རྒྱ་གཞུང་ཉེན་རྟོག་པ་ཟུར་པ་དང་གུང་ཁྲན་ཏང་ཡོན་ལས་བྱེད་ཅིག་དུས་འཁོར་དབང་ཆེན་ཞུ་རུ་ཕྱིན་ན་ཁྲིམས་འགལ་ཡིན་པའི་ཉེས་འཛུགས་འོག་བོད་མི་ཚེ་པོ་ལགས་བཙན་འཁྲིད་བྱས་འདུག
ཟླ་འདིའི་ཕྱི་ཚེས་ ༡༢ ཉིན་གྱི་དགོང་མོར། བོད་སྒ་སྐྱེ་རྒུ་མདོ་ཆུ་དམར་ལེབ་རྫོང་ཁོངས་ནས་ཡིན་པའི་རྒྱ་གཞུང་ཉེན་རྟོག་པ་ཟུར་པ་དང་། གུང་ཁྲན་ཏང་ཡོན་ཚེ་པོ་ཟེར་བའི་སྐྱེས་པ་ཞིག་གིས། ཨ་མ་རྒས་མོ་དང་བཟའ་ཟླ་བུ་ཕྲུག་བཅས་ནང་མི་གསུམ་ཁྲིད་དེ། གུང་ཐང་སྐུ་ཕྲེང་བདུན་པ་བློ་བཟང་འཇམ་དབྱངས་དགེ་ལེགས་བསྟན་པའི་མཁན་ཆེན་མཆོག་གི་ཉིན་གྲངས་བཞིའི་རིང་གི་དཔལ་དུས་ཀྱི་འཁོར་ལོའི་དབང་ཆེན་ཞུ་བར་ཕྱིན་ཏེ། ལམ་བར་གྱི་ཁྲིན་འདུ་རྫོང་གི་ཟ་ཁང་ཞིག་ནང་ཉིན་གུང་གི་ཟ་མ་ཟ་བཞིན་པའི་སྐབས་སུ། གློ་བུར་དུ་རྒྱ་གཞུང་ཉེན་རྟོག་པ་བསླེབས་ཏེ་ཁོང་ཚོ་གང་དུ་འགྲོ་མཁན་ཡིན་མིན་སོགས་འདྲི་རྩད་བྱས་པ་མ་ཟད། དུས་འཁོར་དབང་ཆེན་ཞུ་རུ་འགྲོ་མཁན་ཡིན་ན་ཐོ་འགོད་བྱེད་དགོས་ཚུལ་བརྗོད་ཡོད་འདུག
དེ་ནས་ཁོང་ཚོས་ཐོ་འགོད་བྱས་ཏེ་ཅུང་ཙམ་ལས་མ་འགོར་བར་མི་གཞན་ཞིག་ཡོང་སྟེ། དུས་འཁོར་དབང་ཆེན་ལ་འགྲོ་ཆོག་གི་མ་རེད་ཟེར་ནས་ཁོང་ཚོ་ཚང་མ་ཕྱིར་ལོག་དགོས་པའི་བཀའ་བཏང་ཡོད་པ་མ་ཟད། ཚེ་པོ་ལ་ཁྱོད་རང་ད་བར་ལོ་ངོ་༣༢ རིང་ས་གནས་འདྲ་མིན་ནང་ཉེན་རྟོག་པ་སོགས་ཀྱི་ལས་འགན་འདྲ་མིན་ཁུར་མྱོང་བའི་གུང་ཁྲན་ཏང་ཡོན་རྒན་གྲས་ཤིག་ཡིན་སྟབས། ཁྲིམས་ལུགས་ཆ་ཚང་ཤེས་བཞིན་དུ་དེ་འདྲ་བྱས་པ་ནི་ཧ་ཅང་ཚབས་ཆེན་དང་ཁྲིམས་འགལ་ཡིན་ལུགས་རྗོད་དེ། ཁོང་ཉེན་རྟོག་ཁང་དུ་བཙན་འཁྲིད་བྱས་ཡོད་འདུག
ཚེ་པོ་ལགས་ཀྱིས་ད་བར་ལོ་ངོ་༣༢ རིང་རྫ་སྟོད་སོགས་ས་གནས་འདྲ་མིན་ནང་ཉེན་རྟོག་པ་དང་ཡུལ་ཚོའི་འགོ་ཁྲིད། ཕྱུག་རིགས་ཚན་པའི་འགོ་ཁྲིད་སོགས་ཀྱི་འགན་ཁུར་མྱོང་ཡོད་འདུག་ལ། ད་ལྟ་རང་ལོ་དྲུག་ཅུའི་ནང་བསླེབས་ཡོད་འདུག
གུང་ཐང་རིན་པོ་ཆེ་མཆོག་གི་དུས་འཁོར་དབང་ཆེན་ཞུ་བར་བོད་ཡུལ་ཕྱོགས་མཐའ་ཀུན་ནས་མི་གྲངས་ཁྲི་ཚོ་མང་པོ་འཛོམས་བཞིན་ཡོད་སྟབས། ས་གནས་སྲིད་གཞུང་གིས་བརྡ་ཁྱབ་བཏང་སྟེ། ཐེངས་འདིའི་དུས་དབང་ནི་མཛོད་དགེ་སྟོད་སྨད་མི་མང་གི་ཆེད་དུ་ཡིན་སྟབས། ས་གནས་གཞན་ནས་ཆོས་ཞུ བར་ཡོང་མི་ཆོག་པ་དང་། ཡོང་ནའང་ཕྱིར་ལོག་གཏོང་རྒྱུ་ཡིན་སྐོར་བརྗོད་ཡོད་པ་ལྟར། ལམ་བར་གྱི་ས་གནས་མང་པོ་ནས་ཉེན་རྟོག་པས་བཀག་འགོག་བྱས་ཏེ་དུས་དབང་ཞུ་རུ་འགྲོ་བ་ཡིན་མིན་སོགསའདྲི་རྩད་བྱས་ཏེ་འགོག་བཞིན་ཡོད་འདུག
རྩོམ་སྒྲིག་པ། པདྨ་མཚོ།
