ཕོ་བྲང་པོ་ཏ་ལའི་ནང་མཆོད་མཇལ་དུ་འགྲོ་བར་ཐོབ་ཐང་ལག་ཁྱེར་གློག་གིས་བཤེར་འབེབ་གཏོང་གི་ཡོད་སྟབས་གཞུང་ཕྱོགས་ཀྱི་ལས་བྱེད་དང་བོད་ལྗོངས་སློབ་གྲྭ་ཆེན་མོ་སོགས་ཀྱི་དགེ་ལས་སློབ་ཕྲུག་རྣམས་འགྲོ་ཆོག་གི་མེད་པ་རེད།
བོད་ཀྱི་རྒྱལ་ས་ལྷ་ས་གཙོ་བྱས་
ཡུལ་སྐོར་སྣེ་ཤན་པ་དེས། སྤྱིར་བོད་རིགས་ལས་བྱེད་རྣམས་སྲིད་གཞུང་གི་བྱ་བར་ཞུགས་སྐབས་དང་དམར་ཤོག་ཚོགས་པའི་ནང་དུ་འཛུལ་སྐབས། དམར་ཤོག་ཚོགས་པའི་ཁྲིམས་སྒྲིག་ལ་མཐའ་གཅིག་ཏུ་བརྩི་སྲུང་བྱ་རྒྱུ་ཡིན་པའི་ཁས་ལེན་དམ་བཅའ་འཇོག་དགོས་ཀྱི་ཡོད་པར་བརྟེན། ཕོ་བྲང་པོ་ཏ་ལ་དང་གཙུག་ལག་ཁང་ལ་མཆོད་མཇལ་དུ་ཕྱིན་ན་ཁྲིམས་འགལ་སྒྲིག་འགལ་དུ་བརྩི་ཡི་ཡོད་པ་ཤེས་ཀྱི་ཡོད་སྐོར་དང་། རང་ཁྱིམ་དུ་༧གོང་ས་མཆོག་གི་དབུས་བོད་བརྒྱུད་ནང་བསྟན་གྱི་བླ་མ་རྣམ་པའི་སྐུ་པར་སྒྲིག་གཤོམ་དང་། ཐ་ན་རང་གི་སྐེ་ལ་སྲུང་མདུད་དང་མཚོན་སྲུང་བཏགས་ནའང་ནག་ཉེས་འཛུགས་ཀྱི་ཡོད་པའི་རྐྱེན་གྱིས། བོད་རིགས་ལས་བྱེད་མང་པོ་ཞིག་ཁུ་སིམ་སིམ་ངང་ས་གནས་གཞན་དུ་གནས་སྐོར་དང་མཆོད་མཇལ་དུ་འགྲོ་དགོས་པ་ཆགས་ཀྱི་ཡོད་སྐོར་བརྗོད་བྱུང་།
ཡང་གནས་ཚུལ་མཁོ་སྤྲོད་པ་གཞན་ཞི
ཕྱི་ལོ་ ༢༠༡༩ ལོར་བོད་རང་སྐྱོང་ལྗོངས་སྲིད་གཞུང་གིས་བརྡ་ཐོ་ཞིག་བཏང་སྟེ། ལོ་དེའི་ཕྱི་ཟླ་ ༨ ཚེས་ ༡༨ ཉིན་གྱི་ཉིན་གུང་ཆུ་ཚོད་ ༡༢།༣༠ སྔོན་དུ་འབྲེལ་ཡོད་ལས་ཁུངས་ཁག་ནས་རྒས་ཡོལ་རྣམས་ཀྱི་མིང་དང་། ཁོང་ཚོ་སྐོར་བར་འགྲོ་རྒྱུར་སྟངས་འཛིན་བྱས་ཡོད་པའི་སྙན་ཐོ་ས་གནས་ཀྱི་དམར་ཤོག་ཚོགས་པའི་རྒས་ཡོལ་ལྟ་སྐྱོང་ལས་ཁུངས་ལ་སྤྲོད་དགོས་སྐོར་བརྗོད་ཡོད་པ་མ་ཟད། དམར་ཤོག་ཚོགས་མི་རྒས་ཡོལ་དང་གཞུང་ཞབས་རྒས་ཡོལ་རྣམས་དགོན་པ་སོགས་ལ་སྐོར་བར་འགྲོ་བའི་སྣང་ཚུལ་འབྱུང་གི་ཡོད་མེད་ལ་རྟོག་ཞིབ་བྱེད་དགོས་སྐོར་བཀའ་བཏང་ཡོད་པ་རེད། འབྲེལ་ཡོད་ལས་ཁུངས་ཁག་གིས་རྒས་ཡོལ་ཞུས་ཟིན་པའི་གཞུང་ཞབས་ནང་སྐོར་བ་བྱེད་པ་ནི་གྲངས་ལས་འདས་པ་དང་རྒྱ་ཆེན་པོ་ཡིན་པ། དམར་ཤོག་ཚོགས་མི་རེ་འགས་མངོན་གསལ་དོད་པོ་དང་ཡང་རེ་འགས་དོགས་ཟོན་ངང་ (semi-openly) སྐོར་བར་འགྲོ་ཡི་ཡོད་པའི་གནས་ཚུལ་མཁོ་སྤྲོད་བྱས་ཡོད་པ་རེད།
ཕྱི་ལོ་༢༠༡༨ ལོར་ལྷ་ས་དང་མཚོ་སྔོན་ཕྱོགས་ཀྱི་སློབ་གྲྭ་ཁག་ཅིག་གི་དགུན་ཁའི་གུང་གསེང་སྐབས་སུ། ཁྱིམ་བདག་ཚོས་རང་གི་བྱིས་པ་རྣམས་གསབ་སྦྱོང་འཛིན་གྲྭ་དང་ཆོས་ཕྱོགས་ཀྱི་བྱེད་སྒོ་གང་ལའང་ཞུགས་མི་ཆོག་པའི་ཉེན་བརྡ་སློབ་མཇུག་གི་རྒྱུགས་སྐར་ཤོག་བུ་དང་མཉམ་དུ་སྤྲད་འདུག
གསར་འགོད་པས་འདས་པའི་ལོ་གཉིས་ཙམ་རིང་གི་ཕོ་བྲང་པོ་ཏ་ལའི་སྐོར་ལ་རྒྱུས་ལོན་བྱས་པ་ལྟར་ན། རྒྱ་ནག་ཝུའུ་ཧན་ནས་འཛམ་གླིང་གང་སར་ཁྱབ་པའི་ཏོག་དབྱིབས་གཉན་རིམས་ཀྱི་རྐྱེན་གྱིས་ཕྱི་ལོ་ ༢༠༢༠ ཟླ་ ༡ ཚེས་ ༢༦ ཉིན་ནས་བཟུང་ལོ་དེའི་ཕྱི་ཟླ་ ༦ ཚེས་ ༣ བར་དུ་ཕོ་བྲང་པོ་ཏ་ལ་རྦད་དེ་སྒོ་བརྒྱབ་ཡོད་པ་དང་། ཕྱི་ལོ་ ༢༠༢༢ ཟླ་ ༨ ཚེས་ ༩ ཙམ་ནས་བསྐྱར་དུ་སྒོ་བརྒྱབ་སྟེ་འདི་ལོའི་ཕྱི་ཟླ་ ༡ ཚེས་ ༣ ཉིན་གཞི་ནས་བསྐྱར་དུ་སྒོ་ཕྱེས་འདུག ལོ་རེའི་དགུན་དུས་སུ་ཕོ་བྲང་པོ་ཏ་ལའི་འཛིན་བྱང་རེར་རྒྱ་སྒོར་ ༡༠༠ རེ་དང་། དབྱར་དུས་སུ་རྒྱ་སྒོར་ ༢༠༠ རེ་ཡིན་པ་མ་ཟད། ཉིན་གྲངས་ ༣ སྔོན་ལ་སྒེར་གྱི་ཝེ་ཞིན་(Weixin)ཐོག་ནས་མངགས་ཉོ་བྱེད་དགོས་ཀྱི་འདུག མཆོད་མཇལ་དུ་ཕྱིན་པའི་ཉིན་དེ་ནས་བཟུང་བདུན་ཕྲག་གཅིག་རིང་བསྐྱར་དུ་འཛིན་བྱང་ཉོ་ཆོག་གི་མེད་སྟབས། བདུན་ཕྲག་གཅིག་ནང་མཆོད་མཇལ་ཐེངས་གཅིག་དང་དུས་ཡུན་ཆུ་ཚོད་ ༡ ཏག་ཏག་ནང་མཆོད་མཇལ་ཚར་བ་བྱེད་དགོས་ཀྱི་འདུག གལ་སྲིད་སྒྲིག་གཞི་ཁག་ལ་བརྩི་སྲུང་མ་བྱས་ཏེ། དངུལ་གྱི་ཉེས་ཆད་དང་བསྐྱར་དུ་འཛིན་བྱང་ཉོ་མི་ཐུབ་པ་སོགས་ཀྱི་ཉེས་ཆད་གཅོད་ཀྱི་ཡོད་འདུག་ལ། འདས་ལོའི་ཕྱི་ཟླ་ ༨ ཚེས་ ༡ ཉིན་རྒྱ་ནག་གཞུང་འབྲེལ་གསར་ལམ་དུ། ཕོ་བྲང་པོ་ཏ་ལའི་འཛིན་བྱང་རིན་གོང་ཆེན་པོ་བྱས་ཏེ་ལྐོག་ཚོང་བྱེད་ཀྱི་ཡོད་པའི་ནག་ཉེས་འོག ལྷ་ས་གྲོང་ཁྱེར་དུ་གནས་སྡོད་གླང་སེར་ཚོགས་པ་ཞེས་པ་ཞིག་གཙང་སེལ་བྱས་ཡོད་སྐོར་བསྒྲགས་ཏེ་མི་གྲངས་ ༡༥ འཛིན་བཟུང་བྱས་འདུག
གསར་འགོད་པ། དཔལ་ལྡན།
