བདེན་པའི་འཐབ་རྩོད་པ་ཨ་ཅག་མགོན་པོ་སྐྱིད་ལགས་ལ་ཉེན་རྟོག་ཁང་གིས་ཡང་ནས་བསྐྱར་དུ་ཉེན་བརྡ་བཏང་མིན་ལ་མ་ལྟོས་པར་ཡང་བསྐྱར་ཞི་བའི་ངོ་རྒོལ་ལས་འགུལ་སྤེལ་བར་བརྟེན་དེ་རིང་སྔ་དྲོར་ཁོང་མོ་རླངས་འཁོར་ཞིག་གི་ནང་དུ་བཙན་གྱིས་བཅུག་སྟེ་ཁྲིད་ཕྱིན་འདུག
བོད་ཀྱི་ཕྱུག་བདག་ཆེན་མོ་རྡོ་རྗེ་བཀྲ་ཤིས་ལགས་ཀྱི་གཅེན་མོ་མགོན་པོ་སྐྱིད་ལགས་ཀྱིས་ཁ་སང་ནས་བཟུང་ཡང་བསྐྱར་ཉིན་མགོན་པོ་སྐྱིད་ལགས་ཀྱིས་བོད་རང་སྐྱོང་ལྗོངས་འབྲིང་རིམ་མི་མང་ཁྲིམས་ཁང་གི་མདུན་དུ། རྐྱང་ཕྱག་འཚལ་ཏེ་ཞུ་འབོད་ལས་འགུལ་སྤེལ་བར་བརྟེན། དེ་རིང་སྔ་དྲོར་ཉེན་རྟོག་པ་ཁག་ཅིག་ཡོང་ནས་ཁོང་མོ་འདྲུད་ནས་རླངས་འཁོར་ནང་དུ་བཅུག་སྟེ་བཙན་འཁྲིད་བྱས་ཡོད་འདུག་ལ། ད་ལྟའི་ཆར་ཁོང་མོ་དང་རོགས་པའི་གནས་སྟངས་གང་འདྲ་ཤེས་རྟོགས་མི་འདུག
དེ་རིང་ཁོང་མོ་དང་མཉམ་དུ་ཡོད་པའི་སྐྱེས་པ་ཞིག་གིས་ཉེན་རྟོག་པས་མགོན་པོ་སྐྱིད་འདྲུད་འགྲོ་སྐབས་བརྙན་ཐུང་འགའ་ཤས་བླངས་ཡོད་པའི་ནང་། མང་ཚོགས་ཀྱིས་ལྟོས་དང་། ཨ་ཅག་མགོན་པོ་སྐྱིད་ཉེན་རྟོག་པས་བཙན་པོ་བྱས་ཏེ་རླངས་འཁོར་ནང་དུ་རྫོང་གི་འདུག་ཅེས་བརྗོད་འདུག་ལ། ཉེན་རྟོག་པ་མང་པོ་ཞིག་གིས་བོད་སྐད་བཤད་ཀྱིན་ཨ་ཅག་མགོན་པོ་སྐྱིད་ལགས་བཙན་གྱིས་རླངས་འཁོར་ཞིག་གི་ནང་དུ་རྫོང་བཞིན་འདུག་ལ། བརྙན་ཐུང་གཞན་ཞིག་གི་ནང་དུ་ཁོང་མོས་བོད་ཆས་གཙང་མ་ཞིག་གྱོན་ཏེ་ཁྲིམས་ཁང་གི་མདུན་དུ་རྐྱང་ཕྱག་འཚལ་བཞིན་འདུག
ཉེ་སྔོན་ཟླ་འདིའི་ཕྱི་ཚེས་ ༡༠ ཉིན་མགོན་པོ་སྐྱིད་ལགས་ཀྱིས་བོད་རང་སྐྱོང་ལྗོངས་འབྲིང་རིམ་མི་མང་ཁྲིམས་ཁང་གི་མདུན་ཐང་དུ། ཞི་བའི་འབོད་སྐུལ་ལས་འགུལ་སྤེལ་སྐབས། ཉེན་རྟོག་པ་ཁག་ཅིག་ཡོང་ནས་ཁོང་མོ་བཙན་ཁྲིད་བྱས་ཏེ་རང་ཁྱིམ་དུ་ཀློད་ཡོད་པ་མ་ཟད། མ་འོངས་པར་མུ་མཐུད་ལས་འགུལ་སྤེལ་བ་ཡིན་ན་ཁོང་མོ་དང་གཅེན་པོ་རྡོ་རྗེ་ཚེ་བརྟན་ལགས་གཉིས་འཛིན་བཟུང་བྱ་རྒྱུ་ཡིན་པའི་ཉེན་བརྡ་བསྐྱར་དུ་བཏང་ཡོད་འདུག་ལ། ཁོང་མོ་འཛིན་བཟུང་བཙོན་འཇུག་བྱ་རྒྱུ་ཡིན་པའི་ཉེན་བརྡ་བཏང་བ་ཐེངས་བཞི་པ་ཡས་མས་ཆགས་འདུག
དེ་སྔོན་ཞུ་འབོད་ལས་འགུལ་སྐོར་གྱི་བརྙན་ཐུང་ནང་དུ་མགོན་པོ་སྐྱིད་ལགས་ཀྱིས། ངའི་རེ་བ་འདི་རྒྱལ་ཁབ་ཀྱི་ཁྲིམས་ཀྱི་ནང་ཡོད་པ་ཞིག་ཡིན་ན། ཁྱེད་ཚོ་ཁྲིམས་འདེད་མཁན་ཞིག་ཡིན་པའི་ཆ་ནས་ཁྲིམས་ལྟར་འགྲོ་རྒྱུ་དེ་ངའི་རེ་བ་ཡིན། གལ་སྲིད་ངའི་རེ་བ་འདི་རྒྱལ་ཁབ་ཀྱི་ཁྲིམས་ནང་མེད་པ་ཞིག་ཡིན་ན། ཁྱེད་ཚོས་ང་ལ་ཁྲིམས་ག་རེ་བཙུགས་ནའང་འཁུར་གྱི་ཡིན། ཁྲིམས་དང་མཐུན་པ་ཞིག་ཡིན་ན་ཁྲིམས་ལྟར་འགྲོ་རྒྱུར་ངས་ཁྱེད་ཚོར་ཞུ་བ་བརྒྱབ་སྟེ་ཕྱག་འཚལ་གྱི་ཡོད་ཅེས་བརྗོད་ཡོད་པ་མ་ཟད། དཔོན་ངན་ཁག་ཅིག་གིས་རྒྱལ་ཁབ་དང་ཁྲིམས་རྩེད་སྤྱད་བྱེད་ཀྱི་ཡོད་སྐོར་དང་། ཁྲིམས་ཐོག་ནས་རྒྱ་དང་བོད་འདྲ་མཉམ་ཡིན་ལ། མང་ཚོགས་དང་དཔོན་པོའི་ཐོག་གི་ཁྲིམས་ཡང་འདྲ་མཉམ་ཡིན་པ་རེད། ཡིན་ནའང་། ང་ཚོར་འདྲ་མཉམ་འདུག་གམ། ཞེས་དྲང་བདེན་མིན་པའི་ཁྲིམས་ཆད་དེར་བསྐྱར་ཞིབ་མ་བྱས་བར་དུ་ཞུ་འབོད་ལས་འགུལ་མཚམས་འཇོག་རྒྱུ་མིན་སྐོར་བརྗོད་ཡོད་པ་རེད།
འབྲེལ་ཡོད་གནས་ཚུལ། https://tibettimes.net/2023/05/12/225519/
