༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་ཞབས་མེག་ཇོན་སོན་(Mike Johnson) མཆོག་ཨ་རིའི་གྲོས་ཚོགས་འོག་མའི་ཚོགས་གཙོར་འདེམས་ཐོན་བྱུང་བར་འཚམས་འདྲིའི་གསུང་འཕྲིན་བསྩལ་གནང་འདུག
༧གོང་ས་རྒྱལ་བ་རིན་པོ་ཆེ་མཆོག་དང་ཨ་རིའི་གྲོས་ཚོགས་འོག་མའི་ཚོགས་གཙོ་མེག་ཇོན་སོན་མཆོག དུས་བབ་ཀྱིས་སྒྲིག་བཟོ་བྱས།
ཁ་སང་ཕྱི་ཚེས་༢༦ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་ཞབས་མེག་ཇོན་སོན་(Mike Johnson) མཆོག་གི་མཚན་ཐོག་ཏུ། ཁོང་ཉིད་ཨ་རིའི་གྲོས་ཚོགས་འོག་མའི་ཚོགས་གཙོར་འདེམས་ཐོན་བྱུང་བར་འཚམས་འདྲིའི་གསུང་འཕྲིན་ཞིག་བསྩལ་ཏེ། འཛམ་གླིང་གི་ཆེས་རང་དབང་ལྡན་པའི་ཨ་རི་རྒྱལ་ཁབ་ཀྱིས་མུ་མཐུད་རང་དབང་། དམངས་གཙོ་སོགས་གོང་མཐོར་བཏང་སྟེ། འགྲོ་བ་མིའི་རིགས་ཀྱི་འཚོ་གནས་ལ་ཞབས་འདེགས་བསྒྲུབ་དགོས་པའི་ལམ་སྟོན་མཛད་འདུག
དེ་ཡང་གསུང་འཕྲིན་ནང་། ཨ་རི་ནི་འཛམ་གླིང་གི་སྣེ་འཁྲིད་རྒྱལ་ཁབ་ཅིག་ཡིན་ལ། ངོས་རང་གིས་ཁྱེད་ཀྱི་རྒྱལ་ཁབ་ཀྱིས་ཆོས་དད་རང་དབང་ཚུད་པའི་དམངས་གཙོ་དང་། རང་དབང་། དེ་བཞིན་འགྲོ་བ་མིའི་ཐོབ་ཐང་ལ་ཆེ་མཐོང་གནང་བར་ཡིད་སྨོན་སྐྱེ་ཡི་ཡོད། ཕྱི་ལོ་ ༡༩༧༩ ཙམ་ནས་ངོས་རང་ཨ་རིར་ལན་མང་བསྐྱོད་རྒྱུའི་གོ་སྐབས་བྱུང་ལ། ཨ་རིའི་གྲོས་ཚོགས་ཀྱི་ཚོགས་གཙོ་ཟུར་པ་རྣམས་ཚུད་པའི་མི་མང་ལ་མགོ་ཁྲིད་ཀྱི་ནུས་པ་སྐྱེད་སྲིང་གི་ཐད་ནས་གོ་བསྡུར་ཡང་བྱས་མྱོང་། ལྷག་པར་དུ་ངོས་རང་གིས་ཨ་རིའི་གཞུང་ནས་བོད་ཀྱི་རིག་གཞུང་དང་། སྐད་ཡིག གོམས་གཤིས་སྲུང་སྐྱོབ་སོགས་ཀྱི་ཐད་ལ་རོགས་འདེགས་གནང་བར་བསྔགས་བརྗོད་བྱ་རྒྱུའི་གོ་སྐབས་བྱུང་། ཞེས་གསུངས་འདུག
ཨ་རིས་བོད་དོན་རྒྱབ་སྐྱོར་གནང་བའི་སྐོར་གསུངས་བའི་ནང་། ཨ་རིའི་གཞུང་གིས་ངོས་དང་བོད་མིར་ཞི་བདེ་དང་། འཚེ་མེད་ཞི་བ། བྱམས་བརྩེ་སོགས་ཀྱི་གཞི་རྟེན་བྱས་པའི་བོད་བརྒྱུད་ནང་བསྟན་ཚུད་པའི་བོད་མིའི་ངོ་བོ་སྲུང་སྐྱོབ་བྱེད་པར་རྒྱབ་སྐྱོར་མུ་མཐུད་ནས་གནང་བར་བཀའ་དྲིན་ཆེན་པོ་ཡིན་ལ། ངོས་རང་གིས་ཀྱང་བོད་ཀྱི་ཆོས་རིག་དེ་འགྲོ་བ་མིའི་རིགས་ལ་ཕན་ཐོགས་ཡོང་ཐུབ་པའི་རེ་བ་འཆང་གི་ཡོད། ཅེས་དང་། དེང་གི་འཛམ་གླིང་དེ་ཧ་ཅང་གཉན་ཕྲང་ཆེ་བའི་ལམ་བུ་རུ་སྐྱོད་མུས་ཡིན་ཡང་། འཛམ་གླིང་འདིར་རང་དབང་དང་། གཅིག་གྱུར་གྱི་འདུ་ཤེས་གོང་འཕེལ་དུ་འགྲོ་མུས་ཡིན་པས། ངོས་རང་གིས་མ་འོངས་པར་འགྱུར་བ་བཟང་ཕྱོགས་ནས་ཐེབས་པའི་རེ་བ་བྱེད་ཀྱི་ཡོད། ཅེས་གསུངས་འདུག
གཞན་ཡང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་འཚམས་འདྲིའི་གསུང་འཕྲིན་ཞིག་ཕུལ་བའི་ནང་། ཨ་རི་ནི་བོད་དང་། བོད་མིའི་རིག་གཞུང་དང་ངོ་བོ་སྲུང་སྐྱོབ་བྱེད་པར་རོགས་འདེགས་གནང་མཁན་གྱི་རྒྱལ་ཁབ་ཐོག་མ་དེ་ཡིན་ཞིང་། ངས་ཨ་རིའི་གཞུང་མང་གཉིས་ཀྱིས་གཡོ་བ་མེད་པའི་ཐོག་ནས་བོད་མི་དང་བོད་ཀྱི་འཚེ་མེད་ཞི་བའི་འཐབ་རྩོད་ལ་རོགས་འདེགས་གནང་བར་བསྔགས་བརྗོད་བྱེད་ཀྱི་ཡོད། ཁྱེད་ཀྱིས་ཀྱང་བོད་ཀྱི་བདེན་མཐའ་མ་གསལ་བར་དུ་མུ་མཐུད་རྒྱབ་སྐྱོར་གནང་བའི་རེ་བ་བྱེད་ཀྱི་ཡོད། ཅེས་གསུངས་འདུག
སྐུ་ཞབས་མེག་ཇོན་སོན་མཆོག་ནི་ཕྱི་ལོ་ ༡༩༧༢ ཟླ་ ༡ ཚེས་ ༣༠ ཉིན་ཨ་རིའི་ཤི་རིས་ཝི་པོ་ཊི་(Shreveport) རུ་སྐྱེས་ཤིང་། ཕྱི་ལོ་ ༡༩༩༥ ལོར་ཚོང་འབྲེལ་རིག་པ་(Business administration)པའི་ཐོག་གཙུག་ལག་རབ་འབྱམས་པའི་བསླབ་པ་མཐར་སོན། ཕྱི་ལོ་ ༡༩༩༨ ལོར་ཧེ་བྷིར་ཊི་ཁྲིམས་ལུགས་གཙུག་ལག་སློབ་གཉེར་ཁང་(Paul M. Hebert Law Center) ནས་ཁྲིམས་ལུགས་རིག་པའི་ཐོག་སློབ་གཉེར་གནང་། ཁོང་ནི་ཨ་རིའི་དམངས་གཙོ་ཚོགས་པའི་འཐུས་མི་དང་། ད་བར་ཨ་རིའི་གྲོས་ཚོགས་ཀྱི་འཐུས་མི་ཐེངས་བཞི་ལ་གནང་བ་དང་། ཟླ་འདིའི་ཕྱི་ཚེས་ ༢༥ ཉིན་མང་མོས་ཀྱིས་ཨ་རིའི་གྲོས་ཚོགས་འོག་མའི་ཚོགས་གཙོ་སྐབས་ ༥༦ པར་བདམས་ཡོད་པ་རེད།
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
