འཛམ་གླིང་གི་ཚོང་ཤག་ཆེ་ཤོས་གཉིས་ཀྱི་འབྲེལ་བ་ཇེ་སྡུག་ཏུ་འགྲོ་ཉེན་འདུག

ཡུ་རོབ་མཐུན་ཚོགས་ཀྱི་ཚོང་དོན་འགན་འཛིན་སྐུ་ཞབས་ཝལ་ཌི་སི་ལགས་ (Valdis dombrovskis) ཀྱིས་རྒྱ་ནག་གཞུང་གིས་མུ་མཐུད་ཨུ་རུ་སུར་རྒྱབ་སྐྱོར་བྱེད་བཞིན་པ་དེས་རྒྱ་ནག་དང་ཡུ་རོབ་མཐུན་ཚོགས་ཀྱི་ཚོང་འབྲེལ་ལ་དོ་ཕོག་བཟོ་སྲིད་པའི་ཉེན་བརྡ་བཏང་འདུག

EU trade chief Valdis Dombrovskis speaks at the Bund Summit in Shanghai on Saturday. Photo: Reuters

ཟླ་འདིའི་ཕྱི་ཚེས་ ༢༣ ནས་ ༢༦ བར་ཉིན་གྲངས་གསུམ་རིང་ཡུ་རོབ་མཐུན་ཚོགས་ཀྱི་ཚོང་དོན་འགན་འཛིན་སྐུ་ཞབས་ཝལ་ཌི་སི་ (Valdis dombrovskis) ལགས་ཀྱིས་རྒྱ་ནག་གི་གྲོང་ཁྱེར་ཧྲང་ཧེ་དང་སུའུ་ཀྲུའུ་སོགས་སུ་སྐོར་སྐྱོད་གནང་བཞིན་ཡོད་པ་ལྟར། དེ་རིང་ཁོང་གིས་རྒྱ་ནག་གི་རྒྱལ་ས་པེ་ཅིན་གྱི་ཆིང་ཧྭ་སློབ་ཆེན་དུ་ཚོང་དོན་གཏམ་བཤད་གནང་སྐབས། ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པའི་སྐབས་འདིར། རྒྱ་ནག་གཞུང་གིས་ཨུ་རུ་སུ་ལ་རྒྱབ་སྐྱོར་བྱེད་བཞིན་པ་དེས་ཡུ་རོབ་མཐུན་ཚོགས་དང་རྒྱ་ནག་གཉིས་ཀྱི་ཚོང་དོན་ལས་རིགས་ལ་དོ་ཕོག་འགྲོ་སྲིད་པའི་ཉེན་བརྡ་བཏང་འདུག

སྐུ་ཞབས་ཝལ་ཌི་སི་ལགས་ཀྱིས། ད་ལྟ་རྒྱ་ནག་དང་ཡུ་རོབ་མཐུན་ཚོགས་ཀྱི་ཚོང་དོན་འབྲེལ་ལམ་དེ་གཉན་འཕྲང་ཅན་ཞིག་ཏུ་གྱུར་ཡོད་པ་རེད། ང་ཚོས་ཕྱོགས་གཉིས་ཀར་ཁེ་ཕན་ཡོད་པའི་ལམ་བུ་ཞིག་གདམ་ཆོག་ལ། ང་ཚོས་ལག་པ་དང་ལག་པ་འབྲེལ་ནས་ཕྱི་གསལ་ནང་གསལ་དང་། དྲང་ཚུགས་ལྡན་པའི་ཚོང་འབྲེལ། མ་འཛུགས་སོགས་ཀྱི་ཐོག་ནས་གདོང་ལེན་བྱ་དགོས། ཡང་མིན་ན་ང་ཚོས་ཕྱོགས་གཉིས་ཀ་ག་ལེར་ལོགས་སུ་འགྲོ་བཅུག་པའི་ལམ་བུ་དེ་གདམ་དགོས། ང་ཚོས་འདས་པའི་ལོ་བཅུ་ཕྲག་རིང་གི་མཉམ་བགོས་ཁེ་ཕན་ཇེ་ཞན་དང་མེད་པར་གྱུར་བ་དེས། ང་ཚོས་མི་མང་དང་ཚོང་དོན་གྱི་འབྲེལ་ལམ་མེད་པར་གཏང་རྒྱུ་དེ་རེད། ཅེས་བརྗོད་འདུག

ཁོང་གིས། གནད་དོན་ཆེ་ཤོས་ཤིག་ནི་རྒྱ་ནག་གཞུང་གིས་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱས་པའི་གནད་དོན་ཐད་སྐྱོན་བརྗོད་དང་གླེང་སློང་བྱས་མ་ཐུབ་པ་དེ་རེད། རྒྱ་ནག་གཞུང་གིས་ཨུ་རུ་སུའི་ཁྱབ་ཁོངས་ས་གནས་ཀྱི་གནད་དོན་ཞིག་ལ་རྩིས་ཡོད། ང་ཚོས་རྒྱ་ནག་གཞུང་གི་ལྟ་ཚུལ་དེར་གོ་བ་ལེན་ཁག་པོ་འདུག དེ་ནི་རྒྱ་ནག་གཞུང་གི་གཞི་རྩའི་ལངས་ཕྱོགས་དང་འགལ་ཟླར་གྱུར་ཡོད་པ་རེད། ཅེས་བརྗོད་འདུག

རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་གྱི་གནས་ཚུལ་ལྟར་ན། སྐུ་ཞབས་ཝལ་ཌི་སི་ལགས་ཀྱི་ད་ལན་རྒྱ་ནག་གི་སྲིད་བློན་གཞོན་ཧི་ལི་ཧྥན་ (He Lifeng) དང་ཐུག་འཕྲད་གནང་ནས་རྒྱ་ནག་དང་ཚོང་དོན་གྱི་སྐོར་ལ་གླེང་སློང་གནང་འཆར་ཡོད་པ་མ་ཟད། རྒྱ་ནག་གི་ཚོང་འབྲེལ་གྱི་གནད་ཡོད་མི་སྣ་ཁག་ཅིག་དང་ཐུག་འཕྲད་བྱ་འཆར་འདུག་ལ། དེ་བཞིན་རྒྱ་ནག་དང་ཡུ་རོབ་མཐུན་ཚོགས་གཉིས་ཀྱིས་མཉམ་ལས་བྱེད་མུས་ཡིན་པའི་གློག་བཟོས་རླངས་འཁོར་(electric vehicle) སོགས་ཀྱི་ཐད་ལ་བགྲོ་གླེང་བྱ་རྒྱུ་དང་། རྒྱ་ནག་ནང་གི་ཚོང་དོན་བསྟི་གནས་ཁག་ཏུ་སྐོར་སྐྱོད་དང་། སློབ་ཆེན་ཁག་ཏུ་གཏམ་བཤད་སྤེལ་རྒྱུ་ཡིན་འདུག

ཕྱི་ལོ་ ༡༩༧༥ ནས་ཡུ་རོབ་མཐུན་ཚོགས་དང་རྒྱ་ནག་བར་གྱི་མཉམ་འབྲེལ་ཚོང་ལས་མགོ་བརྩམས་ཤིང་། ཕྱི་ལོ་ ༢༠༡༣ ལོར་བཞག་པའི་ཡུ་རོབ་མཐུན་ཚོགས་དང་རྒྱ་ནག་གི་ཚོང་དོན་མ་འཛུགས་གྲོས་ཆོད་དེས་ཕྱོགས་གཉིས་ཀྱི་ཚོང་དོན་མ་འཛུགས་གོང་འཕེལ་གཏོང་ཐབས་ལ་དམིགས་ཡོད། ཕྱི་ལོ་ ༢༠༡༩ ལོའི་ཚོང་འབྲེལ་གནས་བབ་ལྟར་ན། ཡུ་རོབ་མཐུན་ཚོགས་དང་རྒྱ་ནག་བར་ཁྱོན་ཨ་སྒོར་ཐེར་འབུམ་ ༥༥༩ ཡི་ཚོང་ལས་འབྲེལ་བ་ཡོད་པ་དང་། དེ་ནི་འཛམ་གླིང་གི་ཚོང་འབྲེལ་ཆེ་ཤོས་ཨང་རིམ་ ༢ པ་དེ་ཆགས་ཡོད་འདུག ཕྱི་ལོ་ ༢༠༢༣ ལོར་རྒྱ་ནག་དང་ཡུ་རོབ་མཐུན་ཚོགས་གཉིས་ནི་ཚོང་འབྲེལ་ཆེས་ཆེ་ཤོས་དང་ཚོང་རོགས་ཆེ་ཤོས་དེར་གྱུར་ཡོད་ཅིང་། འདི་ལོ་གཅིག་པུར་རྒྱ་ནག་གིས་ཡུ་རོབ་ཀྱི་ཚོང་རྫས་བརྒྱ་ཆ་༩ ནང་འདྲེན་དང་། བརྒྱ་ཆ་༢༠ ལྷག་ཕྱིར་ཚོང་བྱས་ཡོད་འདུག

འདི་ལོ་གཅིག་པུར་རྒྱ་ནག་གིས་ཐོན་རྫས་བརྒྱ་ཆ་ ༣༠ ལྷག་ཕྱིའི་རྒྱལ་ཁབ་ཁག་ལ་ཕྱིར་ཚོང་བྱས་འདུག་ལ། དེ་བཞིན་ཨ་རིས་བརྒྱ་ཆ་ ༡༨།༡༤ དང་། འཇར་མན་གྱིས་བརྒྱ་ཆ་ ༡༩།༧༦། ཉི་ཧོང་གིས་བརྒྱ་ཆ་ ༡༦། ༠༧ ལྷག་ཚོང་འགྲེམས་བྱས་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།