སྲིད་སྐྱོང་མཆོག་གིས་ཡུ་རོབ་ཁུལ་དུ་གཞུང་འབྲེལ་སྐོར་སྐྱོད་གནང་བཞིན་པར་རྒྱ་ནག་གཞུང་ཚབ་ཁང་གིས་ངོ་རྒོལ་བསྒྲགས་གཏམ་སྤེལ།

སྲིད་སྐྱོང་སྤེན་པ་ཚེ་རིང་མཆོག་གིས་སྦལ་ཌིག་རྒྱལ་ཁབ་གསུམ་དང་། ཧྥིན་ལེན་ཌི། དབྱིན་ཡུལ། སྦེལ་ཇམ་སོགས་སུ་གཞུང་འབྲེལ་གནད་ཡོད་མི་སྣ་དང་འགྲོ་བ་མིའི་ཐོབ་ཐང་སྲུང་སྐྱོབ་པ་སོགས་ལ་མཇལ་འཕྲད་གནང་བཞིན་ཡོད་པས་ཨེ་སི་ཊོ་ནི་ཡའི་རྒྱ་ནག་གཞུང་ཚབ་ཁང་གིས་རྒོལ་གཏམ་དང་ཉེན་བརྡ་བཏང་འདུག

With Ms. Katja Nolvi, Asst. for Int’l Affairs, Finnish Parliament; Rep Sonam Frasi, OOT, London; MP Ms. Inka Hopsu; MP Maria Ohisalo; Erja Sini Kaarina Varis, Founding Director of Finnish Tibet Committee; and Secretary Lochoe Samten, OOT London.

ཟླ་འདིའི་ཕྱི་ཚེས་ ༢༢ ཉིན་ཕྱི་ཟླ་ ༢ པའི་ནང་བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྦལ་ཌིག་(Baltic States) རྒྱལ་ཁབ་གསུམ་དང་། ཧྥིན་ལེན་ཌི། དབྱིན་ཡུལ། སྦེལ་ཇམ་སོགས་སུ་གཞུང་འབྲེལ་སྐོར་སྐྱོད་གནང་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༢༦ ཉིན་སྲིད་སྐྱོང་སྤེན་པ་ཚེ་རིང་མཆོག་ཧྥིན་ལེན་ཌིའི་རྒྱལ་ས་ཧེལ་སིན་ཀི་རུ་ཕེབས་ཏེ་ཡུལ་དེའི་གཞུང་འབྲེལ་གནད་ཡོད་མི་སྣ་དང་། གྲོས་ཚོགས་འཐུས་མི་ལྕམ་ཨིན་ཀ་ (Inka Hopsu ) ལགས་དང་། གྲོས་ཚོགས་འཐུས་མི་ལྕམ་མཱ་རི་ཡ་(Maria Ohisalo ) ལགས་ཀྱི་གཙོས་ཚོགས་སྡེ་དང་འགྲོ་བ་མིའི་ཐོབ་ཐང་ཐད་ལས་ཀ་གཉེར་མཁན་དང་ཉམས་ཞིབ་པ་སོགས་སུ་མཇལ་མོལ་གནང་ཡོད་འདུག

Sikyong Penpa Tsering addressing the gathering at the hearing on “Legal Status of Tibet”.

ཟླ་འདིའི་ཕྱི་ཚེས་ ༢༥ ཉིན་ཨེ་སི་ཊོ་ནི་ཡའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གིས་བོད་དོན་དང་འབྲེལ་བའི་ནན་ཞིབ་ཞིག་གོ་སྒྲིག་གནང་ཡོད་པ་བཞིན། སྲིད་སྐྱོང་སྤེན་པ་ཚེ་རིང་མཆོག་དང་། དབྱིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ལགས། དེ་བཞིན་ལོ་རྒྱུས་མཁས་དབང་རྩོམ་པ་པོ་མའེ་ཁིལ་(Michael van Walt van Praag) ལགས་སོགས་ཀྱིས་ཉན་ཞིབ་དེར་མཉམ་ཞུགས་གནང་ཡོད་པ་དང་། སྲིད་སྐྱོང་མཆོག་གིས་བོད་ཀྱི་ལོ་རྒྱུས། དབུ་མའི་ལམ་གྱི་སྲིད་ཇུས། རྒྱ་ནག་གཞུང་གིས་བོད་ས་བཙན་འཛུལ་བྱས་པའི་ལོ་རྒྱུས་དང་། རྒྱ་ནག་གིས་བོད་ས་བཙན་འཛུལ་མ་བྱས་གོང་དུ་བོད་ནི་རང་བཙན་རྒྱལ་ཁབ་ཅིག་ཡིན་པའི་ལོ་རྒྱུས་ཀྱི་བདེན་པ་ཡོད་པའི་སྐོར་སོགས་གསུངས་འདུག ཉན་ཞིབ་དེའི་ཐོག་ཨེ་སི་ཊོ་ནི་ཡ་གྲོས་ཚོགས་འཐུས་མི་དང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཇུ་ཀུ་ཀལླེ་རཱེཌ་ལགས་དང་། གྲོས་ཚོགས་འཐུས་མི་སོ་ལྔ་ཙམ། དེ་བཞིན་གསར་འགོད་པ་དང་། ཤེས་ཡོན་པ། བོད་དོན་རྒྱབ་སྐྱོར་བ་སོགས་ཕེབས་ཡོད་འདུག

དེ་བཞིན་ཉན་ཞིབ་དེའི་ཐོག་བོད་སྐོར་རྩོམ་པ་པོ་སློབ་དཔོན་ལའོ་ལགས་ཀྱིས་རྒྱ་ནག་གི་མིང་དང་ཆིང་རྒྱལ་རབས་ཀྱི་དུས་སྐབས་ནས་བོད་དེ་རྒྱ་ནག་གི་ཆ་ཤས་མིན་པ་དེབ་ཐེར་དུ་འཁོད་ཡོད་པའི་ཁུངས་སྐྱེལ་གནང་ཡོད་པ་མ་ཟད། ལོ་རྒྱུས་མཁས་དབང་མའེ་ཁིལ་ལགས་ཀྱིས་ཀྱང་། རྒྱ་ནག་གཞུང་གིས་ལུགས་མཐུན་མིན་པའི་ཐོག་ནས་བོད་དེ་སྔ་མོ་ནས་རྒྱ་ནག་གི་ཆ་ཤས་ཡིན་ལུགས་བརྗོད་བཞིན་པ་དེ་བདེན་པ་གཏན་ནས་མིན་པ་བཅས་སོགས་འགྲེལ་བརྗོད་གནང་ཡོད་འདུག

Sikyong participates in a public dialogue on ‘Law, Ethics and Morality’ at the Splendid Palace.

ཕྱི་ཚེས་ ༢༦ ཉིན་ཨེ་སི་ཊོ་ནི་ཡར་ཡོད་པའི་རྒྱ་ནག་གཞུང་ཚབ་ཁང་གིས་ངོ་རྒོལ་བསྒྲགས་གཏམ་ཞིག་སྤེལ་བའི་ནང་། བཙན་བྱོལ་བོད་མིའི་སྒྲིག་འཛུགས་ནི་ཁ་བྲལ་བའི་ཆབ་སྲིད་ཚོགས་པ་དང་ཁྲིམས་མཐུན་མིན་པའི་ཚོགས་པ་ཞིག་སྟེ། རྒྱ་ནག་གཞུང་གིས་རྩ་ཁྲིམས་དང་ཁྲིམས་སྒྲིག་རྨེག་མེད་དུ་གཏོང་མཁན་ཞིག་ཡིན་སྐོར་དང་། དེར་འཛམ་གླིང་གི་རྒྱལ་ཁབ་གང་གིས་ཀྱང་ངོས་ལེན་བྱེད་ཀྱི་མེད་པས། རྒྱ་ནག་གཞུང་གིས་ཚོགས་པ་དེར་རྒྱལ་ཁབ་སུས་འབྲེལ་བ་བྱེད་ན་ངོ་རྒོལ་བྱེད་ཀྱི་ཡོད། ཅེས་ཉེན་བརྡ་བཏང་ཡོད་འདུག

ཡུ་རོབ་ཁུལ་གྱི་གཞུང་འབྲེལ་སྐོར་སྐྱོད་གྲུབ་རྗེས་མུ་མཐུད་ཕྱི་ཟླ་ ༢ ཚེས་ ༡༨ བར་དུ་རྒྱ་གར་ལྷོ་ཕྱོགས་སུ་སྐོར་སྐྱོད་གནང་རྒྱུ་ཡིན་འདུག

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།