རྒྱ་ནག་ཧའེ་ནན་གླིང་ཕྲན་རྒྱལ་སྤྱིའི་གློག་བརྙན་དུས་སྟོན་ཐེངས་ལྔ་པའི་སྟེང་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་འདས་པོ་པདྨ་ཚེ་བརྟན་ལགས་ཀྱི་གློག་བརྙན་བརྩམས་ཆོས་གསའ་ལ་འཁྲབ་ཁྲིད་པ་རྩེ་གྲས་ཀྱི་བྱ་དགའ་ཐོབ་ཡོད་འདུག
ཟླ་འདིའི་ཕྱི་ཚེས་ ༡༦ ནས་ ༢༢ ཉིན་བར་རྒྱ་ནག་གི་ཧའེ་ནན་གླིང་ཕྲན་རྒྱལ་སྤྱིའི་གློག་བརྙན་དུས་སྟོན་ཐེངས་ལྔ་པ་བསྡུ་པའི་སྟེང་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་འདས་པོ་པདྨ་ཚེ་བརྟན་ལགས་ཀྱི་གློག་བརྙན་གསའ་ལ་གློག་བརྙན་འཁྲབ་ཁྲིད་པ་རྩེ་གྲས་ཀྱི་གསེར་་གྱི་བྱ་དགའ་ཐོབ་ཡོད་ཅིང་། ཐེངས་འདིའི་གློག་བརྙན་དུས་སྟོན་ཐོག་འཛམ་གླིང་རྒྱལ་ཁབ་མི་འདྲ་བ་ ༡༠༩ ནས་གློག་བརྙན་བརྩམས་ཆོས་མི་འདྲ་བ་ ༤༠༡༨ ཙམ་བདམས་ཡོད་པའི་ནང་ནས་བརྩམས་ཆོས་རྩེ་ཕུད་ ༡༠ ལ་བྱ་དགའ་ཐོབ་ཡོད་འདུག བྱ་དགའ་གནང་བའི་མཛད་སྒོའི་ཐོག གློག་བརྙན་འདིའི་ལག་བསྟར་འཁྲད་ཁྲིད་པ་དམ་པ་པདྨ་ཚེ་བརྟན་ལགས་ཀྱི་བུ་འཇིགས་མེད་འཕྲིན་ལས་ལགས་དང་། གློག་བརྙན་བཟོ་སྐྲུན་པ་ཚེ་མདོ། གློག་བརྙན་ནང་གི་འཁྲབ་སྟོན་པ་གཙོ་བོ་སྦྱིན་པ་དང་། ཞོང་ཙི་ཆིས། ཚེ་བརྟན་བཀྲ་ཤིས། འཁྲབ་སྟོན་པ་དགེ་འདུན་ཕུན་ཚོགས་དང་། ཀུན་བདེ། དབང་སྒྲོན་མཚོ་སོགས་མཉམ་ཞུགས་གནང་ཡོད་འདུག
སྐབས་དེར་འཁྲབ་ཁྲིད་པ་འཇིགས་མེད་འཕྲིན་ལས་ལགས་ཀྱིས། ཡིད་སྐྱོ་བ་ཞིག་ལ་ངའི་པ་ལགས་དེ་རིང་གི་མཛད་སྒོའི་ཐོག་མཚན་སྙན་འདི་བཞེས་པར་ཕེབས་ཐུབ་མེད། ཡིན་ནའང་། གློག་བརྙན་གསའ་ཡི་ཕབ་སྐྲུན་ཚོགས་ཆུང་དང་། འཁྲབ་སྟོན་པ་ཚང་མ་འདིར་མཉམ་ཞུགས་བྱེད་བཞིན་ཡོད། ཐེངས་འདིའི་གོ་སྒྲིག་ཚོགས་ཆུང་གིས་གློག་བརྙན་གསའ་ལ་འདི་ལྟ་བུའི་མཚན་སྙན་ཞིག་གནང་བར་བཀའ་དྲིན་ཆེ་ཞུ། པ་ལགས་ཀྱི་གློག་བརྙན་བརྩམས་ཆོས་ལས། ང་ཚོ་མི་རེ་རེས་རང་ཉིད་ཀྱི་གཏམ་རྒྱུད་གློག་བརྙན་དུ་ཕབ་སྐྲུན་བྱེད་པའི་སྙིང་སྟོབས་ཤིག་སྦྱིན་པར་ཕྱིར་དྲན་བྱ་ཐུབ། ཅེས་བརྗོད་སོང་།
གློག་བརྙན་བཟོ་སྐྲུན་པ་ཝང་ལི་ཡིས། གསའ་ནི་ཆེས་སྤྱིར་བཏང་གི་གློག་བརྙན་ཞིག་གཏན་ནས་མ་རེད། ཧའེ་ནན་གླིང་ཕྲན་རྒྱལ་སྤྱིའི་གློག་བརྙན་དུས་ཆེན་ནས་གཟིགས་འབུལ་མགོ་བརྩམས་ཏེ། མ་འོངས་པར་གང་མགྱོགས་རྒྱ་ནག་རྒྱལ་ཡོངས་ཀྱི་ལྟད་མོ་བ་རྣམས་ལ་གཟུགས་འབུལ་ཞུ་ཐུབ་པའི་རེ་བ་ཡོད། ཅེས་བརྗོད་སོང་།
འཁྲབ་སྟོན་པ་གཙོ་བོ་སྦྱིན་པ་ལགས་ཀྱི་མིག་ལ་མཆི་མ་འཁོར་བཞིན་དུ། ང་ནི་སྐད་ཆ་ཡག་པོ་བཤད་མི་ཤེས་པའི་མི་ཞིག་ཡིན། ང་ཚོའི་གློག་བརྙན་ལ་འདི་ལྟ་བུའི་བྱ་དགའ་ཐོབ་པར་ཐུགས་རྗེ་ཆེ་ཞུ་ཞེས་བརྗོད་སོང་།
གཙོ་འཁྲབ་པ་ཚེ་བརྟན་བཀྲ་ཤིས་ལགས་ཀྱིས་ངུ་སྐད་དང་བཅས། ང་ནི་ལུང་པ་ཆུང་ཆུང་ཞིག་ནས་ཡོང་བའི་མི་ཞིག་ཡིན། རང་ཉིད་ཀྱི་ཕུགས་བསམ་བོར་བའི་མི་ཞིག་ཀྱང་ཡིན། ཡིན་ཡང་དགེ་རྒན་པདྨ་ཚེ་བརྟན་ལགས་ཀྱིས་ང་ལ་ལམ་ཁ་འདི་གནང་བྱུང་། ཐུགས་རྗེ་ཆེ། ཞེས་བརྗོད་སོང་།
འཁྲབ་སྟོན་པ་དབང་སྒྲོན་མཚོ་ལགས་ཀྱིས། ཞིང་གཤེགས་དགེ་རྒན་དམ་པ་ལགས་ཀྱིས་གློག་བརྙན་གྱི་འཇིག་རྟེན་ལ་རྒྱབ་སྐྱོར་བྱས་པར་ཐུགས་རྗེ་ཆེ་ཞུ་ཞེས་བརྗོད་སོང་།
བྱ་དགའ་གནང་བའི་མཛད་སྒོའི་སྐབས་སུ་འཁྲབ་ཁྲིད་པ་འདས་པོ་པདྨ་ཚེ་བརྟན་ལགས་ཀྱིས། གཏམ་རྒྱུད་ཕྱེད་ཙམ་ལས་བཤད་མ་ཚར་ཡང་། བཤད་ཟིན་པའི་གཏམ་རྒྱུད་ཀྱི་ཁྲག་རྒྱུན་ནི་སྔར་བཞིན་མུ་ནས་མུ་རུ་འཕྱུར་བའི་ཡིད་ཆེས་ཡོད། ཅེས་པའི་གཏམ་བཤད་བཏང་སྟེ་འཁྲབ་ཁྲིད་པ་ཁོང་ལ་གདུང་བའི་མྱ་ངན་ཞུས་འདུག
བོད་ཀྱི་གློག་བརྙན་གསའ་ནི་འདས་པོ་པདྨ་ཚེ་བརྟན་ལགས་ཀྱི་གློག་བརྙན་བརྒྱད་པ་དེ་ཆགས་འདུག་ལ། ཁོང་གིས་སྒྲུང་གཏམ་དེ་ཕྱི་ལོ་ ༢༠༢༠ ལོའི་རིམས་ནད་ཀྱི་སྐབས་སུ་འབྲི་མགོ་བཙུགས་ཤིང་། ཕྱི་ལོ་ ༢༠༢༡ ལོའི་ཟླ་ ༡༠ ནས་བཟུང་ཕབ་སྐྲུན་བྱེད་མགོ་ཚུགས་པ་ཞིག་ཡིན་འདུག་ལ། གློག་བརྙན་འདིའི་ནང་དུ་མི་དང་སྲོག་ཆགས་གཉིས་ཇི་ལྟར་མཉམ་དུ་འཚོ་སྡོད་བྱེད་པའི་སྐོར་གྱི་གཏམ་རྒྱུད་བཤད་ཡོད་པ་དང་། གློག་བརྙན་གྱི་ཕབ་སྐྲུན་བྱ་ཡུལ་ནི་མགོ་ལོག་རྨ་སྟོད་ཀྱི་སྟོང་རི་མཚོ་རྒན་ཉེ་འདབས་ཀྱི་རི་དྭགས་གསའ་རྒྱུན་དུ་འཚོ་སྡོད་བྱ་སའི་ཡུལ་དངོས་སུ་ཕབ་སྐྲུན་བྱས་པ་ཞིག་ཡིན་འདུག
གློག་བརྙན་འདིའི་ནང་དུ་བོད་ཀྱི་གློག་བརྙན་འཁྲབ་སྟོན་པ་སྦྱིན་པ་ལགས་དང་ཚེ་བརྟན་བཀྲ་ཤིས། ཞོང་ཙི་ཆིས་བཅས་ཀྱིས་གཙོ་འཁྲབ་གནང་ཡོད་པ་དང་། གཞན་བོད་ཀྱི་གློག་བརྙན་འཁྲབ་སྟོན་པ་བློ་བཟང་ཆོས་འཕེལ་དང་། དབང་ཕྱུག་མཚོ། དགེ་འདུན་ཕུན་ཚོགས། ཀུན་བདེ། འཇིགས་བྷ། དཀའ་ཐུབ་ཚེ་རིང་། བདེ་ཆེན་གཡང་འཛོམས། འཇུ་ཁྱུང་ཆེན། ཏང་ཧའོ་ཡོས་སོགས་ཀྱིས་འཁྲབ་སྟོན་ནང་དུ་མཉམ་ཞུགས་གནང་ཡོད་འདུག འདི་ལོའི་ཕྱི་ཟླ་ ༡༡ ཚེས་ ༡ ཉིན་ཕྱི་ལོ་ ༢༠༢༣ ལོའི་ཊོག་ཡོའི་གློག་བརྙན་དུས་སྟོན་ཐེངས་༣༦ པའི་(The 36th Tokyo International Film Festival) སྟེང་གློག་བརྙན་འདི་ལ་གློག་བརྙན་རྩེ་གྲས་ཀྱི་བྱ་དགའ་ཐོབ་ཡོད་པ་དང་། ཕྱི་ཟླ་ ༧ ཚེས་ ༢༥ ཉིན་ཨེ་ཊ་ལི་རྒྱལ་ཁབ་ཀྱི་ལི་ཌོ་(Lido)གླིང་ཕྲན་དུ། རྒྱལ་སྤྱིའི་གློག་བརྙན་བཟོ་སྐྲུན་མཐུན་ཚོགས་(International Federation of Film Producers Association)ཀྱིས་གོ་སྒྲིག་བྱས་པའི་སྐབས་ ༨༠ པའི་ཝེ་ནི་སི་རྒྱལ་སྤྱིའི་གློག་བརྙན་དུས་སྟོན་( 80th Venice International Film Festival ) སྟེང་གཟིགས་འབུལ་ཞུས་ཡོད་འདུག
འདས་པོ་སྐུ་ཞབས་པདྨ་ཚེ་བརྟན་ལགས་ནི་ཕྱི་ལོ་ ༡༩༦༩ ལོར་མདོ་སྨད་ཁྲི་ཀ་ནས་སྐྱེས་ཤིང་། གློག་བརྙན་འཁྲབ་ཁྲིད་པ་དང་། རྩོམ་པ་པོ། ལོ་ཙཱ་བ་བཅས་ཡིན་ལ། ཕྱི་ལོ་ ༢༠༠༢ ལོར་པེ་ཅིན་གློག་བརྙན་སློབ་གླིང་དུ་གློག་བརྙན་སྐོར་ལ་ཆེད་སྦྱོང་གནང་རྗེས། འཁྲབ་གཞུང་རྩོམ་པ་པོ་དང་འཁྲབ་ཁྲིད་པ་བཅས་ཀྱི་ལས་ཀ་གཅིག་ལྕོགས་སུ་གནང་། ད་བར་ཁོང་གིས་ལྷིང་འཇགས་ཀྱི་མ་ཎི་རྡོ་འབུམ་དང་འཚོལ། ཁྱི་རྒན་དང་གཡང་མདའ། ཐར་ལོ་སོགས་གློག་བརྙན་རིགས་ ༡༤ ལྷག་འཁྲབ་འཁྲིད་གནང་སྟེ་བོད་ཕྱི་ནང་གཉིས་ནས་དགའ་བསུ་ཆེན་པོ་ཐོབ་ཡོད་པ་མ་ཟད། རྒྱལ་སྤྱིའི་གློག་བརྙན་དུས་སྟོན་ཆེ་ཁག་ནས་གཟེངས་རྟགས་ཁག་ཅིག་ཀྱང་ཐོབ་སྟེ། བོད་པ་རང་གིས་བཟོས་པའི་གློག་བརྙན་གྱིས་རྒྱལ་སྤྱིའི་སྐད་གྲགས་ཅན་གྱི་གློག་བརྙན་ཁྲོམ་རའི་ནང་གོམ་པ་དང་པོ་སྤོས་ཡོད་པ་རེད། དེ་བཞིན་ཁོང་གི་གློག་བརྙན་ཐར་ལོ་དང་ཁྱི་རྒན། ལག་དམར། དབུགས་ལྒང་བཅས་ལ་རྒྱལ་སྤྱིའི་ཝཱ་ནེ་སི་(Venice) དང་། ཨ་རིའི་བྷིར་ཀི་ལིན་(Brooklyn)། ཐའེ་ཝན་དང་རྒྱ་ནག་གི་གློག་བརྙན་དུས་སྟོན་སོགས་ཀྱི་ཐོག་གཟེངས་རྟགས་བྱ་དགའ་ཐོབ་སྟེ། རྒྱལ་སྤྱིའི་སྟེང་པདྨ་ཚེ་བརྟན་ལགས་ནི་བོད་ཀྱི་གློག་བརྙན་འཁྲབ་འཁྲིད་པའི་ཚབ་མཚོན་མི་སྣ་ལྟ་བུར་གྱུར་ཡོད་ལ། ཁོང་གི་གློག་བརྙན་གྲགས་ཅན་ཐར་ལོ་ལ་རྒྱ་ནག་དང་རྒྱལ་སྤྱིའི་གཟེངས་རྟགས་མི་འདྲ་བ་ ༡༢ ཐོབ་ཡོད་འདུག ཡིད་སྐྱོ་བ་ཞིག་ལ་པདྨ་ཚེ་བརྟན་ལགས་འདི་ལོའི་ཕྱི་ཟླ་ ༥ ཚེས་ ༨ ཉིན་གྱི་དགོང་མོར་བོད་ཀྱི་རྒྱལ་ས་ལྷ་སར་གློ་བུར་དུ་སྐུ་གྲོངས་ཡོད་པ་རེད།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
