དགེ་བཤེས་ལྷ་རམས་པར་ཕྱག་ཁྱེར་སྩལ་བའི་མཛད་སྒོར་ཆིབས་བསྒྱུར་བཀའ་དྲིན་བསྐྱངས།  

༧གོང་ས་རྒྱལ་བ་རིན་པོ་ཆེ་མཆོག་དགེ་ལྡན་ལུགས་བསམ་གཙུག་ལག་སློབ་གཉེར་ཁང་གི་དགེ་བཤེས་ལྷ་རམས་པ་ ༤༡༣ ལ་ཕྱག་ཁྱེར་བསྩལ་བའི་མཛད་སྒོར་ཆིབས་བསྒྱུར་བཀའ་དྲིན་བསྐྱངས་བ།

དེ་རིང་ཕྱི་ཟླ་ ༡ ཚེས་ ༣ ཉིན་༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག  དགའ་ལྡན་ཁྲི་རིན་པོ་ཆེ་མཆོག་ནས་གདན་ས་གསུམ་དང་བཀྲ་ཤིས་ལྷུན་པོ། ར་སྟོད་གྲྭ་ཚང་བཅས་ཀྱི་དགེ་བཤེས་ལྷ་རམས་པའི་བསླབ་པ་མཐར་སོན་པ་དགེ་འདུན་པ་གྲངས་ ༤༡༣ ལ་ཕྱག་ཁྱེར་གནང་ཡོད་ཅིང་། སྐབས་དེར་༧མགོན་པོ་གང་ཉིད་ཀྱིས་བོད་ཀྱི་ནང་བསྟན་སློབ་གཉེར་བྱེད་སྟངས་དེ་ཧ་ཅང་ཁྱད་འཕགས་ཅན་ཞིག་ཡིན་སྐོར་སོགས་ཀྱི་བཀའ་སློབ་བསྩལ་སོང་།

དེ་ཡང་༧གོང་ས་རྒྱལ་བ་རིན་པོ་ཆེ་མཆོག་ནས། དེ་རིང་འདིར་ལྷ་རམས་པའི་ཕྱག་འཁྱེར་དབུལ་རྒྱུ་རེད། ང་ཚོ་བོད་གངས་ཅན་གྱི་བསླབ་པ་སློབ་གཉེར་བྱེད་སྟངས་ནི་ཧ་ལས་པ་ཞིག་རེད། ཐའེ་ལན་ཌི་དང་འབར་མ། ཝེ་ཐི་ནམ་སོགས་སུ་ངོས་ལ་ནང་པ་ངོ་ཤེས་པ་མང་པོ་ཡོད། ཡིན་ནའང་། ལོ་མང་པོར་དཔེ་ཆར་ལྟ་མཁན་ཧ་ཅང་ཉུང་ཉུང་རེད། རེ་ཟུང་ཡོད་ཤས་ཆེ་མ་གཏོགས་མང་ཆེ་བ་དཔེ་ཆར་ལྟ་བར་དོ་སྣང་མེད་པར་སྒོམ་བརྒྱབ་ནས་སྡོད་པ་ལ་དོ་སྣང་ཆེ་བ་ལྟ་བུ་འདུག ང་ཚོ་བོད་ལ་དཔེ་ཆར་ལྟ་བར་དང་དོད་ཧ་ཅང་ཤུགས་ཆེན་པོ་ཡོད་པ་རེད། ངོས་རང་ལ་མཚོན་ན་ཆུང་ཆུང་སྐབས་ནས་དཔེ་ཆར་བལྟ་བ་དང་། དཔེ་ཆར་ལྟ་དུས་ཚིག་གི་འབྲུ་རྙེད་པ་ཙམ་དུ་མ་ཟད། དེ་ལ་དཔྱད་པ་བྱེད་ཀྱི་ཡོད། ང་ཚོའི་རྟགས་གསལ་གྱི་འགྲོ་སྟངས་ནི་ཧ་ཅང་ཡག་པོ་ཞིག་རེད། བརྡར་ཤ་བཅད་ནས་འགྲོ་བ་ནི་ཧ་ཅང་གལ་ཆེན་པོ་རེད། ཅེས་གསུངས་སོང་།

ཡང་༧གོང་ས་རྒྱལ་བ་རིན་པོ་ཆེ་མཆོག་ནས། འདིར་སློབ་གཉེར་གནང་མཁན་ཁྱོད་ཚོ་ཚང་མར་བཀྲ་ཤིས་བདེ་ལེགས་ཞུ་རྒྱུ་དང་། ཚང་མས་སློབ་གཉེར་གནང་ནས་ཧུར་ཐག་བྱས་པ་རེད། སློབ་གཉེར་གནང་ནས་གོ་རྟོགས་ཡོད་པ་དེ་ལག་ལེན་དུ་བསྐྱལ་ནས། ཐོག་མར་ཐོས་བྱུང་གི་ཤེས་རབ་དང་། དེ་ནས་བསམ་བྱུང་གི་ཤེས་རབ། མཐའ་མར་སྒོམ་བྱུང་གི་ཤེས་རབ་རྒྱུད་དུ་སྐྱེས་ཏེ་ས་ལམ་བགྲོད་ཐུབ་པ་ཞིག་དགོས། ངོས་རང་ལ་མཚོན་ན་བྱང་ཆུབ་ཀྱི་སེམས་གང་ལ་གང་འཚམ་ཡོད་པ་རེད། སྟོང་ཉིད་ཀྱི་ལྟ་བར་བསམ་བློ་བཏང་ཡོང་དུས་སྦྱོར་ལམ་ནས་ཡར་འགྲོ་བའི་ཚོད་དཔག་བྱེད་ཀྱི་ཡོད་ལ། རེ་བ་རྒྱག་གི་ཡོད། ཅེས་དང་། འཛམ་གླིང་གི་མི་སྤྱི་དང་སངས་རྒྱས་པའི་ཆོས་ལ་དོ་སྣང་ཡོད་མཁན་ཚོར་མིག་དཔེར་མཚོན་ཐུབ་པ་ཞིག་གི་ཐོག་ནས་སངས་རྒྱས་པའི་ཆོས་པ་ཞིག་གིས་ཆོས་ལ་བསམ་བློ་བཏང་། དཔྱད་པ་བྱས་ཏེ་མི་འདྲ་བ་ཞིག་འདུག་བསམ་ཏེ་མི་ཚོས་དོ་སྣང་སླེབས་པར་ཚང་མས་ཧུར་ཐག་བྱ་དགོས། བསྟན་པའི་ཞབས་འདེགས་སྒྲུབ་ཟེར་བ་ནི་དེ་འདྲ་ཞིག་རེད། ཚང་མས་འཆར་ཅན་ཡིན་བསམ་པ་མིན་པར་ཉིན་རེ་བཞིན་དུ་ཐོས་བསམ་སྒོམ་གསུམ་གྱི་ཐོག་ནས་བློ་ལ་ཡར་རྒྱས་ཡོད་པ་ཞིག་དང་། གྲོགས་པོ་ཚོར་འགྲེལ་བཤད་དང་། སྟོན་ཐུབ་པ་ཞིག་བྱུང་ན་བསྟན་པའི་ཞབས་འདེགས་སྒྲུབ་ཀྱི་ཡོད།  ཚང་མས་ཧུར་ཐག་གནང་རོགས། ཞེས་གསུངས་སོང་།

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།