གྲོས་ཚོགས་ཚོགས་དུས་དྲུག་པའི་མཇུག་སྐྱོང་ལས་རིམ་དབུ་འཛུགས་གནང་སོང་།

སྐབས་ ༡༧ སྤྱི་འཐུས་ལྷན་ཚོགས་ཀྱི་ཚོགས་དུས་དྲུག་པའི་མཇུག་སྐྱོང་ལས་རིམ་དབུ་འཛུགས་དང་འབྲེལ་སྤྱི་འཐུས་སྒེར་བ་ཞིག་གི་གནད་དོན་ཐོག་བདེ་སྲུང་ལས་ཁུངས་ཀྱི་རྩད་ཞིབ་བྱས་འབྲས་སྙན་སྒྲོན་གནང་སོང་།

དེ་རིང་ནས་ཕྱི་ཚེས་ ༡༦ བར་ཉིན་གྲངས་བཞིའི་རིང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་འཕྲོ་སྐྱོང་ལས་དོན་དངོས་སུ་མགོ་འཛུགས་གནང་སོང་བ་དང་། ལས་རིམ་གྱི་ཐོག་མར་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཚོགས་གཙོའི་གསུང་བཤད་གནང་ཞིང་། ཚོགས་དུས་དྲུག་པའི་ལས་ཉིན་ ༤ པའི་ཚོགས་ཐུན་ ༡ པོའི་སྟེང་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་གསུམ་བཏོན་གནང་འདུག་པ་དང་། མཇུག་སྐྱོང་གྲོས་ཚོགས་འདིའི་རིང་སྤྱི་འཐུས་ ༤ དགོངས་པ་ཞུས་ཡོད་པ་ལས། སྤྱི་འཐུས་གཉིས་ཀྱིས་ལས་ཉིན་བཞིའི་རིང་དང་། སྤྱི་འཐུས་གཅིག་གིས་ཉིན་གཅིག་དང་གཞན་ཞིག་གིས་ཉིན་གཅིག་དང་ཕྱེད་ཀའི་རིང་དགོངས་པ་ཞུས་ཡོད་འདུག

དེ་རིང་གི་ཞོགས་པའི་ཚོགས་ཐུན་དང་པོའི་སྟེང་། འདས་ལོའི་ཕྱི་ཟླ་ ༡༠ ཚེས་ ༢༧ ཉིན་གྱི་ཕྱི་དྲོར་འདས་གྲོངས་སུ་གྱུར་བའི་བོད་མི་མང་སྤྱི་འཐུས་ཟུར་པ་གྲའུ་དཔོན་རིན་ཆེན་ཚེ་རིང་མཆོག་དང་། འདས་ལོའི་ཕྱི་ཟླ་ ༡༡ ཚེས་ ༢༣ ཉིན་འདས་གྲོངས་སུ་གྱུར་བའི་བོད་མི་མང་སྤྱི་འཐུས་ཚོགས་གཞོན་ཟུར་པ་གྲ་ཕྱི་ཕུན་རབ་བློ་བཟང་དར་རྒྱས་མཆོག འདས་ལོའི་ཕྱི་ཟླ་ ༩ ཚེས་ ༢༩ ཉིན་འདས་གྲོངས་སུ་ཕྱིན་པའི་ཨ་རིའི་གྲོས་ཚོགས་གོང་མའི་འཐུས་མི་བོད་དོན་རྒྱབ་སྐྱོར་ཡུན་རིང་གནང་མཁན་ལྕམ་སྐུ་ཌཡེ་ནེ་ཕ་ཧེན་སི་ཊིན་ (Dianne Feinstein) མཆོག་བཅས་ལ་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་གཞི་གྲོས་འཆར་ ༣ བཏོན་ཏེ། དམ་པ་དེ་དག་གི་འབྲེལ་ཡོད་ནང་མི་ལྟོས་བཅས་ལ་གཞུང་འབྲེལ་མྱ་ངན་དང་ཐུགས་གསོ་གནང་སོང་།

དེ་རིང་གི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་མཇུག་སྐྱོང་དང་འབྲེལ་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། འདས་ལོར་སྤྱི་འཐུས་སྒེར་བ་ཞིག་དང་འབྲེལ་ནས་གྲོས་ཚོགས་ཚོགས་དུས་དྲུག་པ་ཚོགས་མཚམས་བཞག་ཅིང་། ཚོགས་དྲུང་ལས་ཁུངས་བརྒྱུད་ཚོགས་གཙོ་གཞོན་དང་བཀའ་ཤག་བར་བཀལ་མོལ་བྱུང་བའི་བརྒྱུད་རིམ་སོགས་ངོ་སྤྲོད་གྲུབ་མཚམས།  སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་དང་འབྲེལ་བའི་བདེ་སྲུང་ལས་ཁུངས་ཀྱི་སྙན་ཐོ་སྒྲོག་སྦྱངས་གནང་བ་དང་བསྟུན།  འདས་ལོའི་སྤྱི་ཟླ་ ༩ པའི་ཚོགས་དུས་དྲུག་པའི་ལས་ཉིན་དང་པོ་དང་འབྲེལ་བའི་སྤྱི་འཐུས་ཟླ་བ་ཕུན་སྐྱིད་ལགས་དང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་གཉིས་བར་གྱི་ལས་རིམ་བཏོན་པ་དང་འབྲེལ་བའི་ཕན་ཚུན་ཚིག་རྩུབ་དང་། ཟུར་ཟ། དམའ་འབེབས། སྐྱོན་འཛུགས་བྱས་པ་ཆ་ཚང་གྲོས་ཚོགས་ནས་ཕྱིར་འཐེན་བྱས་པའི་ཐག་གཅོད་བྱུང་བ་ཡིན། དེ་རིང་ནས་གནམ་མཁའ་གཡའ་དག་དང་། ས་གཞི་རྡུལ་དག་ཆགས་པ་ཡིན། ཞེས་གསུངས་སོང་།

སྤྱི་འཐུས་སྨོན་ལམ་མཐར་ཕྱིན་དང་འབྲེལ་བའི་བདེ་སྲུང་ལས་ཁུངས་ཀྱི་གསལ་བཤད་ཡི་གེ་དེའི་ནང་། སྤྱི་འཐུས་དགེ་བཤེས་སྨོན་ལམ་མཐར་ཕྱིན་དང་རྒྱ་ནག་གཞུང་ཚབ་ཁྲིན་ཧྲི་མིན་གཉིས་སི་ལི་གུ་རིར་ཐུག་འཕྲད་བྱུང་ཡོད་མེད་སྐོར་གྲོས་ཚོགས་ནང་གླེང་སློང་གིས་དཔལ་ལྡན་ཚོགས་གཙོ་སྦྲེལ་པོས་འདི་ལས་ནས་ཁ་གསལ་བཟོ་དགོས་པའི་ལམ་སྟོན་ཕེབས་པ་དགོངས་མངའ་ལྟར། འདི་ལས་ནས་གནས་ཚུལ་ཡོང་ཁུངས་དང་། འབྲེལ་ཡོད་ཁག་བརྒྱུད་རྩད་ཞིབ་མཐིལ་ཕྱིན་ཞུ་འབྲས་ཀྱི་གནད་དོན་སྙན་གསན་ཞུ་རྒྱུ་ཁག་གཤམ་གསལ་ལྟར། དང་པོ། རྒྱ་ནག་གཞུང་ཚབ་ལས་བྱེད་དེ་བཞིན་ཕྱི་ལོ་ ༢༠༢༣ ཟླ་ ༧ ཚེས་ ༦ ཉིན་གྱི་ཉིན་གུང་སི་ལི་གུ་རིར་ (Mayfair Tea Resort) ཌིའི་མགྲོན་ཁང་དེ་འབྱོར་ནས་ཞགས་སྡོད་བྱས་ཡོད་འདུག གཉིས་པ། གོང་ཚེས་ཀྱི་དུས་ཚོད་དེ་རང་ལ་སྤྱི་འཐུས་སྨོན་ལམ་མཐར་ཕྱིན་དང་རོགས་པ་གཅིག་བཅས་མགྲོན་ཁང་དེ་རང་ལ་ཕེབས་ཡོད་པ་རེད་འདུག གསུམ་པ། མགྲོན་ཁང་དེའི་ནང་དོ་བདག་གཉིས་ཐུག་འཕྲད་བྱས་ཡོད་པའི་དངོས་དཔང་ར་འཕྲོད་པ་ཐུབ་པ་མི་འདུག ཅེས་གསལ་འདུག

དེ་རྗེས་སྤྱི་འཐུས་འཇུ་ཆེན་དཀོན་མཆོག་ཆོས་སྒྲོན་ལགས་ཀྱིས་ལས་རིམ་རྣམ་གཞག་བཏོན་ཏེ། ངའི་ལས་རིམ་རྣམ་གཞག་དེ་གནས་ཚུལ་དང་པོ་དེའི་ཐོག་ལ་ཡིན། རྒྱུ་མཚན་ནི་ཚོགས་གཙོས་ཐག་གཅོད་གནང་སོང་སྟེ། གནས་ཚུལ་དང་པོ་འབྱུང་ས་དང་གཞི་མེད་སྐྱོན་བརྗོད་བྱེད་མཁན་སྤྱི་འཐུས་ཟླ་བ་ཕུན་སྐྱིད་ལགས་ཀྱིས་དགེ་བཤེས་སྨོན་ལམ་མཐར་ཕྱིན་ལགས་ལ་སྐྱོན་འཛུགས་བྱས་པ་དེ་གཞི་མེད་སྐྱོན་བརྗོད་ཡིན་པ་གསལ་པོ་ཆགས་ཀྱི་འདུག དེར་བརྟེན་དོ་བདག་སྤྱི་འཐུས་སྐྱོན་འཛུགས་བྱེད་མཁན་གྱིས་དགོངས་སེལ་ཞུས་ན་ཡག་པོ་ཡོད་རེད་བསམ་གྱི་འདུག སྤྱིར་བཏང་ཡིག་ཆའི་ཐོག་ནས་ཚོགས་གཙོས་ཐག་གཅོད་གནང་སྟེ་ཕྱིར་འཐེན་བྱེད་ཀྱི་ཡིན་གསུངས་སོང་སྟེ། དོ་བདག་སྤྱི་འཐུས་ཀྱིས་གཞི་མེད་སྐྱོན་བརྗོད་དེ་གསལ་བོ་ཆགས་དུས་དགེ་བཤེས་སྨོན་ལམ་མཐར་ཕྱིན་ལགས་ལ་དགོངས་སེལ་ཞིག་ཞུས་ན་ཡག་པོ་ཡོད་རེད་བསམ་གྱི་འདུག ཅེས་བརྗོད་སོང་།

སྐབས་དེར་སྤྱི་འཐུས་ཟླ་བ་ཕུན་སྐྱིད་ལགས་ཀྱིས། ཁ་ཁུ་སིམ་པོར་འདུག་དགོས་བསམ་སོང་། ཚོགས་གཙོའི་ཐག་གཅོད་ཟིན་ནའང་ད་དུང་འཁྲུག་པ་རྒྱག་རྒྱུའི་གོམས་གཤིས་ཡོད་མཁན་འདིས་འཁྲུག་པ་མུ་མཐུད་དུ་སློང་དུས། ཚོགས་གཙོས་འཁྲུག་པ་བསླང་བཅུག་གི་འདུག ཐག་གཅོད་སྒང་ལ་ཐག་བཅད་ནས་སྡོད་དགོས་རེད། འོན་ཀྱང་། དེ་འདྲ་བྱས་ནས་མ་བསྡད་སྟབས་རྙོག་དྲ་མུ་མཐུད་དུ་ཡོང་གི་རེད། གང་ཟག་སྤྱི་འཐུས་འདིའི་ཁེ་ལས་དེ་ག་རང་རེད། བྱས་ཙང་དེ་འདྲ་བསླང་བསྡད་ན་ཕན་ཐོགས་ག་རེ་ཡོད་དམ། ངས་གནད་དོན་ཚར་བ་ཞིག་ལ་ཁུ་སིམ་མར་འདུག་དགོས་བསམ་སོང་། ཡང་ཡར་སློང་གི་འདུག་ག དེར་བརྟེན་དེ་ཚོའི་ཐོག་ལ་སྟངས་འཛིན་མ་གནང་ན། ད་ལྟ་ཡོང་བའི་གནས་ཚུལ་ཚང་མ་དེ་འདྲ་བྱས་ནས་ཡོང་གི་ཡོད་རེད་གདའ། དེ་མིན་པའི་གནད་དོན་ཞུ་རྒྱུ་མང་པོ་ཡོད་ཀྱང་ཞུ་མི་དགོས་པའི་གཙོ་འདོན་བྱས་ཏེ། ཡག་ས་ཞིག་ལ་འགྲོ་ཐུབ་ན་བསམ་པའི་ཀུན་སློང་ཡོད། ད་དུང་ཡང་ཆ་ཤས་ལེན་དགོས་པ་དང་ག་རེ་ཞུ་དགོས་བྱུང་ནའང་ཞུ་རྒྱུ་ཡིན། དགོངས་སེལ་ཞུ་དགོས་པའི་གནད་དོན་ཁྱོན་ནས་མེད། ད་བར་དགོངས་སེལ་ཞུ་རྒྱུའི་ལམ་ལུགས་མེད་པ་ལ་ངས་དགོངས་སེལ་ག་རེ་བྱས་ནས་ཞུ་དགོས་རེད། ཅེས་ལན་འདེབས་གནང་སོང་།

སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་རྒྱ་ནག་གི་ལས་བྱེད་ཅིག་དང་ཐུག་འཕྲད་བྱས་པའི་གནད་དོན་དེ་གཙང་སེལ་བྱུང་བ་དང་འབྲེལ་ནས་འདི་གའི་གསར་འགོད་པར། ཁ་སང་སྔོན་མའི་གྲོས་ཚོགས་སྐབས་ང་ལ་སྐྱོན་འཛུགས་ཀྱི་གནས་སྟངས་ལས་འཕྲོས་ནས་ད་ལྟ་བར་གྲོས་ཚོགས་འགག་པའི་གནས་སྟངས་འདི་བྱུང་བ་རེད། དེ་ཚང་མས་མཁྱེན་གསལ་རེད། ང་རང་ལ་ཆ་མཚོན་ན་ང་རང་གི་གནས་སྟངས་དེ་གང་འདྲ་ཆགས་ཡོད་པ་དང་། ངའི་ད་ལྟ་བར་གྱི་ཆབ་སྲིད་ཀྱི་གནས་སྟངས་ལངས་ཕྱོགས། ལྟ་བ་ཁུར་སྟངས། བོད་ཀྱི་བསྟན་པ་ཆབ་སྲིད། ༧གོང་ས་སྐྱབས་མགོན་རིན་པོ་ཆེ་མཆོག་སོགས་གང་གི་ཐོག་ནས་ཡིན་ན་ཡང་། བསྟན་དགྲ་རྒྱ་མི་དམར་པོ་དང་དུས་ནམ་ཡང་འབྲེལ་བ་མེད་པ་དེ་གསལ་པོ་ཡིན་པ་ང་རང་གིས་ཤེས་ཀྱི་ཡོད། ཡིན་ན་ཡང་། གྲོས་ཚོགས་ནང་ལ་གླེང་སློང་བྱུང་། བདེ་སྲུང་ལས་ཁུངས་བརྒྱུད་ནས་འདྲི་རྩད་ཅིག་བྱུང་བས། ང་རང་ཚོའི་སྤྱི་ཚོགས་ནང་ལ་ཟང་ཟིང་མང་པོ་ཞིག་ཡོང་དུས། དེ་དག་བེད་སྤྱོད་བཏང་ནས་སྤྱི་ཚོགས་ཐོག་ལ་མང་པོ་ཞིག་ཡོང་གི་འདུག དེ་འདྲ་གནས་སྟངས་ཤིག་མི་ཡོང་བའི་ཆེད་དུ་དམ་པོ་ཞིག་བྱ་དགོས་པའི་གནས་སྟངས་ཤིག་ཆགས་པ་རེད། དེ་ལ་བརྟེན་ནས་བཀའ་ཤག་ཡིན་ནའང་འདྲ། བདེ་སྲུང་ལས་ཁུངས་ཡིན་ནའང་འདྲ། དེ་དག་གིས་གང་ཐུབ་ཐུབ་ཀྱིས་འབད་བརྩོན་གནང་ཡོད། ཅེས་དང་། ད་ལན་གྱི་ཞིབ་འཇུག་གི་བརྒྱུད་རིམ་དེའི་ནང་། རྒྱ་གར་གཞུང་གི་གསང་བའི་ལས་ཁུངས་ཚད་ལྡན་ཁག་གིས་དེ་འདྲ་ཞིག་(རྒྱ་ནག་གི་ལས་བྱེད་དང་ཐུག་པ) བྱས་མེད་པ་གསལ་པོ་གསལ་རྐྱང་རེད། གནས་ཚུལ་དེ་བདེ་སྲུང་ལས་ཁུངས་ནས་བཀའ་ཤག་ལ་ཕུལ། དེ་ནས་གྲོས་ཚོགས་ཚོགས་གཙོའི་ཡི་གེ་སྙན་སྒྲོན་ཞུས་པ་ནང་བཞིན། གནས་སྟངས་དེ་གསལ་པོ་གསལ་རྐྱང་ཆགས་ཡོད། ཅེས་གསུངས་སོང་།

གནད་དོན་དེ་དག་ལ་འབྲེལ་ནས་སྤྱི་འཐུས་ཟླ་བ་ཕུན་སྐྱིད་ལགས་ཀྱིས། ང་ལ་དམིགས་བསལ་བརྡ་ལན་ཞུ་ཡ་གང་ཡང་མེད། ཚོགས་གཙོ་མཆོག་གིས་བདེ་སྲུང་ལས་ཁུངས་ཀྱི་བཀའ་ཡིག་རྣམས་ལྗགས་ཀློག་གནང་བ་རེད། གསལ་བཤད་བྱས་པ་རེད། གྲོས་ཚོགས་འཐུས་མི་ཚང་མས་དེ་ག་རང་གི་སྒང་ལ་ངོས་ལེན་གནང་ནས་འགྲོ་བཞིན་པ་རེད། ཚོགས་གཙོས་ད་བར་གྱི་བྱུང་རིམ་ཚང་མ་ཕྱིར་འཐེན་ཡིན། ཚང་མ་གྲོས་ཚོགས་དེབ་ཐེར་ནས་མར་བཏོན་གྱི་ཡིན་ཞེས་བཀའ་གནང་བ་དང་། ནམ་མཁའ་གཡའ་དག་དང་ས་གཞི་རྡུལ་དག་ཡིན་གསུངས་པ་རེད། ཚོགས་གཙོས་གྲོས་ཚོགས་ནང་ལ་བཀའ་འདི་གནང་ནས་གྲོས་ཚོགས་ཞི་འཇམ་པོའི་ཐོག་ནས་འགྲོ་ཡི་ཡོད་པ་དེ་དེ་བཞན་འགྲོ་ཡ་རེད་མ་གཏོགས། དེ་ལས་འཕྲོས་ནས་ཞུ་རྒྱུ་གང་ཡང་མེད། ཅེས་གསུངས་སོང་།

སྲིད་སྐྱོང་དང་ནང་སྲིད་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་ནང་སྲིད་ལས་ཁུངས་ཀྱི་ལས་བསྡོམས་སྙན་སྒྲོན་ཞུས་མཚམས། ལས་བསྡོམས་ཐོག་སྤྱི་འཐུས་རྣམ་པས་བགྲོ་གླེང་དབུ་འཛུགས་ཞུས་སོང་།

གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ། དཔལ་ལྡན། དོན་འགྲུབ་བཀྲ་ཤིས།