ཁ་སང་ཁེ་ན་ཌའི་དགོང་དྲོའི་ཆུ་ཚོད་ ༩།༠༥ ཙམ་ལ་གཟིམ་ཤག་ཏུ་བཀའ་ཟུར་བཀྲས་མཐོང་ཚེ་དབང་ཆོས་རྒྱལ་མཆོག་འདས་གྲོངས་སུ་གྱུར་བའི་གནས་ཚུལ་ཐོན་པ་དང་དེ་རིང་བོད་མིའི་སྒྲིག་འཛུགས་ཀྱིས་ལྷན་ཁང་ཁག་ཉིན་ཕྱེད་ལས་མཚམས་བཞག་སྟེ་མཆོད་འབུལ་སྨོན་ལམ་འཚོགས་སོང་།
དེ་རིང་ཉིན་རྒྱབ་ཆུ་ཚོད་ ༢ སྟེང་གངས་སྐྱིད་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་ཆུང་རྣམ་པ་དང་སྲི་ཞུའི་ལས་བྱེད་བཅས་འཛོམས་པའི་ཐོག བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་ཀྱིས་དམ་པ་ཁོང་གི་ལོ་རྒྱུས་སྒྲོག་སྦྱངས་གནང་གྲུབ་མཚམས་ལས་བྱེད་ཡོངས་ནས་བསྔོ་སྨོན་གསུང་འདོན་དང་། དམ་པ་ཁོང་ལ་མྱ་ངན་གུས་འདུད་དང་གདུང་སེམས་མཉམ་སྐྱེད་མཚོན་སླད་ཉིན་རྒྱབ་ཆུ་ཚོད་ ༣ པ་ནས་དབུས་ཀྱི་ལས་ཁུངས་ཁག་ལས་མཚམས་བཞག་སོང་།
བཀའ་ཟུར་དམ་པ་བཀྲས་མཐོང་ཚེ་དབང་ཆོས་རྒྱལ་མཆོག་ནི་ཕྱི་ལོ་ ༡༩༣༣ ལོར་ཆབ་མདོར་འཁྲུངས་ཤིང་། ཕྱི་ལོ་ ༡༩༥༩ ལོར་རྒྱ་གར་དུ་ཕེབས། ཕྱི་ལོ་ ༡༩༦༤ ལོར་ལྡི་ལི་སྐུ་ཚབ་དོན་གཅོད་ཀྱི་ཕྱག་རོགས་གནང་། ཕྱི་ལོ་ ༡༩༦༦ ལོར་སྐུ་སྒེར་ཡིག་ཚང་དུ་གསུང་བསྒྱུར་གྱི་ཞོར་དུ་ཕྱི་འབྲེལ་བཀའ་བློན་གྱི་ཕྱག་རོགས་ཐུགས་འགན་བཞེས། ཕྱི་ལོ་ ༡༩༦༧ ལོར་མོན་གྷོ་བོད་མིའི་གཞིས་ཆགས་ཐོག་མར་འཛུགས་སྐབས་གཞིས་མགོ་གནང་ཞིང་། ཕྱི་ལོ་ ༡༩༦༨ ནས་ ༡༩༧༥ བར་ལྷོ་ཕྱོགས་གཞིས་ཆགས་ཁག་གི་ལྷོ་སྤྱི་དང་མཉམ་དུ་ཤེས་རིག་བཀའ་བློན་གྱི་ཕྱག་རོགས། ད་དུང་དབུས་བོད་སློབ་འཛིན་སྐྱོང་ཚོགས་པའི་ཚོགས་མི་དང་མ་སུ་རི་བོད་ཁྱིམ་གྱི་ཚོགས་མི་བཅས་ཀྱི་འགན་བཞེས། ཕྱི་ལོ་ ༡༩༧༥ ལོར་དགོངས་པ་ཞུས་ནས་ཁེ་ན་ཌར་ (United World) མཐོ་རིམ་སློབ་གྲྭར་ལོ་བཞིའི་རིང་དགེ་རྒན་གྱི་ཕྱག་ལས་གནང་། ཕྱི་ལོ་ ༡༩༩༦ ལོར་ལྡི་ལི་སྐུ་ཚབ་དོན་གཅོད་དུ་བསྐོ་གཞག་གནང་བ་ལྟར་ཐུགས་འགན་བཞེས། ཕྱི་ལོ་ ༡༩༩༧ ཟླ་ ༤ ཚེས་ ༢ ནས་ཕྱི་ལོ་ ༢༠༠༡ ཟླ་ ༩ ཚེས་ ༤ བར་ཕྱི་དྲིལ་བཀའ་བློན་གྱི་ཐུགས་འགན་བཞེས།
གསར་འགོད་པ། སྐལ་བཟང་སྦྱིན་པ།
