བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་དང་མཇལ་འཕྲད་གནང་སྟེ་མངའ་སྡེའི་ནང་གི་བོད་མིའི་ས་ཆའི་དཀའ་ངལ་སོགས་ཀྱི་སྐོར་ཞུས་པ་ལྟར་རོགས་མགོན་གནང་རྒྱུ་ཡིན་སྐོར་གསུངས་ཡོད་འདུག
སྲིད་སྐྱོང་མཆོག་གིས་མངའ་སྡེའི་སྤྱི་ཁྱབ་བློན་ཆེན་མཆོག་དང་མཇལ་འཕྲད་གནང་། སྲིད་སྐྱོང་གི་ངོ་དེབ་ཀྱི་པར། ༢༠༢༣།༠༥།༡༡
ཟླ་འདིའི་ཕྱི་ཚེས་ ༩ ནས་ཉིན་དགུ་ཙམ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་ཧི་མ་ཅལ་མངའ་སྡེའི་ནང་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། ཁ་སང་ཕྱི་ཚེས་ ༡༡ ཉིན་གྱི་ཕྱི་དྲོར་སྲིད་སྐྱོང་མཆོག་གིས་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་སུ་ཁ་ཝིན་དིར་སིངྷ་སུ་ཁུ་(Sukhvinder Singh Sukhu) མཆོག་དང་ལྷན་མཇལ་འཕྲད་གནང་ཡོད་པ་དང་། མཇལ་འཕྲད་གནང་སྐབས་སྲིད་སྐྱོང་མཆོག་གིས་ཧི་མ་ཅཱལ་མངའ་སྡེའི་ནང་གི་བོད་མི་ཡོངས་ཀྱི་དཀའ་ངལ་དང་། སིམ་ལ་ཁུལ་གྱི་བོད་མིའི་ས་ཆའི་དཀའ་ངལ་སྐོར། ལྷག་པར་དུ་ཕྱི་ལོ་ ༡༩༦༠ ནང་༧གོང་ས་རྒྱལ་བ་རིན་པོ་ཆེ་མཆོག་གི་མཚན་ཐོག་ཏུ་ཕུལ་གནང་བའི་ལས་ཁུངས་ཀྱི་མིང་བསྒྱུར་གནང་རྒྱུའི་སྐོར་སྙན་སེང་ཞུས་པ་ནང་བཞིན། མངའ་སྡེའི་སྤྱི་ཁྱབ་བློན་ཆེན་མཆོག་ནས་རོགས་རམ་དང་རྒྱབ་སྐྱོར་གནང་རྒྱུ་ངོས་བཞེས་གནང་སོང་ལ། དེ་བཞིན་རྒྱལ་སྤྱིའི་ཆབ་སྲིད་ཀྱི་གནས་སྟངས་དང་། བོད་པའི་སྤྱི་ཚོགས་ཀྱི་གནས་སྟངས་སྐོར་བཀའ་མོལ་ཞུས་ཡོད་པ་མ་ཟད། ༧གོང་ས་མཆོག་གི་འཁྲུངས་སྐར་དུས་ཆེན་ལ་མངའ་སྡེའི་སྤྱི་ཁྱབ་བློན་ཆེན་མཆོག་སྐུ་མགྲོན་དུ་ཕེབས་པར་ཞལ་བཞེས་སོགས། ཐེངས་འདིའི་སྲིད་སྐྱོང་མཆོག་དང་མངའ་སྡེའི་སྤྱི་ཁྱབ་བློན་ཆེན་མཆོག་རྣམ་གཉིས་ཀྱི་མཇལ་འཕྲད་སྤྱི་ཡོངས་ནས་ཡག་པོ་བྱུང་ཡོད། ཅེས་གསུངས་འདུག
ཉིན་རྒྱབ་སིམ་ལ་སཾ་བྷོ་ཊ་སློབ་གྲྭའི་ཚོགས་ཁང་དུ། སྲིད་སྐྱོང་མཆོག་གིས་ས་གནས་བོད་རིགས་མང་ཚོགས་ལ་གསུང་བཤད་དང་དྲི་བ་དྲིས་ལན་གནང་སྐབས། སྲིད་སྐྱོང་མཆོག་གིས། བོད་རྒྱའི་དཀའ་རྙོག་སེལ་བར་རྒྱ་ནག་གཞུང་དང་འབྲེལ་བ་མི་བྱེད་ཐབས་མེད་ཅིག་ཆགས་ཡོད་ཀྱང་། བོད་རྒྱའི་དཀའ་རྙོག་གཙང་སེལ་མ་བྱས་བར་དུ་རྒྱལ་སྤྱིའི་སྟེང་དུ་བོད་དོན་དྲིལ་བསྒྲགས་བྱེད་རྒྱུའི་ལས་འགན་ཡོད་པ་དང་། བོད་ནང་གི་བོད་མིའི་དངོས་ཡོད་གནས་སྟངས་ཤེས་དགོས་ཀྱི་ཡོད་པས། ད་ལྟའི་བོད་ནང་གི་གནས་ཚུལ་ཤེས་པར་དཀའ་ངལ་ཆེ་རུ་སོང་ཡོད་ཀྱང་། ཐབས་ཤེས་ཡོད་རྒུ་བཏོན་ནས་རྒྱལ་སྤྱིའི་སྟེང་དུ་གསལ་སྟོན་བྱེད་རྒྱུ་ལས། གནས་ཚུལ་རྙིང་པ་རྣམས་བཤད་བསྡད་པ་ཡིན་ན། རྒྱ་ནག་ནང་བཞིན་རྫུན་དུ་འགྲོ་ཉེན་ཆེ་བས། བོད་ནང་གི་དངོས་ཡོད་གནས་ཚུལ་ཐབས་ཇུས་ལྡན་པའི་ཐོག་ནས་བཏོན་གལ་ཆེ་སྐོར་དང་། གཞོན་སྐྱེས་རྣམས་ཀྱིས་བོད་ཀྱི་ལོ་རྒྱུས་ལ་སློབ་སྦྱོང་བྱེད་དགོས་པ་མ་ཟད། ཕྱི་རྒྱལ་གྱི་ཆབ་སྲིད་པ་རྣམས་ཀྱིས་རྒྱ་ནག་གིས་ལོ་རྒྱུས་འཁྱོག་བཤད་རྗེས་སུ་འབྲངས་བཞིན་ཡོད་པར་ལོ་རྒྱུས་དང་མཐུན་པའི་ཐོག་ནས་བདེན་པ་ར་སྤྲོད་བྱེད་དགོས་སྐོར། དེ་བཞིན་བོད་ཀྱི་སྐྱེ་ཁམས་ཁོར་ཡུག་གི་གལ་གནད་དང་། རྒྱ་ནག་གཞུང་གིས་བོད་ཀྱི་གཙང་པོ་ཁག་གི་འབྱུང་ཁུངས་བེད་སྤྱོད་ཀྱིས་ཨེ་ཤ་ཡ་ཁུལ་དུ་དཀའ་ངལ་བཟོ་བཞིན་པའི་གནས་སྟངས་སྐོར་སོགས་གསུངས་ཡོད་འདུག
དེ་བཞིན་ཕྱི་ཚེས་ ༡༠ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་སིམ་ལ་སྤྱི་ཁྱབ་ལས་ཁུངས་དང་། ས་འཐུས་ལས་ཁུངས། ས་གནས་བུད་མེད་ལྷན་ཚོགས་ཀྱི་ལས་ཁུངས། བུ་བཅོལ་ཁང་། དབྱངས་ཅན་དགའ་ཚལ་གླིང་གཞིས་ཁག་གསུམ། ས་གནས་སྨན་རྩིས་ཁང་བཅས་ལ་འཚམས་གཟིགས་གནང་ཡོད་འདུག
གསར་འགོད་པ། བྱམས་པ་ཚེ་རིང་།
