བསྟན་འཛིན་དཔལ་སྒྲོན་ལགས་གོ་ལའི་མཛངས་མའི་འགྲན་བསྡུར་ནང་ཞུགས་འདུག

ཕྱི་ལོ་ ༢༠༡༧ ལོའི་བོད་ཀྱི་མཛངས་མ་བསྟན་འཛིན་དཔལ་སྒྲོན་ལགས་བོད་པའི་ཚབ་མཚོན་གྱི་ཐོག་ནས་གོ་ལའི་མཛངས་མའི་འགྲན་བསྡུར་ནང་མཉམ་ཞུགས་བྱེད་བཞིན་པ་དང་བསྟུན། བོད་མི་ཚོས་དྲ་ལམ་ནས་འོས་ཤོག་འཕངས་ཏེ་ཁོང་མོར་རྒྱབ་སྐྱོར་བྱེད་པའི་འབོད་སྐུལ་ཞུ་ཡི་འདུག

གོ་ལའི་མཛངས་མའི་འགྲན་བསྡུར་གྱི་ངོ་དེབ་སྟེང་བསྟན་འཛིན་དཔལ་ལྡན་ལགས་ངོ་སྤྲོད་ཞུས་པའི་བརྙན་ཐུང་ཞིག་སྤེལ་བའི་ནང་དུ། བསྟན་འཛིན་དཔལ་སྒྲོན་ལགས་ཀྱིས། བཀྲ་ཤིས་བདེ་ལེགས། ངས་འཛམ་གླིང་གི་ཡང་རྩེ་སྟེ། མཛེས་སྡུག་ལྡན་པའི་བོད་ཀྱི་རིག་གཞུང་གི་ཚབ་མཚོན་བྱས་ཏེ་མཉམ་ཞུགས་བྱེད་བཞིན་ཡོད། ངའི་མིང་ལ་བསྟན་འཛིན་དཔལ་སྒྲོན་ཟེར། ང་ཕྱི་ལོ་ ༢༠༢༣ ལོའི་གོ་ལའི་མཛངས་མའི་འགྲན་ཞུགས་པ་ཡིན། ངས་མཛངས་མའི་འགྲན་བསྡུར་གྱི་གར་སྟེགས་འདི་བརྒྱུད་ནས་ཁྱེད་ལ་བོད་བསྟན་ངེས་ཡིན། བོད་ནི་ས་ཆ་ཞིག་ཁོ་ན་ཙམ་མིན་པར་མི་ཚེའི་བརྒྱུད་རིམ་ཞིག་དང་། ཡིད་དབང་འཕྲོག་པའི་མཛེས་སྡུག་གི་ཞིང་ཁམས་ཤིག རིག་གཞུང་ཧ་ཅང་ཕྱུག་ཅིང་གཏིང་ཟབ་ཡོད་པ་ཞིག་ཡིན་ལ། བོད་མི་རྣམས་ལ་དཔའ་མཛངས་རྟུལ་ཕོད་ལྡན། ང་ཚོས་རང་གི་རིག་གཞུང་མཚོན་པའི་དུས་སྟོན་མང་པོ་སྲུང་གཙི་ཞུ་ཡི་ཡོད། ལོ་སར་སྐབས་ང་ཚོས་བྲོ་འཁྲབ་པ་དང་གླུ་དབྱངས་ལེན་པ་སོགས་བྱས་ཏེ་བཀྲ་ཤིས་ལེགས་ལམ་ཡོང་བའི་སྨོན་ཞུ་ཡི་ཡོད། བོད་ཀྱི་མཛངས་མ་ནི་རིག་གཞུང་ཞིག་གི་ཚབ་མཚོན་གཅིག་པོ་མ་ཡིན་པར་ཕྱིར་རང་གི་སྤྱི་ཚོགས་ལ་ནུས་པ་ལྡན་པའི་ཞབས་འདེགས་བསྒྲུབ་རྒྱུ་དེ་ཡིན། ངས་བོད་ཀྱི་བུད་མེད་ཀྱི་མཛེས་སྡུག་དང་སྙིང་སྟོབས། རྣམ་དཔྱོད་སོགས་ཀྱི་ཚབ་མཚོན་བྱ་རྒྱུ་བྱུང་བར་དགའ་སྤོབས་བྱུང་། ངས་འགྲུལ་བཞུད་འདི་བརྒྱུད་ནས་མི་ཚང་མས་རང་རང་གི་རིགས་རྒྱུད་ལ་དུང་ཞེན་དང་ཕུགས་བསམ་མངོན་འགྱུར་ཡོང་བར་སྐུལ་མ་གཏོང་གི་ཡིན། ཞེས་བརྗོད་འདུག

གོ་ལའི་མཛངས་མའི་འགྲན་བསྡུར་གྱི་དྲ་ངོས་ལྟར་ན། ད་ལྟ་ཕྱི་ལོ་ ༢༠༢༣ ལོའི་གོ་ལའི་མཛངས་མའི་འགྲན་བསྡུར་ནང་མཉམ་ཞུགས་བྱེད་མཁན་འཛམ་གླིང་རྒྱལ་ཁབ་ ༧༥ ཡི་བུ་མོ་ཡོད་ཅིང་། ཕྱི་ཟླ་ ༡༢ ཚེས་ ༢༡ ནས་ཕྱི་ལོ་ ༢༠༢༤ ལོའི་ཟླ་ ༡ ཚེས་ ༡༧ བར་(missglobal.com)ཞེས་པའི་དྲ་ལམ་ནས་འོས་ཤོག་འཕེན་མགོ་བཙུགས་འདུག་ལ། བོད་ཀྱི་བུ་མོ་བསྟན་འཛིན་དཔལ་སྒྲོན་ལགས་ཀྱིས་ཐེངས་འདིའི་འགྲན་བསྡུར་ནང་བོད་པའི་ཚབ་མཚོན་བྱས་ནས་མཉམ་ཞུགས་བྱེད་བཞིན་འདུག

དེ་བཞིན། ད་ལྟ་གོ་ལའི་མཛངས་མའི་འགྲན་བསྡུར་གྱི་དྲ་ལམ་འོས་ཤོག་འཕེན་མགོ་བརྩམས་ཡོད་སྟབས། ནེའུ་ཡོག་ནེའུ་ཇེར་སི་བོད་ཀྱི་བུད་མེད་ལྷན་ཚོགས་དང་བོད་མི་མང་པོས་དྲ་ལམ་ཁག་ཏུ་བསྟན་འཛིན་དཔལ་སྒྲོན་ལགས་སུ་རྒྱབ་སྐྱོར་མཚོན་སླད་འོས་ཤོག་འཕེན་དགོས་པའི་འབོད་སྐུལ་ལས་འགུལ་ཞིག་ཀྱང་སྤེལ་བཞིན་འདུག

ཕྱི་ལོ་ ༢༠༡༧ ལོར་བློ་བཟང་དབང་རྒྱལ་ལགས་ཀྱིས་གོ་སྒྲིག་ཞུས་པའི་བོད་ཀྱི་མཛངས་མའི་འགྲན་བསྡུར་སྐབས་བཅོ་ལྔ་བའི་ནང་བོད་པའི་བུ་མོ་ཁྱོན་ ༩ མཉམ་ཞུགས་བྱས་ཏེ། བསྟན་འཛིན་དཔལ་སྒྲོན་ལགས་སུ་ཨང་དང་པོ་ཐོབ་ཡོད། ད་ལྟ་བསྟན་འཛིན་དཔལ་སྒྲོན་ལགས་ནི་རང་ལོ་ ༢༧ ཡིན་ཞིང་ཨ་རིའི་གྲོང་ཁྱེར་ནེའུ་ཡོག་ཏུ་གནས་སྡོད་བཞིན་ཡོད་ཅིང་། ཁོང་རྒྱ་གར་ལྷོ་ཕྱོགས་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་ནས་ཡིན་འདུག

གསར་འགོད་པ། སྐལ་བཟང་སྦྱིན་པ།