ཁེ་ན་ཌས་རྒྱ་ནག་གི་གཞུང་ཚབ་མི་སྣ་ཀྲའོ་ཝི་ཟེར་བས་ཁེ་ན་ཌའི་ནང་སྲིད་ལ་ཐེ་གཏོགས་བྱས་པར་ངོས་ལེན་བྱེད་ཐབས་མེད་པའི་ངོས་འཛིན་འོག་རྒྱ་ནག་ཏུ་ཕྱིར་ཕུད་བཏང་ཡོད་འདུག
ཉེ་ལམ་ནས་ཁེ་ན་ཌ་དང་རྒྱ་ནག་གཉིས་བར་ཕྱི་སྲིད་འབྲེལ་ལམ་གྱི་ཐོག་ནས་གདོང་ཐུག་བྱུང་དང་འབྱུང་གི་ཡོད་པ་ལྟར། དེ་རིང་ཁེ་ན་ཌ་གཞུང་གིས་གྲོང་ཁྱེར་ཊོ་རོན་ཊོ་རུ་གནས་སྡོད་བྱེད་བཞིན་པའི་རྒྱ་ནག་གི་གཞུང་འབྲེལ་མི་སྣ་ཀྲའོ་ཝི་(Zhao Wei)ཟེར་བས། ཁེ་ན་ཌའི་གྲོས་ཚོགས་འཐུས་མི་སྒེར་བ་ཞིག་ལ་འཇིགས་སྐུལ་བྱས་པའི་ངོས་འཛིན་འོག ཁེ་ན་ཌ་ནས་ཕྱིར་ཕུད་བཏང་བ་ཡོངས་བསྒྲགས་བྱས་འདུག
ཁེ་ན་ཌའི་ཕྱི་སྲིད་བློན་ཆེན་མཱལ་ནེ་ཇའོ་ལེ་ (Mélanie Joly) ལགས་ཀྱིས། ང་ཚོས་ཁེ་ན་ཌའི་ནང་སྲིད་ལ་ཐེ་གཏོགས་བྱེད་མཁན་གྱི་ཕྱིའི་ཤུགས་རྐྱེན་གཅིག་ཀྱང་ཐར་བ་གཏོང་གི་མིན་ལ། ང་ཚོས་ཁེ་ན་ཌའི་ནང་ཡོད་པའི་ཕྱིའི་རྒྱལ་ཁབ་ཁག་གི་གཞུང་འབྲེལ་སྐུ་ཚབ་མི་སྣ་སུ་ཞིག་གིས་ཁེ་ན་ཌའི་ནང་སྲིད་ལ་ཐེ་གཏོགས་བྱས་ཚེ། ཐད་ཀར་ཕྱིར་ཕུད་གཏོང་རྒྱུ་ཡིན་ཞེས་ཉེན་བརྡ་བཏང་ཡོད། ཅེས་བརྗོད་འདུག
ཁེ་ན་ཌའི་ནང་ཡོད་པའི་རྒྱ་ནག་གཞུང་ཚབ་ཁང་གིས། ཁེ་ན་ཌའི་རྒྱ་ནག་གཞུང་ཚབ་མི་སྣ་ཕྱིར་ཕུད་གཏོང་བའི་ཐག་གཅོད་དེར་ངོས་ལེན་རྩ་བ་ནས་མེད་པ་དང་། རྒྱ་ནག་གིས་རྔ་ལ་དཔག་པའི་འཆམ་ཟེར་བ་ནང་ལྟར་ཡ་ལན་བསློག་རྒྱུ་མ་ཟད། གནད་དོན་འདིའི་མཇུག་འབྲས་ཡོད་ཚད་ཁེ་ན་ཌས་འགན་འཁུར་དགོས་པའི་ལན་འདེབས་བྱས་འདུག
ཐེངས་འདིའི་ཁེ་ན་ཌ་དང་རྒྱ་ནག་བར་གྱི་ཕྱི་སྲིད་འབྲེལ་ལམ་གྱི་གནད་དོན་དེ་ནི། ཉེ་སྔོན་རྒྱ་ནག་གིས་ཁེ་ན་ཌའི་གྲོས་ཚོགས་འཐུས་མི་མེ་ཁལ་ (Michael Chong) ལགས་དང་ཧོང་ཀོང་དུ་ཡོད་པའི་ཁོང་གི་ནང་མིའི་རྒྱབ་ལྗོངས་གནས་ཚུལ་སོགས་མཁོ་སྒྲུབ་བྱས་ཏེ། གྲོས་ཚོགས་འཐུས་མི་ཁོང་ནས་མགོ་བརྩམས་ཏེ་འབྱུང་འགྱུར་ཁེ་ན་ཌའི་ནང་རྒྱ་ནག་ཐོག་དགག་པ་རྒྱག་མཁན་གྱི་གནད་ཡོད་མི་སྣའི་རིགས་བཀག་འགོག་བྱེད་ཐབས་བྱས་པ་བརྟེན་ནས་བྱུང་བ་ཞིག་ཡིན་ཡང་། སྐབས་དེར་ཁེ་ན་ཌའི་སྲིད་བློན་ཇ་སི་ཊིན་ཊུ་རུ་ཌོ་ (Justin Trudeau) ལགས་ཀྱིས། ཁེ་ན་ཌའི་གསང་བའི་ལས་ཁུངས་ཀྱིས། རྒྱ་ནག་གིས་ཁེ་ན་ཌའི་ནང་སྲིད་ལ་ཐེ་གཏོགས་བྱེད་བཞིན་པའི་གནད་དོན་ཁུངས་སྐྱེལ་ཐུབ་མེད་སྐོར་བརྗོད་ཡོད་པ་དང་། ད་ལྟ་གནད་དོན་དེ་ཁེ་ན་ཌའི་གཞུང་འཛིན་དང་ཁ་གཏད་སྲིད་དོན་ཚོགས་པ་གཉིས་ཀྱི་གནད་དོན་ཞིག་ཀྱང་ཆགས་བཞིན་པ་སི་ཨན་ཨན་གསར་ཁང་གིས་འགྲེལ་བརྗོད་བྱས་འདུག
སྤྱིར་ཁེ་ན་ཌ་དང་རྒྱ་ནག་བར་ཕྱི་སྲིད་འབྲེལ་ལམ་གྱི་ཐོག་ནས་གདོང་ཐུག་མང་ཅིག་བྱུང་བ་དང་། ཕྱི་ལོ་ ༢༠༡༨ ལོར་ཁེ་ན་ཌས་རྒྱ་ནག་གི་འཕྲུལ་རིགས་ཚན་རྩལ་བཟོ་ཚོང་ཁང་ཆེ་ཤོས་ཧྭ་ཝེ་(Huawei) ཡི་ནོར་དོན་སྤྱི་གཉེར་བ་མིན་ཝན་ཀྲུའུ་(Meng Wanzhou) འཛིན་བཟུང་བྱས་པ་དང་། རྒྱ་ནག་གིས་ཁེ་ན་ཌའི་གཞུང་འབྲེལ་མི་སྣ་མའེ་ཁེལ་ (Michael Kovrig) དང་མའེ་ཁེལ་སི་པཱ་ཝོར་ (Michael Spavor) གཉིས་འཛིན་བཟུང་གིས་ཁེ་ན་ཌར་རྒོལ་ལན་བསླགས་ཡོད་ལ། ཕྱི་ལོ་ ༢༠༢༢ ལོར་ཁེ་ན་ཌས་རྒྱ་ནག་ཏུ་འཚོགས་པའི་དགུན་ཁའི་ཨོ་རྩལ་འགྲན་ཚོགས་སྟེང་གཞུང་འབྲེལ་སྐུ་ཚབ་གཅིག་ཀྱང་བཏང་མེད་པ་སོགས་རྒྱལ་ཁབ་གཉིས་བར་ཕྱི་སྲིད་དང་ཚོང་འབྲེལ། འགྲོ་བ་མིའི་ཐོབ་ཐང་གི་མཚོན་པའི་རྒྱལ་སྤྱིའི་ཁྲིམས་སྒྲིག་སོགས་ཀྱི་ཐད་ནས་འགལ་ཟླ་མང་དག་ཅིག་བྱུང་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
