བོད་མིའི་སྒྲིག་འཛུགས་ཕྱི་དྲིལ་ལྷན་ཁང་གི་དྲུང་ཆེ་ཀརྨ་ཆོས་དབྱིངས་ལགས་ཀྱིས་རྒྱ་གར་གྱི་ཉམས་ཞིབ་པ་དང་མཁས་དབང་དག་གིས་བོད་རིག་པའི་སྐོར་ལ་དོ་སྣང་བྱ་རྒྱུ་གལ་ཆེན་ཡིན་སྐོར་བརྗོད་སོང་།
དེ་རིང་སྔ་དྲོ་ཆུ་ཚོད་ ༡༠ སྟེང་སཱ་ར་བོད་ཀྱི་མཐོ་སློབ་ཏུ། བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག ཉིན་གཉིས་རིང་གི་སྐབས་ལྔ་བའི་རྒྱ་གར་ན་གཞོན་ཉམས་ཞིབ་པའི་ཚོགས་འདུ་དབུ་འཛུགས་ཞུས་སོང་བ་དང་། ཚོགས་འདུའི་སྟེང་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་དྲུང་ཆེ་ཀརྨ་ཆོས་དབྱིངས་ལགས་དང་སཱ་ར་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བསྟན་འཛིན་བདེ་གསལ་ལགས་ཀྱི་གཙོས་ཉམས་ཞིབ་པ་གཞན་ཁག་ཅིག དེ་བཞིན་རྒྱ་གར་དང་ཧི་མ་ལ་ཡའི་ས་གནས་འདྲ་མིན་ནས་ཕེབས་པའི་ཉམས་ཞིབ་པ་ཁྱོན་ ༡༥ མཉམ་ཞུགས་གནང་འདུག
སྐབས་དེར་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས། རྒྱ་གར་གྱི་ཉམས་ཞིབ་པ་དང་མཁས་དབང་དག་གིས་བོད་རིག་པའི་སྐོར་ལ་དོ་སྣང་བྱ་རྒྱུ་གལ་ཆེན་ཡིན་པ་དང་། དེ་ནི་རྒྱ་གར་ནང་བོད་མི་སྐྱབས་བཅོལ་བ་ཡོད་པ་ཙམ་གྱིས་མ་ཡིན་པར། འཕགས་བོད་གཉིས་བར་ལོ་ངོ་སྟོང་ཕྲག་གི་རིག་གཞུང་གི་འབྲེལ་ལམ་ཡོད་པས་ཡིན། དོན་དངོས་ཐོག་བོད་ཀྱི་ནང་པ་སངས་རྒྱས་པའི་ཆོས་དེ་དཔལ་ ནཱ་ལནྡཱའི་ཆོས་བརྒྱུད་ཡིན་པ་དང་ད་སྔ་བར་རྒྱུན་འཛིན་བྱས་ནས་ཡོང་བ་ཞིག་ཡིན་སྟབས། རྒྱ་གར་མཁས་པ་ཚོས་བོད་པའི་འཁྲིས་ནས་རྒྱ་གར་གྱི་གལ་ཆེན་རིག་གཞུང་འདི་ལ་སློབ་སྦྱོང་བྱ་རྒྱུ་གལ་ཆེན་ཆགས་བསྡད་ཡོད། ཁྱེད་ཀྱིས་མཁྱེན་གསལ་ཡོད་ཤག་རེད། ༧གོང་ས་རྒྱལ་བ་རིན་པོ་ཆེ་མཆོག་གིས་ག་དུས་ཡིན་ཡང་། འཕགས་བོད་གཉིས་ལ་དགེ་སློབ་ཀྱི་འབྲེལ་བ་ཡོད་པ་དང་། རྒྱ་གར་བ་ནི་དགེ་རྒན་དང་བོད་པ་ནི་ཡིད་ཆེས་བློ་འཁེལ་སློབ་མ་ཡིན་ཞེས་གསུངས་ཡོད་པ་རེད། ཅེས་དང་། རྒྱ་གར་ནང་བོད་དང་རྒྱ་ནག ཧི་མ་ལ་ཡའི་རི་རྒྱུད་ཐོག་ཆེད་མཁས་པ་མང་པོ་དགོས་གལ་ཆེ་ཞིང་། རྒྱུ་མཚན་ནི་རྒྱ་གར་གྱིས་རྒྱ་ནག་དང་ལྷན་དུ་གྲོས་མོལ་ནུས་པ་ལྡན་པ་ཞིག་བྱེད་པར་རྒྱ་ནག་གི་སྐོར་ཡག་པོ་ཤེས་རྟོགས་དགོས་རྒྱུ་གལ་ཆེན་ཡིན་པ་དང་། ཉམས་ཞིབ་པ་ཚོས་བོད་དང་ཧི་མ་ལ་ཡའི་རི་རྒྱུད་པའི་རིག་གཞུང་དང་ས་ཁམས་སྐོར་ལ་ཞིབ་འཇུག་བྱེད་གལ་ཆེ་སྐོར་གསུངས་འདུག
ད་ལན་གྱི་ཚོགས་འདུ་ཐེངས་ལྔ་བའི་སྟེང་། བོད་དང་བོད་པའི་ནང་ཆོས། ལོ་རྒྱུས། བོད་དང་ཧི་མ་ལ་ཡ། གནས་སྦོར་དང་སྐྱེ་དངོས་རིག་པ། དབྱིན་ཇི་བཙན་རྒྱལ་རིང་ལུགས། བོད་ཀྱི་ཁོར་ཡུག་དང་ཆབ་སྲིད་གནས་སྟངས། དཔལ་འབྱོར། བཙན་བྱོལ་བོད་མིའི་གཞིས་ཆགས་སོགས་བརྗོད་མི་འདྲ་བ་མང་པོས་ཐོག་བགྲོ་གླེང་གནང་གི་ཡོད་འདུག
གསར་འགོད་པ། སྐལ་བཟང་སྦྱིན་པ།
