འཛམ་གླིང་ས་ཕྱོགས་གང་སར་ངོ་རྒོལ་གྱི་ལས་འགུལ་སྤེལ།

དེ་རིང་རྒྱལ་གཅེས་དཔའ་བོ་རང་བཙན་བློ་དགའ་ལགས་ཀྱིས་ནེའུ་ཡོག་གི་རྒྱལ་ཚོགས་མདུན་ཐང་དུ་སྐུ་ལུས་མེར་བསྲེགས་ནས་ཞག་ཞེ་དགུ་འཁོར་བར་རྗེས་དྲན་དང་བསྟུན་འཛམ་གླིང་ས་ཕྱོགས་གང་ས་ནས་རྣམ་པ་འདྲ་མིན་གྱི་ཐོག་ནས་ངོ་རྒོལ་ལས་འགུལ་སྤེལ།

དེ་རིང་ཕྱི་ཚེས་ ༢༠ ཉིན་ཨོ་གླིང་དང་། སུད་སི། རྒྱ་གར་གཙོས་འཛམ་གླིང་ས་ཕྱོགས་གང་སར་རྒྱལ་གཅེས་དཔའ་བོ་རང་བཙན་བློ་དགའ་ལགས་ཀྱིས་ནེའུ་ཡོག་གི་རྒྱལ་ཚོགས་མདུན་ཐང་དུ་སྐུ་ལུས་མེར་བསྲེགས་ནས་ཞག་ཞེ་དགུ་འཁོར་བར་རྗེས་དྲན་དང་། རྒྱ་ནག་གཞུང་གིས་འདི་ལོའི་ཕྱི་ཟླ་ ༧ ནས་ལག་བསྟར་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་བཅའ་ཁྲིམས་ཟེར་བར་ངོ་རྒོལ་མཚོན་སླད། ཞི་བའི་གོམ་བགྲོད་དང་། སྐྲ་བྲེག་པ་སོགས་རྣམ་པ་འདྲ་མིན་གྱི་ཐོག་ནས་ངོ་རྒོལ་ཤུགས་ཆེན་སྤེལ་སོང་། 

དེ་རིང་བོད་དོན་ལྷན་ཁང་དང་རྒྱལ་སྤྱིའི་ཉེས་ཡངས་ཚོགས་པ། ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་བཅས་ཀྱི་གོ་སྒྲིག་འོག  ཨོ་གླིང་གི་དབུས་གྲོས་ཚོགས་ཀྱི་མདུན་ཐང་དུ་བོད་མི་དང་བོད་དོན་རྒྱབ་སྐྱོར་བ་རྣམས་ཚང་འཛོམས་ཐོག རྒྱལ་གཅེས་དཔའ་བོ་རང་བཙན་བློ་དགའ་ལགས་ཀྱིས་ནེའུ་ཡོག་གི་རྒྱལ་ཚོགས་མདུན་ཐང་དུ་སྐུ་ལུས་མེར་བསྲེགས་ནས་ཞག་ཞེ་དགུ་འཁོར་བར་རྗེས་དྲན་སླད། རྒྱལ་ས་ཁེམ་བྷི་རའི་གྲོས་ཚོགས་ཀྱི་མདུན་ཐང་དུ་བོད་མི་ ༥༥ ལྷག་གིས་སྐྲ་བྲེག་ནས་ངོ་རྒོལ་བྱས་ཏེ། བོད་ནང་གི་འགྲོ་བ་མིའི་ཐོབ་ཐང་གི་གནས་བབ་རྣམས་ཨོ་གླིང་གྲོས་ཚོགས་སུ་གླེང་སློང་དགོས་པ་དང་། ཨོ་གླིང་གཞུང་གིས་རྒྱལ་སྤྱིའི་སྡིངས་ཆ་གང་མང་གི་ཐོག་ནས་རྒྱ་ནག་གི་ཁྲིམས་མཐུན་མིན་པའི་བྱ་སྤྱོད་ལ་སྐྱོན་བརྗོད་བྱ་དགོས་པའི་རེ་སྐུལ་སོགས་ཞུས་ཡོད་པ་མ་ཟད། ཁུལ་དེར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་མདུན་དུའང་བོད་མི་འདུ་འཛོམས་ཐོག་ངོ་རྒོལ་སྐད་འབོད་ཀྱི་ངོ་རྒོལ་ལས་འགུལ་སྤེལ་འདུག

དེ་བཞིན་སུད་སིའི་ཇི་ནི་ཝར་དང་ཧྥི་རན་སི། བྷེལ་ཇམ། དེ་བཞིན་སུད་སི་གཙོས་ཡུ་རོབ་རྒྱལ་ཁབ་འདྲ་མིན་ནས་ཡིན་པའི་བོད་མི་འདུ་འཛོམས་ཐོག་རྒྱལ་གཅེས་དཔའ་བོ་རང་བཙན་བློ་དགའ་ལགས་ཀྱི་བློས་བཏང་ལ་རྗེས་དྲན་གྱི་ཞི་བའི་གོམ་བགྲོད་དང་། མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ་སྐྲ་བྲེག་སྟེ་ངོ་རྒོལ་ལས་འགུལ་སྤེལ་འདུག་ལ། སྐབས་དེར་སུད་སི་དོན་གཅོད་འཕྲིན་ལས་ཆོས་སྐྱིད་ལགས་ཀྱིས། རྒྱ་ནག་གཞུང་གིས་ལག་བསྟར་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་བཅའ་ཁྲིམས་འདི་ནི་བོད་མི་དང་། བོད་ཀྱི་ཆོས་རིག་རྩ་མེད་བཟོས་པ་མ་ཟད། རྒྱལ་སྤྱིའི་ནང་བོད་དོན་ལ་རྒྱབ་སྐྱོར་གནང་མཁན་རྣམས་རྩ་མེད་བཟོ་རྒྱུའི་སྲིད་ཇུས་བཟུང་གི་ཡོད་སྟབས། ང་ཚོ་རྒྱ་ནག་གི་ཁྲིམས་ཡིག་དེར་ངོ་རྒོལ་དང་། རྒྱལ་སྤྱི་ལའང་རྒྱ་ནག་གི་ཁྲིམས་དེ་མེད་པར་བཟོ་དགོས་འདུག་ཅེས་སྐད་རྒྱག་པའི་དུས་ལ་བབ་འདུག ཅེས་བརྗོད་འདུག

དེ་བཞིན་ཕྱི་ཚེས་ ༡༩ ཉིན་ཨ་རིའི་ནེའུ་ཡོག་ཏུ་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཟུར་པ་སྤྱི་ཟུར་བསྟན་འཛིན་འཇིགས་མེད་ལགས་ཀྱི་སྣེ་ཁྲིད་འོག རྒྱལ་གཅེས་དཔའ་བོ་རང་བཙན་བློ་དགའ་ལགས་ཀྱི་ཚ་བོ་ཚ་མོ་རྣམ་པས་ཨ་རིའི་བོད་དོན་དམིགས་བསལ་འབྲེལ་མཐུད་པ་རི་ལེ་བྷར་ནེ་སི་ (Riley Barnes) མཆོག་དང་ཐུག་འཕྲག་བྱས་པ་དང་འབྲེལ། དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་རིང་ཆོས་འཕེལ་ལགས་ཀྱིས། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཟུར་པ་སྤྱི་ཟུར་བསྟན་འཛིན་འཇིགས་མེད་ལགས་ཀྱིས་འབྲེལ་བ་མཐུད་ནས། བོད་ཀྱི་གཞོན་ནུ་ལྷན་ཚོགས་ཀྱི་དབུས་སྤྱི་ཁྱབ་རྒྱུན་ལས་ཁང་གིས་བདུན་ཕྲག་གཉིས་གསུམ་གྱི་གོང་ལ་ཡིག་འབྲེལ་བྱས་ཏེ། ཞེ་དགུའི་ཉིན་ལ་དུས་ཚོད་འདོན་རོགས་ཞེས་འབོད་སྐུལ་ཞིག་ཞུས་པ་བཞིན། དེ་རིང་ཕྱི་སྲིད་བོད་དོན་དམིགས་བསལ་འབྲེལ་མཐུད་པས་དུས་ཚོད་གནང་ནས་མཇལ་འཕྲད་གནང་ཐུབ་པ་ཞིག་ཆགས་ཡོད། ད་ལན་གྱི་མཇལ་འཕྲད་སྐབས་གཙོ་བོ་རྒྱལ་གཅེས་དཔའ་བོ་རང་བཙན་བློ་དགའ་ལགས་ཀྱིས་སྐུ་ལུས་མེར་བསྲེགས་པ་དེ་བོད་རྒྱལ་ཁབ་རང་བཙན་གྱི་ཆེད་དུ་ཡིན་པ་དང་། དེ་ནི་ཆབ་སྲིད་ཀྱི་ལས་འགུལ་ཞིག་ཡིན་པ། དེ་བཞིན་རྒྱ་ནག་གཞུང་གི་ཁྲིམས་འཆར་དེ་མཐུན་སྒྲིལ་གྱི་ཁྲིམས་འཆར་ཞིག་མིན་པར། མི་རིགས་རྩ་མེད་གཏོང་བའི་ཁྲིམས་འཆར་ཞིག་ཡིན་པ་སྙན་སེང་ཞུས་ཡོད། ཅེས་དང་།  རྒྱ་ནག་གི་མགོ་འཁྲིད་ཞི་ཅིན་ཕིན་མི་འགྱངས་བར་ཨ་རིར་ཡོང་གྲབས་ཡོད་སྟབས། ཨ་རིས་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་དེ་ཕྱིར་འཐེན་དགོས་པའི་ཐད་གླེང་སློང་གནང་དགོས་པའི་རེ་སྐུལ་སོགས་ཞུས་འདུག

ཕྱི་ཚེས་ ༢༠ ཉིན་རང་བཙན་བློ་དགའ་ལགས་ཀྱིས་སྐུ་ལུས་མེར་བསྲེགས་གནང་སྟེ་ཞག་ཞེ་དགུ་དང་འཁོར་བ་དང་བསྟུན། བཀའ་སྤྱི་གཉིས་དང་བོད་མིའི་སྒྲིག་འཛུགས་ཀྱི་དབུས་སྲི་ཞུའི་ལས་བྱེད་ཡོངས། གཞུང་འབྲེལ་མིན་པའི་ཚོགས་སྡེ་ཁག དེ་བཞིན་བཞུགས་སྒར་ཁུལ་གྱི་སེར་སྐྱ་མི་མང་ཡོངས་ཀྱིས་ཐེག་ཆེན་གཙུག་ལག་ཁང་ནས་དྷ་ཤོད་བར་ཞི་བའི་གོམ་བགྲོད་ལས་འགུལ་སྤེལ་བ་མ་ཟད། དབུས་བོད་མིའི་སྒྲིག་འཛུགས་དང་། ཚོགས་སྡེ་ཁག་གིས་མྱ་ངན་གུས་འདུད་སླད་ཉིན་གང་ལས་མཚམས་བཞག་ཡོད་པ་རེད། 

 དགུང་གྲངས་ ༥༢ ཡིན་པའི་རང་བཙན་བློ་དགའ་འམ་དངོས་མིང་ལ་བློ་བཟང་དཔལ་ལྡན་ལགས་ཀྱིས་། འདི་ལོའི་ཕྱི་ཟླ་ ༧ ཚེས་ ༢ ཉིན་ནེའུ་ཡོག་ཏུ་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ་རྒྱ་གཞུང་གི་བོད་ཐོག་འཛིན་པའི་སྲིད་ཇུས་ཁག་ལ་ངོ་རྒོལ་གྱིས་རང་ལུས་མེར་བསྲེགས།  ཁོང་གིས་ཤུལ་ལུས་བོད་མི་ཡོངས་ལ་ཁ་ཆེམས་བཞག་པའི་ནང་། བོད་ནང་གི་བོད་མི་ཚོར་འགྲོ་བ་མིའི་གཞི་རྩའི་ཐོབ་ཐང་དང་རང་དབང་སོགས་གང་ཡང་མེད་པ་ནི་བོད་རང་བཙན་ཤོར་བའི་རྒྱུ་མཚན་ཡིན་པར་བརྟེན་བོད་རང་བཙན་རྩོད་དགོས་པ། བཙན་བྱོལ་གཞུང་མང་གི་བོད་མི་ཡོངས་ནས་ཆོལ་གསུམ་དབྱེ་བ་མེད་པར་ནང་ཁུལ་མཐུན་སྒྲིལ་བགྱིས་ཏེ་བོད་མི་རིགས་ཀྱི་འཐབ་རྩོད་རྒྱུན་སྐྱོང་བྱེད་དགོས་པ། མ་འོངས་པའི་བོད་རྒྱལ་ཁབ་སླར་གསོ་དགོས་པ་སོགས་གསུངས་ཡོད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། ཆོས་རྒྱལ་སྐྱབས།