ཉི་ཧོང་དུ་ཚད་རིམ་ ༧།༦ ཅན་གྱི་ས་ཡོམ་བྱུང་རྐྱེན་མཚོ་ཁར་ཡོད་པའི་ས་གནས་ཁག་ཏུ་མཚོ་རླབས་འབྱུང་ཉེན་ཡོད་པའི་ཉེན་བརྡ་བཏང་འདུག
ཁ་སང་ཉི་ཧོང་གི་ཕྱི་དྲོའི་ཆུ་ཚོད་ ༤ དང་སྐར་མ་བཅུ་ཡས་མས་སུ། ཡུལ་དེའི་ནུབ་ཁུལ་གྱི་མཚོ་ཁ་རུ་ཡོད་པའི་ཧོན་ཤུ་ (Honshu) གླིང་ཕྲན་གྱི་ས་གནས་ཨི་ཤི་ཀ་ཝ་ (Ishikawa) ས་ཁུལ་དུ། ཚད་རིམ་ ༧།༦ ཅན་གྱི་ས་ཡོམ་བྱུང་སྟེ། དེ་རིང་བར་མི་གྲངས་ ༤༨ རྐྱེན་འདས་དང་། ཁང་པ་དང་གཞུང་ལམ་སོགས་གཏོར་བཤིག་ཚབས་ཆེན་བྱུང་བ་སོགས་ཀྱིས་མི་རྒྱུ་གཉིས་ཀར་གནོད་འཚེ་ཕོག་ཡོད་པ་མ་ཟད། མཚོ་འོག་ཏུ་ས་ཡོམ་བྱུང་ཉེན་ཡོད་སྐོར་སོགས་བརྗོད་དེ་མཚོ་འགྲམ་གྱི་ཡུལ་མི་རྣམས་ཉེན་གཡོལ་ས་ཁུལ་དུ་སྡོད་དགོས་པའི་གསལ་བསྒྲགས་སོགས་སྤེལ་ཡོད་འདུག
དེ་འབྲེལ་ཉི་ཧོང་གི་གནམ་གཤིས་རིག་པས། ཉི་ཧོང་གི་ནུབ་ཕྱོགས་ཁུལ་དུ་ས་ཡོམ་བྱུང་བའི་རྐྱེན་གྱིས། ཡུལ་དེའི་ནུབ་ཁུལ་གྱི་མཚོ་ཁ་རུ་ཡོད་པའི་ཧོན་ཤུ་ (Honshu) གླིང་ཕྲན་གྱི་རྒྱལ་ས་ཊོ་ཡ་མ་ (Toyama) དང་། ནི་གྷ་ཏཱ་ (Niigata) གྲོང་ཁྱེར། དེ་བཞིན་ཧི་ཀའེ་ཌོ་ (Hokkaido) གླིང་ཕྲན་བཅས་ལ་མཚོ་རླབས་ (Tsunami) འབྱུང་ཉེན་ཡོད་པའི་ཉེན་བརྡ་བཏང་ཡོད་འདུག་ལ། ཨུ་རུ་སུ་དང་བྱང་ཀོ་རི་ཡའི་རྒྱལ་ཁབ་ཀྱི་ས་ཁུལ་ཁག་ཅིག་ཏུའང་མཚོ་རླབས་འབྱུང་ཉེན་ཡོད་པའི་ཉེན་བརྡ་བཏང་འདུག
ཉི་ཧོང་གི་སྲིད་བློན་ཧྥུ་མི་ཧི་ཀི་ཤི་ཌ་ (Fumio Kishida) ལགས་ཀྱིས། ཉི་ཧོང་དུ་ས་ཡོམ་གྱི་དོན་རྐྱེན་ཚབས་ཆེན་བྱུང་བའི་རྐྱེན་གྱིས། དོན་རྐྱེན་འབྱུང་ཡུལ་གྱི་ས་གནས་ཁག་ཏུ་ཡོད་པའི་ཡུལ་མི་གང་མང་ཉེན་སྐྱོབ་སླད། མྱུར་སྐྱོབ་ཚན་པས་རྨས་སྐྱོན་ཕོག་པའི་ཡུལ་མི་རྣམས་གང་མགྱོགས་འཚོལ་ཞིབ་དང་མྱུར་སྐྱོབ་བྱ་དགོས་སྐོར་སོགས་བརྗོད་འདུག་ལ། ཐེངས་འདིའི་དོན་རྐྱེན་ཁྲོད་མི་རྒྱུ་གཉིས་ལ་གནོད་སྐྱོན་ཚབས་ཆེན་བྱུང་བར་བརྟེན། ཨ་རིའི་སྲིད་འཛིན་རྗོ་བྷའེ་ཌིན་ (Joe Biden) མཆོག་གིས་ཉི་ཧོང་ལ་རོགས་སྐྱོར་གནངས་དང་གནང་མུས་ཡིན་པ་མ་ཟད། ཁོང་གི་སྲིད་གཞུང་གིས་ཉི་ཧོང་གི་དཔོན་རིགས་དང་འབྲེལ་བ་མུ་མཐུད་བྱེད་བཞིན་འདུག་ལ། ཨ་རིའི་གཞུང་གིས་ཉི་ཧོང་ལ་དགོས་ངེས་མཐུན་འགྱུར་སྦྱོར་བར་གྲ་སྒྲིག་ཡོད་སྐོར་སོགས་བརྗོད་འདུག
སི་ཨན་ཨན་གསར་ཁང་གིས་གནས་ཚུལ་སྤེལ་བ་ལྟར་ན། ད་ལན་གྱི་ས་ཡོམ་གོད་ཆག་ཁྲོད་ཁང་པ་དང་གཞུང་ལམ་མང་པོ་གཏོར་སྐྱོན་ཕྱིན་པ་མ་ཟད། ས་ཡོམ་རྐྱེན་གྱིས་ཁུལ་དེའི་གློག་འཕྲོ་བརླག་ཕྱིན་ཏེ་མྱུར་བགྲོད་མེ་འཁོར་གཉིས་གློ་བུར་དུ་བཀག་སྡོམ་བྱས་རྐྱེན། མེ་འཁོར་དེ་དག་གི་ནང་འགྲུལ་བཞུད་བྱེད་མཁན་མི་གྲངས་ ༡༤༠༠ ཡས་མས་ཙམ་ཆུ་ཚོད་ ༡༡ ལྷག་རིང་འགྲོ་ལམ་འགག་པའི་རྐྱེན་གྱིས་འགྲུལ་བཞུད་བྱས་བྱས་མི་ཐུབ་པའི་དཀའ་ངལ་འཕྲད་འདུག་ལ། ཁྱིམ་ཚང་སྟོང་ཕྲག་ ༤༥ ལྷག་གི་གློག་མེད་པར་ཆགས་འདུག་ལ། ཁ་སང་ཕྱི་ཚེས་ ༡ ཉིན་རྒྱལ་ཁབ་དེའི་བདེ་སྲུང་ལས་ཁུངས་ཀྱིས་མྱུར་སྐྱོབ་སླད་དམག་མི་ ༡༠༠༠ ལྷག་འགྲེམས་འཇོག་བྱས་ཡོད་འདུག
ཉི་ཧོང་རྒྱལ་ཁབ་ཀྱི་ནུབ་ཁུལ་གྱི་མཚོ་བརྒྱུད་ཁུལ་དུ་ཚད་རིམ་ ༧།༦ ཅན་གྱི་ས་ཡོམ་བྱུང་སྟེ། མི་རྒྱུ་གཉིས་ལ་གནོད་སྐྱོན་ཚབས་ཆེན་ཕོག་པ་དང་། ཕྱི་ལོའི་གསར་ཚེས་ ༡ ཉིན་ནས་དེ་རིང་ཕྱི་ཚེས་ ༢ བར་ཉིན་གྲངས་གཉིས་རིང་ཚད་རིམ་ ༧།༦ དང་ཚད་རིམ་ ༦ ལས་ཆེ་བའི་ས་ཡོམ་ ༦ སོགས་ཚུད་པའི་ཁྱོན་ས་ཡོམ་ ༡༥༥ བྱུང་ཡོད་པའི་རྐྱེན་གྱིས་མཚོ་ཁར་མཚོ་རླབས་འབྱུང་ཉེན་ཡོད་སྐོར་བརྗོད་འདུག་ཀྱང་། ད་ལྟའི་ཆར་མཚོ་རླབས་ཀྱི་གོད་ཆག་བྱུང་མི་འདུག འོན་ཀྱང་མཚོ་ཁར་ཡོད་པའི་ཡུལ་མི་རྣམས་རང་ཁྱིམ་དུ་ལོག་མི་དགོས་པའི་གསལ་བསྒྲགས་སྤེལ་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
