༧གོང་ས་རྒྱལ་བ་རིན་པོ་ཆེ་མཆོག་ནས་སྔགས་བགྲང་ན་ཕན་ཐོགས་ཕྲན་བུ་ཡོད་ཀྱང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་ན་ཁ་ཡོད་ལག་ཡོད་ཐོག་ཚེ་སྒྲུབ་ཀྱི་མཆོག་དེ་ཡིན་ཞེས་གསུངས་སོང་།
དེ་རིང་ཕྱི་ཟླ་ ༩ ཚེས་ ༥ ནས་ཉིན་གཉིས་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ལྷོ་ཤར་ཨེ་ཤ་ཡའི་དད་ལྡན་ཆོས་ཞུ་བ་ཚོས་ཇི་ལྟར་གསོལ་བ་བཏབ་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་ནས་དབུ་མ་འཇུག་པའི་རང་འགྲེལ་གྱི་བཀའ་ཆོས་དབུ་འཛུགས་གནང་སོང་བ་དང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། དེ་རིང་འདིར་སྟོན་པ་བཅོམ་ལྡན་འདས་ཀྱི་རྗེས་འབྲངས་མཁན་རིས་སུ་མ་ཆད་པའི་ཆོས་པ་ཚོས་སྨོན་ལམ་རྒྱག་བཞིན་ཡོད་པ་རེད། ང་ཚོས་སྨོན་ལམ་རྒྱག་བཞིན་པ་དེ་སྟོན་པ་བཅོམ་ལྡན་འདས་ཀྱི་ལམ་སྟོན་གནང་སྟེ། ཕུན་ཚོགས་དགེ་ལེགས་བྱེ་བས་བསྐྲུན་པའི་སྐུ།། མཐའ་ཡས་འགྲོ་བའི་རེ་བ་སྐོང་བའི་གསུང་།། མ་ལུས་ཤེས་བྱ་ཇི་བཞིན་གཟིགས་པའི་ཐུགས།། ཤཱཀྱའི་གཙོ་བོ་དེ་ལ་མགོས་ཕྱག་འཚལ།།ཞེས་པ་ལྟར། སྟོན་པ་བཅོམ་ལྡན་འདས་རྟག་པ་རང་བྱུང་གི་སྐྱེས་བུ་མ་ཡིན་པ་དང་། རྒྱུ་ཚོགས་མང་པོ་ལ་བསླབ། མཐར་གྲངས་མེད་གསུམ་ཚོགས་བསགས་ནས་མངོན་པར་རྫོགས་པར་སངས་རྒྱས་པ་རེད། ཕུན་ཚོགས་དགེ་ལེགས་བྱེ་བས་བསྐྲུན་པའི་སྐུ་ཟེར་བ་བཞིན་རྒྱུ་ཚོགས་གྲངས་མེད་པའི་ཐོག་ནས་འབྲས་བུ་མངོན་དུ་མཛད་པ་རེད། སྟོན་པ་བཅོམ་ལྡན་འདས་ཀྱིས་རྒྱུ་ཚོགས་མང་པོར་དགོངས་པ་བཞེས་ཏེ་སེམས་སྟེང་གི་དྲི་མ་བག་ཆགས་དང་བཅས་པ་སྦྱངས་པ་རེད། དེ་འདྲའི་ཉམས་མྱོང་གི་ཐོག་ནས་ང་ཚོར་མར་བསྟན་ཏེ། མཐའ་ཡས་འགྲོ་བའི་རེ་བ་སྐོང་བའི་གསུང་བཞིན་འདུལ་བྱ་བློ་རབ་འབྲིང་ཐ་མ་གསུམ་ལ་གང་འདོད་ལྟར་གསུང་གི་འཕྲིན་ལས་རྒྱས་པ་རེད། སངས་རྒྱས་བཅོམ་ལྡན་འདས་ཀྱི་ཆོས་དེ་ཆོས་དད་མེད་མཁན་ཞིག་ཡིན་ཡང་བསླབ་བྱ་བཟང་པོ་དང་། སེམས་རྒྱུད་བཟང་པོ། གཞན་ཕན་བྱེད་པར་གསུང་བསྡད་ཀྱི་ཡོད་པ་རེད། ཆོས་དད་ཡོད་མཁན་ནང་དུའང་འདྲ་མི་འདྲ་ཡོད་བསྡད་དུས། ཁམས་དང་མོས་པར་འཚམ་པའི་གཞན་ཕན་གྱི་བློ་བཟང་པོ་ཞིག་བསྟན་པ་རེད། བློ་མཆོག་ཡིན་ན་བཅོམ་ལྡན་འདས་ཁོང་རང་ཉིད་ཀྱི་ལམ་གང་འདྲ་ཞིག་གི་ཐོག་ནས་ཡར་མངོན་པར་རྫོགས་པར་སངས་རྒྱས་པ་རེད། ང་ཚོའི་རྒྱུད་ལ་ཁམས་བདེ་གཤེགས་སྙིང་པོ་ཟེར་བ་བཞིན་ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་མང་པོ་ཡོད་ཀྱང་། དེ་དག་གི་གཞི་རྩ་གང་ཟག་གི་བདེན་འཛིན་དང་། ཆོས་ཀྱི་བདེན་འཛིན་ཐོག་ནས་ཡོང་གི་ཡོད་དུས། བདག་མེད་ལ་ཏོག་ཙམ་བསམ་བློ་བཏང་ཚེ། བདག་འཛིན་གཉིས་ག་ལེར་ཞི་ཐུབ་པ་ཞིག་རེད། ངོས་རང་ལ་ཆ་བཞག་ན་ཡང་བཅོམ་ལྡན་འདས་ཀྱི་རྗེས་འབྲངས་ཀྱི་དགེ་སློང་ཞིག་རེད། ཉིན་རེ་བཞིན་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་གཏོང་བཞིན་ཡོད། གང་ལྟར་སེམས་ལ་འགྱུར་བ་ཞེ་བོ་འགྲོ་བསྡད་ཀྱི་འདུག ཕྱི་ནང་གི་ཆོས་གང་ཡིན་ཡང་ང་ཚོས་སྣང་ངོར་ཡོད་པར་སྣང་ཡོང་གི་ཡོད་ཀྱང་། སྣང་བ་དེ་གྲུབ་མེད་བསམ་པའི་མིང་རྐྱང་བཏགས་ཡོད་ཙམ་ཟེར་བ་དེ་ཤུགས་ཆེན་པོ་སེམས་ལ་འཁོར་ཐུབ་ཀྱི་འདུག ཅེས་བཀའ་སློབ་བསྩལ་སོང་།
ཡང་༧གོང་ས་མཆོག་ནས། བསྟན་པ་རིན་ཆེན་མཆོག་གིས་མ་ཁྱབ་པའམ། ། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི། ། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས༑ ༑ ཕན་བདེའི་གཏེར་དེ་གསལ་བར་བྱེད་པར་ཤོག །ཞེས་རྗེ་རིན་པོ་ཆེའི་ཐུགས་སྨོན་གནང་བ་ལྟར། ངོས་རང་ལ་ཆ་བཞག་ནའང་བཅོམ་ལྡན་འདས་ཀྱི་རྗེས་འབྲངས་པ་ཞིག་ཡིན་པས། དབུ་ཚད་ཀྱི་གཞུང་ལ་མང་པོ་བལྟས་ཡོད་པ་རེད་ལ། སངས་རྒྱས་བཅོམ་ལྡན་གྱིས་རིག་པའི་ལམ་ལ་བསམ་བློ་བཏང་ཡོད་པ་དེ་ཞེ་བོ་ཡག་པོ་རེད། དེ་རིང་འདིར་ང་ཚོ་ཆོས་གྲོགས་ཚོ་ཐུག་པ་རེད། དུས་སྙིགས་མ་ཆགས་ཀྱི་ཡོད་ཀྱང་། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་གཉིས་དུས་སྙིགས་མའི་ནང་དུ་ཕན་ཐོགས་མེད་པ་རྩ་བ་ནས་ཆགས་ཀྱི་མ་རེད། དུས་སྙིགས་མ་ཆགས་ཡོད་དུས་དེ་དག་གི་ནུས་པ་ཆེ་རུ་འགྲོ་རྒྱུ་ཡིན་འདུག བྱས་ཙང་ཚང་མས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་ཉིན་རེ་བཞིན་བསམ་བློ་བཏང་ནས་གནང་ཤོག དེ་ནས་བསྟན་པའི་དགྲ་བོ་དང་། གདོན། དགེགས། ལོག་འདྲེན་ཟེར་བ་ཚང་མར་སྙིང་རྗེ་སྐྱེ་བ་མ་གཏོགས། དེར་འཇིགས་སྣང་སྐྱེ་བ་དང་། དགེགས་ཟློག་གཏོང་བ་སོགས་གང་ཡང་དགོས་ཀྱི་མི་འདུག བདག་ཏུ་སོང་བའི་བདེན་འཛིན་དང་། རང་གཅེས་འཛིན་གྱི་གཞན་དབང་དུ་སོང་བསྡད་པར་མཐའ་གཅིག་ཏུ་བརྩེ་བ་འབའ་ཞིག་སྐྱེ་བ་ལས། དེར་གདོན་དང་། དགེགས། འབྱུང་བོ་ཟེར་ནས་ཕར་སྤྲད་རྒྱུ་ཞིག་རེད་མི་འདུག གང་ལྟར་སངས་རྒྱས་པའི་ཆོས་ནི་ཐམས་ཅད་ལ་བརྩེ་བའི་བློ་སྐྱེ་བ་ཞིག་རེད་ཅེས་བཀའ་སློབ་སྩལ་སོང་།
མགོན་པོ་གང་ཉིད་མཆོག་ནས། ངོས་རང་གིས་གང་ཐུབ་ཀྱིས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་སྒོམ་བཞིན་ཡོད། དེས་སེམས་ལ་ཞེ་བོ་ཕན་ཐོགས་ཡོང་གི་འདུག སེམས་ལ་ཕན་ཐོགས་པའི་ཚོད་ཀྱིས་ལུས་ཀྱི་བདེ་ཐང་ལའང་ཕན་ཐོགས་ཞེ་བོ་འདུག ཚེ་སྒྲུབ་ཟེར་ནས་སྔགས་བགྲང་ན་ཕྲན་བུ་ཕན་ཐོགས་ཀྱི་ཡོད་ཀྱང་། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་ན་ཁ་ཡོད་ལག་ཡོད་ཐོག་ཚེ་སྒྲུབ་ཀྱི་མཆོག་དེ་རེད། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་ན་དངོས་ཤུགས་བརྒྱུད་གསུམ་ཐོག་ནས་གཞན་ལ་ཕན་བདེ་ཡོང་ཐུབ་པ་ཞིག་རེད་འདུག ང་ཚོ་ནི་རྣམ་འདྲེན་བཞི་བ་རྒྱལ་བ་ཤཱཀྱ་ཐུབ་པའི་བསྟན་པའི་རྗེས་སུ་ཞུགས་བསྡད་མཁན་ཞིག་རེད། ང་ཚོས་དམིགས་ཡུལ་འཛིན་ས་ནི་སྟོན་པ་བཅོམ་ལྡན་འདས་ནང་བཞིན་བྱེད་ཀྱི་ཡིན་བསམ་པའི་སེམས་ཤུགས་བསྐྱེད་དེ། བྱང་ཆུབ་སེམས་པ་དང་སྟོང་ཉིད་ཀྱི་ལྟ་བར་གང་ཐུབ་ཀྱིས་འབད་བརྩོན་བྱེད་རྒྱུ་དཔེ་གལ་ཆེན་རེད། ཅེས་བཀའ་སློབ་བསྩལ་སོང་།
ཡང་མགོན་པོ་གང་ཉིད་མཆོག་ནས། ངོས་རང་ད་ཅི་འདིར་ཡོང་དུས། གངས་ཅན་མཁས་པའི་གཙུག་རྒྱན་ཙོང་ཁ་བ་ཟེར་གྱི་འདུག ངོས་རང་རྗེ་རིན་པོ་ཆེ་འཁྲུངས་ས་དང་ཐག་ཉེ་བོ་རེད། དུས་རབས་མང་པོ་ཞིག་གི་གོང་དུ་རྗེ་ཙོང་ཁ་བ་འཁྲུངས་བ་རེད། ད་ལྟའི་དུས་རབས་འདིར་ངོས་རང་ལ་རྗེ་ཙོང་ཁ་བའི་དགེ་ཕྲུག་ཟེར་ཆོག་ལ། བློས་ཁེལ་བའི་ཆོས་གྲོགས་ཤིག་ཏུ་ཆགས་བསྡད་ཡོད། ངོས་ཀྱི་སེམས་ནང་དུ་སྤོབས་པ་ཞིག་བྱུང་། ད་ལྟ་བར་དུ་ངོས་ཀྱིས་ཧུར་ཐག་བྱས་ཡོད་ཅིང་། ད་དུང་ལོ་བཅུ་བརྒྱ་ཕྲག་ལྷག་ལ་བསྟན་པའི་ཞབས་འདེགས་སྒྲུབ་ཐུབ་ཀྱི་རེད། རྗེ་རིན་པོ་ཆེའི་དུས་སྐབས་ལ་ཚན་རིག་ཡོད་པ་མ་རེད། ངོས་ཀྱི་དུས་སྐབས་འདིར་ཚན་རིག་ཡར་རྒྱས་ཞེ་བོ་འགྲོ་བསྡད་པ་རེད། ངོས་ཀྱིས་དབུ་མའི་གཞུང་དང་ཚད་མ་རིག་པའི་འགྲོ་སྟངས་སེམས་ཁམས་རིག་པའི་ཐོག་ནས་ཚན་རིག་པ་དང་གྲོགས་པོ་བསྒྲིགས་པ་རེད། ཚན་རིག་པ་མང་པོས་ངོས་རང་ཚན་རིག་པར་མཐོང་གི་ཡོད་པ་རེད། དེང་སང་ཚན་རིག་ལབ་དུས་བདེན་དོན་ཞིག་ཏུ་ངོས་འཛིན་བྱེད་ཀྱི་ཡོད། ང་ཚོས་རྡུལ་ཕྲ་རབ་ཀྱི་སྐོར་ཚན་རིག་པ་དང་མཉམ་དུ་གོ་བསྡུར་བྱས་དུས། ཚན་རིག་པས་ཀྱང་དགའ་བོ་བྱེད་ཀྱི་འདུག ངོས་རང་རྗེ་རིན་པོ་ཆེའི་འཁྲུངས་ཡུལ་དུ་སྐྱེས་ཏེ། རྗེ་ཙོང་ཁ་བའི་དབུ་ཚད་ཀྱི་གཞུང་རྣམས་སློབ་སྦྱོང་དང་ཉམས་ལེན་བྱས་ཡོད་པ་རེད། རང་ཉིད་ཀྱི་ཉམས་མྱོང་གཞན་བཤད་དུས་ཕན་གྱི་འདུག ཅེས་བཀའ་སློབ་བསྩལ་སོང་།
གསར་འགོད་པ། བྱམས་པ་ཚེ་རིང་།
