ཨ་རིའི་གྲོས་ཚོགས་གོང་མའི་ཚོགས་གཙོ་སྐུ་ཞབས་ཆག་ཤུ་མིར་ལགས་ཀྱི་དབུས་ཆབ་སྲིད་ཚོགས་པ་ཆེ་ཁག་གཉིས་ཀྱི་སྐུ་ཚབ་ཚོགས་ཆུང་ཞིག་གིས་རྒྱ་ནག་གི་མགོ་འཁྲིད་ཞི་ཅིན་ཕིན་སོགས་ལ་ཐུག་འཕྲད་གནང་སྟེ་ཨུ་རུ་སུས་ཡུ་ཁི་རེན་ལ་བཙན་འཛུལ་བྱས་པ་དང་ཧཱ་མཱ་སི་དྲག་སྤྱོད་པས་ཨི་ཛི་རལ་ལ་དྲག་རྒོལ་བྱེད་བཞིན་པའི་གནད་དོན་གླེང་སློང་གནང་ཡོད་འདུག
ཟླ་འདིའི་ཕྱི་ཚེས་ ༧ ཉིན་ནས་ཨ་རིའི་གྲོས་ཚོགས་གོང་མའི་ཚོགས་གཙོ་སྐུ་ཞབས་ཆག་ཤུ་མིར་ལགས་ (Chuck Schumer)ལགས་ཀྱི་དབུས་གྲོས་ཚོགས་གོང་མའི་ཆབ་སྲིད་ཚོགས་པ་ཆེ་ཁག་གཉིས་ཀྱི་འཐུས་མི་དྲུག་ལས་གྲུབ་པའི་ཚོགས་ཆུང་ཞིག་རྒྱ་ནག་ཏུ་ཕེབས་ཏེ། ཁ་སང་ཕྱི་ཚེས་ ༩ ཉིན་རྒྱ་ནག་གི་མགོ་ཁྲིད་ཞི་ཅིན་ཕིང་དང་། རྒྱ་ནག་གི་ཕྱི་སྲིད་བློན་ཆེན་ཝང་ཡི་( Wang Yi) སོགས་ལ་ཐུག་འཕྲད་གནང་ཡོད་པ་དང་། པ་ལི་སི་ཐན་གྱི་དྲག་དམག་ཚོགས་པ་ཧ་མ་སིས་(Hamas) ཨི་ཛི་རལ་ལ་དྲག་རྒོལ་བྱེད་བཞིན་པའི་གནད་དོན་ཐོག་རྒྱ་ནག་གཞུང་ནས་ཨི་ཛི་རིལ་མི་མང་ལ་རྒྱབ་སྐྱོར་དང་སྙིང་རྗེ་བྱེད་ཀྱི་མེད་པར་བློ་ཕམ་ཡོད་སྐོར་གསུངས་འདུག
དེ་ཡང་སྐུ་ཞབས་ཆག་ལགས་ཀྱིས། རྒྱ་ནག་གི་ཕྱི་སྲིད་བློན་ཆེན་གྱིས་ཨི་ཛི་རལ་གྱི་ཆེས་ཛ་དྲག་པའི་དུས་སྐབས་འདི་འདྲ་ཞིག་ལ་སྙིང་རྗེ་དང་རྒྱབ་སྐྱོར་གང་ཡང་མེད་པར་བསྒྲགས་གཏམ་སྤེལ་བར་བློ་ཕམ་ཆེན་པོ་ཡོད། ངས་ཁྱེད་དང་རྒྱ་ནག་མི་མང་གིས་ཨི་ཛི་རལ་མི་མང་མཉམ་དུ་ལངས་ནས་དམག་གི་དཔུང་འཇུག་འདི་དག་ལ་སྐྱོན་འཛུགས་བྱ་རྒྱུར་རེ་སྐུལ་བྱེད་ཀྱི་ཡོད། ཅེས་གསུངས་འདུག
ཟླ་འདིའི་ཕྱི་ཚེས་ ༨ ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པས་ཧཱ་མཱ་སི་དྲག་རྒོལ་སྐོར་ལ་བསྒྲགས་གཏམ་ཞིག་སྤེལ་བའི་ནང་། ད་ལྟ་རྒྱལ་ཁབ་གཉིས་ཀྱི་བར་དམག་འཁྲུག་བསྐྱར་དུ་བྱུང་བ་དེས། ཕྱོགས་གཉིས་བར་དེ་སྔ་ནས་ཡོད་པའི་མཉམ་གནས་ཞི་བདེ་རྒྱུན་སྐྱོང་ཡོང་ཐབས་མེད་པ་བསྟན་ཡོད། དམག་འཁྲུག་མཚམས་འཇོག་ཡོང་ཐབས་ཀྱི་གཞི་རྩའི་ཐབས་ལམ་ཉག་ཅིག་ནི། རྒྱལ་ཁབ་སོ་སོར་ངོས་འཛིན་དགོས་པའི་ཐབས་ལམ་ལག་བསྟར་བྱས་ཏེ། པ་ལི་སི་ཐན་རང་བཙན་གྱི་རྒྱལ་ཁབ་ཅིག་ཏུ་བསྐྲུན་དགོས། རྒྱལ་སྤྱིའི་ཚོགས་སྡེ་ཁག་གིས་པ་ལི་སི་ཐན་གྱི་གནད་དོན་གལ་ཆེར་རྩིས་ཏེ། ཨི་ཛི་རལ་དང་པ་ལི་སི་ཐན་བར་གང་མགྱོགས་ཞི་བའི་གྲོས་མོལ་ཡོང་ཐབས་ཀྱི་ལམ་ཞིག་བསྐྲུན་དགོས་ཀྱི་འདུག རྒྱ་ནག་གིས་རྒྱལ་སྤྱིའི་ཚོགས་སྡེ་ཁག་དང་ལྷན་དུ་པ་ལི་སི་ཐན་དང་ཨི་ཛི་རལ་གྱི་གནད་དོན་མཇུག་མ་བསྡུས་བར་དུ་འབད་བརྩོན་བྱ་ངེས་ཡིན། ཞེས་བརྗོད་འདུག
ཁ་སང་རྒྱ་ནག་གི་རྒྱལ་ས་པེ་ཅིང་དུ་རྒྱ་ནག་གི་མགོ་ཁྲིད་ཞི་ཅིན་ཕིན་དང་ཐུག་འཕྲད་བྱས་ཏེ། ཨ་རྒྱ་གཉིས་ཀྱི་ཚོང་འབྲེལ་སོགས་ཀྱི་མཉམ་ལས་ནུས་པ་སྔར་ལས་གོང་མཐོར་གཏོང་ཐབས་དང་། རྒྱལ་ཁབ་ཀྱི་བདེ་འཇགས་སོགས་ཀྱི་ཐད་ལ་གྲོས་མོལ་བྱས་ཡོད་ཅིང་། སྐབས་དེར་སྐུ་ཞབས་ཆག་ལགས་ཀྱིས། རྒྱ་ནག་གཞུང་གིས་རྒྱ་ནག་ཏུ་ཡོད་པའི་ཨ་རིའི་བཟོ་ཚོང་ཁང་མང་དག་ཅིག་ལ་དྲང་བདེན་གྱི་ཐོག་ནས་ལྟ་སྐྱོང་བྱེད་ཀྱི་མེད་པས། ཨ་རིར་ཡོད་པའི་རྒྱ་ནག་གི་བཟོ་ཚོང་ཁང་ཁག་གིས་རང་དབང་དང་གུ་ཡངས་ལོངས་སུ་སྤྱོད་མུས་ཡིན་པ་བཞིན། རྒྱ་ནག་ཏུ་ཡོད་པའི་ཨ་རིའི་བཟོ་ཚོང་ཁང་ཁག་ལའང་དེ་ལྟར་ལྟ་སྐྱོང་བྱ་དགོས་སྐོར་དང་། ཨུ་རུ་སུས་ཡུ་ཁུ་རེན་ལ་བཙན་འཛུལ་བྱས་པའི་གནད་དོན་སོགས་ཀྱི་སྐོར་གླེང་སློང་གནང་ཡོད་འདུག
རྒྱ་ནག་གི་མགོ་ཁྲིད་ཞི་ཅིན་ཕིན་གྱིས། ཨ་རྒྱ་གཉིས་ཀྱིིས་འབྲེལ་ལམ་སྲ་བརྟན་ཚུགས་སླད། ཕན་ཚུན་གུས་བརྩི་དང་། མཉམ་རུབ་ཀྱི་ཐོག་ནས་ནུས་པ་མཉམ་སྐྱེད་བྱ་དགོས་པ་མ་ཟད། འཛམ་གླིང་ཡོངས་ཀྱི་ཁེ་ཕན་ཆེད་ཕྱོགས་གཉིས་བར་མཉམ་ལས་དང་ཡར་རྒྱས་གཏང་རྒྱུ་གལ་ཆེན་ཡིན་ལུགས་བརྗོད་པ་ཙམ་ལས། ཨུ་རུ་སུའི་བཙན་འཛུལ་དང་ཧཱ་མི་སིའི་དྲག་རྒོལ་སོགས་ཀྱི་གནད་དོན་ཐོག་བློ་འཚབ་ཡོད་པའི་རྣམ་པ་གང་ཡང་བསྟན་མེད་པ་རེད།
བརྒྱུད་ལམ་གྱི་གནས་ཚུལ་ལྟར་ན། ཨ་རིའི་སྐུ་ཚབ་ཚོགས་ཆུང་དེ་ད་ལན་རྒྱ་ནག་གཙོས་ལྷོ་ཀོ་རི་ཡ་དང་་ཉི་ཧོང་བཅས་སུ་ཕེབས་འཆར་ཡོད་ཅིང་། ཕྱོགས་ཡོངས་སུ་ཨ་རིའི་ཚོང་འབྲེལ་སོགས་གོང་མཐོར་གཏོང་སླད་ཕེབས་ཀྱི་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།