ཞི་ཅིན་ཕིན་གྱིས་པུ་ཊིན་ལ་ཡུ་ཀེ་རེན་གྱི་གྲོང་ཁྱེར་ཁག་དང་སྨན་ཁང་། སློབ་གྲྭ་སོགས་ཀྱི་ནང་འབར་རྫས་གཡུགས་མཚམས་བཞག་སྟེ། དམག་འཁྲུག་དང་སྡུག་སྦྱོང་མནར་གཅོད་གཏོང་མཚམས་འཇོག་དགོས་པ་མ་ཟད། ཡུ་ཀེ་རེན་ནས་ཨུ་རུ་སུའི་དམག་མི་རྣམས་ཕྱིར་འཐེན་བྱ་དགོས་པའི་སྐུལ་མ་གཏོང་བའི་རེ་བ་ཡོད། འོན་ཀྱང་རྒྱ་ནག་གིས་ཨུ་རུ་སུ་དང་ལྷན་དུ་དམག་མི་རྣམས་ཡུ་ཀེ་རེན་ནས་ཕྱིར་འཐེན་བྱེད་པའི་གྲོས་ཆོད་ཅིག་མ་བཞག་ཚེ། དེ་ནི་རྒྱ་ནག་གིས་ཨུ་རུ་སུའི་ཡུ་ཀེ་རེན་ནང་བཙན་འཛུལ་བྱས་པར་རྒྱབ་སྐྱོར་བྱེད་པ་མཚོན་པས་སེམས་འཚབ་ཡོད་སྐོར་བརྗོད་འདུག

ཡང་དེ་རིང་ཉི་ཧོང་སྲིད་བློན་སྐུ་ཞབས་ཧྥུ་མིའོ་ཀི་ཤི་ཌ་ (Fumio Kishida) ལགས་རྒྱ་གར་གྱི་སྲིད་བློན་མོ་ཌི་མཆོག་དང་ཐུག་འཕྲད་གནང་ཟིན་རྗེས། ཡུ་ཀེ་རེན་གྱི་སྲིད་འཛིན་གྱི་མགྲོན་འབོད་འོག་ནས་རྒྱ་གར་ནས་ཡུ་ཀེ་རེན་གྱི་རྒྱལ་ས་ཀིབ་ (Kyiv) ལ་བསྐྱོད་ཡོད་པ་དང་། ཉི་ཧོང་སྲིད་བློན་སྐུ་ཞབས་ཧྥུ་མིའོ་ཀི་ཤི་ཌ་ཡིས་ཡུ་ཀེ་རེན་གྱི་སྲིད་འཛིན་ཝོ་ལོ་ཌི་མིར་ཛེ་ལེན་སི་ཀི་ (Volodymyr Zelensky) དང་ཐུག་འཕྲད་བྱས་ཏེ། ཉི་ཧོང་གིས་མུ་མཐུད་ཡུ་ཀེ་རེན་ལ་རྒྱབ་སྐྱོར་བྱ་རྒྱུ་ཡིན་སྐོར་སོགས་ཀྱི་ཐོག་གླེང་སློང་བྱ་རྒྱུ་ཡིན་པ་དང་། ཉི་ཧོང་གི་སྲིད་བློན་ཡུ་ཀེ་རེན་ནང་བསྐྱོད་པ་དེས་རྒྱ་ནག་ལ་ཁ་གཏད་ཀྱི་བརྡ་ལན་ཞིག་སྤྲོད་ཀྱིན་ཡོད་སྐོར་བརྗོད་འདུག

ཨུ་རྒྱ་གཉིས་ཀྱི་སྲིད་འཛིན་ཐུག་འཕྲད་སྐབས། རྒྱལ་ཁབ་གཉིས་ཀྱི་འབྲེལ་ལམ་དང་ཐུན་མོང་གི་ཐབས་ཇུས་འཆར་སྣང་སོགས་ཇེ་མཐོར་གཏོང་ཐབས་སྐོར་གླེང་མོལ་བྱེད་བཞིན་ཡོད་པ་དང་། དམིགས་བསལ་ཐེངས་འདིར་རྒྱ་ནག་གིས་ཞི་ཅིན་ཕིན་ཨུ་རུ་སུར་བསྐྱོད་པ་ནི་ཞི་བདེ་བཟོ་སླད་ཡིན་པའི་རྣམ་པ་ཤུགས་ཆེན་བསྟན་འདུག་ལ། ཡུ་ཀེ་རེན་གྱི་གནད་དོན་ཐོག་བསམ་ཚུལ་བརྗེ་རེས་བྱས་སྐོར་རྒྱ་ནག་གཞུང་འབྲེལ་ཞི་ཧྥ་གསར་ཁང་སྟེང་བཀོད་ཡོད་ཀྱང་། ནུབ་ཕྱོགས་རྒྱལ་ཁབ་ཁག་གིས། ད་ལྟ་ཞི་ཅིན་ཕིན་ཨུ་རུ་སུར་བསྐྱོད་པ་དེས་ཡུ་ཀེ་རེན་ལ་བཙན་འཛུལ་བྱེད་བཞིན་པར་སྤུངས་ཤུགས་འཕར་མ་ཞིག་ཆགས་ཡོད་པའི་སྐྱོན་བརྗོད་བྱས་འདུག

ཞི་ཅིན་ཕིན་གྱིས་ཡུ་ཀེ་རེན་ནང་གི་དོན་རྐྱེན་དེ་དག་ཞི་འཇགས་ཡོང་རྒྱུ་དང་འབྲེལ་བའི་དོན་ཚན་བཅུ་གཉིས་བཏོན་པའི་ནང་། འཛམ་གླིང་གི་རྒྱལ་ཁབ་ཡོངས་ལ་བརྩི་བཀུར་དང་། གྲང་དམག་གི་བསམ་བློའི་འཁྱེར་སོ་དོར་དགོས་པ། སྡང་དགྲར་འཛིན་པའི་བྱ་སྤྱོད་མཚམས་འཇོག་དགོས་པ། ཞི་བའི་ལམ་གྱི་ཐོག་ནས་སླར་ཡང་གྲོས་མོལ་བྱ་རྒྱུ། འགྲོ་བ་མིའི་རིགས་ཀྱི་བདེ་སྡུག་གི་དོན་དུ་ལས་ཀ་བྱེད་དགོས་པ། ཡུལ་མི་དང་བཙོན་པ་སོགས་སྲུང་སྐྱོབ་བྱེད་དགོས་པ། རྡུལ་ཕྲན་བཟོ་སྐྲུན་ཁང་ (Nuclear Power Plant) སྲུང་སྐྱོབ་དགོས་པ། དམག་ཇུས་ལ་མཁོ་བའི་རྡུལ་ཕྲན་མཚོན་ཆ་སོགས་བེད་སྤྱོད་གཏོང་མི་རུང་བ། འབྲུ་རིགས་ཕྱིར་འདྲེན་བྱེད་པར་མཐུན་རྐྱེན་སྦྱོར་བ། ཕྱོགས་གཅིག་གི་ཁྲིམས་ལུགས་གཏན་འབེབས་མཚམས་འཇོག་དགོས་པ། བཟོ་ལས་དང་དེའི་ཐོན་སྐྱེད་དངོས་པོ་རྣམས་སྲ་བརྟན་དགོས་པ། རྩོད་རྙོག་རྗེས་སུ་ཁང་པ་སོགས་བསྐྱར་འཛུགས་བྱེད་པར་མཐུན་འགྱུར་དགོས་སྐོར་སོགས་འདུག

ཐུག་འཕྲད་ཀྱི་བརྙན་ལམ་ཞིག་ཏུ་ཞི་ཅིན་ཕིན་གྱིས། ངའི་བརྩེ་བའི་གྲོགས་པོ་ལགས། ངས་ཁྱེད་ནི་བརྩེ་བའི་གྲོགས་པོ་ཞིག་ལ་བརྩི་ཡི་ཡོད། ང་རྒྱ་ནག་དམར་ཤོག་ཚོགས་པའི་སྲིད་འཛིན་ལ་བསྐྱར་དུ་འདེམས་ཐོན་བྱུང་རྗེས། ཁྱེད་ཀྱིས་ང་ཨུ་རུ་སུར་སྐད་བཏང་བར་ཐུགས་རྗེ་ཆེ་ཞུ། ངས་ཀྱང་ཨུ་རུ་སུ་ཕྱིའི་རྒྱལ་ཁབ་ཁག་གི་ཁྲོད་ནས་ཨང་དང་པོར་རྩིས་ནས་འདིར་ཡོང་བ་ཡིན། ཁྱེད་རང་གིས་སྣེ་ཁྲིད་འོག་ཨུ་རུ་སུའི་རྒྱལ་ཁབ་ཡར་རྒྱས་ཤུགས་ཆེན་ཕྱིན་ཡོད་པ་དང་། ཨུ་རུ་སུའི་མི་མང་གིས་ཁྱེད་རང་ལ་གཡོ་བ་མེད་པའི་ཐོག་ནས་མུ་མཐུད་དུ་རྒྱབ་སྐྱོར་བྱ་རྒྱུའི་གདེང་སྤོབས་ཡོད་སྐོར་སོགས་བརྗོད་འདུག

གསར་འགོད་པ། བསྟན་འཛིན་ཕུར་བུ།