ཁ་སང་ཕྱི་ཚེས་ ༢༡ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་སེངྒ་ལའི་པཱ་ལི་ཆོས་བརྒྱུད་ཀྱི་ནང་པའི་དབུ་འཁྲིད་མཐོ་ཤོས་ཌོ་ཌམ་པཱ་ཧ་ལ་ཆན་ཌིར་སི་རེ་མཆོག་འདས་གྲོངས་སུ་ཕྱིན་པར་ཐུགས་གསོའི་གསུང་འཕྲིན་བསྩལ་ཡོད་འདུག
༧གོང་ས་རྒྱལ་བ་རིན་པོ་ཆེ་མཆོག་གིས་ཌོ་ཌམ་པཱ་ཧ་ལ་ཆན་ཌིར་སི་རེ་(Dodampahala Chandrasiri Mahanayake Thero) མཆོག་ལ་བསྩལ་བའི་ཐུགས་གསོའི་གསུང་འཕྲིན་ནང་། སེངྒ་ལའི་ཆོས་དཔོན་ཨ་མ་ར་པུ་ར་མཆོག་དགུང་ལོ་ ༨༤ ཐོག་འདས་གྲོངས་སུ་ཕྱིན་པའི་གནས་ཚུལ་ཐོས་པར་བློ་ཕམ་ཆེན་པོ་བྱུང་། ཁོང་འདས་གྲོངས་སུ་ཕྱིན་པར་སྨོན་ལམ་འདེབས་པ་དང་།ཁོང་ཉིད་ཀྱི་རྗེས་འཇུག་པ་རྣམས་ལ་གདུང་སེམས་མཉམ་སྐྱེད་ཡོད། ཅེས་གསུངས་ཡོད་འདུག
ཡང་མགོན་པོ་གང་ཉིད་མཆོག་གིས། ཁོང་ཉིད་ཀྱིས་མི་ཚེ་གང་པོར་གཞན་ཕན་གྱི་ཞབས་འདེགས་བསྒྲུབས་ཏེ་མི་ཚེ་དོན་དང་ལྡན་པ་བསྐྱལ་ཡོད་པ་རེད། ང་ཚོས་ཁོང་ལ་རྗེས་དྲན་བྱེད་ཐུབ་པ་ནི་ཁོང་གིས་བྱམས་སྙིང་རྗེའི་ཐོག་ནས་གཞན་ཕན་གྱི་ཞབས་འདེགས་བསྒྲུབ་པའི་རྗེས་སུ་འབྲངས་དགོས། ཞེས་གསུངས།
སེངྒ་ལའི་ཆོས་དཔོན་མ་ཧ་ན་ཡ་ཀ་ཐེ་རོ་ (Mahanayaka Thero) མཆོག་ནི་ཕྱི་ལོ་ ༡༩༣༩ ཟླ་ ༡༢ ཚེས་ ༢༠ ཉིན་སེངྒ་ལའི་ལྷོ་རྒྱུད་ཀྱི་ས་གནས་(Dodampahala) སུ་སྐྱེས་པ་དང་། ཌོ་ཌམ་པཱ་ཧ་ལ་དབུས་མཐོ་རིམ་སློབ་གྲྭའི་ (Dodampahala Central High School) ནང་སློབ་སྦྱོང་བྱས། དགུང་ལོ་ ༡༡ ཐོག་ཝ་ལུ་ཀ་ར་མ་དགོན་པའི་ཆོས་སྒོར་ཞུགས་ནས་ཆོས་ཀྱི་ཐོག་ལ་སློབ་སྦྱོང་གནང་། ཁོང་གིས་ཨ་མ་ར་པུ་ར་མ་ཧ་སངྒ་ས་བྷའི་ (Amarapura Maha Sangha Sabha) ཚོགས་གཙོ་དང་ཚོགས་གཞོན་གྱི་ཕྱག་ལས་གནང་། ཕྱི་ལོ་ ༢༠༢༡ ཟླ་ ༧ ཚེས་ ༢༠ ཉིན་ཁོང་སེངྒ་ལའི་པཱ་ལི་ཆོས་བརྒྱུད་ཀྱི་དབུ་འཁྲིད་དུ་བསྐོ་གཞག་བྱུང་། ཁོང་གི་སྐུ་གཟུགས་བདེ་མིན་གྱི་རྐྱེན་པས་ཁོ་ལོམ་བྷོའི་སྨན་ཁང་དུ་སྨན་བཅོས་བྱེད་བཞིན་པའི་སྐབས། ཟླ་འདིའི་ཕྱི་ཚེས་ ༡༨ ཉིན་གློ་བུར་དུ་དགུང་ལོ་ ༨༤ ཐོག་འདས་གྲོངས་སུ་ཕྱིན་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
