ཨེ་ཤ་ཡའི་སྐྱེས་པའི་རྐང་སྤོལ་རྩེད་འགྲན་ཁྲོད་རྒྱ་གར་ཕམ་ཉེས་བྱུང་།

ད་ལྟ་དཀྱིལ་ཤར་ཨེ་ཤ་ཡར་བསྡུ་མུས་ཡིན་པའི་ཨེ་ཤ་ཡའི་སྐྱེས་པའི་རྐང་སྤོལ་རྩེད་འགྲན་ཁྲོད་རྒྱ་གར་གྱི་རྐང་སྤོལ་རུ་ཁག་ལ་ཕམ་ཉེས་བྱུང་ནས་བསྐྱར་འགྲན་ཁག་ལ་ཞུགས་ཐུབ་མེད་པ་རེད།

India knocked out of Asian Cup after losing 0-1 to Syria in last group match

འདི་ལོའི་ཕྱི་ཟླ་ ༡ ཚེས་ ༡༢ ནས་ཟླ་ ༢ ཚེས ༡༠ བར་ཨེ་ཤ་ཡའི་སྐྱེས་པའི་རྐང་སྤོལ་འགྲན་ཚོགས་དེ་དཀྱིལ་ཤར་ཨེ་ཤ་ཡའི་ཁ་ཌར་རྒྱལ་ཁབ་ཏུ་བསྡུ་མུས་ཡིན་པ་ལྟར། ཁ་སང་རེས་གཟའ་མིག་དམར་ཉིན་གྱི་དགོང་མོར་རྒྱ་གར་གྱི་སྐྱེས་པའི་རྐང་སྤོལ་རུ་ཁག་དང་དཀྱིལ་ཤར་ཨེ་ཤ་ཡའི་སི་རི་ཡ་གཉིས་ཀྱི་རྩེད་འགྲན་ཁྲོད། རྩེད་འགྲན་གྱི་དུས་བཀག་སྐར་མ་ ༧༦ སྟེང་སི་རི་ཡའི་རུ་ཁག་གིས་སྤོ་ལོ་གཅིག་བླུགས་ནས་འགྲན་རྒྱལ་བྱུང་ཡོད་ཅིང་། རྒྱ་གར་འདི་ལོའི་ཨེ་ཤ་ཡའི་རྐང་སྤོལ་རྩེད་འགྲན་ཁྲོད་ཐོག་མའི་རྩེད་འགྲན་ལས་ཕམ་ཉེས་བྱུང་ནས་བསྐྱར་འགྲན་ཁག་ལ་ཞུགས་ཐུབ་མེད་པ་རེད།

འདི་ལོའི་ཨེ་ཤ་ཡའི་སྐྱེས་པའི་རྐང་སྤོལ་འགྲན་ཚོགས་དེའི་ཁྲོད་རྒྱལ་ཁབ་མི་འདྲ་བ་ ༢༤ ཡི་རུ་ཁག་དྲག་འདེམས་བྱུང་སྟེ། ཐོག་མའི་རྩེད་འགྲན་གྱི་འཆར་འགོད་སྡེ་ཚན་གཉིས་པའི་ནང་། ཨོ་གླིང་གི་སྐྱེས་པའི་རུ་ཁག་དང་། ཨུ་ཛི་བྷི་ཀི་སི་ཐན། སི་རི་ཡ། རྒྱ་གར་བཅས་ཡོད་ཅིང་རུ་ཁག་དེ་དག་གི་བར་རྩེད་འགྲན་བྱས་པའི་ཁྲོད། རྒྱ་གར་བསྟུད་མར་རྩེད་འགྲན་རིམ་པ་གསུམ་ལས་ཕམ་ཉེས་བྱུང་ནས། མཐའ་མའི་རྩེད་འགྲན་བཅུ་དྲུག་གི་ཁོངས་སུ་ཚུད་མི་འདུག་ལ། རྒྱ་གར་གྱི་སྐྱེས་པའི་རྐང་སྤོལ་རུ་ཁག་དེ་ཕྱི་ལོ་ ༡༩༨༤ དང་༢༠༡༡། དེ་བཞིན་ཕྱི་ལོ་ ༢༠༡༩ བཅས་སུ་ཐོག་མའི་རྩེད་འགྲན་ལས་ཕམ་ཉེས་བྱུང་བ་རེད།

འདས་པའི་ཉིན་ཤས་རིང་རྒྱ་གར་གྱི་སྐྱེས་པའི་རྐང་སྤོལ་རུ་ཁག་གིས་རྩེད་འགྲན་ཐེངས་གསུམ་བྱས་པའི་ཁྲོད། ཨོ་གླིང་གིས་སྤོ་ལོ་གཉིས་དང་། ཨུ་ཛི་བྷལ་ཀི་སི་ཐན་གྱིས་སྤོ་ལོ་གསུམ། དེ་བཞིན་སི་རི་ཡས་སྤོ་ལོ་གཅིག་བཅས་བླུགས་ནས་རྩེད་འགྲན་ཚང་མར་ཕམ་ཉེས་བྱུང་ཡོད་པ་མ་ཟད། རྒྱ་གར་གྱིས་འགྲན་ཡའི་རུ་ཁག་ཁག་ལ་སྤོ་ལོ་གཅིག་ཀྱང་བླུགས་ཐུབ་མེད་པ་རེད།

ད་བར་ཉིན་གྲངས་ ༡༡ ལྷག་གི་རིང་རྩེད་འགྲན་བྱས་པའི་ཁྲོད་ཊ་ཇི་ཀི་སི་ཐན་དང་། ཨ་རབ་སྤྱི་མཐུན་རྒྱལ་ཁབ། ཨི་རག ཨོ་གླིང་། ཨི་རན། སི་རི་ཡ། ཁ་ཌར། ཨུ་ཛི་བྷི་ཀི་སི་ཐན་བཅས་ཀྱི་རྐང་སྤོལ་རུ་ཁག་རྣམས་རྩེད་འགྲན་བཅུ་དྲུག་གི་ཁོངས་སུ་ཚུད་ཟིན་ཡོད་ཅིང་། རུ་ཁག་གཞན་རྣམས་ཀྱིས་མུ་མཐུད་རྣོ་ངར་ཆེན་པོས་རྩེད་འགྲན་བྱེད་མུས་ཡིན་འདུག་ལ། རྩེད་འགྲན་གྱི་རུ་ཁག་བཅུ་དྲུག་ལས་བརྒྱད། བརྒྱད་ནས་བཞི། བཞི་ལས་མཐར་གསོན་གྱི་རུ་ཁག་གཉིས་ཀྱིས་ཕྱི་ཟླ་ ༢ ཚེས་ ༡༠ ཉིན་མཐའ་མའི་རྟིང་རྩོད་འགྲན་སྡུར་བྱ་རྒྱུ་ཡིན་འདུག

རྩེད་རིགས་གསར་འགྱུར་ཁང་ ( The sporting news ) སོགས་ཀྱིས་འདི་ལོའི་ཨེ་ཤ་ཡའི་རྩེད་འགྲན་གྱི་ཐོག་མའི་རྩེད་འགྲན་དང་། རྩེད་འགྲན་པ་དག་ལ་གཞིགས་ནས་དཔྱད་ཞིབ་བྱས་མཐར། རྩེད་རིགས་ཆེད་མཁས་པ་དག་གིས་འདི་ལོའི་ཨེ་ཤ་ཡའི་སྐྱེས་པའི་རྐང་སྤོལ་འགྲན་ཚོགས་དེ་ཉི་ཧོང་དང་། ལྷོ་ཀོ་རི་ཡ། ཨོ་གླིང་བཅས་གང་རུང་ཞིག་ལ་འཐོབ་པའི་ཚོད་དཔག་བྱས་ཡོད་ཅིང་། ཉི་ཧོང་གིས་ཕྱི་ལོ་ ༢༠༡༡ དང་། ༢༠༠༤། ༡༩༩༢། ༢༠༠༠། བཅས་སུ་ཨང་དང་པོ་དང་། ལྷོ་ཀོ་རི་ཡས་ཕྱི་ལོ་ ༡༩༥༦། ༡༩༦༠ གཉིས་ལ་ཨང་དང་པོ་བླངས། དེ་བཞིན་ཕྱི་ལོ་ ༢༠༡༥ ལོའི་རྩེད་འགྲན་དེ་ཨོ་གླིང་གིས་བཀྱགས་ཡོད་འདུག

ཨེ་ཤ་ཡའི་སྐྱེས་པའི་རྐང་སྤོལ་རྩེད་འགྲན་དེ་ནི་རྒྱལ་ཁབ་ཕན་ཚུན་གྱི་འབྲེལ་ལམ་དང་འཆམ་མཐུན་སོགས་ལ་དམིགས་ནས། དམག་ཆེན་གཉིས་པའི་རྗེས་སྟེ་ཕྱི་ལོ་ ༡༩༥༦ ལོར་ཐོག་མར་མགོ་བཙུགས་ནས་ལོ་བཞི་རེའི་མཚམས་སུ་རྩེད་འགྲན་བྱེད་ཀྱི་ཡོད་ཅིང་། ད་བར་རྩེད་འགྲན་ཐེངས་ ༡༨ བསྡུ་བསྐོངས་བྱས་ཏེ། ཉི་ཧོང་ལ་ཐེངས་བཞི་དང་། སོ་ཌི་ཨ་རི་ཡ་བྷི་ཡ་(Saudi Arabia) ལ་ཐེངས་གསུམ། ཨི་རན་ལ་ཐེངས་གསུམ། དེ་བཞིན་ལྷོ་ཀོ་རི་ཡ་ལ་ཐེངས་གཉིས་བཅས་ཐོབ་འདུག

གཞན་ཡང་། ཨ་ཧྥེ་རི་ཁའི་རྒྱལ་ཁབ་ཁག་གི་ཕྱི་ལོ་ ༢༠༢༣ ལོའི་སྐྱེས་པའི་རྐང་སྤོལ་འགྲན་ཚོགས་དེའང་བསྡུ་མུས་ཡིན་པ་མ་ཟད། རྐང་སྤོལ་འགྲན་སྡུར་ཁག་གི་རྒྱལ་ཕམ་དབྱེ་ཞིབ་དང་ཚོད་དཔག་བྱེད་མཁན་(OPta Analyst) ཟེར་བས་ཞིབ་འཇུག་བྱས་པ་བརྒྱུད། ཨ་ཧྥེ་རི་ཁའི་སི་ནི་གྷལ་ (Senegal) རྒྱལ་ཁབ་ཀྱི་རུ་ཁག་ལ་སླར་ཡང་ཨ་ཧྥེ་རི་ཁའི་རྐང་སྤོལ་འགྲན་ཚོགས་ལས་རྣམ་པར་རྒྱལ་ཐུབ་པའི་ཚོད་དཔག་བྱས་འདུག་ལ། སི་ནི་གྷལ་རུ་ཁག་ལ་ཕྱི་ལོ་ ༢༠༢༡ ལོར་རྒྱལ་ཁ་དེ་ཐེངས་གཅིག་ཐོབ་ཚར་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་པ། སྐལ་བཟང་སྦྱིན་པ།