ཨ་རིའི་གྲོས་ཚོགས་འཐུས་མི་ཇེམ་མེག་གྷོ་ཝན་མཆོག་གིས་རྒྱ་ནག་གཞུང་གི་དཔོན་རིགས་ཚོས། ༧གོང་ས་རྒྱལ་བ་རིན་པོ་ཆེ་མཆོག་ནི་ཞི་བདེ་དང་ཞི་འགྲིག་གནང་མཁན་ཞིག་ཡིན་པ་ཤེས་པའི་ཐོག་ནས་བོད་རྒྱ་གྲོས་མོལ་བསྐྱར་གསོ་བྱས་ཏེ་དཀའ་རྙོག་སེལ་བའི་རེ་བ་ཡོད་སྐོར་གསུངས་སོང་།
ཁ་སང་ཕྱི་ཚེས་ ༡༧ ཉིན་ཨ་རིའི་རྒྱལ་ས་ཝང་ཤིན་ཊོན་གྱི་གྲོས་ཚོགས་ཚོགས་ཁང་ཞིག་ཏུ། བྱང་ཨ་རིའི་བོད་ཀྱི་སྐུལ་ཚབ་དོན་གཅོད་ལས་ཁུངས་དང་རྒྱལ་སྤྱིའི་བོད་དོན་ལས་འགུལ་ཁང་། རྒྱལ་སའི་མངའ་ཁུལ་གྱི་ས་གནས་བོད་རིགས་ཚོགས་པ་བཅས་ཀྱི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་རྟགས་མ་འབུལ་བཞེས་མཛད་ནས་ལོ་ངོ་ཧྲིལ་པོ་ ༡༦ འཁོར་བའི་མཛད་སྒོ་ཞིག་ཚོགས་ཡོད་ཅིང་། ཚོགས་ཐོག་ཏུ་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་བ་ལྕམ་ནན་སི་པོལ་སི་མཆོག་དང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག ཨ་རིའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern)མཆོག་དང་སྤྱི་མཐུན་ཚོགས་པའི་གྲོས་ཚོགས་འཐུས་མི་སྐུ་ཞབས་ཁུ་རེ་སི་སི་མེ་ཐི་ (Chris Smith) མཆོག གྲོས་ཚོགས་འཐུས་ལྕམ་མག་གོལ་ལིམ་ (McCollum)མཆོག གྲོས་ཚོགས་འཐུས་མི་ལྕམ་ཆ་ཀོ་ཝོ་སི་ཀེ་ (Schakowsky)མཆོག་བཅས་དང་། གཞན་ཡང་ཨ་རིའི་བོད་དོན་རྒྱབ་སྐྱོར་གནང་མཁན་གྱི་གནད་ཡོད་མི་སྣ་གཞན་ཁག་དང་། རྒྱལ་སྤྱིའི་བོད་དོན་ལས་འགུལ་ཁང་གི་ངེས་སྟོན་པ་རེས་ཆ་ཌི་གྷེ་རེ་ (Richard Gere) མཆོག་དང་འགན་འཛིན་བསྟན་ཆོས་རྒྱ་མཚོ་མཆོག་སོགས་འཛོམས་ཡོད་འདུག
སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས། ༧གོང་ས་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་ཕུལ་བའི་གྲོས་ཆོད་ལ་རྒྱབ་སྐྱོར་གནང་མཁན་ཡོངས་ལ་ཐུགས་རྗེ་ཆེ་ཞུས་པ་དང་སྦྲགས། ༧གོང་ས་མཆོག་ལ་སྙན་གྲགས་ཆེ་བའི་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་འབུལ་བཞེས་མཛད་པ་དེ་ནི་༸གོང་མཆོག་སྐུ་སྒེར་གྱི་མཛད་རྗེས་ལ་ཆེ་བསྟོད་ཞུས་པ་ཙམ་མ་ཡིན་པར། འདས་པའི་ལོ་ངོ་ ༦༤ ཙམ་གྱི་རིང་རྒྱ་ནག་གི་གདུག་རྩུབ་འོག་མནར་གཅོད་མྱོང་བཞིན་པའི་གཞིས་ལུས་བོད་མི་ཚོའི་སྙིང་སྟོབས་དང་ལྷག་བསམ་རྒྱུན་གནས་ཐུབ་པ་དང་བཙན་བྱོལ་བོད་མི་ཚོས་བོད་དོན་འཐབ་རྩོད་མུ་མཐུད་རྩོད་ཀྱིན་ཡོད་པར་ངོས་འཛིན་མཚོན་བྱེད་ཅིག་ཀྱང་ཆགས་ཡོད་སྐོར་དང་། ད་རེས་སྲིད་སྐྱོང་མཆོག་ལྷོ་ཨ་མི་རི་ཁའི་རྒྱལ་ཁབ་ཁག་ཏུ་གཞུང་འབྲེལ་འཚམས་འདྲི་གནང་བའི་བརྒྱུད་རིམ་ངོ་སྤྲོད་དང་འབྲེལ། ༧གོང་ས་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་འབུལ་བཞེས་མཛད་པའི་བརྒྱུད་རིམ་ལ་རྒྱབ་སྐྱོར་གནང་མཁན་ཡོངས་ལ་ཐུགས་རྗེ་ཆེ་ཞུས་པ་མ་ཟད། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་ཀྱི་འཕྲོད་བཞེད་སྔར་རྒྱུན་བཞིན་བདེ་འཚམས་ཡིན་སྐོར་སོགས་གསུངས་སོང་།
ལྕམ་ནན་སི་པོལ་སི་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་གི་དགོངས་པ་ལ་བརྟེན་ནས། ཨ་རིའི་གྲོས་ཚོགས་གོང་འོག་གཉིས་འབབ་ས་གཅིག་གི་ཐོག་བབས་ཏེ། བོད་དོན་ལ་རྒྱབ་སྐྱོར་གནང་གི་ཡོད་སྟབས། ཨ་རིའི་གྲོས་ཚོགས་གོང་འོག་གཉིས་ནས་གང་ཡོང་ཅི་ཡོང་གིས་བོད་དོན་ལ་རྒྱབ་སྐྱོར་གནང་རྒྱུ་དང་། མི་འགྱང་བར་༧གོང་ས་མཆོག་དགུང་གྲངས་ ༩༠ ཕེབས་པའི་༧སྐུའི་འཁྲུངས་སྐར་གྱི་དུས་ཆེན་སྲུང་གཙི་ཞུ་རྒྱུ་ཡིན་སྟབས། ༧གོང་ས་མཆོག་གི་གོ་སྟོན་དེ་ཟབ་རྒྱས་ཤིག་གནང་དགོས་པའི་ཐུགས་རེ་ཡོད་སྐོར་གསུངས་སོང་།
སྤྱི་མཐུན་ཚོགས་པའི་གྲོས་ཚོགས་འཐུས་མི་སྐུ་ཞབས་ཁུ་རེ་སི་སི་མེ་ཐི་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་དགོངས་འོག་ནས། དམངས་གཙོ་ཚོགས་པ་དང་སྤྱི་མཐུན་ཚོགས་པ་གཉིས་གཅིག་ཏུ་སྒྲིལ་ཏེ། བོད་དོན་ལ་རྒྱབ་སྐྱོར་གནང་གི་ཡོད་པ་དང་དམིགས་བསལ་རྒྱ་ནག་དང་འབྲེལ་བའི་ལས་དོན་བསྒྲུབས་དང་སྒྲུབ་མུས་ཡིན་ཞིང་། བོད་དོན་རྒྱབ་སྐྱོར་བ་སྐུ་ཞབས་རེ་ཆ་ཌི་གྷེ་རེ་ལགས་ཀྱིས་ཨ་རིའི་གྲོས་ཚོགས་ནང་བོད་དོན་ཉན་ཞིབ་རིམ་པ་བྱས་པའི་བརྒྱུད་ངོ་སྤྲོད་དང་སྦྲགས། འདས་པའི་ལོ་ངོ་དྲུག་ཅུ་ལྷག་གི་རིང་བོད་ནང་གི་གནས་སྟངས་མང་པོ་ཞིག་སེམས་སྐྱོ་དགོས་པ་ཞིག་ཆགས་ཡོད་པ་དང་། རྒྱ་ནག་གཞུང་གིས་བོད་རིགས་སློབ་མ་ཚོ་རྒྱ་གཞུང་གི་བཅའ་སྡོད་སློབ་གྲྭར་བཙན་གྱིས་བཅུག་སྟེ་རྒྱ་སྒྱུར་གྱི་སྲིད་ཇུས་ལག་བསྟར་བྱེད་བཞིན་ཡོད་པ་དང་། ཕྱི་ལོ་ ༡༩༩༥ ལོར་༧ཀུན་གཟིགས་པཎ་ཆེན་རིན་པོ་ཆེ་མཆོག་དགུང་གྲངས་ ༦ གི་སྟེང་འཛིན་བཟུང་བཙན་ཁྲིད་བྱས་ཏེ་ཆོས་ཕྱོགས་ཀྱི་བྱེད་སྒོ་ཡོངས་ལ་སྟངས་འཛིན་བྱས་དང་བྱེད་མུས་ཡིན་ཁར། ༧གོང་ས་མཆོག་གི་ཡང་སྲིད་ཐད་ཐེ་གཏོགས་བྱེད་བཞིན་ཡོད་པས། ༧གོང་ས་མཆོག་གི་ཡང་སྲིད་ཀྱི་གནད་དོན་ནི་བོད་མི་ཁོ་ནར་བདག་པ་ལས་རྒྱ་ནག་གཞུང་ལ་བདག་དབང་གང་ཡང་མེད་སྐོར་དང་། རྒྱ་ནག་གཞུང་གིས་སྲིད་དབང་ལོག་སྤྱོད་བྱས་ཏེ་བོད་མི་མང་པོ་གང་བྱུང་འཛིན་བཟུང་བཀག་ཉར་དང་བཙོན་འཇུག་བྱེད་བཞིན་ཡོད་སྟབས། ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གིས་རྒྱ་ནག་གི་འབྲེལ་ཡོད་དཔོན་རིགས་ཚོར་འགན་ལེན་བྱེད་དུ་འཇུག་དགོས་སྐོར་གསུངས་སོང་།
མང་གཙོ་ཚོགས་པའི་ཨ་རིའི་གྲོས་ཚོགས་འཐུས་མི་སྐུ་ཞབས་ཇིམ་མག་གྷོ་ཝན་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་ཕུལ་བ་དེ་ནི་ཨ་རིའི་སྤྱི་དམངས་གཟེངས་རྟགས་ཆེས་མཐོ་ཤོས་དེ་ཡིན་པ་དང་། དེ་བཞིན། ༧གོང་ས་མཆོག་ལ་ཞི་བདེ་དང་བཟོད་པ། སྤྱི་སེམས་དང་དམངས་སེམས་མཚོན་པའི་ཨ་རིའི་སྲིད་འཛིན་ཟུར་བ་བྷོ་ཤིའི་གཟེངས་རྟགས་ཕུལ་ཡོད་སྐོར་དང་། དེང་གི་དུས་སུ་སྐབས་༧གོང་ས་མཆོག་གི་བྱམས་བརྩེ་དང་ཞི་བདེའི་སྙིང་བོར་བཟུང་བའི་རླབས་ཆེན་གྱི་དགོངས་གཞི་ཁག་ཧ་ཅང་གལ་ཆེན་ཆགས་ཡོད་པ་དང་། ༧གོང་ས་མཆོག་ནི་ཞི་བདེ་འདོད་ཅིང་དམག་འཁྲུག་མི་འདོད་པའི་འཛམ་གླིང་གི་དབུ་འཁྲིད་ཞིག་ཡིན་སྐོར། དེ་བཞིན། དུས་དྲན་དེ་སྲུང་གཙི་བྱས་པ་དང་བསྟུན། ནམ་ཞིག་རྒྱ་ནག་གཞུང་གི་དཔོན་རིགས་ཚོས། ༧གོང་ས་རྒྱལ་བ་རིན་པོ་ཆེ་མཆོག་ནི་ཞི་བདེ་དང་ཞི་འགྲིག་གནང་མཁན་ཞིག་ཡིན་པ་ཤེས་པའི་ཐོག་ནས་བོད་རྒྱ་གྲོས་མོལ་བསྐྱར་གསོ་བྱས་ཏེ་བོད་རྒྱའི་དཀའ་རྙོག་སེལ་བའི་རེ་བ་ཡོད་སྐོར་གསུངས་སོང་།
གསར་འགོད་པ། སྐལ་བཟང་སྦྱིན་པ།
