རྒྱ་གཞུང་གིས་བཙན་བྱོལ་བོད་མི་རྣམས་ལ་རྒྱལ་མཚམས་ལས་བརྒལ་ཏེ་དྲག་གནོན་བྱེད་ཀྱི་ཡོད་པའི་སྙན་ཐོ་བཏོན། 

བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་བསྟི་གནས་ཁང་གིས་རྒྱ་ནག་གཞུང་གིས་བཙན་བྱོལ་བོད་མིའི་སྤྱི་ཚོགས་ནང་རྒྱལ་མཚམས་ལས་བརྒལ་བའི་དྲག་གནོན་བྱེད་ཀྱི་ཡོད་པའི་སྙན་ཐོ་ཞིག་འདོན་སྤེལ་གནང་འདུག

དེ་རིང་རེས་གཟའ་མིག་དམར་ཉིན་རྒྱ་གར་གྱི་རྒྱལ་ས་ལྡི་ལིར་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་བསྟི་གནས་ཁང་གིས། རྒྱ་ནག་གཞུང་གིས་བཙན་བྱོལ་བོད་མིའི་སྤྱི་ཚོགས་ནང་རྒྱལ་མཚམས་ལས་བརྒལ་བའི་དྲག་གནོན་ (Chinese Transnational Repression of Tibetan Diaspora Communities ) ཞེས་པའི་སྙན་ཐོ་ཞིག་འདོན་སྤེལ་གནང་སྟེ། རྒྱལ་སྤྱིའི་སྤྱི་ཚོགས་ཀྱིས་འགྲོ་བ་མིའི་ཐོབ་ཐང་ལ་འགན་སྲུང་ནན་པོའི་ཐོག་ནས་བཙན་བྱོལ་བོད་མིའི་བདེ་འཇགས་སྲུང་སྐྱོབ་དང་། རྒྱ་ནག་གཞུང་གིས་རྒྱལ་མཚམས་ལས་བརྒལ་ནས་དྲག་གནོན་བྱེད་བཞིན་པར་སྐྱོན་བརྗོད་གནང་དགོས་པ་སོགས་ཀྱི་རེ་སྐུལ་ཞུས་འདུག 

དེའི་ཐད་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་བསྟི་གནས་ཁང་གི་འཛིན་སྐྱོང་འགན་འཛིན་བསྟན་འཛིན་ཟླ་བ་ལགས་ཀྱིས་། རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་དམར་ཤོག་ཚོགས་པའི་རྒྱལ་མཚམས་ལས་བརྒལ་བའི་གཉའ་གནོན་མྱོང་མཁན་གྱི་བཙན་བྱོལ་བོད་མི་སོགས་ཀྱི་བདེ་འཇགས་ལ་འཐུས་ཚང་ལྡན་པའི་སྲུང་སྐྱོབ་དགོས་པ་མ་ཟད་རྒྱལ་ཁབ་སོ་སོའི་རང་སའི་ཐོག་གི་འགྲོ་བ་མིའི་ཐོབ་ཐང་ལ་འགན་སྲུང་ནན་པོ་ཡོང་བར་དངོས་ཤུགས་བརྒྱུད་གསུམ་ནས་གནོན་ཤུགས་སྤྲོད་ཐབས་བྱ་དགོས་པའི་རེ་སྐུལ་ཞུས་འདུག 

དེ་རིང་གི་སྙན་ཐོ་དེ་དང་འབྲེལ་ནས་བསྟི་གནས་ཁང་གིས་བོད་ཡིག་ཏུ་སྤེལ་བའི་བསྒྲགས་གཏམ་ནང་། རྒྱ་ནག་དམར་ཤོག་ཚོགས་པའི་རྒྱལ་མཚམས་ལས་བརྒལ་བའི་གཉའ་གནོན་འོག་དཀའ་སྡུག་མྱོང་མཁན་མང་དག་ཅིག་གི་གནད་དོན་སྙན་ཐོར་བཀོད་ཟིན་ཡོད་ཀྱང་ད་བར་དུ་བཙན་བྱོལ་བོད་མི་རྣམས་ལ་རྒྱལ་མཚམས་ལས་བརྒལ་བའི་གཉའ་གནོན་ཐེབས་པའི་སྐོར་གྱི་གནད་དོན་གླེང་སློང་བྱས་པ་ཤིན་ཏུ་ཉུང་། དེའི་རྒྱུ་མཚན་གཙོ་བོ་ནི་བོད་མི་ཚོས་རྒྱ་ནག་གི་གནོན་ཤུགས་དེ་དག་ཧ་ཅང་རྒྱུན་ལྡན་ཅན་དུ་བརྩིས་ནས་ཡོད་པས་ཡིན། ཞེས་དང་། རྒྱ་ནག་དམར་ཤོག་ཚོགས་པས་“དུག་ལྔ་”རུ་འབོད་པའི་བོད་མི་དང་ཡུ་གུར་བ། ཐེ་ཝན་བ། ཧོང་ཀོང་གི་ངོ་རྒོལ་ལས་འགུལ་བ་ཐེ་བའི་རྒྱ་རིགས་དམངས་གཙོ་དོན་གཉེར་བ་དང་། ཧྥ་ལོང་རྩ་རླུང་སྒོམ་སྒྲུབ་པ་སོགས་རྒྱལ་ཁབ་གཞན་དུ་གནས་པ་རྣམས་ལ་འཆར་གཞི་དང་གོ་རིམ་ལྡན་པའི་ངང་ནས་གཉའ་གནོན་ཇི་ལྟར་བྱེད་བཞིན་ཡོད་པ་གླེང་སློང་བྱ་རྒྱུ་ནི་ཤིན་ཏུ་གལ་འགངས་ཆེན་པོ་ཡིན། དེ་བཞིན་སོག་རིགས་རྣམས་ལའང་སྲིད་གཞུང་གི་གནས་རིམ་མི་འདྲའམ་སྒེར་ཐད་ནས་ཐད་ཀར་གཉའ་གནོན་འཕྲོད་ཐབས་བྱེད་བཞིན་ཡོད་པ་ར་སྤྲོད་བྱུང་ཡོད། ཅེས་བསྒྲགས་འདུག 

བསྒྲགས་གཏམ་ནང་། སྤྱིར་དེང་གི་ཆར་རྒྱ་ནག་གཞུང་གི་རྒྱལ་མཚམས་ལས་བརྒལ་བའི་གཉའ་གནོན་ལ་མི་རྣམས་ཀྱིས་དོ་སྣང་གང་འཚམ་བྱེད་ཀྱིན་ཡོད་ན་ཡང་ད་དུང་རྣམ་པ་འདྲ་མིན་གྱི་གཉའ་གནོན་བྱེད་ཐབས་དང་བཙན་བྱོལ་བོད་མི་རྣམས་ཀྱིས་མྱོང་བཞིན་པའི་གཉའ་གནོན་ལ་འཐུས་ཚང་གི་རྒྱུས་ལོན་དང་དོ་སྣང་སླེབས་ཐུབ་མེད། རྒྱ་ནག་དམར་ཤོག་ཚོགས་པས་བཙན་བྱོལ་བོད་མི་རྣམས་ནི་རང་གི་རྒྱལ་སྤྱིའི་སྟེང་གི་ཆེ་མཐོང་ལ་གནོད་པ་བྱེད་མཁན་གཙོ་བོ་ཞིག་ཏུ་ངོས་འཛིན་བྱས་ཡོད། དུས་རབས་སྔ་མའི་ལོ་རབས་བརྒྱད་ཅུ་གྱ་གྲངས་ནང་ནས་བཟུང་རྒྱ་ནག་གཞུང་གིས་བོད་ཀྱི་བླ་ན་མེད་པའི་དབུ་ཁྲིད་༧གོང་ས་སྐྱབས་མགོན་ཆེན་པོ་མཆོག་གི་རྒྱལ་སྤྱིའི་མཛད་འཕྲིན་ཁག་ལ་གང་ཐུབ་ཀྱིས་བཀག་འགོག་དང་འབྲེལ་ཡོད་སྡེ་ཁག་ལ་གནོན་ཤུགས་འཕྲོད་ཐབས་བྱས་ཡོད་པ་མ་ཟད། བཙན་བྱོལ་བོད་མིའི་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་ལས་དོན་སྒྲུབ་ཕྱོགས་ལ་རྒྱུས་ལོན་ཆེད་གསང་ཉུལ་བ་བཏང་བའི་གནད་དོན་མང་པོ་བྱུང་ཡོད། དབུས་བོད་མིའི་སྒྲིག་འཛུགས་བདེ་སྲུང་ལས་ཁུངས་ལྟར་ན་དེང་གི་ཆར་བོད་ནང་དུ་ཕ་མ་སྤུན་མཆེད་ཡོད་མཁན་གྱི་བཙན་བྱོལ་བོད་མི་བརྒྱ་ཆ་ ༨༠ ནས་ ༩༠ ཙམ་ལ་རྒྱལ་མཚམས་ལས་བརྒལ་བའི་གཉའ་གནོན་ཕོག་བཞིན་ཡོད་པ་གསལ་འདུག ཅེས་འཁོད་འདུག 

ཡང་བསྒྲགས་གཏམ་ནང་། རྒྱ་ནག་དམར་ཤོག་ཚོགས་པའི་རྒྱལ་མཚམས་ལས་བརྒལ་བའི་གཉའ་གནོན་དེ་ཉིད་ཐད་ཀར་མི་སྒེར་དང་དྲྭ་ལམ་སོགས་བརྒྱུད་ནས་སྤེལ་བཞིན་འདུག་ཅིང་གནོན་ཤུགས་འཕྲོད་ཐབས་སུ་ཐད་ཀར་འཇིགས་སྐུལ་བྱེད་པ་དང་ལུས་ལ་དྲག་སྤྱོད་སྤེལ་བ། རྒྱུ་ནོར་གྱི་བདག་དབང་བཀག་བསྡོམས་བྱེད་པ། འཐུས་མི་བརྒྱུད་ནས་བཙན་སྐུལ་བྱེད་པ་སོགས་ཐབས་ལམ་འདྲ་མིན་སྤྱོད་བཞིན་འདུག བཙན་བྱོལ་བོད་མིའི་ཁྲོད་དུ་རྒྱ་གཞུང་གིས་བོད་ནང་དུ་གནས་པའི་ཕ་མ་སྤུན་མཆེད་སོགས་ཀྱི་བདེ་འཇགས་གཏའ་མར་བཞག་ནས་གནོན་ཤུགས་འཕྲོད་ཐབས་བྱེད་པའི་གནས་ཚུལ་བྱུང་བ་ཧ་ཅང་མང་པོ་འདུག མ་ཟད་བོད་མི་རྣམས་ཀྱི་བྱ་སྤྱོད་ལ་རྒྱུན་དུ་སོ་ལྟ་ནན་པོ་བྱེད་པ་དང་སྤྱི་ཚོགས་ཁྲོད་དུ་རྒྱའི་གསང་ཉུལ་བ་འགྲེམ་འཇོག་བྱས་ཡོད་པ་སོགས་ལ་བརྟེན་ནས་བཙན་བྱོལ་བོད་མིའི་སྤྱི་ཚོགས་ཀྱི་ནུས་སྟོབས་དང་མི་ཕན་ཚུན་དབར་གྱི་ཡིད་ཆེས་ལའང་དོ་ཕོག་ཆེན་པོ་ཐེབས་བཞིན་འདུག དེར་བརྟེན་རྒྱ་ནག་དམར་ཤོག་ཚོགས་པའི་རྒྱལ་མཚམས་ལས་བརྒལ་བའི་གཉའ་གནོན་གྱིས་བཙན་བྱོལ་བོད་མི་སྤྱི་ཚོགས་ཧྲིལ་པོར་གནོད་སྐྱོན་ཐེབས་བཞིན་པ་མ་ཟད་མ་འོངས་པའི་བོད་དོན་ལས་འགུལ་ལའང་གནོད་སྐྱོན་ཚབས་ཆེན་ཐེབས་ཉེན་འདུག ཅེས་འཁོད་འདུག 

དེ་བཞིན་བསྟི་གནས་ཁང་དེས་ཞིབ་འཇུག་བྱས་པ་བརྒྱུད། རྒྱ་ནག་གཞུང་གིས་བཙན་བྱོལ་ནང་གི་ནང་མིར་འབྲེལ་ལམ་གཅོད་དུ་བཅུག་པ་དང་། བཙན་བྱོལ་བོད་མི་སྒེར་ལ་འཇིགས་སྐུལ་དང་བོད་ནང་གི་ནང་མིར་ཉེན་བརྡ་གཏོང་བ། བོད་ནང་གི་ནང་མིའི་དངུལ་གཏོང་ལེན་སོགས་ལ་བཀག་འགོག་བྱས་ནས་ནང་མིའི་འཚོ་གནས་ལ་གནོད་འཚེ་བཏང་ནས། བཙན་བྱོལ་དུ་ཡོད་པའི་བོད་མི་རྣམས་ལ་རྒྱལ་མཚམས་ལས་བརྒལ་ནས་དྲག་གནོན་དང་། གཉའ་གནོན་བྱེད་ཀྱིན་ཡོད་སྐོར་སོགས་བྱེད་ཀྱི་ཡོད་པ་སོགས་གསལ་སྟོན་བྱས་འདུག 

གསར་འགོད་པ། དཔལ་ལྡན། 

རྩོམ་སྒྲིག་པ། པདྨ་མཚོ།