ཨ་རིའི་རང་དབང་གཟེངས་རྟགས་ཀྱི་ཉིན་མོར་ཨ་རིའི་ཕྱི་སྲིད་བློན་ཆེན་ཨེན་ཊོ་ནི་བྷི་ལིན་ཀིན་མཆོག་ནས་རྒྱ་ནག་གཞུང་གིས་བོད་ཁུལ་དུ་རིགས་རྫས་བསྡུ་ལེན་འཕོན་ཆེན་བྱེད་བཞིན་པར་ཐུགས་འཚབ་ཡོད་སྐོར་གསུངས་འདུག
ཨ་རིའི་ཕྱི་སྲིད་བློན་ཆེན་ཨེན་ཊོ་ནི་བྷི་ལིན་ཀིན་ (Antony Blinken)མཆོག་གིས་རྒྱ་ནག་གཞུང་གིས་བོད་ནང་གི་བོད་མི་རྣམས་ཀྱི་རིགས་རྫས་ (DNA) ཕོན་ཆེན་བསྡུ་ལེན་བྱེད་བཞིན་ཡོད་པར་སེམས་འཚབ་ཡོད་སྐོར་བརྗོད་འདུག
ཟླ་འདིའི་ཕྱི་ཚེས་ ༩ ཨ་རིར་རྟེན་གཞི་བྱས་ཡོད་པའི་རང་དབང་ཁང་པའི་ (Freedom House) ལོ་འཆར་ཅན་གྱི་རང་དབང་གཟེངས་རྟགས་ཀྱི་ཉིན་མོར། ཨ་རིའི་ཕྱི་སྲིད་བློན་ཆེན་ཨེན་ཊོ་ནི་བྷི་ལིན་ཀིན་ (Antony Blinken)མཆོག་གིས། རྒྱ་ནག་གཞུང་གིས་བོད་ནང་གི་བོད་མི་རྣམས་ལ་ལྟ་རྟོག་དང་སྟངས་འཛིན་སྔར་ལས་དམ་ཟབ་ཐུབ་པའི་ཆེད་དུ་བྱིས་པ་ཚུད་པའི་བོད་མི་རྣམས་ཀྱི་རིགས་རྫས་ཕོན་ཆེན་བསྡུ་ལེན་བྱེད་བཞིན་ཡོད་པར་ང་ཚོས་སེམས་འཚབ་བྱེད་ཀྱི་ཡོད། ཅེས་གསུངས་འདུག
དེའི་ཐད་རྒྱལ་སྤྱིའི་བོད་དོན་ལས་འགུལ་ཁང་གིས། རྒྱ་ནག་གིས་བོད་ནང་བཙན་འཛུལ་བྱས་ཏེ། བོད་ནང་གི་བོད་མི་རྣམས་ལ་སྟངས་འཛིན་དང་ལྟ་ཞིབ་བྱེད་ཆེད་དུ་བོད་མི་རྣམས་ཀྱི་རིགས་རྫས་བསྡུ་ལེན་བྱེད་བཞིན་ཡོད་པ་དང་། རྒྱ་གཞུང་གི་མི་གཅིག་དབང་སྒྱུར་གྱི་རིང་ལུགས་འོག་ནས་བོད་ནང་གི་བོད་མི་རྣམས་ལ་སྲུང་སྐྱོབ་ཆེད་དུ་ཞི་བའི་གྲོས་མོལ་གྱི་ལམ་ནས་བོད་རྒྱ་དཀའ་རྙོག་སེལ་དགོས་པ་དང་། ཨ་རིའི་གཞུང་གིས་བོད་རྒྱ་དཀའ་རྙོག་སེལ་ཐབས་སུ་རྒྱབ་སྐྱོར་ཁྲིམས་འཆར་ (Promoting a Resolution to the Tibet-China Conflict Act) གཏན་འབེབ་བྱ་དགོས། ཞེས་བརྗོད་འདུག
དེ་འབྲེལ་རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་པ་ཝང་ཝིན་པིན་ (Wang Wenbin) གྱིས། ཨ་རིའི་ཕྱི་སྲིད་བློན་ཆེན་བྷི་ལིན་ཀིན་གྱིས་བཤད་པ་དེ་ཚོར་བ་སྐྱེན་པོའི་གསར་འགྱུར་བཟོས་པ་ལས་གང་ཡང་མེད་པ་དང་། ཨ་རིའི་དམག་མིས་རྒྱ་མི་དང་ཨ་རབ་ (Arabs)། (Aryan) སོགས་ཀྱི་རིགས་རྫས་བསྡུ་ལེན་བྱས་པར་སྐྱོན་བརྗོད་བྱས་ཡོད་པ་དང་སྦྲགས། བོད་ནང་གི་བོད་མི་རྣམས་ཀྱི་རིགས་རྫས་བསྡུ་ལེན་བྱེད་པ་དང་། བོད་ནང་དུ་གསར་འགོད་པ་རྣམས་འགྲོ་སྐྱོད་བྱེད་མི་ཆོག་པ་དང་། རྒྱ་ནག་གི་ལས་དོན་དང་འབྲེལ་བའི་གསར་འགྱུར་བྲིས་ཆོག་གི་མེད་པ་སོགས་ལ་ངོས་ལེན་བྱས་མི་འདུག
འདས་ལོའི་ཕྱི་ཟླ་ ༩ པའི་ནང་མི་སེར་བརྟག་དཔྱད་ཁང་ (Citizen Lab) གིས་སྙན་ཐོ་བཏོན་པའི་ནང་། རྒྱ་ནག་ཉེན་རྟོག་པས་བོད་རང་སྐྱོང་ལྗོངས་ཟེར་བའི་ས་ཁུལ་གྱི་སྐྱེས་པ་དང་བུད་མེད། སློབ་ཕྲུག་སོགས་མི་གྲངས་འབུམ་ ༩(༩༢༠,༠༠༠) ལྷག་ནས་ས་ཡ་ ༡།༢ ཙམ་གྱི་རིགས་རྫས་བསྡུ་རུབ་བྱས་ཡོད་སྐོར་གྱི་གནས་ཚུལ་སྤེལ་ཡོད་པ་དང་། དེ་བཞིན་འགྲོ་བ་མིའི་ཐོབ་ཐང་ལྟ་ཞིབ་ཁང་ (Human Rights Watch) གིས། རྒྱ་ནག་གཞུང་གིས་ཕ་མ་རྣམས་ཀྱི་མོས་མཐུན་མེད་པར་བྱིས་པ་རྣམས་ཀྱི་རིགས་རྫས་བསྡུ་ལེན་བྱེད་བཞིན་ཡོད་སྐོར་བརྗོད་ཡོད་པ་རེད།
