མགོན་པོ་སྐྱིད་ཀྱི་བཟའ་ཟླ་ཆོས་སྐྱོང་ལགས་སུ་རྒྱ་གཞུང་ཉེན་རྟོག་པས་ཉིན་ལྔའི་རིང་ཁ་ཏ་སློབ་གསོ་ཟེར་བ་བྱས་ཏེ་ཟླ་འདིའི་ཕྱི་ཚེས་ ༡༨ ཉིན་ཀློད་གྲོལ་བཏང་ཡོད་འདུག
འདི་གའི་གསར་འགོད་པར་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༡༨ ཉིན་གྱི་སྔ་དྲོར་ལྷ་ས་གྲོང་ཁྱེར་ཉེན་རྟོག་པས་བདེན་པའི་འཐབ་རྩོད་པ་མགོན་པོ་སྐྱིད་ཀྱི་བཟའ་ཟླ་ཆོས་སྐྱོང་ལགས་ཀློད་གྲོལ་བཏང་ཡོད་ཀྱང་། ད་ལྟ་ད་དུང་མགོན་པོ་སྐྱིད་ལགས་གང་དུ་འཛིན་བཟུང་བཀག་ཉར་བྱས་ཡོད་པ་དང་ཀློད་གྲོལ་གཏོང་མིན་སོགས་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།
གནས་ཚུལ་མཁོ་སྤྲོད་པས། ད་རེས་རྒྱ་གཞུང་ཉེན་རྟོག་པས་ཆོས་སྐྱོང་ལགས་ཉིན་གྲངས་ལྔའི་རིང་བཀག་ཉར་བྱས་ཏེ་མ་འོངས་པར་ཞུ་གཏུགས་ལས་འགུལ་རིགས་མི་སྤེལ་བ་སོགས་ཀྱི་ཁ་ཏ་སློབ་གསོ་བརྒྱབ་འདུག ཅེས་བརྗོད་བྱུང་།
ཟླ་འདིའི་ཕྱི་ཚེས་ ༡༣ ཉིན་མགོན་པོ་སྐྱིད་ལགས་དང་ཆོས་སྐྱོང་གཉིས་ཀྱིས་ཞི་འབོད་ལས་འགུལ་སྤེལ་བཞིན་པའི་སྐབས་ཉེན་རྟོག་པ་སྐོར་ཞིག་ཡོང་ནས། ཁོང་གཉིས་འཛིན་བཟུང་བཙན་ཁྲིད་བྱས་ཡོད་པ་དང་། དེ་སྔ་མགོན་པོ་སྐྱིད་ལགས་གཅིག་པུ་རྒྱ་གཞུང་ཉེན་རྟོག་པས་འཛིན་བཟུང་བཙན་ཁྲིད་བྱས་རྗེས་ཀློད་གྲོལ་བཏང་ཡོད་ཀྱང་། སྐབས་དེར་བཟའ་ཟླ་ཆོས་སྐྱོང་ལགས་ཀྱང་འཛིན་བཟུང་བྱས་ཡོད་པ་མ་ཟད། ཁོང་གཉིས་འཛིན་བཟུང་བྱས་རྗེས་གང་དུ་བཀག་ཉར་བྱས་ཡོད་མེད་སོགས་ཀྱི་གནས་ཚུལ་གང་ཡང་ཤེས་རྟོགས་ཐུབ་མེད་པ་རེད།
ད་རེས་རྒྱ་གཞུང་ཉེན་རྟོག་པས་ཆོས་སྐྱོང་ལགས་འཛིན་བཟུང་བྱས་ཏེ་ལུས་སེམས་གཉིས་ལ་དཀའ་ངལ་དང་སྡུག་སྦྱོང་མནར་གཅོད་ག་འདྲ་བཏང་ཡོད་མེད་ཤེས་རྟོགས་ཐུབ་ཀྱི་མེད་ཀྱང་། རྒྱ་གཞུང་ཉེན་རྟོག་པས་བོད་མི་རྣམས་གང་བྱུང་འཛིན་བཟུང་བཀག་ཉར་བྱས་ཏེ་མི་ཆོས་ལས་འདས་པའི་མནར་གཅོད་གཏོང་གི་ཡོད་པ་ནི་རྒྱུན་ལྡན་ཞིག་ཡིན་པ་མ་ཟད། དེ་སྔ་རྒྱ་གཞུང་གིས་འཛིན་བཟུང་དང་བཙོན་འཇུག་བྱས་པའི་བོད་མི་ཆབ་སྲིད་བཙོན་པ་ཟུར་བ་ཡོངས་ཀྱིས་ཁ་གཅིག་གྲགས་ཐོག་ནས་རྒྱའི་བཙོན་ཁང་དུ་དམྱལ་བ་མི་ཡུལ་དུ་ལྷུང་བ་ལྟ་བུའི་མནར་གཅོད་བཏང་བའི་བརྒྱུད་རིམ་ཉན་བཟོད་དཀའ་བ་བཤད་རྒྱུ་ཡོད་པ་རེད།
ཨ་ཅག་མགོན་པོ་སྐྱིད་ལགས་ཀྱིས་ཕྱི་ལོ་ ༢༠༢༢ ཙམ་ནས་བཟུང་ཁོང་མོའི་གཅུང་པོ་བོད་ཀྱི་ཚོང་པ་རྡོ་རྗེ་བཀྲ་ཤིས་ལགས་ཀྱི་ཁྲིམས་ཆད་དྲང་བདེན་བྱུང་མེད་པ་དང་། རྡོ་རྗེ་བཀྲ་ཤིས་ཀློད་གྲོལ་གཏོང་དགོས་པ། ཁོང་མོ་གཅུང་པོ་ལ་ཐུག་ཏུ་འཇུག་དགོས་པའི་རེ་འདུན་སོགས་བཏོན་ཏེ། ལྷ་ས་འབྲིང་རིམ་མི་དམངས་ཁྲིམས་ཁང་དང་གྲྭ་བཞི་བཙོན་ཁང་སོགས་ཀྱི་མདུན་དུ་ཕྱག་འཚལ་བ་དང་སྐད་འབོད་རྒྱག་པ་སོགས་ཀྱི་ཞུ་འབོད་ལས་འགུལ་མཚམས་མ་བཞག་པར་ད་བར་སྤེལ་ཡོད་ལ། ཁོང་མོས་ཞི་འབོད་ལས་འགུལ་སྤེལ་བའི་བརྒྱུད་རིམ་ཁྲོད། རྒྱ་གཞུང་ཉེན་རྟོག་པས་མགོན་པོ་སྐྱིད་ལགས་གཙོ་བྱས་པའི་བཟའ་ཟླ་ཆོས་སྐྱོང་ལགས་དང་གཅེན་པོ་རྡོ་རྗེ་ཚེ་བརྟན་བཅས་ལ་ལས་འགུལ་སྤེལ་ཡུལ་ནས་སྔ་གཞུག་ཏུ་གང་བྱུང་འཛིན་བཟུང་བཙན་ཁྲིད་བྱས་པ་དང་རུབ་རྡུང་བཏང་བ། སྡིགས་ར་སྐུལ་བ་སོགས་དྲང་བདེན་མིན་པ་དང་མནར་གཅོད་བཏང་བའི་བརྒྱུད་རིམ་མང་པོ་བྱུང་མྱོང་བ་རེད།
བོད་ཀྱི་ཚོང་པ་རྡོ་རྗེ་བཀྲ་ཤིས་ལགས་ལ་ཕྱི་ལོ་ ༢༠༡༠ ལོར་གསང་བའི་ཐོག་ནས་ཚེ་བཙོན་གྱི་ཁྲིམས་ཐག་བཅད་ཡོད་པ་དང་། ཕྱི་ལོ་ ༢༠༢༠ ལོ་སྟེ་ཁོང་བཙོན་འཇུག་བྱས་ཏེ་ལོ་ ༡༠ ཕྱིན་པའི་སྐབས་དེར་ཁོང་གི་ཁྲིམས་རྩོད་པ་དང་ནང་མི་ཚོས་ཐེངས་མང་དྲང་བདེན་མིན་པའི་ཁྲིམས་ཆད་དེར་བསྐྱར་ཞིབ་དགོས་པའི་རེ་བ་བཏོན་ཡོད་ཀྱང་དོན་འབྲས་ཐོན་མེད་པར་བརྟེན། འདས་ལོའི་ཕྱི་ཟླ་ ༡༠ ཙམ་ནས་བཟུང་ཁོང་གི་གཅེན་མོ་མགོན་པོ་སྐྱིད་ལགས་དང་གཅེན་པོ་རྡོ་རྗེ་ཚེ་བརྟན་ལགས་སོགས་ཀྱིས་ལྷ་སའི་འབྲིང་རིམ་མི་མང་ཁྲིམས་ཁང་ཟེར་བའི་མདུན་དུ་ཞི་རྒོལ་ལས་འགུལ་བསྟུད་མར་སྤེལ་ཡོད་པ་དང་། ཉེན་རྟོག་པས་ཁོང་ཚོར་ཐེངས་མང་འདྲི་རྩད་བྱས་ཏེ་སྡིགས་ར་བསྐུལ་ཡོད་འདུག
གསར་འགོད་པ། སྐལ་བཟང་སྦྱིན་པ།
