རྒྱ་ནག་གཞུང་གིས་བོད་ནང་དུ་ཚོགས་ཆེན་འཚོགས་ནས་དམར་ཤོག་གི་ལྟ་བ་དྲིལ་བསྒྲགས་བྱས་པ་ཙམ་ལས་བོད་མི་རྣམས་ཀྱི་འཚོ་བ་དངོས་ལ་ཕན་ཐོགས་མེད་སྐོར་འགྲེལ་བརྗོད་གནང་བྱུང་།
དེ་རིང་ཕྱི་ཟླ་ ༡ ཚེས་ ༡༡ ནས་ ༡༤ བར་ཉིན་གྲངས་བཞི་རིང་ཀན་ལྷོ་བོད་རིགས་རང་སྐྱོང་ཁུལ་མི་དམངས་འཐུས་མི་ཚོགས་ཆེན་ཐེངས་གསུམ་པ་ཟེར་བ་དེ་གཙོས་གྲོང་ཁྱེར་དུ་འཚོག་གི་ཡོད་ཅིང་། ཚོགས་ཆེན་སྒོ་འབྱེད་མཛད་སྒོའི་སྟེང་ཕྱི་ལོ ༢༠༢༤ ལོར་ཀན་ལྷོ་བོད་རིགས་རང་སྐྱོང་ཁུལ་ཟེར་བའི་ནང་རྒྱ་ནག་དམར་ཤོག་གཞུང་གི་མགོ་ཁྲིད་ཞི་ཅིན་ཕིན་གྱིས་སྣེ་ཁྲིད་པའི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ཟེར་བ་དང་། བོད་སྐྱོང་ཇུས་ཆེན་དོན་འཁྱོལ་གཏིང་ཟབ་བྱེད་པ་ཟེར་བ། ཀྲུང་ཧྭ་མི་རིགས་ཐུན་མོང་གཞི་གཅིག་གི་འདུ་ཤེས་བརྟན་པོ་འཛུགས་ཐབས་ཟེར་བ། དེ་བཞིན་ཏང་གི་ཚོགས་ཆེན་ཐེངས་ཉི་ཤུ་པའི་དགོངས་དོན་ཟེར་བར་སྔར་ལས་ལྷག་པའི་ཤུགས་སྣོན་བརྒྱག་དགོས་པའི་དྲིལ་བསྒྲགས་ཤུགས་ཆེན་བྱས་ཡོད་འདུག
དེའི་སྐོར་ལ་བོད་ནང་གི་ཤེས་ཡོན་པ་ཞིག་གིས་འདི་གའི་གསར་འགོད་པར། བོད་ནང་རྒྱ་ནག་གཞུང་གིས་གོ་སྒྲིག་བྱས་པའི་ཚོགས་ཆེན་དེ་དག་ལ་ཉན་འཇོག་བྱེད་ཀྱི་མེད། དེ་ནི་ཆབ་སྲིད་ཀྱི་དགོས་མཁོའི་དབང་གིས་དྲིལ་བསྒྲགས་དང་འཁྲབ་སྟོན་ཞིག་ཡིན་པ་ལས། མི་མང་གི་འཚོ་བ་དངོས་ལ་ཕན་པའི་ཚོགས་འདུ་ཞིག་ཧ་ལམ་ཡོད་མ་རེད། ཅེས་འགྲེལ་བརྗོད་གནང་བྱུང་།
དེ་རིང་གི་ཚོགས་ཆེན་སྒོ་འབྱེད་ཐོག ཕྱི་ལོ ༢༠༢༣ ལོ་ནི་ཏང་གི་ཚོགས་ཆེན་ཐེངས་ཉི་ཤུ་པའི་དགོངས་དོན་ཁྱོན་ཡོངས་ནས་ལག་བསྟར་བྱས་པའི་ལོ་ཞིག་ཡིན་སྐོར་དང་། འདས་པའི་ལོ་གཅིག་རིང་རྒྱ་ནག་དབུས་གཞུང་དང་འབྲེལ་ཡོད་སོགས་ཀྱིས་བོད་ནང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པ་དང་། ཞི་ཅིན་ཕིན་གྱི་དགོངས་དོན་ཟེར་བ། དུས་རབས་གསར་པའི་ཏང་གི་བོད་སྐྱོང་ཇུས་ཆེན་ལག་བསྟར་ཟེར་བ་བྱས་ཐུབ་ཡོད་པ། དེ་བཞིན་ཀྲུང་ཧྭ་མི་རིགས་ཐུན་མོང་གཞི་གཅིག་གི་འདུ་ཤེས་བརྟན་པོ་ཟེར་བ་བཙུགས་ཏེ། སྤྱི་ཚོགས་ཡར་རྒྱས་འགྲོ་ཡོད་ལུགས་སོགས་བརྗོད་ཡོད་འདུག
དེ་བཞིན་རྒྱ་ནག་གི་མགོ་ཁྲིད་ཞི་ཅིན་ཕིན་གྱི་ཕྱི་ལོ་གསར་པའི་ཤིས་ཚིག་ཟེར་བ་ཞིག་གི་ནང་། རྒྱ་ནག་ལུགས་ཀྱི་དེང་རབས་ཅན་ལ་སྔར་ལས་ལྷག་པའི་སྐུལ་འདེད་དང་། རྒྱ་ནག་གཞུང་གི་འཕེལ་རྒྱས་ཟེར་བ་ཞིག་གི་འོག་ནས། རྒྱ་ནག་དང་ཨེ་ཤ་ཡ། རྒྱུད་གཅིག་ལམ་གཅིག་གི་ཕྱི་འབྲེལ་ཟེར་བ་སོགས་གོང་མཐོར་གཏང་རྒྱུ་ཡིན་ལུགས་བཤད་ཡོད་པ་མ་ཟད། མེས་རྒྱལ་གོང་བུ་གཅིག་གྱུར་ཟེར་བ་ནི་ལོ་རྒྱུས་ཀྱི་ལྡོག་མེད་ཀྱི་ཆོས་ཉིད་ཟེར་བ་ཞིག་ཡིན་ལུགས་བཤད་ནས། རྒྱ་ནག་མི་རིགས་གཅིག་གྱུར་འདུ་ཤེས་ཟེར་བ་གོང་མཐོར་གཏང་དགོས་ལུགས་སོགས་བཤད་འདུག
སྤྱིར་རྒྱ་ནག་གཞུང་གིས་བོད་ནང་གི་ས་གནས་མང་དག་ཅིག་གི་ཁུལ་རིམ་པ་དང་རྫོང་རིམ་པར་ཚོགས་འདུ་སྐོང་འཚོགས་བྱེད་བཅུག་གི་ཡོད་ཅིང་། ལྷག་པར། ལོ་ལྟར་ཕྱི་ཟླ་ ༡༠ ནང་འཚོགས་པའི་རྒྱ་ནག་དམར་ཤོག་ཚོགས་པའི་ཚོགས་ཆེན་སྐབས། བོད་ནང་གཙོས་རྒྱ་ནག་གཞུང་གིས་བཙན་བཟུང་བྱས་པའི་ས་ཁུལ་ཁག་སོགས་སུ་ཆོས་ཕྱོགས་ཀྱི་མཛད་སྒོ་སོགས་མི་མང་འདུ་འཛོམས་རིགས་གཏན་ནས་མི་ཆོག་པ་མ་ཟད། སྤྱི་ཚོགས་དྲ་ལམ་དུ་ཆོས་ལུགས་དང་འབྲེལ་བ་ཡོད་པའི་ཡི་གེ་དང་པར་རིས་སོགས་སྤེལ་བར་བཀག་སྡོམ་དང་དམ་དྲག་ཆེན་པོ་བྱེད་ཀྱི་ཡོད་ལ། ཚོགས་ཆེན་སྐབས་བོད་མི་དང་ཡུ་གུར་བ་གཙོས། ས་གནས་གཞན་དང་གཞན་ནས་པེ་ཅིང་དུ་ཡོང་མཁན་རྣམས་ལ་དམ་དྲག་དང་། མཐའ་ན་བོད་མི་དང་ཡུ་གུར་བ་རྣམས་ལ་དྲག་སྤྱོད་པ་ཡིན་ལུགས་བསྙད་ནས། མགྲོན་ཁང་ཡང་རག་གི་མེད་པ་རེད་འདུག
གསར་འགོད་པ། དཔལ་ལྡན།
རྩོམ་སྒྲོག་པ། པདྨ་མཚོ།
