དེ་རིང་ནས་ཉིན་བཅུ་གཉིས་རིང་རྩིས་ལོ་ ༢༠༢༤་་་༢༠༢༥ ལོའི་སྔོན་རྩིས་གཏན་འབེབ་ཀྱི་གྲོས་ཚོགས་དབུ་འཛུགས་དང་འབྲེལ། བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་བདུན་ཐོག་སྤྱི་ཡོངས་བགྲོ་གླེང་གནང་སོང་།
དེ་རིང་ནས་ཕྱི་ཚེས་ ༣༠ བར་ཉིན་གྲངས་བཅུ་གཉིས་རིང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པ་དབུ་འཛུགས་གནང་སོང་བ་དང་། ཚོགས་ཐོག་ཏུ་དེ་རིང་ཕྱི་ཚེས་ ༡༨ ཉིན་གཅིག་རིང་སྤྱི་འཐུས་གཉིས་ཀྱིས་དགོངས་པ་ཞུས་པ་ལས་གཞན་ཚང་མ་འཛོམས་ཡོད་པ་དང་། ཐེངས་འདིར་གྲོས་ཚོགས་ཀྱིས་གཙོ་བོ་བོད་མིའི་སྒྲིག་འཛུགས་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༤ ་་་་ ༢༠༢༥ ལོའི་སྔོན་རྩིས་གཏན་འབེབ་དང་གལ་གནད་ཆེ་བའི་བཅའ་ཁྲིམས་བསྐྱར་བཅོས་ཀྱི་བྱ་རིམ་ཁག་ཅིག་བཅས་ཡོད་འདུག
དེ་རིང་གི་མཛད་རིམ་གྱི་ཐོག་མར་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་བཅུ་གཉིས་རིང་ཆགས་བསྡད་ཡོད། ལས་ཉིན་བཅུ་གཉིས་ནང་ཐོག་མར་སྤྱི་འཐུས་རྒྱུན་ལས་ཀྱི་ངོས་ནས་བོད་ནང་གི་ཛ་དྲག་གི་གནས་སྟངས་ཐོག་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་ཞིག་ཁུར་ཡོད། དེའི་ཐོག་ནས་ཉེ་ཆར་བོད་ནང་གི་གནས་ཚུལ་ཛ་དྲག་བྱུང་བ་དཔེར་ན། ཁམས་སྡེ་དགེའི་གནས་སྟངས་དེ་ཚོའི་ཐོག་ཚང་མ་གསལ་པོ་བྱས་ནས་འཁོད་ཡོད་པས། སྤྱི་འཐུས་རྣམ་པ་སྤྱི་ཡོངས་ཀྱིས་དགོངས་ཚུལ་སྤུངས་ཐུབ་པའི་རེ་བ་བྱེད་ཀྱིན་ཡོད། དེ་བཞིན་གནད་དོན་གལ་ཆེ་བ་གཅིག་དེ་དཔལ་འབྱོར་ལས་དོན་ཆགས་བསྡད་ཡོད། བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༤་་་༢༠༢༥ ཡི་སྔོན་རྩིས་དེ་དེ་རིང་གཏན་འབེབ་བྱ་རྒྱུའི་དུས་ཚོད་ཆགས་བསྡད་ཡོད། ཅེས་དང་། གཙོ་བོ་ང་ཚོས་ལྷན་ཁང་ཁག་ཁྱབ་ཁོངས་དང་བཅས་པའི་སྔོན་རྩིས་གཏན་འབེབ་བྱ་དགོས་པ་དེ་ཆགས་ཀྱི་ཡོད། དེ་ཡང་བཀའ་ཤག་གི་རྒྱབ་གཉེར་འཆར་འབུལ་ཞུས་པའི་རྩིས་ཤོག་ཚང་མ་གྲོས་ཚོགས་ལ་ཕུལ། གྲོས་ཚོགས་ཀྱི་ཚོད་དཔག་འཆར་རྩིས་ཚོགས་ཆུང་གིས་བསྐྱར་བཅོས་ཞུས་པའི་སྙན་ཐོ་ཞིག་བསླེབས་ཡོང་གི་རེད། དེ་བཞིན་དཔལ་འབྱོར་བཀའ་བློན་མཆོག་གིས་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༤་་༢༠༢༥ སྔོན་རྩིས་འགོད་འབུལ་གྱི་གསུང་བཤད་བསླེབས་ཡོང་གི་རེད། དེ་ཚོའི་ཐོག་ལ་བཀུར་འོས་སྤྱི་འཐུས་རྣམ་པས་རིག་པ་སྒྲིམ་ནས་ཐུགས་སྣང་གནང་ཐུབ་དགོས་པ་དེ་གལ་ཆེན་པོ་རེད། ང་ཚོའི་ལོ་འཁོར་ལས་བསྡོམས་ཀྱི་འབྱུང་ཁུངས་དེ་སྔོན་རྩིས་གྲོས་ཚོགས་ཆགས་ཀྱི་ཡོད། སྔོན་རྩིས་གྲོས་ཚོགས་ནང་ལས་རིམ་ག་རེ་འཁུར་ཡོད་པ་དང་དངུལ་འབོར། ས་གནས་ག་བར་ལས་འཆར་མགོ་འཛུགས་བྱེད་ཀྱི་ཡོད་མེད་སོགས་གསལ་པོ་བྱས་ནས་ཤེས་རྟོགས་ཐུབ་པའི་གནས་བབ་ཆགས་ཀྱི་ཡོད་སྟབས། དེ་ཚོའི་ཐོག་ལའང་དགོངས་པ་བཞེས་དགོས་པ་ཞིག་ཆགས་ཡོད། ཁྲིམས་འཛིན་ལས་དོན་དེ་རྣམ་པ་ཚོ་ཚང་མས་དགོངས་པའི་མངའ་གསལ་རེད། ང་ཚོས་ཁྲིམས་སྒྲིག་བསྐྱར་བཅོས་ཚོགས་ཆུང་ཆེད་འཛུགས་བྱས་ནས་ཁྲིམས་སྒྲིག་བསྐྱར་བཅོས་ཚོགས་ཆུང་གི་སྙན་ཐོ་དང་བསྐྱར་བཅོས་འཆར་ཟིན་གྱི་སྙན་ཐོ་ཚང་མ་གྲོས་ཚོགས་ནང་བསླེབ་ཀྱི་ཡོད། གྲོས་ཚོགས་ཀྱི་ལས་རིམ་གང་འདྲ་ཞིག་ཕེབས་རུང་དེ་ལ་གོ་བསྡུར་ཞིབ་ཚགས་པོ་དང་དོན་ཕན་ལྡན་པ་ཡོང་ཐུབ་རྒྱུར་རྣམ་དཔྱོད་བཏོན་པའི་ཐོག་དགོངས་པ་བཞེས་རོགས་གནང་། ཞེས་གསུངས་སོང་།
དེ་རྗེས་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་ཐོག བོད་མི་མང་སྤྱི་འཐུས་ ༢༠ ཙམ་གྱིས་ཆ་ཤས་བཞེས་ཏེ། བོད་ནང་གི་ཛ་དྲག་གནས་སྟངས་སྤྱི་དང་རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་གདུག་རྩུབ་ཆེ་བའི་སྲིད་ཇུས་ཁག དེ་བཞིན་བཙན་བྱོལ་བོད་མིའི་སྒྲིག་འཛུགས་ཀྱི་དབུས་སྐྱབས་བཅོལ་བོད་མི་ཡོངས་ནས་རང་འགན་རང་འཁྲི་དང་བོད་སྤྱི་པའི་རྩ་དོན་འཐབ་རྩོད་རྒྱུན་སྐྱོང་གནང་གལ་ཆེ་སྐོར་སོགས་ཀྱི་ཐོག་དགོངས་འཆར་མི་འདྲ་བ་མང་པོ་གསུངས་མཚམས། སང་ཞོགས་ཆུ་ཚོད་ ༩།༣༠ བར་ཚོགས་གསེང་བཏང་སོང་།
བོད་ནང་གི་ཛ་དྲག་གནས་སྟངས་དང་འབྲེལ་བའི་་གྲོས་ཆོད་བདུན་ནི། གཅིག བོད་ས་ཤོར་ནས་ད་བར་རྒྱ་ནག་དམར་གཞུང་གི་བཙན་གནོན་དང་སྡུག་སྦྱོང་མནར་གཅོད་འོག་བོད་བསྟན་སྲིད་མི་རིགས་ཆེད་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་ལྷག་བསམ་དང་སྙིང་སྟོབས་ལ་ཡི་རངས་བསྔགས་བརྗོད་དང་བཅས། ཚེ་རབས་ཀུན་ཏུ་འཕགས་མཆོག་འཇིག་རྟེན་མགོན་པོས་རྗེས་སུ་བཟུང་བའི་སྨོན་འདུན་དང་། ཤུལ་ལུས་ཉེ་འབྲེལ་ལྟོས་བཅས་ཡོངས་ལ་ཐུགས་གསོ་ཞུ་རྒྱུ།
གཉིས། རྒྱ་ནག་དམར་གཞུང་གིས་འཛིན་བཟུང་བྱས་པའི་ ༧ ཀུན་གཟིགས་པཎ་ཆེན་རྗེ་བཙུན་བསྟན་འཛིན་ཡེ་ཤེས་འཕྲིན་ལས་དཔལ་བཟང་པོ་(དགེ་འདུན་ཆོས་ཀྱི་ཉི་མ་)མཆོག་གིས་གཙོས་བོད་ཀྱི་ཆབ་སྲིད་བཙོན་པ་རྣམས་འཕྲལ་དུ་ཀློད་གྲོལ་དང༌། འཛིན་བཟུང་རྗེས་འདས་གསོན་གནས་སྟངས་གསལ་ཁ་མེད་པ་དག་གི་གནས་ཚུལ་ཡང་གང་མགྱོགས་ གསལ་བཤད་བྱེད་དགོས་པ་དང་། དེ་བཞིན་རྒྱ་ནག་དམར་གཞུང་གི་ནོར་འཁྲུལ་ཅན་གྱི་སྲིད་བྱུས་ལ་ཞི་བའི་ངོ་རྒོལ་གྱིས་རང་ལུས་མེར་བསྲེགས་གནང་མཁན་རྣམས་ཀྱིས་གཙོས་བོད་ཀྱི་བདེན་དོན་འཐབ་རྩོད་གནང་སྟེ་ཆབ་སྲིད་ཉེས་མིང་བཏགས་པ་ཡོངས་ཀྱི་ནང་མི་ཉེ་འབྲེལ་ཀུན་ལ་གནོན་བཙིར་དང་འཇིགས་སྐུལ་མཚམས་འཇོག་བྱ་དགོས།
གསུམ། རྒྱ་དམར་གཞུང་གིས་སྐད་གཉིས་སློབ་གསོ་དང་རྒྱལ་ཁབ་ཀྱི་སྤྱི་སྐད་ཁྱབ་གདལ། དེ་བཞིན་འགྲིམ་འགྲུལ་ཚོང་འབྲེལ་དང་བརྡ་འཕྲིན་ཚན་རྩལ་སོགས་ཀྱི་བརྒྱུད་ལམ་སྤྱད་དེ་བོད་པའི་སྐད་ཡིག་རིག་གནས་རྩ་མེད་གཏོང་བའི་ཐབས་བྱུས་དང༌། བོད་ནང་བཅའ་སྡོད་སློབ་གྲྭ་དང་རྒྱ་ནག་ནང་བོད་ལྗོངས་ནང་སའི་འཛིན་གྲྭ་ཟེར་བ་སོགས་བཙུགས་ཏེ། བོད་མི་རིགས་རྒྱ་བསྒྱུར་དང་མི་རབས་གསར་པའི་ཀླད་པ་བཀྲུ་བའི་ཐབས་བྱུས་ཡོངས་འཕྲལ་དུ་མཚམས་འཇོག་བྱེད་དགོས།
བཞི། རྒྱ་ནག་དམར་གཞུང་གིས་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་དོ་དམ་བྱ་ཐབས་ཟེར་བ་དང་། བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་དགོས་ཟེར་བ་སོགས་ཀྱི་སྲིད་བྱུས་ལག་བསྟར་བྱས་ཏེ། བོད་ཀྱི་ཐུན་མོང་མ་ཡིན་པའི་སྤྲུལ་སྐུའི་ཡང་སྲིད་ངོས་འཛིན་ཞུ་བའི་ལམ་ལུགས་ལ་ཐེ་ཇུས་དང་། འཁྱོག་བཤད་ཀྱི་དྲིལ་བསྒྲགས་བྱས་པ། བོད་བརྒྱུད་ནང་བསྟན་ལ་སྟངས་འཛིན་དང་དམ་དྲག་ཤུགས་ཆེ་བྱེད་བཞིན་པ་འཕྲལ་དུ་མཚམས་འཇོག་བྱ་དགོས།
ལྔ། སྡེ་དགེ་དབོན་པོ་སྟོད་དུ་གློག་ཁང་ཆུ་རགས་འཛུགས་སྐྲུན་ལས་འཆར་འོག་མི་མང་སྟོང་ཕྲག་མང་པོར་བརྡབ་གསིག་གཏོང་བཞིན་པ་གཙོས་བོད་ནང་གཏེར་ཁ་སྔོག་འདོན་དང་ཆུ་རགས་གསར་རྒྱག རྒྱལ་ཁབ་སྤྱི་གླིང་འཛུགས་སྐྲུན་སོགས་བོད་ཀྱི་ཁོར་ཡུག་གཏོར་བཅོམ་དང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་རྣམས་འཕྲལ་དུ་མཚམས་འཇོག་བྱ་དགོས་པ་དང་། དེ་བཞིན་རྒྱ་ནག་གཞུང་གིས་བོད་ནང་ཙམ་མ་ཟད། རྒྱལ་མཚམས་ལས་བརྒལ་ཏེ་བོད་ཀྱི་ཕྱི་ལོགས་རང་དབང་ལུང་པའི་ནང་ཡོད་པའི་བོད་མི་ཚོར་ཡང་སྡིགས་བསྐུལ་བསུན་གཙེར་བཟོ་བ་དང་། དེང་གི་ཁ་པར་དང་བརྡ་འཕྲིན་བརྒྱུད་བོད་མིའི་འགྲོ་འདུག་སྤྱོད་གསུམ་ལ་སྟངས་འཛིན་བྱ་ར་བྱེད་པ་སོགས་མཚམས་འཇོག་བྱེད་དགོས་པ་མ་ཟད། རྒྱལ་སྤྱིའི་སྤྱི་ཚོགས་ནས་ཀྱང་དེ་དག་འགོག་ཐབས་བྱ་དགོས་པའི་སྐུལ་འདེབས་ཞུ་རྒྱུ་ཡིན།
དྲུག བོད་དེ་ལོ་རྒྱུས་ཐོག་ནས་རང་དབང་རང་བཙན་གྱི་རྒྱལ་ཁབ་གཅིག་ཡིན་ལ། བོད་དེ་རྒྱ་ནག་དམར་གཞུང་གིས་འདས་ལོ་དྲུག་ཅུ་ལྷག་རིང་ཁྲིམས་འགལ་གྱིས་ཧམ་བཟུང་འོག་ཚུད་པ་ཞིག་ཡིན། རྒྱ་ནག་དམར་གཞུང་གིས་བོད་དེ་གནའ་སྔ་མོ་ནས་རྒྱ་ཁོངས་ཡིན་ཁུལ་དང་རྒྱལ་སྤྱིའི་ཁྱོན་ཡོངས་སུ་རྒྱ་ནག་གཅིག་གི་སྲིད་བྱུས་ལ་ཁས་ལེན་དགོས་པའི་མགོ་སྐོར་བཏང་དང་གཏོང་བཞིན་ཡོད་ཀྱང་། དུས་རབས་ཉེར་གཅིག་པའི་འཛམ་གླིང་མི་མང་རྣམས་བསླུ་བྲིད་བྱ་སྤྱོད་དེའི་འོག་ཚུད་ཐབས་མེད་པ་རྒྱ་ནག་གི་དཔོན་རིགས་ཚོས་ངེས་པར་དུ་ཤེས་དགོས། བོད་མིའི་སྒྲིག་འཛུགས་ཀྱིས་འདས་པའི་མི་ལོ་བཅུ་ཕྲག་འགའ་རིང་གཉིས་སྨན་དབུ་མའི་ལམ་གྱི་སྲིད་བྱུས་ཀྱིས་བོད་རྒྱའི་དཀའ་རྙོག་སེལ་བའི་ཐབས་ལམ་བསྟེན་ཡོད་པ་མ་ཟད། བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་གི་བསམ་འཆར་ཡང་རྒྱ་གཞུང་ལ་སྤྲད་ཟིན་ཡང་རྒྱ་གཞུང་ནས་ད་བར་འགན་ཁུར་ཇི་བཞིན་མ་བླངས་པའི་ཉེར་ལེན་ལས་ལག་པ་གཅིག་གིས་ཟློག་པ་མི་ཐེབས་པའི་དཔེ་བཞིན་རྒྱ་གཞུང་གི་དཔོན་རིགས་ཚོའི་བྱེད་བབ་ལ་རག་ལས་ཡོད།
བདུན། རྒྱ་ནག་དམར་གཞུང་གི་ནོར་འཁྲུལ་ཅན་གྱི་སྲིད་བྱུས་འོག་བོད་ནང་གི་བོད་མི་ཚོས་དཀའ་སྡུག་ཚད་མེད་མྱངས་དང་མྱོང་བཞིན་ཡོད་པ་རྣམས་ལ་གདུང་སེམས་མཉམ་སྐྱེད་ཞུ་རྒྱུ་དང༌། བྱེས་བཞུགས་བོད་མི་ཚོས་ཀྱང་༸གོང་ས་མཆོག་གི་བཀའ་དགོངས་གཞིར་བཟུང་མཐུན་ལམ་རྡོག་རྩ་གཅིག་སྒྲིལ་དང་བོད་པའི་སྐད་ཡིག་རིག་གཞུང་སྲུང་སྐྱོབ་བཅས་ལ་ཕྱར་གྲུ་མཉམ་འདེགས་གནང་དགོས་ཞེས་པ་བཅས་རེད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་པ། སྐལ་བཟང་སྦྱིན་པ།
