སྲིད་སྐྱོང་མཆོག་གིས་བྷི་རཱ་ཛིལ་སཱོ་པུ་ལོ་མངའ་སྡེའི་གྲོས་ཚོགས་སུ་བོད་ནང་གི་ཛ་དྲག་གནས་སྟངས་དང་། བྷི་རཱ་ཛིལ་དབུས་དང་ས་གནས་གཞུང་གིས་རྒྱ་ནག་དང་མ་འཛུགས་ལས་གཞི་ཐོག་དོགས་ཟོན་གནང་དགོས་སྐོར་གསུངས་འདུག
ཨ་རིའི་རྒྱལ་ཡོངས་གསར་འགོད་མཐུན་ཚོགས་ཀྱིས་གསལ་བསྒྲགས་སྤེལ་བ་ལྟར་ན། ཟླ་འདིའི་ཕྱི་ཚེས་ ༡༨ ཉིན་གྱི་ཕྱི་དྲོའི་ཆུ་ཚོད་གཉིས་པའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་བོད་ཀྱི་ས་ཁམས་ཆགས་སྟངས་དང་། ཆོས་དང་རིག་གཞུང་གི་སྐོར་དང་། རྒྱ་ནག་གི་རྒྱུད་གཅིག་ལམ་གཅིག་གིས་བོད་ཀྱི་ངོ་བོ་རྩ་བརླག་གཏོང་ཉེན་ཡོད་སྐོར་སོགས་ཀྱི་ཐོག་གསུང་བཤད་གནང་རྒྱུ་དང་། ཕྱི་ཚེས་ ༡༩ ཉིན་གྱི་དགོང་དྲོ་ཆུ་ཚོད་བཞི་བར་ཇོར་ཇི་མཱ་སོན་ (George Mason) གཙུག་ལག་སློབ་གླིང་དུ། སྲིད་སྐྱོང་མཆོག་ནས་བོད་རྒྱའི་དཀའ་རྙོག་སེལ་བར་བོད་ཀྱི་སྐུ་ཚབ་གལ་ཆེན་ཡིན་པའི་སྐོར་དང་བོད་ཀྱི་ས་ཁམས་ཆགས་སྟངས་དང་། རིག་གཞུང་གི་གལ་གནད་ཐོག་བགྲོ་གླེང་གནང་རྒྱུ་བཅས་ཡིན་འདུག
ཕྱི་ཟླ་ ༩ ཚེས་ ༢༩ ནས་ཕྱི་ཟླ་ ༡༠ ཚེས་ ༢༤ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ལྷོ་ཨ་མེ་རི་ཁའི་རྒྱལ་ཁབ་བྷི་རཱ་ཛིལ་དང་། ཀོ་སི་ཊ་རི་ཀ ཀོ་ལིམ་བྷི་ཡ། མེ་སི་ཁོ། ཨ་རི་བཅས་སུ་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༢ ཉིན་གྱི་སྔ་དྲོར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་བྷི་རཱ་ཛིལ་སཱོ་པུ་ལོ་མངའ་སྡེའི་གྲོས་ཚོགས་ཀྱི་ཚོགས་གཙོ་ཨན་ཌི་རེ་ཌོ་པ་རཱ་ཌོ་(Andre do Prado)་མཆོག་དང་། ཚོགས་གཞོན་གྷིལ་ཌི་ནུ་ཛི་(Gil Dinuz) མཆོག ངལ་རྩོལ་སྲིད་དོན་ཚོགས་པའི་ཚོགས་མི་པུ་ལཱ་ཧྥོ་རི་ལོ་(Paula Fiorilo) ལགས། སྤྱི་མཐུན་སྲིད་དོན་ཚོགས་པ་དང་རྒྱལ་སྤྱིའི་མཛའ་འབྲེལ་ཚོགས་པའི་ཚོགས་མི་རུའི་ཨལ་ཧྥ་སི་(Rui Alves) ལགས་བཅས་ལ་མཇལ་འཕྲད་གནང་ཡོད་ཅིང་། སྐབས་དེར་སྲིད་སྐྱོང་མཆོག་གིས་ད་ལྟའི་བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་དང་། བྷི་རཱ་ཛིལ་དབུས་དང་ས་གནས་གཞུང་ངོས་ནས་རྒྱ་ནག་གཞུང་གི་མ་འཛུགས་ལས་གཞིའི་ཐོག་དོགས་ཟོན་གནང་དགོས་སྐོར་གསུངས་འདུག
ཉིན་རྒྱབ་གྲོང་སྡེ་ལྷན་ཚོགས་ཀྱི་སྤྱི་ཁྱབ་ལས་ཁུངས་སུ་སྲིད་སྐྱོང་མཆོག་གིས་སཱོ་པུ་ལོའི་གྲོང་ཁྱེར་གྱི་འགྲོ་བ་མིའི་ཐོབ་ཐང་ཚན་པའི་དྲུང་ཆེ་སོ་ནིན་ཧཱ་ (Soninha Francine) ལགས་དང་། གནམ་གཤིས་གནས་ཚུལ་གྱི་དྲུང་ཆེ་གྷིལ་བྷར་ཌོ་བཱ་ཐཱ་ལི་ནི (Gilberto Natalini )ལགས་གཉིས་དང་མཇལ་འཕྲད་གནང་ཡོད་ཅིང་། དགོང་དྲོ་སྲིད་སྐྱོང་མཆོག་ནས་སཱོ་པུ་ལོ་གཙུག་ལག་སློབ་གཉེར་ཁང་དུ་བཙན་བྱོལ་བོད་མིའི་མང་གཙོའི་འཕེལ་རིམ་དང་། བོད་མིའི་རིག་གཞུང་སོགས་དང་འབྲེལ་བའི་གནད་དོན་ཐོག་གསུང་བཤད་གནང་ཡོད་པ་རེད།
ཟླ་འདིའི་ཕྱི་ཚེས་ ༡ ཉིན་སྲིད་སྐྱོང་སྤེན་པ་ཚེ་རིང་མཆོག་བྷི་རཱ་ཛིལ་གྱི་རྒྱལ་ས་སའོ་པོ་ལོ་རུ་ (Longevidade Expo + Forum) ཞེས་པའི་ལྷན་ཚོགས་སུ་མཉམ་ཞུགས་གནང་ཡོད་པ་དང་། ལྷན་ཚོགས་ཀྱི་འགན་འཛིན་ཝལ་ཌར་ཧྤ་ཌི་མན་(Walter Feldman)ལགས་དང་། ལྷན་ཚོགས་ཐོག་མར་གསར་འཛུགས་གནང་མཁན་ཧྤ་རན་ཁི་སི་སོ་སཱན་ཌོ་སི་ (Francisco Santos) ལགས་བཅས་ཚོགས་མི་ཁག་ཅིག་དང་མཇལ་འཕྲད་གནང་འདུག སྐབས་དེར་སྲིད་སྐྱོང་མཆོག་ནས་༸གོང་ས་རྒྱལ་བ་རིན་པོ་ཆེ་མཆོག་གི་རླབས་ཆེ་བའི་མཛད་འཕྲིན་སྐོར་དང་། ད་ལྟ་གཉན་འཕྲང་ཆེ་བའི་བོད་ཀྱི་གནས་སྟངས་དང་བོད་བརྒྱུད་ནང་བསྟན་བཅས་ཀྱི་སྐོར་ལ་བགྲོ་གླེང་གནང་ཡོད་འདུག་ལ། ཉིན་དེའི་རྒྱབ་ཏུ་སྲིད་སྐྱོང་མཆོག་གིས་བྷི་ར་ཛིལ་བོད་ཁང་གི་འགན་འཛིན་ལྷན་ཚོགས་དང་མཇལ་མོལ་གནང་ཞིང་། དེ་ནས་དེ་གའི་རྒྱ་གར་གྱི་མིག་(indian eye) ཞེས་པའི་གསར་ཁང་གི་བཅར་འདྲི་དང་ལེན་གནང་ཡོད་འདུག
ཕྱི་ཚེས་ ༡ ཉིན་གྱི་ཞོགས་པར་སྲིད་སྐྱོང་མཆོག་ལྷོ་ཨ་མེ་རི་ཁའི་བྷི་རཱ་ཛིལ་གྱི་རྒྱལ་ས་སཱོ་པུ་ལོའི་གནམ་ཐང་དུ་ཕེབས་འབྱོར་བྱུང་ཡོད་པ་དང་། སྐབས་དེར་ལྷོ་ཨ་མི་རི་ཀའི་སྐུ་ཚབ་དོན་གཅོད་འཇིགས་མེད་ཚེ་རིང་ལགས་དང་། བྷི་རཱ་ཛིལ་བོད་ཁང་གི་འགན་འཛིན་ལྷན་ཚོགས་ཀྱི་དབུ་འཛིན་བླ་མ་རིན་ཆེན་ལགས། བོད་དོན་རྒྱབ་སྐྱོར་བ་སཱིན་ཌ་རཱ་ཧྥར་ནཱན་ཌི་སི་ (Sandra Fernandes Erickson) ལགས། བྷི་རཱ་ཛིལ་བོད་ཁང་གི་ལས་བྱེད་ཌེ་ནིལ་སེར་མན་ཌོ་(Daniel Sermento) ལགས་བཅས་ནས་སྣེ་ལེན་ཞུས་ཡོད་འདུག ཡང་ཕྱི་ཟླ་ ༩ ཚེས་ ༣༠ ཉིན་སྲིད་སྐྱོང་མཆོག་གིས་ཡུ་རོབ་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་དང་མཇལ་འཕྲད་གནང་སྟེ། ཡུ་རོབ་ཀྱིས་རྒྱ་ནག་གཞུང་གི་སྲིད་ཇུས་འཛིན་སྟངས་ལ་གདོང་ལེན་བྱེད་ཕྱོགས་དང་། བོད་དོན་ཐོག་བཟང་ཕྱོགས་སུ་འགྱུར་བ་གཏོང་ཐབས་སྐོར་བགྲོ་གླེང་གནང་ཡོད་འདུག
གསར་འགོད་པ། བྱམས་པ་ཚེ་རིང་།
