༧གོང་ས་རྒྱལ་བ་རིན་པོ་ཆེ་མཆོག་སྔ་འགྱུར་རྙིང་མའི་སྨོན་ལམ་ཆེན་མོའི་ཚོགས་མགོན་དུ་ཆིབས་བསྒྱུར་བཀའ་དྲིན་བསྐྱངས།

༸གོང་ས་རྒྱལ་བ་རིན་པོ་ཆེ་མཆོག་སྔ་འགྱུར་རྙིང་མའི་སྨོན་ལམ་ཆེན་མོ་སྐབས་ ༣༥ པའི་ཚོགས་མགོན་དུ་ཆིབས་བསྒྱུར་བསྐྱངས་ཏེ་གནས་ཁྱད་པར་ཅན་འདིར་སྨོན་ལམ་བརྒྱབ་དུས་གཏན་གཏན་འགྲུབ་པའི་རྐྱེན་ཞིག་ཡོད་པ་རེད་ཅེས་བཀའ་སློབ་བསྩལ་འདུག

ཟླ་འདིའི་ཕྱི་ཚེས་ ༡༡ ནས་ ༢༠ བར་ཉིན་གྲངས་ ༡༠ རིང་གནས་མཆོག་རྡོ་རྗེ་གདན་གྱི་མཆོད་རྟེན་ཆེན་མོའི་དྲུང་དུ། འཛམ་གླིང་ཞི་བདེའི་རྡོར་གདན་སྔ་འགྱུར་རྙིང་མའི་སྨོན་ལམ་ཆེན་མོ་སྐབས་ ༣༥ པ་འཚོག་བཞིན་ཡོད་ཅིང་། དེ་རིང་ཕྱི་ཚེས་ ༡༨ ཉིན་གྱི་སྔ་དྲོའི་ཆུ་ཚོད་ ༧།༥༠ ཙམ་ལ་༧གོང་ས་རྒྱལ་བ་རིན་པོ་ཆེ་མཆོག་སྔ་འགྱུར་རྙིང་མའི་སྨོན་ལམ་གྱི་ཚོགས་མགོན་དུ་ཆིབས་བསྒྱུར་བཀའ་དྲིན་བསྐྱངས་གནང་ཡོད་པ་དང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། ཆོས་གྲོགས་ལྷན་རྒྱས་རྣམ་པར་ཞུ་རྒྱུར། དེ་རིང་འདིར་སངས་རྒྱས་བཅོམ་ལྡན་འདས་ཀྱི་ཆོས་འཁོར་བསྐོར་ས་དང་། མངོན་པར་རྫོགས་པའི་སངས་རྒྱས་པའི་མཛད་པ་མཛད་སའི་གནས་ཆེན་ཁྱད་པར་ཅན་འདིར། ང་ཚོ་མཉམ་དུ་འཛོམས་ནས་སྨོན་ལམ་རྒྱག་པའི་བསྐལ་བ་བཟང་པོ་བྱུང་བ་རེད། གང་ལྟར་ང་ཚོའི་མི་ཚེ་གཅིག་ལ་འདི་འདྲའི་གོ་སྐབས་བཟང་པོ་ཞིག་བྱུང་ནས་བསོད་ནམས་བསགས་ཡོང་དུས། འདི་འདྲའི་ལས་བཟང་པོའི་འབྲས་བུ་དེ་ཚེ་རབས་ནས་ཚེ་རབས་བར་དུ་སྨིན་པ་ཐག་གིས་གཅོད་ཐུབ། ངོས་རང་སྒེར་གྱི་ངོས་ནས་བཤད་ན་སྟོན་པ་ཐུབ་པའི་དབང་བའི་གནས་ཁྱད་པར་ཅན་ནས་མཉམ་དུ་འཛོམས་ཏེ་སྨོན་ལམ་བརྒྱབ་པ་དེ་གོ་སྐབས་ཧ་ཅང་བཟང་པོ་ཡིན། བསྟན་པ་རིན་ཆེན་མཆོག་གི་མ་ཁྱབ་པའམ། །ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི། །སྙིང་རྗེ་ཆེན་པོས་ཡིད་རབ་བསྐྱོད་པ་ཡིས། །ཕན་བདེའི་གཏེར་དེ་གསལ་བར་བྱེད་པར་ཤོག། །ཞེས་གསུངས་པ་ནང་བཞིན། སངས་རྒྱས་བཅོམ་ལྡན་འདས་ཀྱི་ཆོས་དེ་སྔ་མ་དར་བའི་ས་ཆ་ལའང་དེང་སང་དོ་སྣང་གསར་པ་ཞིག་བྱེད་བཞིན་ཡོད་པ་རེད། ང་ཚོ་ནི་ཕ་མེས་ནས་སངས་རྒྱས་བཅོམ་ལྡན་འདས་ཀྱི་རྗེས་འབྲངས་བ་རེད། གནས་ཁྱད་པར་ཅན་འདིར་ང་ཚོ་ལྷན་འཛོམས་བྱུང་ནས་སྨོན་ལམ་རྒྱག་ཐུབ་པ་ཧ་ཅང་སྐལ་བ་བཟང་པོ་ཡིན། ང་ཚོས་ཇི་ལྟར་གསོལ་བ་བཏབ་པ་བཞིན་ཚེ་རབས་ནས་ཚེ་རབས་སུ་སངས་རྒྱས་བཅོམ་ལྡན་འདས་ཀྱི་རྗེས་འབྲངས་རྣལ་མ་ཞིག་ཆགས་ཐུབ་པའི་སྨོན་ལམ་རྒྱག་གི་ཡོད། ཆོས་གྲོགས་ཚོའང་དེ་བཞིན་གཏན་གཏན་ཡོང་གི་རེད། ཚང་མས་ཀྱང་ཐུགས་སྨོན་ཡག་པོ་གནང་ཤོག ཅེས་གསུངས་སོང་།

 ཡང་མགོན་པོ་གང་ཉིད་མཆོག་ནས། དུས་དང་དུས་སུ་སྨོན་ལམ་རྒྱག་རྒྱུ་གལ་ཆེན་པོ་རེད། ཡིན་ནའང་། གཙོ་ཆེ་ཤོས་དེ་ཉིན་ཞག་དུས་དྲུག་གི་རིང་སོ་སོའི་སེམས་དེ་བཅོམ་ལྡན་འདས་ཀྱི་དགོངས་པ་དང་མ་འགལ་བའི་ཐོག་ནས་བསམ་པ་རྣམ་དག་གི་ཆོས་པ་ཞིག་བྱེད་དགོས། དེ་ཚང་མས་ཐུགས་ལ་བཅངས་དགོས། ངོས་རང་ལ་ཆ་བཞག་ན་ཧ་ཅང་སྐལ་བ་བཟང་པོ་བྱུང་། ཚེ་རབས་ནས་ཚེ་རབས་བར་སྟོན་པ་བཅོམ་ལྡན་འདས་ཀྱི་བསྟན་པ་ཉམས་སོར་ཆུད་དང་། མི་ཉམས་གོང་སྤེལ་ཡོང་བའི་སྨོན་ལམ་རྒྱག་གི་ཡོད་ལ། སེམས་ཤུགས་བསྐྱེད་བསྡད་ཀྱི་ཡོད། ཇི་སྲིད་ནམ་མཁའ་གནས་པ་དང༌། ། འགྲོ་བ་ཇི་སྲིད་གནས་གྱུར་པ། ། དེ་སྲིད་བདག་ནི་གནས་གྱུར་ནས། ། འགྲོ་བའི་སྡུག་བསྔལ་སེལ་བར་ཤོག །ཞེས་པའི་སྨོན་ལམ་སྙིང་ཁོངས་རུས་པའི་གཏིང་ནས་འདེབས་བཞིན་ཡོད། ཇི་སྲིད་ནམ་མཁའ་མ་སྲིད་བར་དུ་བསྟན་པ་འདིའི་ཆེད་དུ་ངོས་རང་གིས་ཞབས་འདེགས་ཅི་ཞིག་བསྒྲུབ་པར་སྨོན་ལམ་རྒྱག་གི་ཡོད། ཆོས་ཞེས་པ་ཕྱི་ལོགས་ཀྱི་རྣམ་འགྱུར་གཅིག་པོ་མ་རེད། ནམ་རྒྱུན་བསམ་བློ་ནང་དུ་ཆོས་ཀྱི་སྙིང་པོ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་དེ་མ་བརྗེད་པ་བྱ་རྒྱུ་ཧ་ཅང་གལ་ཆེན་རེད། ངོས་རང་ལ་ཆ་བཞག་ན་ཞོགས་པར་ཡར་ལངས་ཏེ་བྱང་ཆུབ་ཀྱི་སེམས་སྒོམ་པ་དང་། དེ་ནས་སྟོང་ཉིད་སྒོམ་བཞིན་ཡོད། ངོས་ཀྱི་ཆོས་བྱེད་སྟངས་དེ་འདྲ་ཞིག་རེད། སྟོན་པའི་རྗེས་འབྲངས་རྣལ་མ་ཐོག་འགྲོ་བ་མི་གཙོ་བོ་གྱུར་བའི་མཐའ་ཡས་པའི་སེམས་ཅན་མཐའ་དག་གི་ཆེད་དུ་སྨོན་ལམ་རྒྱག་བཞིན་ཡོད་ལ། གནས་ཁྱད་པར་ཅན་འདིར་སྨོན་ལམ་བརྒྱབ་དུས་གཏན་གཏན་འགྲུབ་པའི་རྐྱེན་ཞིག་ཡོད་པ་རེད། ཅེས་གསུངས་སོང་།

གསར་འགོད་པ། བྱམས་པ་ཚེ་རིང་།

རྩོམ་སྒྲིག་པ། པདྨ་མཚོ།