༸གོང་ས་༸རྒྱལ་བ་རིན་པོ་ཆེ་མཆོག་གིས་འཛམ་གླིང་འདིའི་སྒང་ཆོས་ལུགས་སྣ་ཚོགས་ཡོད་པ་རྣམས་ལ་ནང་པའི་ལྟ་གྲུབ་ཉམས་ལེན་བྱས་ཏེ་གྲུབ་འབྲས་བསྟན་རྒྱུ་ཡོད་པ་ཞིག་འབྱུང་ན། དེ་ནི་ནང་ཆོས་ལ་ཞབས་འདེགས་དང་སྟོན་པར་བཀའ་དྲིན་གསོ་བ་ཡིན་ཞེས་གསུངས་སོང་།
Photo | Tenzin Choejor | OHHD
དེ་རིང་སྔ་དྲོའི་ཆུ་ཚོད་ ༨།༣༠ ཐོག་རྒྱ་གར་རྒྱལ་ས་ལྡི་ལིའི་ཨ་ཤོཀ་གསོལ་མགྲོན་ཁང་དུ་ཁ་སང་ནས་དབུ་འཛུགས་ཞུས་པའི་གོ་ལའི་ནང་པའི་ཚོགས་འདུ་ཆེན་པོའི་ཉིན་གཉིས་པར། ཚོགས་འདུ་གོ་སྒྲིག་ཚོགས་པ་རྒྱ་གར་ནང་པའི་མཐུན་ཚོགས་ཀྱིས་ཇི་ལྟར་གསོལ་འདེབས་ཞུས་དོན་ལྟར། དེ་རིང་༸གོང་ས་༸རྒྱལ་བ་རིན་པོ་ཆེ་མཆོག་ཚོགས་མགོན་དུ་ཆིབས་བསྒྱུར་བཀའ་དྲིན་བསྐྱངས་གནང་མཛད་སོང་བ་དང་།ཚོགས་ཐོག་ཏུ་ཨེ་ཤ་ཡའི་ནང་པའི་རྒྱལ་ཁབ་གཙོ་བྱས་པའི་རྒྱལ་ཁབ་ཁག་མི་འདྲ་བ་ ༣༠ ལྷག་གི་ནང་པའི་བླ་ཆེན་དང་སྐུ་ཚབ་མ་ཟད། བོད་བརྒྱུད་ནང་བསྟན་རིས་སུ་མ་ཆད་པའི་བསྟན་བདག་བླ་ཆེན་ཁག་མི་ཉུང་བ་ཞིག་དང་སྐུ་ཚབ་རྣམ་པ་བཅས་ཚོགས་པ་ ༦༠༠ ལྷག་མཉམ་ཞུགས་གནང་འདུག
སྐབས་དེར་༸གོང་ས་༸རྒྱལ་བ་རིན་པོ་ཆེ་མཆོག་གིས་ཚོགས་འདུར་ཕེབས་པའི་ནང་པའི་རྗེས་འབྲངས་བ་རྣམས་ལ་རེ་སྐུལ་གནང་དོན། ངོས་ཀྱིས་ད་ལྟ་བར་དུ་སྒོམ་གང་ཐུབ་བརྒྱབས་པ་ཡིན། བྱས་ཙང་ཁྱེད་རྣམ་པས་ཀྱང་ཟབ་པ་དང་རྒྱ་ཆེ་བའི་སྐོར་ལ་བསམ་བློ་ཉིན་རེ་བཞིན་དུ་བཏང་ནས་ཕྱིན་པ་ཡིན་ན་འགྱུར་བ་གཏན་ཏན་འགྲོ་གི་རེད། ཆོས་གྲོགས་ཚང་མས་དཔྱད་འཇོག་གི་སྒོམ་ལ་ཤུགས་བསྐྱོན་ནས་ཧུར་ཐག་གནང་རོགས། ངས་ཁ་ཙམ་མ་ཡིན་པར་ཉམས་མྱོང་གི་ཐོག་ནས་བཤད་ཀྱི་ཡོད། དཔྱད་འཇོག་གི་ཐོག་ནས་བྱང་ཆུབ་སེམས་དང་སྟོང་ཉིད་ལ་བསམ་བློ་བཏང་ན་དངོས་གནས་དྲང་གནས་ཀྱི་འགྱུར་བ་གཏན་ཏན་ཞིག་འགྲོ་གི་འདུག དེ་ནི་ངས་རེ་བ་དང་ཆོས་ཀྱི་ལེགས་སྐྱེས་ཚུལ་དུ་ཡིན། ཚང་མས་དེར་དགོངས་པར་བཅང་ཤོག ཅེས་གསུངས།
ཡང་ནང་པའི་གཞུང་ཆེན་ཁག་ལ་ཉམས་བཞེས་གནང་དགོས་གལ་ཆེ་སྐོར་ལ། ང་ལ་ཆ་བཞག་ན་བོད་ཀྱི་མདོ་སྨད་ས་མཐའ་ནས་སྐྱེས་པའི་པུ་གུ་ཞིག་ཆགས་བསྡད་ཡོད། དེ་ནས་ལྷ་ས་ལ་ཡར་སླེབས་ནས་གཞུང་དེ་དག་ལ་གཏོགས་ཙམ་སྦྱངས། དེ་ནས་བཙན་བྱོལ་ལ་སླེབས་ནས་གཞུང་དེ་དག་ལ་བསམ་བློ་ཧ་ཅང་གཏོང་སྡོད་ཀྱི་ཡོད། སེམས་ལ་ཧ་ཅང་ཕན་བསྡད་པ་དེ་མིག་མཐོང་ལག་འཛིན་ཡིན། བྱས་ཙང་ཚང་མས་ཧུར་ཐག་གནང་རོགས་གནང་ཞུ་གི་ཡིན། ཞེས་གསུངས་སོང་།
མཇུག་ཏུ་དེ་རིང་ཚོགས་འདུའི་སྐོར་ལ་གསུང་དོན། ཆོས་ལུགས་ཚང་མ་མི་ལ་ཕན་ཐོགས་ཡོད་རེད་ཞེ་དྲག་ཡག་པོ་རེད། ཡིན་ནའི་དཔྱད་འཇོག་ཟུང་འབྲེལ་གྱི་ཐོག་ནས་ཟབ་པ་དང་རྒྱ་ཆེ་བ་ལ་ཉམས་ལེན་བྱེད་རྒྱུ་ཡོད་པ་དེ་ཕལ་ཆེར་ནང་པའི་ཆོས་བརྒྱུད་ཀྱི་ཁྱད་ཆོས་ཆགས་བསྡད་འདུག དེ་ནི་ང་ཚོ་ཚང་མ་ལ་ཕ་མེས་ནས་བརྒྱུད་པའི་ཆོས་བརྒྱུད་ཆགས་བསྡད་ཡོད། དེ་རིན་ཐང་ཡིན་པ་ངོ་ཤེས་པའི་ཐོག་ནས་ག་ཚོད་ཐུབ་ཐུབ་ཀྱི་ཉམས་ལེན་བྱས་ནས་ཤུགས་ཤིག་རྒྱབ་ཀྱི་ཡིན་ན། འཛམ་གླིང་འདིའི་སྒང་ལ་ཆོས་ལུགས་འདྲ་མིན་འདྲ་ཡོད་རེད། དེ་གའི་མིག་ངར་ལ་སངས་རྒྱས་པའི་ཆོས་ལུགས་ཉམས་ལེན་པ་ཚོས་དེ་ཚོ་ལ་ཁ་ཡོད་ལག་ཡོད་ཀྱི་གྲུབ་འབྲས་བསྟན་རྒྱུ་ཡོད་པ་ཞིག་འབྱུང་ན་དངོས་གནས་དྲང་གནས་ཀྱི་བསྟན་པའི་ཞབས་འདེགས་ལ་འགྲོ་གི་རེད། སྟོན་པའི་བཀའ་དྲིན་གསོ་ཟེར་བའང་དེ་ཆགས་བསྡད་ཀྱི་ཡོད་པས་ཚང་མས་ཧུར་ཐག་གནང་རོགས། ཞེས་གསུངས་སོང་།
གོ་ལའི་ནང་པའི་ཚོགས་འདུ་ཆེན་པོ་འདི་བཞིན་རྒྱ་གར་ནང་པའི་མཐུན་ཚོགས་ཀྱི་གོ་སྒྲིག་འོག་རྒྱ་གར་གྱི་རྒྱལ་ས་ལྡི་ལིའི་གྲགས་ཅན་གསོལ་མགྲོན་ཁང་ཨ་ཤོཀ་ཞེས་པའི་ནང་ཁ་སང་ནས་དབུ་འཛུགས་ཞུས་ཡོད་པ་དང་། ཚོགས་འདུའི་དབུ་འབྱེད་མཛད་སྒོ་ལ་རྒྱ་གར་གྱི་སྲིད་བློན་མུ་དྷི་མཆོག་ཕེབས་ཏེ་ཚོགས་བཞུགས་པ་རྣམས་ལ་གསུང་བཤད་དང་ཚོགས་འདུ་ལེགས་གྲུབ་ཡོང་བའི་བཀྲ་ཤིས་སྨོན་འདུན་ཞུས་ཡོད།
གསར་འགོད་པ། ཉི་མ་ཚེ་རིང་།
