རྒྱ་ནག་གཞུང་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཁོངས་སུ་ཞུགས་པའི་འོས་བབ་མེད་པ་མ་ཟད། རྒྱ་ནག་གཞུང་གིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་སྒྲོམ་གཞི་གཏོར་སྐྱོན་གཏོང་བའི་ཉེན་ཁ་ཡོད་སྐོར་བརྗོད་འདུག
དེ་རིང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དང་། རྒྱལ་སྤྱིའི་བོད་དོན་ལས་འགུལ་ཁང་སོགས་བོད་དོན་དང་འབྲེལ་བའི་ཚོགས་སྡེ་ ༡༤༠ ལྷག་གིས། རྒྱ་ནག་གཞུང་བསྐྱར་དུ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཀྱི་ཁོངས་སུ་འོས་འདེམས་བྱུང་བར་སྐྱོན་བརྗོད་དང་སྦྲགས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ལ་གཉན་འཕྲང་གི་དཀའ་ངལ་འཕྲད་བཞིན་ཡོད་སྐོར་བསྒྲགས་འདུག
བོད་པའི་ཚོགས་སྡེ་ཁག་གིས། རྒྱ་ནག་ནི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་མཁན་ཞིག་ཡིན་པས། རྒྱལ་སྤྱིའི་འགྲོ་བ་མིའི་ཐོབ་ཐང་གི་ལྷན་ཚོགས་ཀྱི་ཁོངས་སུ་ཞུགས་པར་འོས་འཚམས་མེད་པ་དང་། ད་ལྟ་རྒྱ་ནག་བསྐྱར་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཁོངས་སུ་བདམས་པ་དེས་འཛམ་གླིང་ཁྱོན་ཡོངས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་དང་གོང་འཕེལ་ཡོང་བར་གནོད་སྐྱོན་བཟོ་རྒྱུ་ཡིན་པ་མ་ཟད། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ལའང་བརྡབ་གསིག་ཐེབས་ངེས་ཡིན་སྐོར་སོགས་བརྗོད་འདུག
ཡང་དེ་འབྲེལ་ཐད་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་བསྟན་འཛིན་ཟླ་བ་ལགས་ཀྱིས། སྲིད་དབང་སྒེར་གཅོད་རིང་ལུགས་ཀྱི་རྒྱ་ནག་དམར་ཤོག་ཚོགས་པས། རྒྱལ་སྤྱིའི་འགྲོ་བ་མིའི་ཐོབ་ཐང་གི་གནས་བབ་ཇེ་ཞན་དུ་གཏོང་ཐབས་སུ་དུས་ནས་དུས་སུ་སྒྲིག་བཀོད་ལྡན་པའི་འཆར་གཞི་ལག་བསྟར་གྱིས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་སྒྲོམ་གཞིར་དབང་སྒྱུར་དང་འགོག་རྐྱེན་བསྐྲུན་པ། སྒེར་སྤྱོད་སོགས་བྱས་དང་བྱེད་མུས་ཡིན་པ་རྒྱལ་སྤྱིའི་ཚོགས་སྡེ་ཁག་གིས་ཤེས་རྟོགས་ཐུབ་ཡོད། ཅེས་བརྗོད་འདུག
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། ད་ལྟའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མི་འདེམས་སྒྲུག་བྱེད་ཕྱོགས་ཀྱི་སྲིད་ཇུས་ལ་འགྱུར་བ་ཤུགས་གཏོང་དགོས་པ་དང་། ས་ཁུལ་རིམ་པ་མཚོན་པའི་ཚོགས་མི་འདེམས་རྒྱུ་གལ་ཆེན་ཡིན་ཡང་།འགྲོ་བ་མིའི་ཐོབ་ཐང་གི་རིན་ཐང་ཁག་བློས་གཏོང་བྱས་ཏེ་འགྲོ་བ་མིའི་ཐོབ་ཐང་གི་ཚོགས་མི་བདམས་པ་ནི་རྒྱབ་འགལ་ཆགས་ཡོད། ལྷན་ཚོགས་ཀྱི་ཚོགས་མི་རྒྱལ་ཁབ་དག་འགྲོ་བ་མིའི་ཐོབ་ཐང་སྲུང་སྐྱོབ་བྱེད་མཁན་ཡིན་དགོས་པ་ལས། རྒྱ་ནག་ལྟ་བུ་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་ལྷན་ཚོགས་ཀྱི་ཁོངས་སུ་ཞུགས་མི་ཆོག་པ་བཟོ་དགོས་སྐོར་སོགས་བརྗོད་འདུག
རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སྐབས་ ༥༤ པའི་སྟེང་། ཨེ་ཤ་ཡ་དང་ཞི་བདེ་རྒྱ་མཚོའི་ཁུལ་ནས་ཨིན་ཌོ་ནེ་ཞི་ཡར་(Indonesia)འོས་གྲངས་ ༡༨༦ དང་གོ་ཝེཊ་(Kuwait)ལ་འོས་ ༡༨༣ ། དེ་བཞིན་ཉི་ཧོང་ལ་འོས་ ༡༧༥ ། རྒྱ་ནག་ལ་འོས་གྲངས་ ༡༥༤ བཅས་ཐོབ་སྟེ། རྒྱ་ནག་སླར་ཡང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མིར་འོས་འདེམས་བྱུང་ཡོད་པ་དང་། ད་རེས་ནི་རྒྱ་ནག་གཞུང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མིར་གྱུར་བ་ཐེངས་ ༦ ཆགས་ཡོད་འདུག་ལ། ཕྱི་ལོ་ ༢༠༢༠ ལོའི་འོས་གྲངས་དང་བསྡུར་ཚེ་རྒྱ་ནག་ལ་ཐོབ་པའི་འོས་གྲངས་ཇེ་མང་དུ་ཕྱིན་ཡོད་འདུག
གསར་འགོད་པ། སྐལ་བཟང་སྦྱིན་པ།
