སྤྱི་འཐུས་ཚོགས་གཙོ་མཆོག་ནས་ང་ཚོས་དམངས་གཙོའི་ཐག་གཅོད་གཞི་རྩར་འཛིན་དགོས་པ་གལ་ཆེན་པོ་ཡིན་སྐོར་གསུངས་སོང་།

བོད་ཀྱི་གཞོན་ནུ་ལྷན་ཚོགས་ཀྱི་བསྒྲགས་གཏམ་ནང་དུ་བོད་རང་དབང་རང་བཙན་གྱི་བདེན་མཐའ་མ་གསལ་བར་གཞོན་ལྷན་ནས་འཛམ་གླིང་རྒྱལ་སྤྱིའི་ཐོག་རྒྱ་གཞུང་ལ་ངོ་རྒོལ་མཐའ་གཅིག་ཏུ་བྱ་རྒྱུ་ཡིན་པ་མ་ཟད། བོད་དོན་འཐབ་རྩོད་ཀྱི་ལས་འགུལ་སྔར་ལས་ནུས་ཤུགས་ལྡན་པ་སྤེལ་རྒྱུ་ཡིན་པ་ནན་བརྗོད་བྱ་རྒྱུ་ཡིན་ཞེས་འཁོད་འདུག

དེ་རིང་སྔ་དྲོའི་ཆུ་ཚོད་ ༩།༤༥ ཐོག་དྷ་ས་བོད་ཀྱི་ཟློས་གར་ཁང་དུ། བོད་ཀྱི་གཞོན་ནུ་ལྷན་ཚོགས་དབུ་བརྙེས་ནས་ལོ་ངོ་ ༥༣ འཁོར་བའི་དུས་དྲན་སྲུང་གཙིའི་མཛད་སྒོ་འཚོགས་ཡོད་ཅིང་། ཚོགས་ཐོག་ཏུ་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་དབུས་བོད་མི་མང་སྤྱི་འཐུས་ཀྱི་རྒྱུན་ལས་རྣམ་པ་དང་ཕྱོགས་བཞུགས་སྤྱི་འཐུས། ཚོགས་པ་ཁག་གི་སྐུ་ཚབ། ས་གནས་མི་མང་བཅས་འཛོམས་འདུག་ལ། གཞས་སྣ་འཁྲབ་སྟོན་དང་ཐག་འཐེན་སོགས་ཀྱི་རྩེད་མོ་རྩེ་ཡི་འདུག

མཛད་སྒོའི་ཐོག་བོད་ཀྱི་གཞོན་ནུ་ལྷན་ཚོགས་ཀྱི་དབུས་ཚོགས་གཙོ་མགོན་པོ་དོན་གྲུབ་ལགས་ཀྱིས་དུས་དྲན་དང་འབྲེལ་བའི་གཏམ་བཤད་གནང་སྐབས། རྒྱ་དམར་སྲིད་གཞུང་གིས་བོད་ས་བཙན་འཕྲོག་བྱས་པ་ནས་བཟུང་མི་ལོ་དྲུག་ཅུ་ལྷག་རིང་དངོས་ཤུགས་བརྒྱུད་གསུམ་ནས་ཐབས་བརྒྱ་ཇུས་སྟོང་གིས་བོད་མིའི་ཆོས་དང་རིག་གཞུང༌། སྐད་དང་ཡི་གེ། ཡུལ་གོམས་གཤིས་ལུགས་སོགས་རྩ་མེད་བཏང་དང་གཏོང་མུས་ཡིན་པ་མ་ཟད། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་རྩིས་མེད་རྡོག་རོལ་གྱིས་ཚད་ལས་བརྒལ་བའི་དམ་དྲག་སྲིད་ཇུས་འོག་ཉེས་མེད་ཉེས་འདོགས་ཀྱིས་གང་བྱུང་འཛིན་བཟུང་བཙོན་འཇུག་སོགས་ཉིན་མཚན་ཀུན་དུ་དོ་དམ་སྟངས་འཛིན་འོག་སྡུག་སྦྱོང་མནར་གཅོད་མྱངས་དང་མྱོང་བཞིན་ཡོད། རྒྱ་གཞུང་གིས་དེང་རབས་འཕྲུལ་རིགས་བེད་སྤྱོད་ཀྱིས་ཁྲིམས་འགལ་ཐོག་བོད་མིའི་རིགས་རྫས་བཙན་གྱིས་བསྡུ་ལེན་བྱས་དང་བྱེད་མུས་ཡིན་པ་དང་། དེ་བཞིན་བོད་ཕྲུག་ས་ཡ་གཅིག་ལྷག་གཏན་འཇགས་སློབ་གྲྭར་བཙན་འཇུག་བྱས་ཏེ་བོད་རིགས་རྒྱ་རིགས་སུ་སྒྱུར་སླད་སྐད་ཡིག་སློབ་གསོའི་ཐོག་ནས་དམར་ཤོག་གི་ལྟ་བ་བཙན་ཁྲིད་བྱེད་བཞིན་ཡོད་པ་མ་ཟད། བོད་ཀྱི་ཐ་སྙད་མིང་དོན་དང་བཅས་པར་སྒྱུར་བཅོས་ཀྱིས་རྒྱལ་སྤྱིའི་ཐོག་ཡིག་ངག་གཉིས་ཐོག་ནས་བོད་དེ་རྒྱ་ནག་གི་ཆ་ཤས་ཡིན་པ་མཚོན་ཐབས་བྱེད་བཞིན་པ་བཅས་བོད་ནང་གི་ཛ་དྲག་གི་གནས་སྟངས་ཉིན་རེ་བཞིན་ཇི་སྡུག་ཇེ་ཞན་དུ་གྱུར་བཞིན་ཡོད་སྟབས། རྒྱལ་སྤྱིའི་ཐོག་གཞུང་དང་གཞུང་འབྲེལ་མ་ཡིན་པའི་ཚོགས་སྐྱིད་དང་སྤྱི་སྒེར། བོད་དོན་རྒྱབ་སྐྱོར་བ་ཚང་མས་གོ་སྐབས་དམ་འཛིན་གྱིས་ནུས་ཤུགས་གཅིག་སྒྲིལ་ཐོག་ལས་འགུལ་སྤེལ་མཁན་ཚང་མར་ཡི་རང་བསྔགས་བརྗོད་ཞུ་རྒྱུ་དང་། ལྷག་པར་དགྲ་བོ་རྒྱ་དམར་སྲིད་གཞུང་གི་གདུག་རྩུབ་ཆེ་བའི་བྱ་སྤྱོད་ངོས་འཛིན་གྱིས་རྒྱལ་སྤྱིའི་ཐོག་ལས་འགུལ་སྔར་ལྷག་མུ་མཐུད་སྤེལ་རྒྱུར་རེ་བ་དང་འབོད་སྐུལ་ཞུ་བཞིན་ཡོད། ཅེས་བརྗོད་སོང་།

ཡང་ཁོང་གིས། རྒྱ་གཞུང་གི་དམ་དྲག་སྲིད་ཇུས་འོག་སྡུག་སྦྱོང་མནར་གཅོད་མྱངས་དང་མྱོང་བཞིན་པའི་གཞིས་ལུས་རྒྱ་ཚེའི་མི་མང་འདས་གསོན་ཡོངས་ཀྱི་ལྷག་བསམ་དང་སྙིང་སྟོབས། བློས་གཏོང༌། ཁོང་རྣམས་ཀྱི་མངོན་འདོད། བོད་ནང་གི་ཆབ་སྲིད་ཀྱི་གནས་བབ་སོགས་ཡིད་ལ་དྲན་པའི་སྒོ་ནས་བྱེས་གྱར་བོད་མི་ཡོངས་ནས་རང་གི་དགྲ་བོ་ངོས་འཛིན་པའི་ཐོག་ནས་ཕྱི་ནང་གི་གནས་ཚུལ་ཆུང་ཙག་རིགས་ལ་མགོ་བོ་མ་འཁོར་བར་བོད་བསྟན་པ་ཆབ་སྲིད་ཆགས་འཇིག་དང་ཉག་ཕྲ་བའི་དུས་གནས་སུ་ལྷུངས་ཡོད་པར་དགོངས་བཞེས་ཀྱིས་བོད་མི་སྤྱི་བོ་གནམ་བསྟན་ཡོངས་ལ་འགན་འཁྲི་ཡོད་པ་དང་། ལྷག་པར་བཙན་བྱོལ་གྱི་རང་དབང་ལུང་པའི་ནང་ཡོད་པའི་བོད་རིགས་རྩམ་ཟན་པ་ཡོངས་ལ་དམིགས་བསལ་གྱིས་འགན་འཁྲི་ཡོད་པ་བཞིན་བོད་མི་ནང་ཁུལ་མཐུན་ལམ་དམ་ཚིག་རྡོག་རྩ་གཅིག་སྒྲིལ་གྱིས་བོད་དོན་འཐབ་རྩོད་ཐད་ལྟ་ཕྱོགས་ཇི་ལྟར་ཡིན་མིན་ལ་མ་ལྟོས་པར་ནུས་ཤུགས་གཅིག་ཏུ་སྤུངས་ཏེ་རང་གི་ངོ་བོ་སྲུང་སྐྱོབ་ཐོག་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་དང་སྟབས་བསྟུན་གོ་སྐབས་དམ་འཛིན་གྱིས་བོད་དོན་འཐབ་རྩོད་ཀྱི་ལས་འགུལ་སྔར་ལྷག་སྤེལ་རྒྱུར་རེ་བ་དང་འབོད་སྐུལ་ཞུ་བཞིན་ཡོད། ཅེས་བརྗོད་དེ། བོད་ཀྱི་གཞོན་ནུ་ལྷན་ཚོགས་ནས་འདི་ལོར་གཞི་རྒྱ་ཆེ་བའི་ལས་འགུལ་དུ་བོད་དོན་ཛ་དྲག་གླེང་སློང་གོམ་བགྲོད་ལས་འགུལ་དེ་རྒྱ་གར་ནུབ་བྱང་ནས་བྱང་ཤར་བར་ཟླ་བ་གཅིག་མ་ཟིན་ཙམ་རིང་གཞི་རྒྱ་ཆེ་བའི་གོམ་བགྲོད་བྱས་ཡོད་པ་དང༌། དེ་བཞིན་སྟོབས་ཆེན་རྒྱལ་ཁབ་ཉི་ཤུའི་ཚོགས་འདུ་དངོས་སུ་ཚོགས་སྐབས་རྒྱ་གར་རྒྱལ་ས་ལྡི་ལིར་གཟི་བརྗིད་དང་ཆེ་མཐོང་ལྡན་པའི་ལས་འགུལ་ཤུགས་ཆེན་སྤེལ་ཡོད་པ། གཞན་ཡང་། དུས་འཁོར་དབང་ཆེན་སོགས་ཀྱི་སྐབས་སུ་བཙན་བྱོལ་བོད་མིའི་སྤྱི་ཚོགས་ནང་ཞབས་ཕྱིའི་ལས་འགུལ་སྣ་མང་སྤེལ་ཡོད་པ་སོགས་བོད་ཀྱི་གཞོན་ནུ་ལྷན་ཚོགས་ནས་སྤྱི་སྨན་གྱི་ལས་དོན་མང་པོ་སྤེལ་དང་སྤེལ་མུས་ཡིན་པ་འགྲེལ་བརྗོད་གནང་སོང་།

སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། བོད་ཀྱི་གཞོན་ནུ་ལྷན་ཚོགས་དབུ་བརྙེས་ནས་ལོ་ངོ་ ༥༣ འགྲོ་བཞིན་ཡོད། སྤྱིར་ལོ་ངོ་ ༥༣ གྲངས་ཀ་ཉུང་ཉུང་ཞིག་ཆགས་སྲིད་ཀྱང་། མི་གཅིག་གི་མི་ཚེའི་བརྒྱུད་རིམ་ལ་མཚོན་ན་དུས་ཚོད་ཡག་ཤོས་རྫོགས་ཚར་རེད།  བོད་ཀྱི་གཞོན་ནུ་ལྷན་ཚོགས་ཀྱི་དབུས་དང་ས་གནས་རྒྱུན་ལས་ཁག་གིས་ཐོག་མར་ཚོགས་པ་བཙུགས་པ་བཞིན། ལས་དོན་བྱེད་ཕྱོགས་ལ་འགྱུར་བ་མེད་པར་ལྷག་བསམ་ཆེར་བསྐྱེད་ཀྱིས་ཞབས་ཕྱི་བསྒྲུབ་བཞིན་པ་ཡག་པོ་མཐོང་བཞིན་ཡོད་ལ། གོ་སྐབས་འདི་བརྒྱུད་ནས་བསྔགས་བརྗོད་ཞུ་རྒྱུ་ཡིན། དེང་གི་དུས་སུ་གཞུང་གི་ཆབ་སྲིད་ཀྱི་ལངས་ཕྱོགས་དང་སྒེར་གྱི་བསམ་ཚུལ་ཐོག་ནས་བསམ་ཚུལ་གཅིག་གྱུར་གྱི་གནས་བབ་ཅིག་ཧ་ཅང་ཁག་པོ་ཆགས་ཡོད། དམངས་གཙོའི་སྤྱི་ཚོགས་ལ་མཚོན་ན་དེ་བས་ཁག་པོ་ཆགས་ཡོད། བོད་པ་ཐོག་མར་རྒྱ་གར་ལ་སྐྱབས་བཅོལ་དུ་བསླེབས་པའི་སྐབས་དང་། ད་ལྟའི་གནས་སྟངས་ཐད་འགྱུར་བ་ཆེན་པོ་བྱུང་ཡོད་ཀྱང་། དེ་ནི་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེའི་བཀའ་དྲིན་དང་།བོད་མིའི་སྒྲིག་འཛུགས་ལ་བརྟེན་ནས་བྱུང་བ་གསལ་པོ་རེད། བོད་མི་ཞིག་ཡིན་ན་དུས་རྒྱུན་བཀའ་དྲིན་དེ་དག་དྲན་དགོས་པ་གལ་ཆེན་རེད། ང་ཚོ་བཙན་བྱོལ་དུ་འབྱོར་ཏེ་ལོ་ངོ་ ༦༣ ལྷག་འགྲོ་བཞིན་པ་རེད། བོད་ཀྱི་གཞོན་ནུ་ལྷན་ཚོགས་ནི་གཞུང་ཁུངས་མིན་པའི་ཚོགས་པ་ཆེ་ཤོས་ཤིག་དང་། ཚོགས་མི་མང་ཤོས། ས་གནས་ཁག་ཏུ་ཁྱབ་ཤོས་ཀྱི་སྒྲིག་འཛུགས་ཤིག་ཆགས་ཡོད་ལ། ལོ་ངོ་ ༥༣ རིང་མུ་མཐུད་རྒྱུན་གནས་ཆགས་པ་ཡག་པོ་རེད། ༧གོང་ས་རྒྱལ་བ་རིན་པོ་ཆེ་མཆོག་ནས་བླང་དོར་ལམ་སྟོན་གནང་བ་ལ་བརྟེན་ནས།  བཙན་བྱོལ་བོད་མིའི་སྒྲིག་འཛུགས་དམངས་གཙོ་ཡང་དག་པའི་ལམ་དུ་འགྲོ་ཐུབ་ཡོད། བར་སྐབས་ཤིག་ནས་ང་ཚོའི་སྤྱི་ཚོགས་སུ་ཕ་མས་ཕྲུ་གུ་སྐྱེད་སྲིང་བྱེད་པ་ནང་བཞིན་གྱི་གནས་སྟངས་ཤིག་ཆགས་བཞིན་ཡོད་ཀྱང་། སྤྱི་ཡོངས་ཀྱི་གནས་སྟངས་ལ་བལྟས་ཚེ་གནས་བབ་ཡག་པོ་ཆགས་བསྡད་འདུག ང་ཚོའི་ཆིག་སྒྲིལ་གཏོར་བཤིག་གཏོང་ཐུབ་པའི་གནས་སྟངས་ཤིག་ཆགས་མེད་པ་རེད།  ཡིན་ཡང་སེམས་འཁུར་བྱེད་དགོས་པ་གལ་ཆེན་པོ་ཆགས་ཡོད། ལོ་ངོ་ ༦༣ དེར་རྒྱ་ཆེ་ས་ནས་བསམ་བློ་བཏང་བ་ཡིན་ན་གྲངས་ཀ་ཉུང་ཉུང་ཡིན་ཡང་། ལོ་དེ་དག་གི་ནང་དུ་སྒྲིག་འཛུགས་དང་སློབ་གསོའི་ཐོག་ནས་རྒྱལ་སྤྱིའི་སྤྱི་ཚོགས་སུ་དོ་སྣང་བྱེད་སའི་གནས་བབ་བསྐྲུན་ཐུབ་ཡོད། ད་ལྟ་ང་ཚོས་དངོས་ཡོད་གནས་སྟངས་ལ་བསྟུན་ནས་འགྲོ་དགོས་པ་དང་། དེ་ཡང་ལོ་རྒྱུས་གནས་བབ་སླར་གསོ་བྱེད་དགོས་པ་དང་། དམངས་གཙོའི་ཐག་གཅོད་གཞི་རྩར་འཛིན་དགོས་པ་གལ་ཆེན་པོ་རེད། ཅེས་གསུངས་སོང་།

གསར་འགོད་པ། བྱམས་པ་ཚེ་རིང་།

རྩོམ་སྒྲིག་པ། པདྨ་མཚོ།