གཞི་རིམ་སློབ་གྲྭའི་རིགས་ལམ་སྦྱོང་བརྡར་འདུ་འཛོམས་ཐེངས་གསུམ་པ་འཚོག་བཞིན་ཡོད་འདུག

ཉིན་གྲངས་བཅུ་གསུམ་རིང་དྷ་ས་དཔེ་སྟོན་སློབ་གྲྭ་དང་སེ་ལ་ཀུལ་བོད་ཁྱིམ་གྱི་སློབ་ཕྲུག་གྲངས་ ༤༣ མཉམ་ཞུགས་ཀྱིས་རིགས་ལམ་སྦྱོང་བརྡར་འདུ་འཛོམས་ཤིག་འཚོག་བཞིན་ཡོད་འདུག

ཟླ་འདིའི་ཕྱི་ཚེས་ ༡༧ ནས་ཕྱི་ཚེས་ ༢༩ བར་ཉིན་གྲངས་ ༡༣ རིང་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དུ། བོད་མིའི་སྒྲིག་འཛུགས་ཤེས་རིག་ལས་ཁུངས་དང་ཝཱ་ཎ་དགེ་འོས་སྡེ་ཚན་ཟུང་འབྲེལ་གྱི་གོ་སྒྲིག་འོག བཙན་བྱོལ་བོད་མིའི་གཞི་རིམ་སློབ་གྲྭའི་རིགས་ལམ་སྦྱོང་བརྡར་གྱི་འདུ་འཛོམས་ཐེངས་གསུམ་པ་འཚོག་བཞིན་ཡོད་འདུག ཐེངས་འདིའི་དབུ་འབྱེད་མཛད་སྒོ་ཐོག་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་རིགས་བདག་དབང་ཕྱུག་རྡོ་རྗེ་ནེ་གེ་མཆོག་དང་། རིགས་དྲུང་སུ་ནེ་ཏཱ་ཅན་ད་རཱ་ལགས། རིགས་དྲུང་གཞོན་པ་ཧི་མན་ཤུ་པཱན་ཌེ་ལགས། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཤེས་ཡོན་འགན་འཛིན་དངོས་གྲུབ་བསྟན་པ་ལགས། མཐོ་སློབ་ཀྱི་དགེ་བའི་བཤེས་གཉེན་རྣམས་དང་སློབ་གཉེར་བ། གཞི་རིམ་སློབ་གྲྭའི་སློབ་ཕྲུག་གྲངས་ ༤༣ བཅས་མཉམ་ཞུགས་གནང་ཡོད་འདུག

རིགས་ལམ་སྦྱོང་བརྡར་འདུ་འཛོམས་ཀྱི་གལ་གནད་སྐོར་ལ་ཤེས་ཡོན་འགན་འཛིན་དངོས་གྲུབ་བསྟན་པ་ལགས་ཀྱིས་འདི་གའི་གསར་འགོད་པར། ༧གོང་ས་རྒྱལ་བ་རིན་པོ་ཆེ་མཆོག་གིས་རིགས་ལམ་སློབ་གཉེར་གྱི་བཀའ་སློབ་རིམ་པ་མང་པོ་ཕེབས་པ་བཞིན་སྔོན་མ་ནས་གཞི་རིམ་སློབ་གྲྭ་ཁག་ཏུ་མགོ་བཙུགས་ཞུས་ཡོད། བོད་སློབ་འཛིན་ཚོགས་ཡོད་པའི་སྐབས་སུ་རྒྱ་གར་གཞུང་ནས་འཛིན་གྲྭའི་གནས་བབ་གཞིར་བཟུང་ཐོག་ལྟ་གྲུབ་དགེ་རྒན་ཁག་ཅིག་ཡོད་པ་དང་། གཞན་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་ལྟ་གྲུབ་དགེ་རྒན་གྱི་མཐུན་རྐྱེན་སྦྱར་ཏེ་འཛིན་གྲྭ་བརྒྱད་པའི་བར་དུ་འགྲོ་བཞིན་ཡོད། རིགས་ལམ་གྱིས་སློབ་ཚན་གཞན་གྱི་ནང་དོན་གཏིང་ཟབ་ཤེས་པའི་རེ་བ་བྱེད་བཞིན་ཡོད་པ་ལྟར། ཕྱི་ལོ་ ༢༠༡༢ ནས་བཟུང་ཤེས་རིག་ལས་ཁུངས་ཀྱི་གོ་སྒྲིག་འོག ལོ་ལྟར་སློབ་གྲྭ་ཁག་ཏུ་རིགས་ལམ་འདུ་འཛོམས་ཤིག་འཚོག་བཞིན་ཡོད་ཅིང། ཕྱི་ལོ་ ༢༠༢༠ ནས་རྒྱུད་སྨད་གྲྭ་ཚང་ནས་མགོ་བཙུགས་པ་དང་། ཕྱི་ལོ་༢༠༢༣ ལོར་འབྲས་སྤུངས་བློ་གསལ་གླིང་དུ་འཚོགས། ཐེངས་འདིར་ཝཱ་ཎ་མཐོ་སློབ་ཏུ་འཚོག་བཞིན་ཡོད། ཟབ་སྦྱོང་འདིའི་མིང་ལ་སློབ་ཕྲུག་རིགས་ལམ་རྒྱུས་སྟོན་པ་གསོ་སྐྱོང་ཞེས་བཏགས་ཡོད། ལྟ་གྲུབ་དགེ་རྒན་རྣམས་ཀྱིས་ཁ་དོག་དཀར་དམར་དང་། མུ་གསུམ་མུ་བཞི་སྒྲིག་སྟངས་སྦྱོང་བ་ཙམ་མིན་པར། སློབ་མའི་སྤྱི་ཡོངས་ཀྱི་ཤེས་ཚད་ཡར་རྒྱས་འགྲོ་བར་རེ་བ་རྒྱག་བཞིན་ཡོད།ཅེས་འགྲེལ་བརྗོད་གནང་བྱུང་།

ཐེངས་འདིའི་རིགས་ལམ་འདུ་འཛོམས་སྐོར་ལ་ཁོང་གིས། ཐེངས་འདིའི་འདུ་འཛོམས་ནི་གློ་བུར་བའི་ལས་གཞི་ཆགས་ཡོད། འདས་ལོའི་ཕྱི་ཟླ་བརྒྱད་པའི་མཇུག་ཏུ་མ་སུ་རི་བོད་ཁྱིམ་དུ་རིགས་ལམ་འདུ་འཛོམས་ཤིག་འཚོགས་ཡོད། སྐབས་དེར་སློབ་གྲྭ་ཁག་ཅིག་མཉམ་ཞུགས་བྱས་ཐུབ་མེད་པ་དང་། ལས་གཞིའི་རོགས་དངུལ་ལྷག་ཡོད་ཀྱང་། རིགས་ལམ་སྦྱོང་བརྡར་འདུ་འཛོམས་ཀྱི་ལས་གཞི་ཆ་ཚང་གི་འགྲོ་གྲོན་ལ་འདང་གི་མེད་པས། ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་ནས་རོགས་རམ་མཐུན་སྦྱོར་གནང་བའི་རེ་བ་ཞུས་པ་བཞིན། མཉམ་ཞུགས་གནང་མཁན་རྣམས་ཀྱི་ཆེད་དུ་བཞུགས་གནས་དང་ཞལ་ལག་མཐུན་སྦྱོར་གནང་བྱུང་། འགྲོ་གྲོན་གཞན་རོགས་དངུལ་གྱི་ལྷག་མ་ནས་འདང་འགྲོ་ཡི་རེད། སློབ་ཕྲུག་རྣམས་ལ་སློབ་སྦྱོང་བྱེད་སའི་གོ་སྐབས་འཕར་མ་ཞིག་ཐོབ་པ་ཡག་ཤོས་རེད་ལ། ཐེངས་འདིར་དྷ་ས་དཔེ་སྟོན་སློབ་གྲྭའི་སློབ་ཕྲུག་ ༣༤ དང་། སེ་ལ་ཀུལ་བོད་ཁྱིམ་ནས་ ༩ མཉམ་ཞུགས་བྱེད་བཞིན་ཡོད་ལ། ཟབ་སྦྱོང་གི་སྐབས་སུ་ཝཱ་ཎ་མཐོ་སློབ་ཀྱི་སྡེ་ཚན་ཁག་ལ་བསྐོར་བསྐྱོད་དང་། སཱ་རཱ་ནཱ་ཐའི་མཆོད་རྟེན། རྩྭ་མཆོག་གྲོང་སོགས་གནས་མཇལ་དུ་འགྲོ་འཆར་ཡོད། ཐེངས་འདིའི་རིགས་ལམ་འདུ་འཛོམས་དང་བསྟུན། མཉམ་ཞུགས་པ་རྣམས་ཀྱིས་ཝཱ་ཎ་མཐོ་སློབ་ཀྱི་སློབ་སྦྱོང་གི་མཐུན་རྐྱེན་དང་ཁོར་ཡུག་སོགས་ལ་དབྱིངས་ཞུགས་ཏེ། མ་འོངས་པར་མཐོ་སློབ་འདི་ནས་བོད་ཀྱི་སྐད་ཡིག་དང་རིག་གཞུང་སོགས་ལ་སློབ་སྦྱོང་བྱེད་འདོད་ཡོད་ཚེ། ལས་གཞི་འདིའི་དགེ་མཚན་གཉིས་པ་ཞིག་འགྲུབ་ཡོང་གི་ཡོད། ཅེས་འགྲེལ་བརྗོད་གནང་སོང་།

མ་འོངས་བའི་འཆར་གཞི་སྐོར་ལ་ཁོང་གིས། རྩིས་ལོ་རྗེས་མའི་ནང་དུའང་རིགས་ལམ་འདུ་འཛོམས་ཀྱི་ཐོག་རོགས་དངུལ་ཐོབ་ཡོད་ཅིང་། ཟབ་སྦྱོང་གི་དུས་ཚོད་ནི་དབྱར་ཁའི་གུང་གསེང་སྐབས་སུ་ཟབ་སྦྱོང་འཚོག་རྒྱུ་ཡིན་པ་དང་། སློབ་ཕྲུག་གྲངས་ ༥༠ མཉམ་ཞུགས་བྱེད་པའི་གོ་སྐབས་ཡོད། དེ་སྔ་མ་སུ་རི་སམ་བྷོ་ཌ་སློབ་གྲྭ་དང་། སེ་ལ་ཀུལ་བོད་ཁྱིམ། དྷ་ས་དཔེ་སྟོན་སློབ་གྲྭ་བཅས་རྒྱ་གར་བྱང་ཤར་ཁུལ་གྱི་སློབ་ཕྲུག་རྣམས་ལ་གོ་སྐབས་ཐོབ་ཡོད་པ་དང་། ལོ་རྗེས་མར་རྒྱ་གར་ལྷོ་ཕྱོགས་ཁུལ་གྱི་སློབ་གྲྭ་ཁག་ལ་གསལ་བསྒྲགས་བཏང་ཡོད། ཅེས་འགྲེལ་བརྗོད་གནང་སོང་།

དབུ་འབྱེད་མཛད་སྒོ་སྐབས་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་རིགས་བདག་དབང་ཕྱུག་རྡོ་རྗེ་ནེ་གེ་མཆོག་གིས། རིགས་ལམ་ནི་སློབ་སྦྱོང་བྱེད་པར་གལ་གནད་ཆེན་པོ་ཞིག་ཆགས་ཡོད། རིགས་ལམ་གྱིས་གཏན་ལ་ཕབ་པའི་དོན་ཅི་ཞིག་ཡིན་པ་ཤེས་དགོས་པ་གལ་ཆེན་པོ་རེད། ང་ཚོས་ཤེས་ཡོན་ཡར་རྒྱས་ཀྱི་ཆེད་དུ་རིགས་ལམ་བེད་སྤྱོད་གཏོང་བཞིན་ཡོད། དེ་ཡང་ཤེས་ཡོན་གྱི་དགོས་མཁོ་དང་ཁེ་ཕན་ཤེས་དགོས། དེ་དག་ཤེས་ཚེ་སློབ་སྦྱོང་གི་འདུན་པ་དང་སྤྲོ་བ་རང་བཞིན་གྱི་སླེབས་ཀྱི་ཡོད། དེ་དང་མཉམ་དུ་ཤེས་ཡོན་ཡོད་པའི་རྒྱལ་ཁབ་དང་། སྤྱི་ཚོགས། ཁྱིམ་ཚང་གི་གནས་སྟངས་ཀྱི་ཁྱད་པར་ཡང་ཤེས་དགོས། ད་ལྟ་འཛམ་བུ་གླིང་གི་གནས་སྟངས་དེ་ཁ་པར་ལས་མཐོང་ཐུབ་པ་ཡང་ཤེས་ཡོན་ཅན་གྱིས་བཟོས་པ་ཞིག་རེད། སོ་སོས་ཅི་ཞིག་ལ་བརྩོན་པ་བྱས་ན་དེ་ཐོབ་པའི་ངེས་པ་རྙེད་དགོས། ཕྱི་ནང་གི་ཡར་རྒྱས་བྱུང་བ་དེ་སློབ་སྦྱོང་ལ་བརྟེན་ནས་བྱུང་བ་སེམས་སུ་ཉར་རོགས། ཞེས་སོགས་གསུངས་སོང་།

ཝཱ་ཎ་གཙུག་ལག་སློབ་གཉེར་ཁང་གི་དགེ་འོས་སྡེ་ཚན་གྱི་ལྟ་གྲུབ་དགེ་བཤེས་བློ་བཟང་རྒྱ་མཚོ་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རེ་བཞིན། བོད་མིའི་སྒྲིག་འཛུགས་ཤེས་རིག་ལས་ཁུངས་དང་ཝཱ་ཎ་མཐོ་སློབ་གཉིས་ཀྱི་མཐུན་འགྱུར་དང་རྒྱབ་སྐྱོར་འོག རིགས་ལམ་བརྒྱུད་ཚན་རིག་དང་ཨང་རྩིས་ཀྱི་ཁྲིད་དེབ་གསུམ་བཏོན་ཡོད་པ་མ་ཟད། རིགས་ལམ་ཐད་སློབ་ཕྲུག་རྣམས་ཀྱི་ཟབ་སྦྱོང་སོགས་བྱས་མྱོང་ཡོད་ཅིང་། སློབ་ཕྲུག་རྣམས་ཀྱིས་དགེ་རྒན་གྱིས་བསླབ་པའི་རྟགས་གསལ་ཙམ་ལས། བརྗོད་གཞི་གཞན་པའི་ཐོག་རྟགས་གསལ་གྱི་ལམ་ནས་ལན་འདེབས་མ་ཐུབ་ཚེ། རིགས་ལམ་འགྲོ་སྟངས་ཡག་པོ་ཆགས་མེད་།ཅེས་བརྗོད་སོང་།

དེ་བཞིན་སེ་ལ་ཀུལ་བོད་ཁྱིམ་གྱི་ལྟ་གྲུབ་དགེ་རྒན་བསྟན་འཛིན་ཐེག་མཆོག་ལགས་ཀྱིས། ནང་དོན་རིག་པ་དང་། བརྡ་སྤྲོད་རིག་པ། ཚན་རིག ཨང་རྩིས་སོགས་གང་གི་ཐོག་སློབ་སྦྱོང་བྱེད་བཞིན་ཡོད་ཀྱང་། ཚད་མ་རིག་པ་ནས་གསུངས་ཡོད་པའི་རིགས་ལམ་བེད་སྤྱོད་བྱས་ཚེ། སློབ་སྦྱོང་ཧ་ཅང་སྤུས་དག་པོ་ཞིག་ཤེས་ཐུབ་པའི་སེམས་ཚོར་བྱུང་། རང་ཉིད་ལ་མཚོན་ན་ནང་བསྟན་གྱི་གཞུང་ནས་གསུངས་བའི་ཉམས་ལེན་དེ་རིགས་ལམ་གྱི་ཐོག་ངེས་པ་རྙེད་ཀྱི་འདུག་ལ། ཐེངས་འདིར་སློབ་ཕྲུག་ཚོས་ཀྱང་རིགས་ལམ་སློབ་སྦྱོང་གི་གོ་སྐབས་ཆུད་ཟོས་སུ་མ་བཏང་བར་འབད་བརྩོན་བྱ་རོགས། ཞེས་བརྗོད་སོང་།

གསར་འགོད་པ། བྱམས་པ་ཚེ་རིང་།