སྤྱི་འཐུས་ཀྱི་ཉུང་མཐའི་གྲངས་ཚད་མ་ལོན་སྟབས་གྲོས་ཚོགས་ཚོགས་དུས་དྲུག་པའི་ལས་དོན་ལྷག་མ་བསྐྱང་རྒྱུའི་ཚོགས་འདུ་འཕར་འགྱངས་གནང་སོང་།
དེ་རིང་ཉིན་རྒྱབ་ཆུ་ཚོད་ ༤ ཡོལ་ཙམ་ལ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོས། ཚོགས་དྲུང་ལས་ཁུངས་བརྒྱུད་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པ་སྤྱི་འཐུས་ཀྱི་ཉུང་མཐའི་གྲངས་ཚད་ལོན་མིན་དབང་གིས། རེ་ཞིག་གྲོས་ཚོགས་འཕར་འགྱངས་གནང་བའི་ཡོངས་ཁྱབ་གསལ་བསྒྲགས་སྤེལ་སོང་།
དེ་འབྲེལ་ཡོངས་ཁྱབ་གསལ་བསྒྲགས་ནང་། བཙན་བྱོལ་བོད་མིའི་བཅའ་ཁྲིམས་དོན་ཚན་ཞེ་དགུ་བའི་ནང་གསེས་ ༢ པར། སྤྱི་འཐུས་ཉུང་མཐའི་གྲངས་ཚད་མ་ལོན་པར་ཚོགས་འདུ་ཉིན་གྲངས་བདུན་ལྷག་འཕར་འགྱངས་བྱེད་དགོས་བྱུང་ན་ཚོགས་གཙོ་སྦྲེལ་པོས་ཚོགས་འདུ་འཕར་འགྱངས་ཀྱི་ཐག་གཅོད་བྱ་རྒྱུ་ཞེས་གསལ་བ་བཞིན། སྐབས་༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༦ པ་མུ་མཐུད་བསྐྱང་རྒྱུར་སྤྱི་འཐུས་ཉུང་མཐའི་གྲངས་ཚད་ལོངས་མིན་དབང་གིས་རེ་ཞིག་ཚོགས་འདུ་འཕར་འགྱངས་བྱ་རྒྱུ་དང་། ཚོགས་དུས་འདིའི་ལས་དོན་ལྷག་མ་རྣམས་མུ་མཐུད་བསྐྱང་རྒྱུའི་དུས་ཚོད་གཏན་འཁེལ་བྱུང་མཚམས་འབྲེལ་ལམ་ཞུ་རྒྱུ་ལགས་ན། ཚོགས་མི་རྣམས་དུས་ཐོག་ཚོགས་བཅར་གནང་དགོས་ཞེས་འཁོད་འདུག
གྲོས་ཚོགས་ཚོགས་དུས་དྲུག་པ་དེ་ཟླ་འདིའི་ཕྱི་ཚེས་ ༡༩ ཉིན་ནས་དབུ་འཛུགས་ཀྱིས། དེ་རིང་ཕྱི་ཚེས་ ༢༨ བར་འཚོགས་གཏན་ཁེལ་ཡོད་ཀྱང་། ཟླ་འདིའི་ཕྱི་ཚེས་ ༢༡ བར་ཉིན་གྲངས་གསུམ་རིང་ལས་ཚོགས་ཐུབ་མེད་པ་དང་། ད་ཐེངས་ཀྱི་གྲོས་ཚོགས་ཚོགས་དུས་ ༦ པའི་སྟེང་འཛིན་སྐྱོང་བཀའ་ཤག་གིས་བོད་མིའི་སྒྲིག་འཛུགས་ཀྱི་ལྷན་ཁང་རེ་རེའི་ལོ་གཅིག་གི་ལས་བསྡོམས་གྲོས་ཚོགས་སུ་སྙན་སྒྲོན་གནང་རྒྱུ་དང་། བོད་མི་མང་སྤྱི་འཐུས་རྣམས་ནས་བོད་མིའི་སྒྲིག་འཛུགས་ཀྱི་ལྷན་ཁང་ཁག་རེ་རེའི་ལས་དོན་དང་འབྲེལ་བའི་དོགས་འདྲི་དང་ཞིབ་བཤེར་བགྲོ་གླེང་གི་ལས་རིམ་ཞིག་ཆགས་ཡོད། འོན་ཀྱང་། ད་ལན་ཚོགས་དུས་དྲུག་པའི་སྟེང་ཆོས་རིག་ལས་ཁུངས་ཀྱི་ལས་བསྡོམས་མ་གཏོགས་ལྷན་ཁང་ཁག་གཞན་ཚང་མའི་ལས་དོན་ལྷག་བསྡད་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
