བཀའ་སྤྱི་གཉིས་ཀྱིས་ཉིན་གྲངས་གསུམ་རིང་རྒྱལ་ས་ལྡི་ལི་ཁུལ་དུ་འཛམ་གླིང་རྒྱལ་ཁབ་ཁག་གི་གཞུང་ཚབ་སོགས་ལ་མཇལ་འཕྲད་གནང་ནས་བོད་དོན་ཞུ་སྐུལ་གནང་ཡོད་འདུག
ཟླ་འདིའི་ཕྱི་ཚེས་ ༥ ཉིན་གྲངས་གསུམ་རིང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་གཉིས་ཀྱི་དབུས་བཀའ་བློན་དང་སྤྱི་འཐུས་རྒྱུན་ལས་སོགས་བཀའ་སྤྱི་གཉིས་ཀྱིས། རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ཨ་རི་དང་། ཅེག་སྤྱི་མཐུན་རྒྱལ་ཁབ། ཐའེ་ཝན་སོགས་འཛམ་གླིང་རྒྱལ་ཁབ་ ༡༧ གྱི་གཞུང་ཚབ་ཆེན་མོ་སོགས་དང་མཇལ་འཕྲད་གནང་སྟེ་བོད་དོན་ཞུ་སྐུལ་གནང་ཡོད་འདུག
ཁ་སང་ཕྱི་ཚེས་ ༧ ཉིན་བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་གིས་གསར་འགོད་གསལ་བསྒྲགས་ཤིག་སྤེལ་བའི་ནང་། བཀའ་སྤྱི་གཉིས་ཀྱི་སྣེ་ཁྲིད་པའི་ཞུ་སྐུལ་ལས་དོན་འདིར། ཕྱི་ལོ་ ༢༠༢༢ ལོར་གྲོས་ཚོགས་ནང་བོད་ནང་གི་ཛ་དྲག་གནས་སྟངས་ཀྱི་གྲོས་ཆོད་ཀྱི་དགོངས་དོན་བཞིན། བཀའ་སྤྱི་གཉིས་ཀྱིས་སྣེ་ཁྲིད་ནས་རྒྱལ་སྤྱིའི་ནང་བོད་དོན་ཞུ་གཏུགས་ཀྱི་ལས་འགུལ་ཞིག་སྤེལ་དགོས་པའི་གྲོས་ཆོད་ཅིག་བཞག་སྟེ། བཀག་སྤྱི་གཉིས་ཀྱི་བར་གྲོས་བསྡུར་ཐེངས་ཁ་ཤས་གནང་ནས། ཟླ་འདིའི་ཕྱི་ཚེས་ ༥ ནས་ ༧ བར་ལྡི་ལི་དོན་གཅོད་བརྒྱུད་རྒྱལ་སྤྱིའི་གཞུང་ཚབ་ཁག་དང་། རྒྱ་གར་ཆབ་སྲིད་ཚོགས་པའི་འཛིན་སྐྱོང་ཁག་བཅས་དང་ཐུག་འཕྲད་གནང་ནས་བོད་དོན་ཞུ་སྐུལ་གནང་ཡོད་སྐོར་དང་། དེ་བཞིན་ཨ་རི་དང་། ཅེག་སྤྱི་མཐུན་རྒྱལ་ཁབ་སོགས་ཀྱི་གནད་ཡོད་མི་སྣ་མང་དག་ཅིག་དང་ཐུག་ནས། བོད་ནང་གི་ཛ་དྲག་གི་གནས་སྟངས་དང་འགྲོ་བ་མིའི་ཐོབ་ཐང་། ཆོས་དད་རང་དབང་། ཁོར་ཡུག་གི་གནད་དོན་སོགས་ཀྱི་ཐད་ལ་ཡིག་ངག་གཉིས་ཀྱི་ཐོག་ནས་གླེང་སློང་གནང་སྟེ། ཕྱོགས་ཡོངས་ནས་ཉིན་གྲངས་གསུམ་རིང་གི་ལས་རིམ་དེ་ཚགས་ཚུད་དང་གྲུབ་འབྲས་ལྡན་པ་ཞིག་བྱུང་ཡོད་སྐོར་སོགས་གསུངས་འདུག
ཐེངས་འདིའི་ཞུ་སྐུལ་སྐབས། བཀའ་སྤྱི་གཉིས་ལས་གྲུབ་པའི་སྐུ་ཚབ་ཚོགས་ཆུང་གི་ཚོགས་མི་རྣམ་པ་སྡེ་ཚན་གསུམ་དུ་བགོས་ཏེ། སྲིད་སྐྱོང་སྤེན་པ་ཚེ་རིང་མཆོག་དང་། སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་བཅས་ཀྱིས་སྡེ་ཚན་རེ་རེའི་སྣེ་ཁྲིད་གནང་སྟེ། ལྡི་ལིར་རྟེན་གཞི་བྱས་པའི་གཞུང་ཚབ་ཁག་གི་གཞུང་ཚབ་པ་ཆེན་པོ་དང་གཞོན་པ། དེ་བཞིན་གནད་ཡོད་མི་སྣ་མང་དག་ཅིག་དང་མཇལ་ཕྲད་གནང་ནས། བོད་དོན་ཞུ་སྐུལ་དང་བོད་ནང་གི་འགྲོ་བ་མིའི་ཐོབ་ཐང་སོགས་ཀྱི་ཐད་ནས་གླེང་སློང་གནང་ཡོད་འདུག
གསར་འགོད་པ། དཔལ་ལྡན།
