ཨ་རིའི་འཕྲུལ་རིག་ཚན་རྩལ་བཟོ་ཚོང་ཁང་གིས་བོད་ནང་དུ་རིགས་རྫས་བརྟག་དཔྱད་གཏོང་བྱེད་ཀྱི་ཡོ་ཆས་བཙོང་མཚམས་བཞག་པའི་ཐག་གཅོད་བྱས་པར་བརྟེན། རྒྱལ་སྤྱིའི་བོད་དོན་ལས་འགུལ་ཁང་སོགས་ཀྱིས་དགའ་བསུ་ཞུས་འདུག
ཕྱི་ལོ་ ༢༠༢༣ ལོའི་ཟླ་ ༡༢ ཚེས་ ༣༡ ཉིན་ཨ་རིའི་མངའ་སྡེ་མཱ་སེ་ཆུ་སེ་ཊི་ (Massachusetts) ཡི་གྲོང་ཁྱེར་བྷོ་སི་ཊོན་ (Boston) ནང་རྟེན་གཞི་བྱས་པའི་འཕྲུལ་རིག་ (Thermo Fisher Scientific) ཚན་རྩལ་བཟོ་ཚོང་ཁང་གིས། བོད་ནང་དུ་རིགས་རྫས་བརྟག་དཔྱད་གཏོང་བྱེད་ཀྱི་ཡོ་ཆས་བཙོང་མཚམས་བཞག་པའི་གསལ་བསྒྲགས་སྤེལ་ཡོད་པ་ལྟར། ཁ་སང་ཕྱི་ཚེས་ ༣ ཉིན་ནེའུ་ཡོག་ཏུ་ཡོད་པའི་བོད་རང་བཙན་སློབ་ཕྲུག་ཚོགས་པ་དང་རྒྱལ་སྤྱིའི་བོད་དོན་ལས་འགུལ་ཁང་། བོད་དོན་འབྲེལ་མཐུད་ལས་འགུལ་ཚོགས་པ་སོགས་ཀྱིས། བོད་ནང་གི་བོད་མིའི་རིགས་རྫས་བརྟག་དཔྱད་གཏོང་བྱེད་ཀྱི་ཡོ་ཆས་བཙོང་མཚམས་བཞག་པར་དགའ་བསུ་ཞུས་འདུག
བོད་རང་བཙན་སློབ་ཕྲུག་ཚོགས་པ་དང་རྒྱལ་སྤྱིའི་བོད་དོན་ལས་འགུལ་ཁང་། བོད་རང་དབང་དང་བོད་དོན་འབྲེལ་མཐུད་ལས་འགུལ་ཚོགས་པ། སུད་བོད་མཛའ་འབྲེལ་ཚོགས་པ་ (Swiss Tibetan Friendship Association) སོགས་བོད་མིའི་གཞུང་འབྲེལ་མིན་པའི་ཚོགས་སྡེ་ཁག་གིས། ད་ལན་ཨ་རིའི་འཕྲུལ་རིག་ཚན་རྩལ་བཟོ་ཚོང་ཁང་གི་ཐག་གཅོད་དེ་ལ་དགའ་བསུ་དང་སྦྲགས། རིགས་རྫས་བརྟག་དཔྱད་གཏོང་བྱེད་ཀྱི་ཡོ་ཆས་བཙོང་མཚམས་བཞག་པའི་གནས་ཚུལ་དེ་ནི་བོད་དང་བོད་མི་ལས་འགུལ་བ་རྣམས་ཀྱི་རྒྱལ་ཁ་ཞིག་ལ་ངོས་འཛིན་བྱེད་བཞིན་འདུག
དེ་འབྲེལ་ཝ་ཤིང་ཊོན་དུ་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་མགྲིན་ཚབ་པ་ལིའུ་ཕཱེན་ཡོའུ་ (Liu Pengyu) ཡིས། ཤར་ཏུར་ཀི་སི་ཐན་དང་བོད་སོགས་གྲངས་ཉུང་མི་རིགས་ཀྱི་རིགས་རྫས་བསྡུ་རུབ་བྱེད་ཀྱི་ཡོད་པའི་སྐྱོན་འཛུགས་དེ་ནི་ཁུངས་མེད་ལུང་མེད་ཡིན་པ་མ་ཟད། རྒྱ་ནག་ལ་ཁྲིམས་མཐུན་གྱིས་རང་གི་མི་སེར་སྲུང་སྐྱོབ་བྱེད་པའི་དབང་ཚད་ཡོད་སྟབས། འབྲེལ་ཡོད་ཨ་རིའི་འཕྲུལ་རིག་བཟོ་ཚོང་ཁང་གིས་མཉམ་འབྲེལ་གྱི་ཚོང་ལས་ཆབ་སྲིད་ལ་བསྒྱུར་བ་དང་། ཁུངས་ལུང་མེད་པའི་སྐྱོན་འཛུགས་དེ་དག་ལ་བརྟེན་ནས་མཉམ་ལས་ཚོང་འབྲེལ་མཚམས་འཇོག་བྱས་པར་མཐའ་གཅིག་ཏུ་འགག་པ་ཡོད་སྐོར་སོགས་ཀྱིས་ལན་འདེབས་བྱས་འདུག
ཕྱི་ལོ་ ༢༠༢༢ ལོར་ཨ་རིར་རྟེན་གཞི་བྱས་པའི་འཕྲུལ་རིག་བཟོ་ཚོང་ཁང་གིས་བོད་ནང་དུ་རིགས་རྫས་བརྟག་དཔྱད་གཏོང་བྱེད་ཀྱི་ཡོ་ཆས་བཙོང་སྟེ། རྒྱ་གཞུང་གིས་བཙན་དབང་གི་ཐོག་ནས་བོད་མིའི་རིགས་རྫས་བསྡུ་རུབ་དང་འགྲོ་འདུག་སྤྱོད་གསུམ་ལ་དམ་དྲག་བྱས་དང་བྱེད་མུས་ཡིན་པར་བརྟེན། ཕྱི་ལོ་ ༢༠༢༢ ལོ་དེ་ནས་བཟུང་བོད་དོན་རྒྱབ་སྐྱོར་བ་དང་ལས་འགུལ་བ། དེ་བཞིན་བོད་ཀྱི་གཞུང་འབྲེལ་མིན་པའི་ཚོགས་པ་ཁག་དང་། རྒྱལ་སྤྱིའི་བོད་དོན་ལས་འགུལ་ཁང་། འགྲོ་བ་མིའི་ཐོབ་ཐང་ལྟ་ཞིབ་ཁང་སོགས་རྒྱལ་སྤྱིའི་ཚོགས་སྡེ་ཁག་འདྲ་མིན་གྱིས། ཨ་རིར་རྟེན་གཞི་བྱས་པའི་ (Thermo Fisher) འཕྲུལ་རིག་བཟོ་ཚོང་ཁང་ནས་རྒྱ་ནག་ལ་རིགས་རྫས་བརྟག་དཔྱད་གཏོང་བྱེད་ཀྱི་ཡོ་ཆས་འཚོང་མཚམས་འཇོག་དགོས་པའི་ངོ་རྒོལ་ལས་འགུལ་མང་པོ་སྤེལ་བའི་ཁྲོད། རྒྱ་ནག་གཞུང་གིས་བྱིས་པ་ཚུད་པའི་མི་སྒེར་གྱི་ཁེ་ཕན་འཕྲོག་པ་དང་། བོད་མི་དང་ཤར་ཏུར་ཀི་སི་ཐན་གཙོས་གྲངས་ཉུང་མི་རིགས་རྣམས་ལ་བྱ་ར་དང་ཉུལ་ཞིབ་སོགས་བྱས་དང་བྱེད་བཞིན་པ་དང་། གྲངས་ཉུང་མི་རིགས་ཁག་གི་རིགས་རྫས་བརྟག་དཔྱད་བྱས་པར་བློ་ཕམ་ཆེན་པོ་ཡོད་པ་མ་ཟད། རྒྱ་གཞུང་གིས་ཁྲིམས་མཐུན་མིན་པའི་ཐོག་ནས་བོད་མི་དང་ཡུ་གུར་མི་མང་གི་རིགས་རྫས་བསྡུ་རུབ་བྱེད་བཞིན་པ་དེ་མཚམས་འཇོག་དགོས་པ་སོགས་ཀྱི་རེ་འབོད་ཐེངས་མང་ཞུས་ཡོད་པ་མ་ཟད། རྒྱལ་སྤྱིའི་སྡིངས་ཆ་སྣ་མང་སྟེང་དེ་འབྲེལ་ལས་འགུལ་མང་པོ་སྤེལ་བ་སོགས་ལ་བརྟེན་ནས། ཉེ་ལམ་ཨ་རིའི་འཕྲུལ་རིག་བཟོ་ཚོང་ཁང་དེས་བོད་ནང་དུ་རིགས་རྫས་བརྟག་དཔྱད་གཏོང་བྱེད་ཀྱི་ཡོ་ཆས་བཙོང་མཚམས་བཞག་པའི་ཐག་གཅོད་དེ་བྱུང་ཡོད་འདུག
ཨ་རིའི་ནེའུ་ཡོག་ཏུ་རྟེན་གཞི་བྱས་པའི་ (The Wall Street Journal) ཚགས་ཤོག་གསར་ཁང་གིས་དེ་འབྲེལ་གནས་ཚུལ་སྤེལ་བ་ལྟར་ན། འཛམ་གླིང་ནང་གི་འགྲོ་བ་མིའི་རིགས་རྫས་བསྡུ་རུབ་དང་མཁོ་སྒྲུབ་བྱེད་མཁན་གྱི་རྒྱལ་ཁབ་ཆེ་ཤོས་དེ་རྒྱ་ནག་ཡིན་པ་མ་ཟད། རྒྱ་ནག་གིས་མི་མང་ཐེར་འབུམ་ ༡།༤ ཙམ་གྱི་རིགས་རྫས་བསྡུ་རུབ་བྱས་ཏེ་འཕྲུལ་རིགས་བརྒྱུད་མི་མང་ལ་སོ་ཉུལ་བྱེད་བཞིན་ཡོད་སྐོར་དང་། ཨ་རིའི་འཕྲུལ་རིག་བཟོ་ཚོང་ཁང་གིས་རྒྱ་ནག་གི་རྒྱལ་ཁབ་ཉེན་རྟོག་པའི་ཚོད་ལྟ་ཁང་ (Police lab) ལ་རིགས་རྫས་བརྟག་དཔྱད་གཏོང་བྱེད་ཀྱི་ཡོ་ཆས་མཁོ་སྒྲུབ་བྱས་ཡོད་སྐོར་སོགས་གསལ་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། སྐལ་བཟང་སྦྱིན་པ།
