བྱང་ཀོ་རི་ཡའི་མགོ་ཁྲིད་ཀིམ་གྱིས་ང་ཚོས་དུས་རྟག་ཏུ་མཉམ་རུབ་ཐོག་བཙན་རྒྱལ་རིང་ལུགས་ལ་གདོང་ལེན་བྱ་རྒྱུ་ཡིན་སྐོར་བརྗོད།

ཁ་སང་ཕྱི་ཚེས་ ༡༢ ཉིན་བྱང་ཀོ་རི་ཡའི་མགོ་ཁྲིད་ཀིམ་ཇོང་ཨན་ (Kim Jong-un) མེ་འཁོར་ནང་བསྡད་ནས་ཨུ་རུ་སུའི་ཤར་ཕྱོགས་གྲོང་ཁྱེར་ཝ་ལ་ཌི་ཝོ་སི་ཊོག་ (Vladivostok) ཏུ་འབྱོར་བར་བརྟེན། འཛམ་གླིང་རྒྱལ་ཁབ་མང་པོ་ཞིག་གིས་མགོ་ཁྲིད་དེ་གཉིས་ཀྱིས་ངན་པ་ལག་སྦྲེལ་གྱི་ཐོག་ནས་རྒྱལ་སྤྱིའི་ཐོག་ཤུགས་རྐྱེན་ངན་པ་བཟོ་སྲིད་པའི་སེམས་འཚབ་བྱེད་བཞིན་འདུག

Russia’s President Vladimir Putin shakes hands with North Korea’s leader Kim Jong Un at a meeting at the Vostochny Сosmodrome in the far eastern Amur region, Russia, on September 13, 2023.

ཨུ་རུ་སུས་ཡུ་ཀེ་རེན་ལ་བཙན་འཛུལ་བྱས་ཏེ་ལོ་གཅིག་ལྷག་འགྲོ་བཞིན་ཡོད་པ་དང་། འཛམ་གླིང་རྒྱལ་ཁབ་གཞན་གྱིས་ཡུ་ཀེ་རེན་ལ་དྲག་ཆས་ཕོན་ཆེན་མཁོ་སྤྲོད་བྱས་པར་བརྟེན། ཨུ་རུ་སུར་མཚོན་ཆའི་དཀའ་ངལ་འཕྲད་བཞིན་པའི་སྐབས་འདིར། ད་ལན་མགོ་ཁྲིད་གཉིས་ཐུག་འཕྲད་སྐབས། བྱང་ཀོ་རི་ཡས་ཨུ་རུ་སུར་གོ་མཚོན་གྱི་མཐུན་རྐྱེན་བསྐྲུན་རྒྱུ་དང་། ཨུ་རུ་སུའི་ངོས་ནས་བྱང་ཀོ་རི་ཡར་ཟས་རིགས་དང་ནུས་ཤུགས། འཕྲུལ་རིགས་གོ་མཚོན་སོགས་ཡར་རྒྱས་གཏོང་བར་རོགས་རམ་བྱེད་དགོས་པ་ཞིག་ཆགས་ཀྱི་ཡོད་སྐོར་རྗོད་ཀྱིན་ཡོད་ཀྱང་། ཝ་ཤིང་ཊོན་ཆ་འཕྲིན་གྱིས་སྤེལ་བའི་གནས་ཚུལ་ནང་། མགོ་ཁྲིད་གཉིས་ཀྱིས་རྒྱལ་ཁབ་གཉིས་ཀྱི་འབྲེལ་ལམ་དང་། དཔལ་འབྱོར། ཚོང་འབྲེལ་སོགས་ཡར་རྒྱས་གོང་འཕེལ་གཏང་རྒྱུ་དང་། བྱང་ཀོ་རི་ཡའི་འཁོར་སྐར་ཡར་རྒྱས་གཏང་རྒྱུའི་ཐད་གླེང་སློང་བྱས་ཡོད་སྐོར་བཀོད་འདུག

ཐེངས་འདིའི་ཐུག་འཕྲད་ནི་ཏོག་དབྱིབས་གཉན་རིམས་རྗེས་ནས་བྱང་ཀོ་རི་ཡའི་མགོ་ཁྲིད་ཀིམ་ཇོང་ཨན་ཕྱིའི་རྒྱལ་ཁབ་ཏུ་ཕྱིན་པ་ཐོག་མ་ཆགས་ཀྱི་འདུག བདུན་ཕྲག་རྗེས་མའི་ནང་རྒྱ་ནག་གི་ཕྱི་སྲིད་བློན་ཆེན་ཝང་ཡི་ (Wang Yi) ཨུ་རུ་སུར་བསྐྱོད་འཆར་ཡོད་འདུག

དེ་རིང་ཐུག་འཕྲད་སྐབས་བྱང་ཀོ་རི་ཡའི་མགོ་ཁྲིད་ཀིམ་ཇོང་ཨན་གྱིས། དུས་དེ་རིང་ནས་བཟུང་ཨུ་རུ་སུ་དང་བྱང་ཀོ་རི་ཡའི་འབྲེལ་ལམ་དེ་དགོས་གལ་ཨང་དང་པོར་འཇོག་རྒྱུ་ཡིན་པ་མ་ཟད། ཨུ་རུ་སུའི་སྲིད་འཛིན་པུ་ཊིན་གྱི་ཐག་གཅོད་ཡོངས་རྫོགས་ལ་མཐའ་གཅིག་ཏུ་རྒྱབ་སྐྱོར་བྱ་རྒྱུ་ཡིན། ང་ཚོས་དུས་རྟག་ཏུ་མཉམ་རུབ་ཐོག་བཙན་རྒྱལ་རིང་ལུགས་ལ་གདོང་ལེན་བྱ་རྒྱུ་ཡིན། ཞེས་བརྗོད་འདུག

ཨུ་རུ་སུའི་སྲིད་འཛིན་པུ་ཊིན་གྱིས། ཨུ་རུ་སུའི་ངོས་ནས་བྱང་ཀོ་རི་ཡའི་འཁོར་སྐར་དང་བར་སྣང་ས་ཚིགས་ཀྱི་ལས་གཞི་ཡར་རྒྱས་གཏོང་རྒྱུ་རོགས་རམ་བྱ་རྒྱུ་ཡིན་སྐོར་སོགས་བརྗོད་འདུག

ཁ་སང་ཕྱི་ཚེས་ ༡༢ ཉིན་ཨ་རིའི་ཕོ་བྲང་དཀར་པོས། འཛམ་གླིང་མཉམ་འབྲེལ་རྒྱལ་ཚོགས་ཀྱི་རྒྱལ་སྲུང་ལྷན་ཁང་གིས་ཨུ་རུ་སུར་གོ་མཚོན་སྤྲོད་མི་ཆོག་པའི་གྲོས་ཆོད་གཏན་འབེབས་གཞིར་བཟུང་། བྱང་ཀོ་རི་ཡས་ཀྱང་ཨུ་རུ་སུར་གོ་མཚོན་གྱི་མཐུན་རྐྱེན་སྤྲོད་མི་ཆོག་པའི་བཀའ་རྒྱ་བཏང་ཡོད་པ་མ་ཟད། དེ་རིང་ཨ་རིའི་གཞུང་གིས། མེ་སྒྱོགས་དང་གོ་མཚོན་སྤྲོད་གཏན་འཁེལ་ཡོད་སྐོར་ལ་སྐྱོན་བརྗོད་བྱས་ཡོད་ཀྱང་། བྱང་ཀོ་རི་ཡ་དང་ཨུ་རུ་སུའི་ངོས་ནས་གནད་དོན་དེར་ངོས་ལེན་བྱས་མེད་པ་རེད།

ཕྱི་ལོ་ ༢༠༡༩ ཟླ་ ༤ པའི་ནང་ཨུ་རུ་སུའི་ཤར་ཕྱོགས་གྲོང་ཁྱེར་ཝ་ལ་ཌི་ཝོ་སི་ཊོག་ (Vladivostok) ཏུ་ཕྱིན་ཏེ། མགོ་ཁྲིད་གཉིས་ཀྱིས་འབྲེལ་ལམ་དང་དཔལ་འབྱོར་སོགས་ཡར་རྒྱས་གཏང་རྒྱུའི་སྐོར་ལ་གླེང་སློང་བྱས་ཡོད་པ་རེད།

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། པདྨ་མཚོ།